Nakatakda munang ipagpaliban nina
Princess Mako at kasintahan
na si Kei Komuro, kapwa 26, ang kanilang engagement at pagpapakasal, ito ang
inanunsyo ng Imperial Household Agency kamakailan.
Ayon sa pahayag na inilabas ng
magkasintahan, hindi sapat ang natitirang oras para sa kanilang paghahanda sa
balak na seremonya ng kasal at buhay pagkatapos ng kanilang pag-iisang dibdib.
Dinagdag din nila na ito ay sarili nilang desisyon.
Matatandaang pormal na inanunsyo ng
Imperial Household Agency ang planong engagement nina Princess Mako at Komuro
sa isang press conference na ginanap sa Akasaka Imperial estate noong Setyembre
3 noong nakaraang taon.
Dating magkaklase ang dalawa sa
International Christian University kung saan sila ay nagtapos noong 2014. Naging
malapit ang loob nila sa isa’t isa matapos ang isang orientation para sa study
abroad programs ng kanilang unibersidad noong 2012.
Nag-propose si Komuro kay Princess
Mako noong 2013 na tinanggap naman ng prinsesa.
Si Princess Mako ang unang apo nina
Emperor Akihito at Empress Michiko at panganay sa tatlong anak nina Prince
Akishino at asawang si Princess Kiko. Siya ay may master’s degree sa art museum
at gallery studies mula sa University of Leicester sa England at kasalukuyang
nagtatrabaho bilang researcher sa museo sa University of Tokyo.
Si Komura naman ay isang “commoner”
o ordinaryong mamamayan at naninirahan sa Yokohama kasama ang ina at lolo.
Pumanaw ang kanyang ama noong 2002. Siya ay nagtatrabaho bilang paralegal sa
isang law firm sa Tokyo habang nag-aaral ng business law sa graduate school ng
Hitotsubashi University.
Walang komento:
Mag-post ng isang Komento