Jerwin Ancajas, tagumpay sa ikaapat na IBF junior bantamweight title defense sa Texas

“Hindi ko talagang naiisip na ikinukumpara ako kay Sir Manny pero sinisipagan ko sa laban para kahit kaunti man lang maging katulad ni Sir Manny,” ang tugon ni Jerwin “Pretty Boy” Ancajas (29-1-1, 20 KOs) sa post-fight interview nito sa ESPN kaugnay ng nakikitang pagkakaparehas nila ni Filipino champ Manny Pacquiao, partikular na sa karisma at ugali.

Ito ay pagkatapos niyang pabagsakin sa pamamagitan ng technical knockout (TKO) sa 10^th round si Israel “Jiga” Gonzalez (21-2, 8 KOs) ng Mexico. Ginanap ang laban ngayong Pebrero sa American Bank Center Corpus Christi, Texas.

A rousing US debut

Pinabilib ng tubong Panabo City, Davao del Norte na boksingero ang mga manonood at boxing experts sa ipinakita nitong bilis at galing sa kanyang U.S debut at kauna-unahang laban simula nang pumirma siya sa Top Rank, na siya rin nasa likod ng mataginting na karera ni Pacquiao, na co-promoter ng laban at itinuturing ni Ancajas na kanyang idolo at mentor.

Ayon sa CompuBox statistics, nakapagtala ang IBF junior bantamweight champion ng kabuuang 130 sa 477 shots o 27 porsyento samantalang si Gonzalez ay may 48 sa 303 shots o 16 porsyento.

Ang naturang tagumpay ni Ancajas ay ang ikaapat na beses nang naidepensa nito ang kanyang IBF junior bantamweight title. Mataginting din ang record ng 26-taong-gulang na si Ancajas dahil kasama na ang laban na ito sa 16 na panalong naitakda niya kung saan 15 rito ay sa pamamagitan ng knockout.

A new force to reckon with

Sa opening round pa lamang ay pinakitaan na agad ni Ancajas ng senyales si Gonzalez na hindi ito padadaig nang naimarka nito ang isang flash knockdown nang tumama ang kaliwang suntok nito sa panga ng Mexicano.

Nagsimulang uminit ang laban pagdating ng 5^th round nang naging agresibo si Gonzalez nang ma-corner si Ancajas nang panandalian at naipasok ng Mexicano ang ilang mga kanang suntok nito. Sa kabila nito, mabilis na nakabawi si Ancajas gamit ang kanyang counter left at right hooks sa pagtatapos ng naturang round.

Pagpatak ng 10^th round ay inaamok pa rin ni Gonzales si Ancajas na nagbigay ng pagkakataon sa Pinoy na maikasa ang left straight at sinundan niya ito ng looping left na tumama sa sentido ng Mexicano, na tuluyan nang naging hudyat ng pagtatapos ng laban sa loob ng isang minuto at 50 segundo ng naturang round.

Inaasahan naman ni Las Vegas matchmaker Sean Gibbons na kayang lumaban ni Ancajas ng tatlo pa ngayong taon lalo na’t hindi ito madaling tamaan.

Tinitingnan naman na susunod na hakbang ni Ancajas ang umakyat sa 115-pounds kung saan posible nitong makaharap sina WBA champion Khalid Yafai, WBC champion Srisaket Sor Rungvaisai at WBO king Naoya Inoue.

Heir apparent to the throne

Maging ang dating WBO welterweight champion Tim Bradley ay nakikitang si Ancajas ang papalit kay Pacquiao nang makita nito ang laban ng una bilang bahagi ng ESPN TV panel.

“Ancajas looked sharp. This kid will go far. Top Rank will bring him along. He’s got tremendous potential. I thought his 1-2 combinations were on point. It was an impressive showing in his U.S debut,” ani Bradley.

Ngunit inamin din niya malaki rin ang kailangan pang pagbutihin ng baguhang boksingero at iminungkahing, “For one, he should vary his punches. I didn’t see him throw too many uppercuts. He landed jabs, straights and hooks. You don’t want to be predictable. For another, I’d like to see more movement. He fought Gonzalez straight up. I don’t mean jumping out side-to-side. He should try shifting his balance laterally to create angles and find openings. One last thing, he should throw feints.

“It’s that Manny charisma that I see in Jerwin. My final advice to Ancajas is to stay focused,” ang pagbabahagi ni Bradley.

Pacquiao, dismayado sa pagkabigo ng Pilipinas na mapiling host ng 2019 FIBA World Cup

Ni Florenda Corpuz

Yao Ming at Manny Pacquiao
(Kuha ni Florenda Corpuz)

Tokyop, Japan – Dismayado si eight-division Filipino boxing champion Manny Pacquiao sa pagkabigo ng Pilipinas na mapili bilang host country ng 2019 FIBA World Cup.

Sa host announcement ceremony na ginanap sa Tokyo Prince Park Tower Hotel noong Agosto 7, idineklara ni FIBA President Horacio Muratore ang desisyon ng FIBA Central Board na gawin sa China ang pinakamalaking basketball tournament sa buong mundo sa botong 14-7.

Pinangunahan ni Pacquiao ang delegasyon ng Pilipinas na kumumbinsi sa FIBA Central Board habang ang dating NBA Houston Rockets center na si Yao Ming naman ang nanguna sa delegasyon ng China.

“Nakakalungkot, but we did our best. Hindi pa para sa atin. Next time. Ibibigay ito ng Diyos sa Pilipinas sa tamang panahon,” pahayag ng pambansang kamao at KIA player-coach ng PBA sa panayam ng Pinoy Gazette.

Tagos sa puso ang naging presentasyon ng Pilipinas na sumentro sa pagmamahal ng bansa at mga Pilipino sa larong basketball. Ipinagmalaki rin ang pagiging social media capital ng bansa na pinatunayan ng pag-trend worldwide ng campaign hashtag na #PUSO2019 bago pa man magsimula ang final pitch.

Kabilang din sa delegasyon ng Pilipinas sina Samahang Basketbol ng Pilipinas President Manuel V. Pangilinan, Hollywood Fil-Am actor Lou Diamond Phillips, dating Gilas Pilipinas captain Jimmy Alapag at dating coach Chot Reyes na pare-parehong nagpahayag ng pagkalungkot sa naging desisyon ng FIBA Central Board.

“We gave our best shot,” malungkot na pahayag ni MVP na sinabing magpapahinga muna sila matapos ang mahabang preparasyon na kanilang ginawa para rito.

Ito ang unang pagkakataon na magiging host ang China ng FIBA World Cup na naging host ng FIBA World Championship for Women noong 2002. Binida ng delegasyon ang kakayahan ng kanilang bansa na mag-host ng malalaking international sporting events kabilang ang 2008 Beijing Olympics pati na rin ang malaking populasyon nito na aabot sa halos 1.4 bilyon katao at malaking merkado nito.

Muhammad Ali’s 12 rounds of boxing

Kung bukambibig ngayon sa larangan ng boksing ang mga pangalang Floyd Mayweather, Jr. at Manny Pacquiao, noong 1960 hanggang 1980 ay si Muhammad Ali ang bidang-bida. Sa katunayan ay “The Greatest” ang monicker na ibinigay sa kanya dahil sa angking galing nito sa ring at record at pagkilala na naitala sa larangan ng boksing.

Ngayon ay 72-taong-gulang na si Ali at may sakit na Parkinsons disease ngunit patuloy pa rin ang kanyang pagsuporta sa boksing at pagtulong sa pamamagitan ng itinayo niyang foundation. Nito lamang, matapos ang maintrigang pagkapanalo ni Mayweather laban kay Marcos Maidana ay nanawagan ito na sana’y magkaharap na sa ring ang una at si Pacquiao.

Sa halos ilang taong pamamayagpag bilang world-class boxer at sa patuloy sa pagtataguyod ng isport na tunay niyang minahal, narito ang ilang mahahalagang bagay tungkol sa tinaguriang pinakamagaling na boksingero sa kasaysayan ng boksing.

1. Unang nadiskubre ni Ali ang boksing noong siya’y 12-taong-gulang nang minsang mawala ang kanyang bagong bisikleta. Hinanap niya iyon at isinumbong sa pulis na si Joe Martin na noo’y mayroong gym at nagtuturo ng boksing sa mga kabataan. Ani Ali kay Martin na nais niyang gulpihin kung sino man ang nagnakaw ng kanyang bisikleta na sinagot ng huli na dapat ay matuto muna siya lumaban bago maghamon.

2. Cassius Marcellus Clay ang tunay na pangalan ni Ali, na ipinanganak noong Enero 17, 1942 sa Kentucky, ngunit noong 1964 ay umanib siya sa Nation of Islam na pinamumunuan ni Elijah Muhammad na nananawagan para magkaroon ng “separate black nation.” Simula noon, Muhammad Ali na ang dinalang pangalan ng popular na boksingero.

3. Nasa 61 ang naging laban ni Ali, 56 sa mga ito ay kanyang naipanalo. Sa 56 na panallo, 37 sa mga ito ay sa pamamagitan ng knockout. Sa lima niyang talo, isang beses lamang siya na-knockout.

4. Naging professional boxer si Ali nang makuha nito ang gold medal sa Olympics game na ginanap sa Rome, Italy noong 1960.

5. Siyam na beses niyang nadepensahan ang kanyang heavy weight titles.  Itinanghal din siya na World Heavyweight Championnoong 1964, 1974, at1978.

6. Noong 1967 ay napasama si Ali sa military service sanhi ng nagaganap na Vietnam War ngunit tinanggihan ito ni Ali dahil labag umano ang pagpatay sa kanyang relihiyon. Kinasuhan siya ng draft evasion at pinagmulta ng US$10,000 at pagkakakulong ng limang taon. Hindi man siya nakulong dahil sa kanyang pag-apela, tatlong taon siyang hindi pinayagan maglaro ng boksing at binawi rin sa kanya ang heavyweight title.

7. Sa kanyang siyam na anak mula sa apat na asawa, ang anak niyang babae na si Laila Ali ang sumali sa professional boxing ngunit hindi naging kasing matagumpay ng kanyang ama.

8. Lumaban si Ali sa 12 bansa at isa na rito ay sa Pilipinas kung saan ang kanyang ikatlong laban kay Joe Frazier noong 1975, na pinamagatang “Thrilla in Manila,” ang itinuturing na isa sa pinakamaganda at pinakaklasikong laban sa kasaysayan ng boxing. Umabot ito ng round 14 na pinanalunan ni Ali.

9. Naging popular din siya sa mga binitiwang kataga na, “float like a butterfly, sting like a bee.”

10. Huling laban ni Ali noong 1981 nang matalo siya kay Trevor Berbick sa edad na 39. Isang araw matapos ang kanilang laban ay inanunsiyo na ni Ali ang kanyang pagre-retiro sa pagboboksing.

11. Ibinunyag ni Ali na mayroong siyang sakit na Parkinsons Disease, isang degenerative disorder ng central nervous system, na sinasabing sakit ng mga boksingero dahil sa mga natatamong suntok ulo. Dahil ditto, itinayo ni Ali ang Muhammad Ali Parkinson Center sa Arizona.

12. Nailagay si Ali sa World Boxing Hall of Fame noong 1986 at tinanggap din niya ang Presidential Medal of Freedom mula kay dating Pangulong George W. Bush noong 2005.

WBC World Youth belt nakopo ng Pinoy boxer

Ni Enrique Toto Gonzaga 

Napuno ang Kurakoen Hall sa Suidobashi, Tokyo dahil sa laban ng dalawang Pilipinong boksingero  na sina Joe “The Machine” Maxian at Raymond Sermona para sa WBC World Youth Lightweight Division kamakailan. 

Parehong galing ang dalawa sa Elorde Gym Philippines na lumaban sa mga Hapon para makamit ang titulo.

Tampok sa laban nito ang pag-agaw ng WBC World Youth Lightweight Championship belt ni Maxian, tubong Capiz, Panay Island, sa kalabang Hapon na si Saito Tsukasa.

Isang malakas na suntok ang binitawan ni Maxian sa ikapitong round ng kanilang sagupaan na nagpatumba kay Tsukasa. Hindi makapaniwala ang mga Hapon ngunit kinilala pa rin nila ang galing ni Maxian sa pamamagitan ng pagsabi ng "Sugui Umai." Ang ibig sabihin  nito ay mataas ang tingin ng mga Hapon sa kaniya gawa ng kaniyang pagkapanalo.

“Nagpapasalamat po ako una sa lahat sa Panginoon sa ibinigay niyang tagumpay sa akin, sa lahat ng mga Pilipino sa Japan na sumuporta at higit sa lahat sa aking manager at sa Elorde Gymnasium na nagbigay sa akin ng oportunidad para makalaban dito sa Japan bilang kinatawan ng Pilipinas,” ani Maxian.

Draw naman ang resulta ng naging laban ni Sermona kay Yutai Nagai para sa Semi-feather Lightweight Division. Umabot sa walong rounds ang laban kung saan nagpakita ng lakas at matinding depensa si Sermona.

Si Sermona ay laking Bacolod City, Negros Occidental at nag-eensayo siya sa Elorde Gym sa Paranaque City bago siya ipinadala sa Japan para lumaban.