Novelty dining service Dinner in the Sky inilunsad sa Solaire Resort and Casino

“The Philippines is the third country in Southeast Asia in which the Dinner in the Sky experience is taking place. We are especially excited about its launch as Filipinos are known to be adventurous and fun-loving people. This experience will be a good boost to the country’s variety of culinary outlets, and both locals and tourists alike should not miss this once-in-a-lifetime experience. We are also excited to work with our local Filipino partners, who share our vision in making the event an unforgettable one for everyone.”

Ito ang pahayag ni Arvin Randahwa (CEO - DITS ASIA) sa naganap na press conference kamakailan sa Solaire Resort and Casino sa Parañaque, ayon sa When in Manila website tungkol paglulunsad ng Belgian-based novelty dining service na Dinner in the Sky kamakailan.

A culinary escapade for the thrill-seekers

Naganap ang paglulunsad na ito sa pamamagitan ng organisasyon ng pinagsama-samang kolaborasyon ng MMI Live, DITS Asia, at Solaire Resort and Casino. At ito ang unang pagkakataon na makarating sa Pilipinas ang binansagang isa sa Top 10 Most Unusual Restaurants sa listahan ng Forbes Magazine.

Mayroon nang lampas sa 5,000 events ang naisagawa para sa Dinner in the Sky na nauna nang ginanap sa mahigit 45 na siyudad sa iba’t ibang panig ng mundo. Ilan lamang dito ang baybayin ng Copacabana sa Rio de Janeiro, Brazil; mga hardin ng King David Hotel sa Jerusalem, Israel; sa taas ng mga burol sa Villa Borghese sa Rome, Italy; mga dalampasigan ng St. Lawrence River sa North America; Cape Town Bay sa South Africa; Strip of Las Vegas, USA; at Petronas Twin Tower sa Kuala Lumpur, Malaysia.

Inumpisahan ang kakaibang dining service sa Brussels, Belgium noong Mayo 2006 at binuo naman ang konsepto nito ng isang Belgian company, ang E.I.T.S. BvBa. Lahat naman ng mga pamamaraan, drawings, calculations, at simulations ay aprubado at sinusuri ng TÜV Rhineland (global provider of technical, safety, and certification services).

“As we celebrate our 5th anniversary, Solaire brings you yet another world-class experience. Dinner in the Sky is a bold testament to our commitment to continuously give our guests memorable experiences that no other property in the Philippines has done before,” ang pahayag naman ni Lorenzo Manalang, Brand & Marketing Vice President ng Solaire Resort and Casino.

A bird’s eye view and the famed Manila Bay sunset

Idinisenyo rin ang mga makinarya at platform na ginagamit ayon sa pamantayan ng Germany ukol sa mga flying structures at gawa sa Belgium ang naturang platform. Istrikto rin ang isinasagawang regular na safety check-up at maintenance para masiguradong ligtas ang naturang culinary heights experience.

“Filipinos now are more receptive to new ideas, eager to try exciting concepts, aggressively chasing experiences they have seen and heard around the globe. The Philippines is ripe for the picking – to be a stop for a unique, world-class dining experience such as Dinner in the Sky,” dagdag naman ni Rhiza Pascua, CEO ng MMI Live.

Iaangat sa ere ang dining table sa taas na 45-50 metro (based on weather conditions) sa pamamagitan ng isang crane kung saan ang mga guests, presenter, at crew ay nakasuot ng safety belts sa loob ng isang oras. Bago naman sumalang, kailangan din dumaan ng mga guests sa isang briefing tungkol sa mga safety regulations. At sa kabuuan ng session ay may regular na monitoring at komunikasyon ang mga crane operator at ground crew.

Nagsisimula ang package sa Php9, 990 kung saan kabilang dito ang isang four-course exclusive dinner at world-class cuisine mula sa mga chef ng Solaire na sina Chef Kenneth Cacho (Director for Culinary Arts of the International School for Culinary Arts and Hotel Management (ISCAHM)), at Michelin-star Chef Yves Mattagne ng Sea Grill – Brussels. Kasama rin sa package ang Dinner in the Sky lounge admission, at ang kaaya-ayang Manila Bay sunset view.

Bukas ito para sa lahat na lampas 13-taong-gulang (minimum height of 145cm and a maximum weight of 150kg), maging sa mga guests na may mild disabilities o gumagamit ng wheelchair ngunit kailangan magsumite ng sulat bago mag-book, 22 katao lamang ang pinapayagan sa bawat session, at kailangan nasa lounge na ang mga guests isang oras bago ang session.

Japanese envoy, nag-courtesy call kay VP Robredo

Ni Florenda Corpuz

Sina Vice President Leni Robredo at Japanese
Ambassador Koji Haneda sa ginanap na courtesy
 call sa tanggapan ng una kamakailan.
(Kuha mula sa Facebook account ni VP Leni Robredo)

Bumisita sa tanggapan ni Vice President Leni Robredo ang bagong ambassador ng Japan sa Pilipinas na si Koji Haneda para sa isang courtesy call nitong unang linggo ng Enero.

Pormal na inaprubahan at inanunsyo ng Gabinete ni Prime Minister Shinzo Abe ang pagkakatalaga kay Haneda noong Setyembre 5 nang nakaraang taon. Pinalitan niya si dating ambassador Kazuhide Ishikawa na nagtapos ang termino matapos ang tatlong taon.

“Today, I am honored to meet His Excellency Koji Haneda, the new Ambassador Extraordinary and Plenipotentiary of Japan to the Philippines. I look forward to working together in the future in advocacies that promote the welfare of our kababayans in Japan,” pahayag ni Robredo.

Si Haneda ay dating embahador ng Japan sa Islamic Republic of Iran mula 2012 hanggang 2015. Nagsilbi siya bilang chief negotiator ng Japan para sa Free Trade and Economic Partnership Agreements mula 2015 hanggang 2016. Sinimulan niya ang kanyang foreign service career noong 1979 at kinumpleto ang kanyang unang foreign assignment sa Embahada ng Japan sa Pilipinas noong 1982 hanggang 1984.

Japan dismayado sa ‘comfort woman’ statue sa Maynila

      Dumalaw sa Malacañang si Japanese Internal Affairs and Communications 

        Minister Seiko Noda kay Pangulong Rodrigo Duterte bilang courtesy call.

       (Kuha ni Toto Lozano/Presidential Photo)

Nagpahayag ng pagkadismaya si Japanese Internal Affairs and Communications Minister Seiko Noda sa itinayong comfort woman statue sa Roxas Boulevard sa Maynila sa kanilang paghaharap ni Pangulong Rodrigo Duterte kamakailan.

Nag-courtesy call si Noda kay Duterte sa Malacañang noong Enero 9.

Ayon sa ulat ng Kyodo, sinabi ni Noda sa Pangulo na, “It’s regrettable for this kind of statue to suddenly appear.”

Hindi naman nagbigay ng komento rito ang Pangulo base sa ulat.

Matatandaang pinangunahan ng National Historical Commission of the Philippines ang unveiling ng dalawang metrong bronze statue ng isang nakapiring na babae noong Disyembre 8. Itinayo ito bilang alaala ng mga kababaihang Pilipino na sapilitang pinagtrabaho sa mga military brothels noong panahon ng Hapon.

Samantala, nagbabala naman si Foreign Affairs Secretary Alan Peter Cayetano na nakataya ang “long-term” na relasyon ng Japan at Pilipinas dito.

“You can’t strengthen your relationship long term if you keep bringing up things that you think are settled,” aniya.

Sinabi ng kalihim na kabilang ang isyu ng comfort women sa 1956 Reparations Agreement sa pagitan ng Japan at Pilipinas kung saan magbabayad ang una ng $550 milyon sa huli.

Public apology at just compensation naman ang sigaw ng mga comfort women.

Tinatayang humigit-kumulang sa 1,000 kababaihang Pilipino ang nagsilbi bilang comfort women noong panahon ng Hapon.

Baguio pinangalanan bilang isa sa 64 UNESCO Creative Cities

Pagkatapos mapabilang sa shortlist ng United Nations Educational, Scientific and Cultural Organization (UNESCO) Creative Cities Network, opisyal nang kabilang ang Summer Capital ng Pilipinas na Baguio bilang isa sa mga bagong pinangalanang siyudad na kinilala sa kanilang katangi-tanging kontribusyon at patuloy na pagsusulong ng innovation at creativity sa pitong kategorya – Crafts and Folk Art, Design, Film, Gastronomy, Literature, Media Arts and Music. 

“These new designations showcase an enhanced diversity in city profiles and geographical balance, with 19 cities from countries not previously represented in the Network,” ang saad ni UNESCO Director-General Irina Bokova sa isang opisyal na pahayag.

Sa kabuuan, may 64 na siyudad mula sa 44 na bansa ang napabilang sa exclusive club. Ngayon, mayroon nang 180 na siyudad mula sa 72 bansa ang kabilang sa Network. Magaganap naman sa Hunyo 2018 ang Annual Meeting of the Creative Cities Network sa Krakow at Katowice sa Poland.  

Alinsunod sa balangkas ng implementasyon ng United Nations 2030 Agenda for Sustainable Development and the New Urban Agenda, binuo ang UNESCO Creative Cities Network noong 2004 “to provide a platform for cities to foster and demonstrate innovation, creativity and culture’s role as key drivers for building a more inclusive and sustainable urban development.”  

The Philippines’ first UNESCO Creative City

Layunin ng Creative Cities ang pagbuo at pagsusulong ng industriya ng paglikha; pagpapatibay ng partisipasyon ng publiko sa aspetong pang-kultura sa pamamagitan ng produksyon at distribusyon ng mga produkto, serbisyo at mga aktibididad; at integrasyon ng kultura at paglikha sa mga pulisiya ukol sa sustainable urban development ng mga lokal na pamahalaan.

Ang pagkakahirang ng Baguio City sa kategorya ng Crafts and Folk Arts ang unang pagkakataon na makapasok sa Network ang isang siyudad ng bansa. Isang patunay na hindi lamang sikat na holiday destination ang Baguio dahil sa klima at mga pine trees nito, ngunit patuloy din nitong pinagyayaman ang angking kultura ng siyudad na umaayon sa layunin ng Creative Cities Network.

Kinikilala ang Baguio sa masiglang art scene nito, nariyan ang pagkakabuo ng Baguio Arts Guild na itinayo ng mga Filipino artists na sina Benedicto Reyes Cabrera, Kidlat Tahimik, Willie Magtibay, Luisa Igloria, Roberto Villanueva, David Baradas, Santiago Bose, at Tommy Hafalla noong 1988.

Pinapatiling buhay din sa Baguio ang tradisyon ng paghahabi at pagsusulong ng Cordillera woven art sa pagsasanay sa mga kababaihan ng naturang kultura gaya ng pinangungunahan ng Narda’s Handwoven Arts and Crafts, na pinasimulan ng yumaong Igorot weaving icon na si Leonarda “Narda” Capuyan.

Kabilang din sa mayamang kultura ng paglikha sa Baguio ang wood carving at metal crafts. At ‘di rin makakaligtaan ang mga cultural at creative sites dito gaya ng Mt. Cloud Bookshop sa Casa Vallejo, Upper Session Road; Museo Kordilyera sa UP Drive, Governor Pack Road; Baguio Garden Theater sa Garden Terraces, Dagohoy St.; at BenCab Museum sa Tuba, Benguet. 

Boracay tampok sa international tourism campaign ng Japan

Itinampok ang Boracay island sa international tourism drive na “Fun Budget Campaign Japan” kung saan ang target ay mga manlalakbay na kababaihang Hapon.

Ayon sa Department of Tourism (DOT) sa Western Visayas, mas lalong mapapalakas ng kampanya ang reputasyon ng Boracay bilang pangunahing destinasyon sa Pilipinas.

Saad sa ulat ng Philippine News Agency (PNA), ang kampanya ay serye ng branded content kung saan tampok ang mga sikat na Key Opinion Leaders (KOLs) na nagpapakita kung paano maaaring magiging kasiya-siyang karanasan para sa tinatawag na “Joshi Tabi” o Japanese women travelers market ang pagpasyal sa iba’t ibang mga destinasyon.

Ipinakita ng YouTube star na si Risa Sekin at Japanese endorser na si Mika Shindat ang kanilang mga aktibidad sa isla tulad ng mermaid swimming, helmet diving, food trips at souvenir shopping. Layon nilang mahikayat ang mga biyaherong babaeng Hapon na bisitahin ang Pilipinas at masilayan ang ganda ng Boracay.

Bukod sa Boracay, nakatakda rin itampok sa kampanya ang Cebu City.

Paboritong tourist destination ang Boracay dahil sa apat na kilometrong beach na may malapulbos na puting buhangin na galing sa coral fragments at seaweed Halimeda. Ang coral reef ecosystem ang pinakamahalagang yaman nito.

Feed your body and soul at Luljetta’s Hanging Gardens and Spa in Antipolo

Maagang pumasok ang tag-ulan sa Pilipinas at dito naman sa Japan ay nagsisimula na ang autumn season, parehas na klase ng panahon na medyo gloomy ang pakiramdam. Kapag tag-ulan, lalo na kung malakas ito, madalas nakakatamad lumabas at idagdag pa na mas trapik kapag umuulan. Ngunit kahit naman tag-ulan, maaari pa rin naman ang magbakasyon at mag-relax na hindi kailangang lumayo.

Sa Loreland Farm Resort sa Barangay San Roque, Antipolo ay nakatago ang Luljetta’s Hanging Gardens and Spa na nagtataglay ng magandang kumbinasyon ng unique pampering packages; relaxing green scenery, fresh-organic menu; wide selection of amenities; at nakapagandang view ng Sierra Mountain Ranges, Laguna de Bay, Metro Manila skyline, at ng buong Antipolo. Ito rin ang kauna-unahang hanging gardens and spa sa bansa.

Like a front row seat

Hindi ba’t nakaka-relax at nakakamangha ang magmasid sa kabuuan ng paligid mo mula sa mataas na lugar gaya ng kapag nasa viewing deck ka ng Tokyo Tower?

Bagaman walang viewing deck sa Pilipinas, maaari mo pa rin magawa ang parehas na karanasan sa Luljetta’s mula sa mga mountainside pools at spa nito – ang main attraction na hydrotherapy pools, partikular na ang infinity pool at hydromassage pool kung saan pinakamagandang pagmasdan ang mga iba’t ibang kulay ng view. Mainam naman maglagi sa tinaguriang Sunset Hut para pagmasdan ang nakakaantig na pagbaba ng araw.

Get a healthy dose

Magbabad din sa fish spa zen ponds na tiyak ay makatatanggal ng pagod mo sa iyong paglalakad-lakad sa buong lugar habang pinapaligiran ka ng mga puno’t halaman. At kapag nagsimula nang umulan sa hapon o gabi at medyo lumamig na ang kapaligiran, magandang mag-detox sa sauna o mag-hot bath sa jacuzzi.

Pagkatapos, pumunta sa bamboo huts para magpa-body massage (grape seed oil, signature massage, ginger ventosa, hand or foot reflex, head-back massage, ear candling) foot spa o all-natural body scrub (coffee scrub, sweet calamansi scrub, red wine scrub, choc’late scrub). Mayroon din spa enhancers – flawless feet, flawless feet with herbal foot bath, soft touch, soft touch with paraffin wax, manicure, at pedicure.

Pwede rin mamili mula sa tatlong package ng Luljetta’s Spa Journey – Comfort, Nurture, at Rejuvenate na may kasamang access to hanging gardens facilities, welcome snack/drink, 4 course wellness menu, aromatheraphy welcome kit, at iba pa na nagsisimula sa Php2,450 – Php3,950.

Nariyan din ang Hanging Garden Experience – Hanging Garden Retreat at Hanging Garden Getaway mula Php1,100-Php1,650 kung saan kasama ang mga unang nabanggit na amenities.

Sa pagkain naman, tikman ang in-house garden salad mula sa kanilang organic farm, Antipolo suman (topped with sweet mangoes) at lemongrass iced tea. Nagbabago naman ang kanilang main course depende sa panahon.

Distinct Filipino feel

Ang masonry nito ay gawa ng mga taga-Pangasinan, mga kurtina mula sa Rizal province, furniture pieces ng Palawan, synthetic rattan furniture ng Pampanga, wooden bar at flowering plants ng Baguio, daybed na may Abel Iloco Fabric ng Ilocos, droplights na gawa sa abaca ng Bicol at towel/robe na gawa sa batik fabric.

Para pumunta, bumaba sa LRT Santolan, sumakay ng pa-Antipolo na FX o jeep, bumaba sa Antipolo Cathedral at mag-tricycle papuntang Loreland Resort. May mga Antipolo-bound terminals din sa Araneta Center, Cubao; Robinson’s Galleria; SM Megamall; EDSA Central, Mandaluyong; at Ayala Center, Makati.

Have an old-fashioned weekend getaway at the new Vessel Hostel in La Union

Maaga man nagsimula ang panahon ng tag-ulan sa Pilipinas, hindi naman ito nangangahulugan na tapos na ang magandang panahon para magbakasyon, malayo man o malapit sa bansa.

Sa La Union, na kilalang Surfing Capital of the North, bagaman medyo maalon na ngayon at hindi na kasagsagan ng summer season para mag-surf, marami pa rin naman na magagandang tuklasin sa La Union, gaya na lamang ng pinakabagong “themed hostel” na Vessel Hostel, na matatagpuan sa National Highway, Urbiztondo, San Juan.

Tinatawag itong Vessel Hostel dahil gawa ang naturang accommodation sa container vans o repurposed shipping vessels na parang capsule hotel dito sa Japan, at mula sa ideya ng architect-surfer owners nito, ang mag-asawang Buji Libarnes at Nikki Dela Paz-Libarnes. Pangunahing konsepto ng mag-asawang Libarnes ang mapanatili ang “60’s modern vibe” sa bawat sulok ng hostel.

Higit dito, napaka-affordable rin ang accommodation sa Vessel dahil nasa Php980 lamang ang room rates nito.

Elegantly vintage but comfortably laid-back

Bilang mga arkitekto ang mag-asawang Libarnes, makikita ang magagandang detalye na ginawa ng dalawa sa disenyo sa loob at labas nito, at siyempre malaking bonus ang eco-friendly element ng hostel sa pag-recycle nito ng mga container vans na madalas ay nakatiwangwang lamang.

Maliban dito, pinagtuunan din ng higit na pansin ng mag-asawa na dapat ay naaayon ang disenyo ng hostel sa tropical climate ng bansa para masiguro ang magandang karanasan ng mga guests, gaya ng paglalagay ng insulation para mabawasan ang init sa loob dahil natural na mainit ang loob ng container vans at sun shading para naman ‘di direkta ang pasok ng sikat ng araw lalo na kapag hapon.

New happy place in surf town La Union

“Vessel is a time machine! Now let's go back to the things I like the most! Its jalousie windows, wooden floor boards, baby-powder smelling towels and sheets takes me back to the ‘60s (I mean if I was already born then) & relive my ‘70s childhood. If you don’t believe me just check out the color palette of the surfboards stashed in the shed across the hostel. Sixties! Functionality down pat. I can go on and on about the design & architecture,” ang review ni Xeng Zulueta, guest, sa Facebook page ng Vessel.

Nagbukas ito sa publiko nitong Disyembre noong nakaraang taon at may apat na dorms na may 22 beds at isang dorm na mayroon namang anim na kama. Bawat kwarto ay may aircondition, fans at fiber optic WiFi. Ang bawat kama naman ay may sariling work desk at locker, na maiging ideya dahil ‘di na mag-uunahan ang guests kapag kailangan mag-charge o kaya ay mag-online.

Nariyan din ang open-plan dining room/kitchen nito na masarap tambayan habang ine-enjoy ang complimentary continental breakfast (a light breakfast consisting of coffee, fruit, rolls with butter and jam, baked goods) at ang roof deck na magandang pwesto para makita ang overview ng karagatan, mag-barbecue party habang nagsa-sunset o mag-agahan habang nagsa-sunrise.

Summer blooms: Flower field destinations within the Philippines

Tuwing summer, nakagawian na ang magpunta sa mga baybayin o magtampisaw sa malamig na tubig ng mga talon para maibsan ang init ng panahon. Subalit may kakaiba at espesyal na pakiramdam ang maglakad-lakad at simpleng damahin lang ang simoy ng hangin habang napapalibutan ng mga makukulay at iba’t ibang klase ng mga bulaklak sa mga tinatawag na flower field o flower farm destinations sa bansa.

Gaya ng dinadayong sakura sa Japan at wisteria flower tunnel sa Kawachi Fuji Garden sa Kitakyushu, kaaya-aya rin na gawin ang ganito sa Pilipinas na may mga maipagmamalaking magagandang bulaklak din.

Stroll amongst the flowers

At bagaman walang malawak na flower field gaya ng Hitachi Seaside Park sa Hitachinaka, Ibaraki Prefecture, mayroon naman tayong sariling atin gaya ng Liwasan Cosmos Flower Field sa Masungi Georeserve sa Tanay, Rizal; Bahong Rose Gardens sa Barangay Bahong, La Trinidad, Benguet; King Louis Flower Farm sa Lamtang, Benguet; Celosia Flower Farm sa Barangay Sirao, Cebu; at lotus flower sa Lake Sebu, South Cotabato.

Umuusbong na destinasyon ang Masungi Georeserve na isang conservation area at rock garden, at maliban sa giant rope hammock at spider web viewing deck, bubungad muna ang nakakahalinang matitingkad na kulay dilaw na cosmos flowers sa tinatawag na Liwasan Cosmos Flower Field. Maglakad-lakad muna rito bago simulan ang nakakapagod ngunit magandang pisikal na aktibidad sa discovery trail.

Pangunahing supplier din ng mga bulaklak at nakapasong halaman gaya ng carnations, chrysanthemums, calla lily bulbs, poinsettia, gerbera daisies, at hydrangeas ang King Louis Flower Farm sa iba’t ibang panig ng bansa.

Rose Capital and Little Amsterdam

Tinaguriang “Rose Capital of the Philippines” naman ang Barangay Bahong sa La Trinidad dahil sa Bahong Rose Gardens na hindi kalayuan mula sa La Trinidad Strawberry Farm. Peak flower season nito ay mula Nobyembre hanggang Marso. Dito nagmumula ang 80 porsyento ng mga bulaklak sa Maynila. Bukas ang  flower farm mula Lunes – Linggo (7am-3pm) at may Php20-50 entrance/per guest at 200-300/tour guide (maximum of 10 persons).

Binansagan namang “Little Amsterdam” ang Celosia Flower Farm sa Cebu dahil sa pagkakahawig nito sa tulip fields sa Netherlands. Ang mga naunang Celosia seeds sa lugar ay dinala ng mga Cebuanong bumisita sa Haarlemmermeer, Netherlands noong 1991.

Nagmula sa salitang Greek ang pangalang Celosia at ang mga matingkad na kulay nito na pula, dilaw, kahel, at rosas ay sumisimbolo sa apoy dahil sa masigla at maalinsangan na kumbinasyon ng mga kulay. Tinagurian din itong Official Sinulog Festival Flower sa tuwing ipagdiriwang ang pista.

Animo’y nasa Netherlands ka talaga dahil may replika pa rito ng windmill at pwede rin mag-renta ng Dutch costume sa halagang Php30 para sa mas kumpletong Netherlands in Cebu experience.

May mga mabibilhan na rin ng pagkain at mga souvenir shops. Malaking tulong din ito sa mga flower farmers dahil ‘di na nila kailangang ibiyahe pa ang mga bulaklak papunta sa bayan dahil dito pa lang ay marami nang mga mamimili.

Peak season ng Celosia Flower Farm ay mula Abril-Mayo at Oktubre-Nobyembre at may entrance fee na Php20. Maigi rin puntahan ang ibang kalapit na atraksyon gaya ng Sirao Pictorial Garden and Campsite na nitong nakaraang taon lang binuksan kung saan may mga celosia flowers din at ang Terrazas de Flores Botanical Garden.

Tuwing maririnig naman ang Lake Sebu, kasama na nito ang maisip din ang mga pink lotus flowers na nagpapakulay sa lawa. Magandang mamangka kapag dapit-hapon at pagmasdan ang paglubog ng araw o umaga sa pagsikat naman ng araw kasama ng mga bulaklak.

Summer adventure through waterfall-hopping in the province of Laguna

Maliban sa pagiging makasaysayan ng Laguna, kinikilala rin ito bilang waterfall haven dahil sa napakaraming waterfalls na makikita rito sa probinsiya.

Sa halip na pumunta pa sa Boracay o sa mga nakasanayan nang beach destinations, ‘di na kailangan lumayo mula sa Maynila para sa isang mas refreshing at mala-paraisong summer adventure ngayong taon, na dala ng mga matatayog at napakalamig na tubig mula sa mga waterfalls ng Laguna.

The stunning cascades of Luisiana

Ang Luisiana ay nanggaling sa Luis y Ana na mga pangalan ni Don Luis Bernardo at asawang si Ana, na nagpasimula sa pagkakatatag ng munisipalidad na dati ay bahagi lamang ng isang mas malaking bayan.

Wala pang standard guide rates sa pagpunta sa mga nabanggit na falls ngunit kapag pupuntahan ang tatlong falls o higit pa ay magbayad ng Php600 at Php300 para sa isa.

Unang stop ng trail ang two-tier falls na Talay Falls na mas madali-dali para sa mga baguhan ngunit madulas at maputik pa rin ang daan papunta rito. May ilang batis din na kailangan tawirin bago makarating sa Talay. Ang mas maliit na bahagi nito ay nasa bukana at ang mas malaking bahagi naman ay medyo natatakpan ng mga puno. Mas kalmado rin ang agos ng tubig dito kumpara sa iba.

Nakatago naman sa likod ng malalaking bato ang Hidden Falls at ang paakyat dito ay matarik na. Tamang-tama naman ang laki nito bilang panggitna sa Talay at Hulugan.

Pangunahing atraksyon naman ang 90-meter high na Hulugan Falls na nagmula ang pangalan pagkatapos mahulog ang isang kalabaw mula sa tuktok nito. Kapag hapon naman, mayroon din maliit na  bahaghari na lumilitaw dito sa may paanan ng falls.

Maganda rin mag-side trip sa 65-feet Aliw Falls na 30 minuto lang ang trek dahil mas patag ang daan papunta rito mula Hulugan Falls.

Be daring in Pagsanjan,  explore more in Nagcarlan, Balian, Majayjay and Mt. Romelo

Sa Pueblo El Salvador naman ang jump off point ng Pagsanjan Falls o Cavinti Falls. Dalawa ang klase ng exploration options – boating/shooting the rapids (Php600/kada tao) na mula pa noong Spanish Colonial Era ay popular na atraksyon na rito at hiking/rapelling (Php270/kada tao) kasama na ang bamboo raft kung gustong magpunta sa Devil’s Cave.

Nariyan din ang tinaguriang virgin waterfalls na Sumucob Twin Falls na mas mapangahas ang daan at para sa mga mas malalakas ang loob.

Isang natural spring at waterfall naman ang Bukal Falls na sikat din sa crystal blue waters nito na gaya ng Enchanted River ng Surigao del Sur.

Nariyan din ang Imelda Falls o Taytay Falls na isang 2-storey falls na ipinangalan kay dating first lady Imelda Marcos dahil sa pagpondo nito ng turismo ng Majayjay. Sa Nagcarlan, mamangha naman sa luntiang rain forest at nakaka-relax na agos sa sapa sa Bunga Twin Falls na madali lang puntahan (5-10 min-trek). Mag-cliff diving sa 49-foot drop at 32-ft na pool basin nito. 

Nasa may Sierra Madre Mountain Range naman ang Buntot Palos Falls na nasa Balian sa bayan ng Pangil, na may 80-meter height at mararating sa pamamagitan ng Pangil Eco Park o Barangay Balian trail (2-3 hr-trek).

‘Di rin nagpapahuli ang 180-foot tall na Buruwisan Falls na nagmumula sa Siniloan River sa Mt. Romelo, Siniloan kung saan makikita rin ang Lanzones Falls, Batya-Batya Falls at Sampaloc Falls. Maaaring mag-rapelling pababa sa falls para sa ‘di malilimutang karanasan.

Coldplay’s ‘A Head Full of Dreams’ Asian tour is pure magic

Ni Len Armea

 Para sa milyun-milyong fans ng British rock band na Coldplay, isang pambihirang pagkakataon ang mapanood ang banda ng personal. Ito ang unang beses na nagtanghal sina Chris Martin (vocalist), Jonny Buckland (guitarist), Guy Berryman (bassist ), at Will Champion (drummer) sa Pilipinas, ikalawang beses pagkaraan ng dalawang dekada sa Taiwan, at ikaapat na beses naman sa Singapore.
 Nagpunta rin ang Coldplay sa Thailand, South Korea at Japan.
 Sa lahat ng naging pagtatanghal ng Coldplay sa Asya, mayroong isang pagkakapareho at ito ay dinayo ng libu-libong fans ang bawat concert at lahat ay nagpatotoo kung gaano kahusay ang banda at gaano kaganda ang kanilang naging pagtatanghal.
 A visual spectacle Isang visual spectacle ang “A Head Full of Dreams” ng Coldplay mula sa malaki at makulay na stage na may mahabang runway at pop-up na entablado sa glowing wristbands na ipinasuot sa mga fans at pagsaboy ng confetti. At nang magsimula ng lumabas at tumugtog ang banda ay walang kapaguran ang mga fans sa pagtalon, paghiyaw at pagsabay sa mga luma at bagong kanta ng Coldplay.
 Sa Singapore pa lamang, mahigit sa 100,000 ang naging audience sa Singapore National Stadium sa loob ng dalawang araw na pagtatanghal ng banda. Binuksan nila ang concert sa pagkanta ng A Head Full of Dreams na agad na sinundan ng popular na kanta na “Yellow” kung saan nagkulay dilaw ang buong stadium mula sa LED wristbands ng fans.
 “Thank you for coming out tonight wherever you’re from. This is gonna be the best show we’ll ever play,” panimula ni Chris.
 Sinundan ito ng “Every Teardrop Is a Waterfall,” “The Scientist,” “Birds,” at “Paradise” na kung hindi paikot-ikot si Chris sa stage ay tumutugtog ito ng piano o kaya ay dala ang kanyang gitara na labis na ikinamangha ng mga fans.
 “This is our first show of the year. So either we’re a little rusty or we’re fresh, depends on how you see it,” biro pa ni Chris sa mga fans na karamihan ay mula pa sa Pilipinas, Indonesia, Hong Kong at ibang panig ng mundo.
 Combination of old and new songs Karamihan sa mga kinanta ng Coldplay ay mula sa kanilang 2015 album na kinabibilangan ng mga kantang “Hymn for the Weekend,” “Everglow,” “Amazing Day,” “Amazing Day,” “Up and Up,” at “Adventure of Lifetime” kung saan maraming makukulay na malalaking bola ang nagsipagbagsakan na pinagpasa-pasahan ng mga manonood.
 Hindi rin mawawala sa set list ang kanilang iba pang popular na mga kanta tulad ng “Always in my Head,” “Magic,” “Clocks,” “Viva La Vida,” “Charlie Brown,” “Don’t Panic,” “Midnight,” “A Sky Full of Stars” at “Fix You.”
 Nagbigay din ng tribute si Chris kay David Bowie sa pagkanta ng “Heroes” habang kinanta rin ng banda ang bago nilang collaboration kasama ang The Chainsmokers, ang “Something Just Like This.”
 “I think you’re one of the greatest audiences we’ve ever played for. I wish you could know what it feels like to be up here. It’s an amazing feeling,” ani Chris habang tumugtog ng piano.
 “See you next time, yeah?” na sinagot ng malakas na palakpakan at hiyawan ng fans.
 Worth the wait for Manila fans Worth the wait at worth the price naman ang sigaw ng 35,000 Filipino fans na pumunta sa Mall of Asia Arena concert grounds para sa kauna-unahang pagtatanghal ng Coldplay.
 Halos pareho lamang ang naging set list ng Coldplay sa Asian Tour nito liban lamang sa isa o dalawang kanta na mula sa napiling request ng fans. Sa Singapore ay “Til Kingdom Come” at “In My Place” ang napiling tugtugin ng banda habang “Ink” naman sa Manila na dedicated kay Ken Santiago na isang cancer patient na binisita ni Chris sa ospital bago ang concert.
 Impromptu rin gumawa ng “Manila song” ang banda kung saan ang bahagi ng lyrics ay “I’d say that the crowd is such a thrilla | They’re all killer, no filler.”
 “Sorry for making you all wait for 17 years. Lots of people were asking why it took us a long time to visit your beautiful country. We have been waiting, so we would have enough good songs,” pahayag ng 40-taong-gulang na bokalista ng Coldplay.
  

Bring out the thrill-seeker in you at the Narvacan Outdoor Adventure Hub

Kuha mula sa NOAH Official Facebook page

Kilala ang Ilocos Sur sa pagiging heritage site nito na hinirang pa sa New7Wonder Cities. Sa kabila ng modernisasyon ay napapanatili ang tradisyonal na kultura sa kapaligiran nito. Marahil sa maraming taga-siyudad, Vigan lamang ang madalas na naririnig ngunit higit pa sa Spanish colonial architectures, bagnet, at longganisa – may ibubuga pala ang bayan ng Ilocos Sur sa extreme sports at outdoor adventure sa pamamagitan ng Narvacan Outdoor Adventure Hub (NOAH).

Isang malaking kapatagan ang Narvacan na pinapaligiran ng mga bulubundukin at malapit sa West Philippine Sea. Isa rin ito sa pinakaunang sentro ng kalakalan sa North Luzon na nadiskubre noon ni Spanish navigator Juan de Salcedo.

Extreme sports hub of the Philippines

Taong 2012, mula sa ecotourism development sa pangunguna ni Mayor Zuriel Zaragoza ay ginawa itong bagong sentro ng adventure tourism dahil sa kagila-gilalas na Bantay Abot na may taas na 1,000 talampakan at tatak nito ang malaking butas mula sa taas ng bundok.

Pinangalanan niya ang adventure camp na Narvacan Outdoor Adventure (NOAH) at nagsimula sa paglulunsad ng mahigit 500 metrong zipline na may bilis na 40/kph o 50 segundo sa parehas na taon. Mabilis nitong nakuha ang atensyon ng mga adrenaline junkies sa loob at labas ng bansa, at noong 2015 ay idinaos ang 3-day Fiesta Del Mar (Festival of the Seas) kung saan nagkaroon ng kumpetisyon sa beach volleyball, soccer, paragliding at bikathon.

“We want the world to know that there’s more to experience in Ilocos Sur apart from cultural tourism—and that is through Narvacan’s new ecotourism and extreme adventure site,” ang pahayag ni Zaragoza.

Ngayon, ang Bantay Abot ang nagsisilbing take-off point para sa paragliding event at mamamalas mula sa ere ang “only in the Philippines” na tanawin ng Narvacan coastline, mga burol at palayan ng buong Ilocos Sur.

Ayon kay Randell Buko Raymundo, NOAH paragliding consultant/ air sports specialist – Air Sports Adventure Philippines (ASAP), pinapayagan lamang mag-paraglide kapag nasa 10-20/kph ang hangin para ‘di gaanong malakas o mahina para makatagal sa ere. Dagdag pa nito, ‘di kailangang sobrang taas ng launch pad at pwede na ang 10-15ft (from the ground).

Paborito rin ang Via Ferrata (Iron Road) na isang 300-meter vertical climb (rock climbing, trail walking, surveying) sa mababatong burol ng Narvacan. May harness at steel cables na nakasuporta para maakyat ito hanggang taas at bababa naman sa paraan ng pag-zipline o rappelling.

Perfect fusion of elements

Ayon kay Jose Cuerdo, business development manager – NOAH, sinisimbolo ng mga outdoor activities ng NOAH ang kumbinasyon ng apat sa classical elements – earth (mountain, hills), wind (ocean breeze), fire (engine from all-terrain vehicles), at water (windsailing).

Mayroon din parasailing, downhill bike circuit, all-terrain vehicles (AVT) race track sa Narvacan sand dunes, 4x4 tour, hobie cat (with pilot/sailing intro), kite surfing, kayaking, at windsurfing. Nagsisimula ang rates sa Php800 – 2,500. 

Livelihood program para sa mga biktima ni ‘Yolanda’

Kuha mula sa JICA

 Nagsisilbi bilang susi sa pagbangon ng mga kababaihang biktima ng bagyong Yolanda sa isang remote, coastal barangay sa Sta. Cruz, Tanauan, Leyte ang milkfish (bangus) livelihood program kung saan ang dalawang palapag na processing facility ay bahagi ng technical cooperation project ng Japan International Cooperation Agency (JICA).

Sa proyekto na tinawag na “Urgent Development Study for the Rehabilitation and Recovery from Typhoon Yolanda of the Japan International Cooperation Agency” sinasanay ng JICA at ng Municipal Agriculture Office ang mga kababaihan sa pagbuo, paggawa at packaging ng mga produktong bangus.

Karamihan sa kanila ay maybahay ng mga mangingisda na ang kabuhayan ay nakasalalay sa industriya ng aquaculture ng Leyte. Matapos ang bagyo ay nawala ang kanilang kabuhayan at ang processing facility na itinayo noong nakaraang taon ang nagbigay sa kanila ng oportunidad na muling maisaayos ang kanilang buhay.

“Noong bumalik kami dito pagkatapos ng bagyong Yolanda, akala ko wala na talagang pag-asa. Pero ngayon dahil may sarili na kaming kita, unti-unti na kaming nakakabangon,” kwento ni Menchie Frumencia, ang head ng Sta. Cruz Women Fisherfolk Association. 

Ilan sa mga gawain nila ay ang marinating, cooking at packing ng bangus sa vacuum-sealed packaging bago dalhin sa mga groceries at iba pang mamimili.

Ang soft-boned, pressure cooked bangus ay may kasamang homemade sauce na gawa ng mga kababaihan. Kamakailan ay nakatanggap sila ng orders na mahigit sa 150 piraso mula sa Japan.

“Sana makakuha pa kami ng buyers para tuluy-tuloy ang income namin,” dagdag ni Frumencia.

Tatlong taon matapos ang trahedyang dulot ng bagyong Yolanda ay may kislap na ng pag-asa sa mukha ang mga kababaihang biktima nito dahil batid nila na muling mapapabuti ang kanilang pamumuhay sa pamamagitan ng livelihood program tulad nito.

Japan nag-alok ng tulong sa Pilipinas, Indonesia, Malaysia laban sa pamimirata at terorismo

Ni Florenda Corpuz

Kuha mula sa Department of National Defense

 Siniguro ng Japan sa gobyerno ng Pilipinas ang kahandaan nito na tumulong na labanan ang pamimirata at terorismo upang makapag-ambag sa trilateral cooperation sa pagitan ng Pilipinas, Indonesia at Malaysia.

Ito ang inihayag ni Japanese Vice-Minister for International Affairs Ro Manabe kay Undersecretary for Defense Policy Ricardo David Jr. sa ginanap na 5^th PH-Japan Vice-Ministerial Meeting na ginanap sa Tokyo kamakailan.

Hiniling ni Manabe kay David na iparating sa gobyerno ng Japan kung paano ang pinakamainam na paraan para sila ay makatulong para labanan ang pamimirata at kidnapping sa shared maritime areas ng tatlong bansa.

Tiniyak din ng Japan ang suporta nito sa Pilipinas sa Chairmanship ng ASEAN ngayong taon. Inulit din niya ang pagnanais ng Japan na palaganapin ang defense cooperation sa ASEAN member states at sinabing handa ang Japan na ituloy ang mas malalim na defense cooperation sa Pilipinas sa pamamagitan ng exchanges at defense equipment transfer.

Kinilala naman ni David ang kontribusyon ng Japan sa capability upgrade ng Philippine defense forces partikular ang pagpapaarkila ng limang TC-90 aircraft para sa maritime surveillance kung saan ang dalawa ay ide-deliver sa Marso. Nagbigay din ang Japan ng capacity building assistance partikular ang humanitarian assistance at disaster response.

Dinagdag pa ni David na kailangang pagtibayin ang lagay ng visiting forces agreement ng dalawang bansa lalo pa’t interesado ang Japan na magsagawa ng pagsasanay kasama ang Pilipinas.

Bago ang pagpupulong ay tinalakay muna ng Japanese delegation sa Philippine delegation ang pinakabagong developments sa South China Sea na mino-monitor ng Japan.

Sinigurado rin ng Japan ang patuloy na pagbibigay ng napapanahong impormasyon sa bansa partikular ang mga paglabag sa mga tuntunin ng batas bilang pagtukoy sa desisyon na inilabas ng Permanent Court of Arbitration noong Hulyo ng nakaraang taon.

           

Japan tutulong para sa de-kalidad na childcare training sa Pilipinas

Ni Florenda Corpuz

Tutulong ang bansang Hapon sa pamamagitan ng Japan International Cooperation Agency (JICA) sa Department of Social Welfare and Development (DSWD) at A Child’s Trust is Ours to Nurture (ACTION), isang Japanese non-profit group, sa pagpapalakas ng house parenting standards sa mga childcare institutions sa National Capital Region (NCR) sa Pilipinas.

Nilagdaan ng tatlong organisasyon ang capacity building program para rito kamakailan.

“JICA aims to support the Philippines’ poorest sectors overcome their vulnerability. This cooperation hopes to also ensure that everyone, including marginalized children, will benefit from the economic growth the Philippines achieved. Improving child care standards of house parents and social workers is crucial in teaching children to become self-reliant and productive members of society,” pahayag ni JICA Chief Representative Susumu Ito.

Mainit na tinanggap ni DSWD Secretary Judy Taguiwalo ang kooperasyon ng JICA at ACTION at sinabing “the project supports the present administration’s anti-poverty agenda of reaching out to marginalized children and communities and providing them opportunities to improve their plight.”

Sa Pilipinas, ang DSWD at ang mga accredited childcare facilities sa buong bansa ay nagbibigay ng interventions sa naturang kaso ng mga bata. Ang kakulangan ng house parenting o care giving standards sa mga nasabing pasilidad ang nag-udyok sa JICA, DSWD at ACTION para magtakda ng capacity building program upang mapabuti ang kaalaman at kasanayan ng mga child care workers sa mga pasilidad.

Ayon sa datos ng Philippine Statistics Authority (PSA) noong 2012, mas mataas ang poverty incidence sa children sector na umabot sa 35.2 porsyento kumpara sa ibang sektor. Mas malapit din sa kapahamakan tulad ng karahasan, pagsasamantala, pang-aabuso at diskriminasyon ang mga mahihirap na bata.

Ang kooperasyon ay bahagi ng JICA Partnership Program sa ilalim ng Official Development Assistance (ODA) na sumusuporta sa Japanese non-government organizations, local governments at akademya para masolusyunan ang social at economic development issues sa grassroots level.

Layon din ng proyekto na magbigay ng life skills training at iba pang developmental activities sa mga bata sa residential institutions sa Region 3. Una nang nagsagawa ng pagsasanay sa 180 house parents at 56 social workers sa 38 residential facilities sa Central Luzon.