Tuklasin ang mga bagong summer destinations sa Pilipinas

Nalalapit na naman ang summer kung saan paborito ng karamihan na mag-travel sa mga sikat na destinasyon sa loob at labas ng bansa.

Maliban sa mga nakagawian nang puntahan na destinasyon gaya ng Baguio City, Sagada, Banaue Rice Terraces sa Ifugao, El Nido, Coron, Tubbataha Reefs Natural Park, Puerto Princesa sa Palawan, at Boracay sa Aklan. Tuklasin natin ang mga bagong destinasyon na hindi pa gaanong popular ngunit kasing ganda rin ng mga lugar na alam na ng karamihan.

Hindi na bago sa mga banyaga at mga Pinoy na turista ang Surigao del Norte, ngunit hindi pa gaanong natutuklasan ang Surigao del Sur na mayroon din mga kamangha-manghang mga lawa gaya ng Blue Lagoon na matatagpuan sa munisipalidad ng Cantilan gayon din ang mga spotless na white beaches.

Huwag din palampasin ang Britania group of islands sa San Agustin na nagtataglay ng 24 na isla at maliliit na isla na pinapaligiran ng karst (landscape formed from dissolution of rocks), 55 meter three-tiered Tinuy-an Falls na 95 metro ang lawak sa munisipalidad ng Bislig, gayon din ang misteryosong 80 feet-deep na Enchanted River sa kanyang kaakit-akit na kulay na sapphire blue na matatagpuan naman sa Hinatuan.

At sa Mindanao region pa rin, lumabas sa siyudad ng Davao, dito ay sasalubungin ka ng Davao Oriental at ang maharlikang 1,110 feet, 8-tiered na Aliwagwag Falls sa Cateel, ang 7-kilometrong Dahican Beach sa Mati na magandang mag-skimboarding, at higit sa lahat ang bagong UNESCO World Heritage Site na Talicud island sa Davao del Norte at ang Mt. Hamiguitan na kilala sa mga bonsai trees nito at tahanan ng mga agila.

Sa rehiyon naman ng Visayas, mag-relax at magliwaliw sa Roxas sa probinsiya ng Capiz na tinaguriang Seafood Capital ng bansa, mag-river cruise, mag-island hopping sa white beach ng Olotayan at rock island sa Mantalinga, akyatin ang bell tower ng Santa Monica church sa Pan-ay, mag-caving sa Lahab Cave sa Dumalag, mag-sunny dip sa Suhot Spring, mag-trekking sa Liktinon, Pres. Roxas at Camp Peralta sa Jamindan.

Bagaman tinamaan ng Typhoon Yolanda, unti-unti nang nakakabangon ang Leyte kaya’t magandang pagkakataon para suportahan ang mga mamamayan nito sa pagbisita sa Kalanggaman island sa Palompon, maglaro sa payapang tubig ng Lake Danao sa Ormoc, restored MacArthur Landing Memorial Park, at makisaya sa Ginsiyaman Music Festival ng mga taga-Tacloban tuwing Setyembre na unang isinagawa noong nakaraang taon.

Lumabas naman sa Cebu City at galugarin ang katimugang bahagi ng Cebu na nagtataglay ng Alcoy at Aloguinsan beach, Bojo River, nature trip sa Moalboal, canyoneering sa Badian, Malapascua island at historical trip sa Carcar.

Hindi naman magpapahuli ang Luzon na matatagpuan ang Quirino na mayaman sa mga kweba, karsts, bulubundukin, at mga ilog na swak na swak sa mga aktibidad na canoeing at tubing sa Siitan, spelunking sa Aglipay caves, dipping, whitewater rafting sa Governor’s Rapids sa Maddela at boating. Panoorin din sa Nagtipunan ang mala-larawang view ng Cagayan River.

Nariyan din ang laging nasa bucket list ng lahat, ang evergreen Batanes na punung-puno ng naggagandahang tanawin ng burol at talampas na pinapaikutan ng mga alon at mga stone houses. Hamunin ang sarili at tahakin ang mga matataas na alon sa pagsakay sa faluwa papuntang Itbayat, ang isla sa pinaka-hilagang bahagi ng isla na malapit na sa Taiwan. At siyempre, pagdating sa pagkain siguradong masasarap din gaya ng samu’t saring seafood.

Isama din sa iyong listahan ang Langun Gobingob sa Samar at Biri sa Northern Samar, Dumaguete sa Negros Oriental, Antique Rice Terraces sa Panay, Catanduanes sa Bicol, Carabao island at El Fraile sa Ternate at Maragondon sa Cavite, Calayan Group of Islands, Calaguas Group of Islands, Batlag Falls sa Tanay, Rizal, Bukal Falls sa Majayjay, Laguna, Tinalisay island sa Masbate, Sibale island sa Romblon, Mt. Ulap sa Itogon, Benguet, Malicong Rice Terraces sa Bontoc Province, at Mt. Pinagbanderahan sa Atimonan, Quezon. 

An enjoyable summer at Tokyo’s Sanno Matsuri

Ni Florenda Corpuz

Tuwing sasapit ang buwan ng Hunyo ay inaabangan ng maraming tao ang pagdiriwang ng Sanno Matsuri na isa sa pinakapopular na festivals sa lungsod ng Tokyo at isa rin sa tatlong pinakamalaking festivals sa buong Japan.

Nitong Hunyo 13 ay sinimulan ang pagdiriwang ng Sanno Matsuri na tatagal nang mahigit sa isang linggo kung saan iba’t ibang kaganapan ang isasagawa kabilang na ang pangunahing prusisyon na kung tawagin ay “Jinkosai”. Ang Jinkosai ay nagaganap lamang tuwing even number ang taon. Dito, daan-daang katao ang makikitang nakasuot ng makukulay at sinaunang kasuotan habang may buhat na “mikosho” o portable shrines at “dashi” o festival floats na napapamalamutian ng phoenix, isang uri ng ibon, sa tuktok nito. Habang ang iba naman ay may hawak na drums o di kaya’y nakasakay sa kabayo.

Makakakita rin ng mga taong nakadamit tulad ng goblin na nagngangalang Tengu na may pulang mukha at mahabang ilong at pinaniniwalaang nagtataglay ng mga supernatural powers. Sila ay nagpuprusisyon mula Hie-jinja Shrine kung saan nakadambana ang guardian deity ng Tokyo na pinaniniwalaang tagapagbantay ng siyudad patungo sa Tokyo Station, Diet Building, Ginza at iba pang pangunahing lugar sa lungsod. Tumatagal ng halos 10 oras ang prusisyon na umaabot sa mahigit sa 600 metro ang haba.

Bukod sa Jinkosai, kaabang-abang din ang “Sanno Chinkasai,” isang purification ceremony na ginaganap sa Hie Shrine kung saan ang mga tao ay nagtutungo sa isang malaking bilog na hinabi gamit ang kawayan na pinaniniwalaang nag-aalis sa mga kasalanan na nagawa sa nakalipas na anim na buwan at nakapagbibigay ng swerte. Makakakita rin ng mga display ng mga bulaklak na nakaayos sa istilo ng Ikebana. Maaari rin makatikim ng masarap at espesyal na Japanese green tea. 

Ayon sa kasaysayan ang pagdiriwang ng Sanno Matsuri ay iniaalay para sa mga tagapamuno noong Edo period (1603-1867). Sa kasalukuyan, nag-aalay ng panalangin para sa Imperial Family. Noong 2012, nag-alay naman ng panalangin para sa mga naging biktima ng Great East Japan Earthquake.

Sa paglipas ng panahon, ang pagdiriwang ng Sanno Matsuri ay hindi na kasing grandiyoso noong Edo period upang hindi makaabala sa trapiko at komersyo. Kung dati’y aabot sa 40 floats ang pinaparada, iilan na lang ito sa kasalukuyan. Sa kabuuan ng pagdiriwang, maaaring makisaya sa iba’t ibang kaganapan na nagpapakita ng mayamang kultura at tradisyon ng mga Hapon.

Beating the summer heat

Ni Elvie Okabe, DBA/MAE

Summer na naman po rito sa Japan kaya naman school summer vacation ng  40 days mula sa last week ng July hanggang first week ng September.  Sa lahat ng bansa, naiiba ang school break sa Japan dahil ito ay hindi sa pagitan ng dalawang school years kundi ito ay itinaon sa pinakamainit na panahon ng Japan, ang buwan ng Agosto. 

Ang dahilan, walang aircon sa  public schools (elementary hanggang senior high) dito na sinadya upang makatipid sa kuryente sa ‘di paggamit ng aircon kahit na kayang tustusan ng Japanese government o ng taxpaid money ng mga Japanese. I should know because I have taught at different public schools in the Kanto region for many years before having my job now as Business English Teacher for professional adults.  

Kaya naman ang Agosto ay panahon ng paglalakbay sa ibang bansa o sa mga malalamig na lugar ng northern Japan upang makaiwas sa napakatinding init na maaaring maging sanhi ng stroke, allergy, at iba pang mga sakit.  

Ayon sa balita kamakailan ay umabot sa 40 degrees centigrade na pinakamainit na temperatura na naitala sa kasaysayan ng Japan, na parang disyerto ng Saudi Arabia na sa kainitan.  Bukod sa mainit na panahon, nariyan ang three-day holiday o “renkyuo” na “Obon” mula Agosto 14 hanggang Agosto 16 na taunang paggunita sa mga mahal na yumao ng mga Hapon.  

Ang Obon ay isang Buddhist culture sa bawat tahanan ng mga Hapon na kung saan sa araw ng Agosto 14 ang kaluluwa ng kanilang mga yumaong kamag-anak ay sinusundo sa sementeryo at ‘pinabibisita’ sa tahanan ng naiwang kamag-anak sa pamamagitan ng lampara. Sa araw naman ng Agosto 16 ay inihahatid muli sa sementeryo ang ‘kaluluwa’ sa pamamagitan ng nakasinding lampara.  Bawat kamag-anak ay dinadalaw ang mga patay hindi sa sementeryo kundi sa altar ng bahay ng mga naiwang kamag-anak na kabaligtaran sa tradisyon ng mga Kristiyano dahil sa puntod sa sementeryo naglalagi ang mga naiwang kamag-anak sa araw ng Nobyembre 1 hanggang 2.

Ang buwan ng Agosto ay tinatawag ding ‘ghost month’ na ayon sa ancient Chinese culture na pinagbasehan ng mga Hapon ay buwan nga ng pagdiriwang para sa mga patay.  Ang mga Hapon ay hindi lang naghahanda sa bahay kundi sa komunidad din gaya ng “Obon Odori” o Bon dance na nakasuot ng yukata o Japanese summer kimono ang mga sumasayaw, may mga palaro para sa mga bata mula hapon hanggang gabi at ang pinakahuli sa pagdiriwang ay ang fireworks.  

Naiiba nga ang init ng araw tuwing summer sa Japan kaysa sa ‘Pinas kaya narito ang mga paalala at mungkahi ng mga doktor:  

1. Laging magbaon at uminom ng maraming tubig o sports drinks lalo na kung nasa labas ng bahay at pinagpapawisan ng todo upang hindi ma-dehydrate, manghina at magkasakit tulad ng heat stroke.

2. Ugaliing magmumog ng mouthwash o tubig na may asin paggising sa umaga, sa tanghali, at sa gabi upang hindi magka-sore throat. 

3. Magpahid ng sunscreen lotion sa katawan upang hindi magka-sunburn.

4. Magsuot ng pastel o light-colored na damit upang mas presko sa paningin at pakiramdam. Gayon din sa mga kurtina at kobre kama.

5. Gumamit ng payong, sumbrero, sunglasses -- may araw man o wala -- dahil kahit makulimlim tuwing summer ay nakaka-sunburn din.

6. Kung gustong mag-swimming o iba pang sports dapat ay sa mga indoor sports center ito gawin.

7. Kung nasa bahay naman at walang airconditioning unit ang lahat ng kuwarto ay buksan ang mga bintana at gumamit ng electric fan.

8. Ugaliing maligo sa umaga, tanghali, at bago matulog kung nasa bahay maghapon.

9. Palamigin muna ang pagkain bago kainin kung ito ay bagong luto.

10. Bukod sa sunscreen lotion, pahiran din ang katawan ng mosquito o insect repellent lotion upang hindi katihin ang katawan.

Hope everything is well with you and your loved ones during this summer!  Stay safe and have fun whatever you are doing!