Negosyo 101: Kunin at panatilihin ang matamis na oo ng iyong customers

Ni MJ Gonzales

Sa negosyo ang tumatayong pinakaamo ay customers o parokyano. Ang makuha at mapanatili ang matamis nilang oo ay ang magdidikta sa itatakbo ng isang kabuhayan. Kaya naman hindi basta lamang makabenta ang importante, dapat ay ipadama na sila ang bida sa iyong kumpanya.

Kilala mo ba sila? Maraming negosyo na ang atake sa promosyon ay pangkalahatan.  Ang problema rito ay maaari ngang marami ang magkainteres pero iilan lang pala sa kanila ang talagang customer. Ibig sabihin niyan ay nasayang ang iyong ginastos sa hindi epektibong istratehiya sa pagpapatalastas. Ang mahalagang punto rito ay ang kawalan ng pagkilala sa pinupuntiryang mamimili o target market.

Maaaring sari-saring tao ang naaakit na bumisita sa iyong tindihan o shop pero balewala ang dami na ito kung sa pagsusuri ay mababa ang halaga ng kita dahil iilan lamang pala ang bumibili. Kaya mainam na malaman kung sino talaga  ang  merkado mo para sila ang mahikayat na bisitahin ka, mamimili sa iyo, at maramdaman nila na kailangan ka nila para balik-balikan ka. 

Sino ka ba para tangkilikin nila? Hindi lamang dahil sa tindi ng kumpetisyon ang kainaman ng pagkakaroon ng magandang imahe o reputasyon. Ang ilan pang nakapaloob dito ay tiwala at pagiging tapat ng mamimili. Ang kanilang pagtangkilik ay nagsisimula sa impresyon na iminamarka mo sa kanilang isipin sa bawat pagbili nila sa iyo.  Nagbibigay ka ba ng kalidad, ginhawa, natumbok mo ang kanilang gusto, nagsasabi ka ba ng totoo, at maaasahan palagi?  

Hanggang maaari sa lahat ng pagkakataon ay dapat pinapangatawanan mo ang iyong ipinapangako sa iyong mga kliyente.  Masira ka ng isa ay mahirap na, kung mauulit pa ay mitsa na ng hindi magandang reputasyon.  Sa ibang punto, hindi rin mapaghihiwalay ang isang negosyo sa may-ari nito. Kaya minsan kahit gaano kaganda ang produkto ay mababalewala kung ang may-ari at tauhan nito ay may ‘di kanais-nais na  imahe sa mata ng marami.

Handa ka bang sundan sila?  Maliban doon sa matatag na kumpanya ay araw-araw ay may mga ipinanganganak na magagaling sa iba’t ibang klase ng negosyo.  Ang pwede mong maging laban sa kanila ay ang iyong gilas sa pagpulso sa pangangailangan at manguna sa pag-aalok ng mga bagay na kailangan ng iyong mamimili. Kung hinihingi rin ng pagkakataon na may baliin o baguhin sa iyong pamamaraan para mapabuti ang iyong serbisyo ay dapat gawin. 

“It is not the strongest of the species that survives, nor the most intelligent that survives. It is the one that is most adaptable to change,” ang sabi ni Dr. Leon C. Megginson, isang Louisana State University professor at may akda ng librong “Small Business Management.”  

Kaya mo bang sumubok? Sa pangkalahatan, ang anumang klase ng pamumuhunan ay dumadaan sa pagsubok. Pwedeng ito ay may kinalaman sa bagay na hindi mo pa alam, sa bagay na hindi ka kumportable o kaya sa iyong kinatatakutan.  Hindi naman na kailangan na magpakalayo-layo ka sa iyong nais.  

Katunayan ay hindi ipinapayo na gawin mo ang isang investment na hindi mo naman gamay at nalalaman. Ang mahalaga ay gaano ka ba kapursigido na itaas pa ang iyong antas at magpakadalubhasa sa iyong napiling larangan.

Tama na maraming bentahe kung ang negosyo na mayroon ka ay malapit sa iyo. Subalit, maaari rin na ang iyong nalalaman sa iyong kinahihiligan o “passion” ay limitado kaya ka napag-iiwanan at tinatanggihan.

Para maging angat sa iba ay marapat na hindi ka nagdadalawang-isip na gumastos, palawigin ang iyong nalalaman, at sumubok ng mga istratehiya.  Halimbawa na computer products ang ibinebenta mo, hindi ba dapat na alam mo ang pinakabago, pinakamahusay, at pinakamainam para sa isang customer na magtatanong?  

Matutugunan nang mabilis at epektibo ang mga komento?  Mainam kung palaging positibo ang komentong matatanggap. Subalit minsan ay may papasok at papasok pa rin na negatibo at  kakaibang komento tungkol sa iyo.

Kahit negatibo man, pero kung mapapamahalaan nang tama ang pagtugon sa “customer feedback” ay mainam itong serbisyo sa kliyente.  Ito ang magtatawid upang patuloy kang tangkilikin at magbigay sa iyo ng mahusay na panukala.