Shin-Yokohama Raumen Museum: World’s First Food Amusement Park

Ni Oliver Corpuz

Kuha ni Oliver Corpuz

Ang ramen ay isang uri ng noodle dish na itinuturing na pangunahing staple food sa Japan. Mula China, inangkat at ipinakilala ito ng Japan sa mga mamamayan nito noong Meiji period (1868-1912). Sa paglipas ng panahon, ito ay naging popular at paboritong pagkain na inakma sa panlasa ng mga Hapon. 

Dahil sa popularidad ng ramen sa Japan, naisip ni Yoji Iwaoka, isang ramen connoisseur na magtayo ng ramen museum sa Shin-Yokohama, ang lugar kung saan siya isinilang at lumaki. Taong 1994 nang magkaroon ng katuparan ang ideya na ito ni Iwaoka at buksan sa publiko ang Shin-Yokohama Raumen Museum, ang kauna-unahang food amusement park sa buong mundo.

Ang Shin-Yokohama Raumen Museum ay nahahati sa dalawang bahagi. Ang una ay ang ramen restaurant mall kung saan matatagpuan ang siyam na ramen restaurants na napili mula sa libu-libong ramen-ya mula sa iba’t ibang bahagi ng Japan. Kabilang sa mga ito ang Ryusyanhai mula sa Yamagata, Ganja ng Saitama, Menno-bou-toride ng Shibuya sa Tokyo, Kamome-syokudo ng Sendai, Komurasaki ng Kumamoto, Sumire ng Hokkaido, Shinasoba-ya ng Kanagawa, Nidaime-genkotsu-ya ng Tokyo at Ikemen Hollywood mula naman sa Amerika. 

Bawat ramen-ya ay popular sa pinagmulang lugar at may kani-kanyang specialty na inaalok sa mga lokal at dayuhang turista na gustong makatikim ng masarap na ramen. Maaaring um-order ng mini ramen at regular ramen na nagkakahalaga mula Y500-Y1,000 bawat serving gamit ang mga food stubs na mabibili sa mga vending machines. Ang pangalawa naman ay ang 1:1 replica ng Shitamachi sa Tokyo noong 1958, ang taon kung kailan naimbento ang instant ramen.

Matatagpuan din sa Shin-Yokohama Raumen Museum ang isang gallery kung saan naka-display ang mga litrato na nagpapakita sa makabuluhang kasaysayan ng ramen sa bansa. May souvenir shop at slot car racing din dito para sa mga bata. 

Isa ang Shin-Yokohama Raumen Museum sa mga pasyalan na hindi dapat palampasin kung ikaw ay nasa Yokohama. Hindi lamang ito isang simpleng atraksyon bagkus ay isang makabuluhang lugar kung saan matututuhan ang kahalagahan ng ramen sa kulturang Hapon.

Ang Shin-Yokohama Raumen Museum ay lima hanggang 10 minutong lakad mula sa istasyon ng Shin-Yokohama. Bukas ito mula 11:00 ng umaga hanggang 9:30 ng gabi sa ordinaryong araw, 10:30 naman nagbubukas tuwing Linggo at national holidays. May bayad na Y300 ang entrance rito.