A separate New Year’s resolutions for your travel goals

Ayon sa mga kwento at pagsasaliksik, malalim ang pinagmulan ng tradisyon ng New Year’s resolutions.  Sa mga Babylonians, na noon ay nangangako sa kanilang mga diyos na ibabalik nila ang anumang mga bagay na kanilang hiniram at magbabayad ng kanilang pagkakautang sa tuwing mag-uumpisa ang taon; sa mga Romans naman na ginagawa ang kanilang mga pangako kay Janus, ang diyos ng pagtatapos at pagsisimula at kung kanino rin ipinangalan ang buwan ng Enero; at sa mga kabalyero noong Medieval period na isinasagawa ang tinatawag na “peacock vow” sa pagtatapos ng Kapaskuhan bilang bagong pagpapatibay ng kanilang  dedikasyon sa kanilang mga tungkulin.

Ngayon, bagaman, hindi na kagaya ng dati ang pamamaraan sa tradisyong ito, hindi naman nawawala ang saysay nito sa maraming tao na ginagamit itong gabay nila sa pagpasok ng bagong taon. Magandang pagkakataon na gumawa ng travel resolutions – mga bagay na partikular tungkol sa sinumang gustong tumuklas ng mga bagong kultura at lugar.

Narito ang ilang ideya mula sa Skyscanner, isang nangungunang global travel search site, para sa isang mas exciting na travel adventures mo ngayong 2017.

Be outside of your comfort zone

Una na riyan ang mag-travel mag-isa na dapat talagang subukan ng sinuman mapa-local destination man o ibang bansa. Bagaman medyo nakakatakot sa umpisa o iisipin mong ‘di mo kakayanin, ang totoo ay ito nga ang hamon dito. Isang magaling na confidence booster ang ganitong karanasan at tunay na isang life-changing experience. Magagawa ang anumang gusto mong gawin sa sarili mong oras at paraan at kakailanganin mo talagang makipag-usap sa mga tao sakali mang maligaw ka.

‘Wag mong isipin ang sasabihin ng iba, lalo na’t hindi nakaugalian sa ating mga Pinoy ang ganito na mahilig talaga magsaya na may mga kasama o grupo. Kung hindi mo pa ito nagagawa dati, ito na ang magandang pagkakataon para tuparin ito.

Have richer travelling moments

Uso ngayon iyong sa loob ng limang araw ay tatlong lugar ang mapupuntahan na may tour guide at iba pang amenities ngunit sa paraang ito ay hindi ka gaanong nagkakaroon ng mas memorableng karanasan sa mga lugar na iyong pinuntahan dahil limitado lang ang oras, maging ang mga partikular na lugar na maaari mo pa sanang madiskubre. Ika nga, “travel slowly and savor every moment.”

Maganda rin ang pumunta sa mga panibagong lugar maliban sa iyong mga favorite destinations na lagi mong binabalik-balikan. Sa ganitong paraan, nakakagawa ka ng mga panibagong karanasan at mga masasayang alaala sa isang lugar na hindi mo pa napupuntahan dati.

Take more time off from social media

Dahil naman social media capital ang ‘Pinas, karamihan ng mga Pinoy ay may mas maraming oras sa social media sa kanilang getaways – share sa Facebook, Instagram, Twitter at iba pa. Hindi ba’t mas maigi kung mas pagtutuunan mo ng atensyon ang destinasyon na iyong pinupuntahan kaysa ang unahin ang ibahagi ito sa social media? Makapaghihintay ang pagbabahagi ng iyong vacation photos sa mga kaibigan.

Master the quick weekend trips

Dahil hindi naman posibleng laging mahaba ang bakasyon, maaari ka pa rin naman mag-quick weekend getaway sa mga lugar na ‘di kalayuan para makapagpahinga sa iyong pang-araw-araw na bahay-trabaho-trabaho-bahay. Enero pa lang ay pag-aralan na kung paano iaayon ang iyong vacation leave sa bilang ng mga official holidays sa susunod na taon. Maaari rin naman biglaang mag-quick Sunday drive.