Dolby Atmos technology nasa Pilipinas na

Ni Jovelyn Javier

Sina Precy M. Florentino, Mayor Guia Gomez, Sen. JV Ejercito, Mr. Ignacio Ortigas at Paolo Mendoza sa ribbon cutting ceremony ng Dolby Atmos. 

Sa kauna-unahang pagkakataon ay nagkaroon ang bansa ng bagong rebolusyonaryong teknolohiya sa industriya ng pinilakang-tabing. Ito ay ang Dolby Atmos na isang makabagong sound technology na tinitingala sa buong mundo. Kamakailan lang ay inilunsad ito sa New Promenade Cinemas 6, 7 at 8 sa Greenhills Shopping Center. 

Sa pamamagitan ng Golden Duck Group, ang Southeast Asian distributor nito, ipinagkaloob ang rights ng Dolby Atmos sa Greenhills Cinemas. Dahil dito, bukod-tanging ang Greenhills Cinemas lamang ang may Dolby Atmos sa kanilang mga sinehan dito sa bansa. At nito lamang ay ginawaran din ang Dolby Atmos ng Technical Achievement Award for Post Production ng Cinema Audio Society. 

Nagbibigay ng kakaibang cinematic experience ang Dolby Atmos sa bawat pelikulang mapapanood kung saan ito ang gamit. Kakaiba ito dahil mayroon itong maraming speaker na nakalagay sa lahat ng sulok ng sinehan. Ang mga speaker na ito ang gumagawa ng malakas at dramatikong tunog at naigagalaw nito ang tunog sa kahit saang parte ng sinehan kung kaya’t mas nagiging makatotohanan ang pelikulang pinapanood. 

Magiging daan din ito para muling maibalik ang dating atmosphere ng mga sinehan tulad na lamang ng pagkakaroon ng iba’t ibang klase ng mga mural at art pieces na dati ay nakikita sa sinehan, ngunit habang umaasenso at nagiging makabago ang industriya ng sine ay tuluyan na itong tinanggal. 

Isa sa mahalagang bahagi ng paglulunsad ng Dolby Atmos ay ang paglalantad ng isang malaking mural na tinawag na ‘8 Movements’ at gawa sa metal ng National Artist for Visual Arts Benedicto Cabrera (BenCab). Ito ang pinakamalaki at kauna-unahang mural na gawa sa metal mula kay BenCab. 

Dinaluhan ang naturang selebrasyon at pagbubukas ng Dolby Atmos sa Greenhills ng maraming kilalang opisyales mula sa pulitika at negosyo gaya nila Mayor Guia Gomez ng San Juan, Senador Loren Legarda, Senador JV Ejercito, Mrs. Marga Ortigas ng Ortigas & Company Limited Partnership, Senador Grace Poe Llamanzares, Precy Florentino ( Greenhills Cinemas president), at Paolo Mendoza (vice president – Music Museum Group, Inc at general manager ng Greenhills Cinemas. )

Mararanasan na ng mga Pinoy sa kauna-unahang pagkakataon ang kakaibang sound technology ng Dolby Atmos sa pagpapalabas ng pelikulang Pacific Rim, isang science-fiction monster movie na idinirehe ng batikang aktor na si Benicio del Toro ngayong Hulyo.