'Smartphone storytelling' susi sa paghugis ng batas

Ni Cesar Santoyo

Ano ang kaibahan ng regular na "keitai" sa smartphone? Ang mga smartphone ay may mataas na kalidad na kamerang pang-picture at video. Karaniwan na may wi-fi connection ang mga smartphone na kahit walang linya ng telepono at makakasagap ng signal ay maaaring magtelepono gamit ang mga application gaya ng Facetime, Viber, Line, Tango at iba pa. Sa smartphone ay maaari rin na mag-Facebook at mag-email ng walang sawa basta’t may wi-fi signal. Siyempre mas panalo ang may mga smartphone na may regular phone-line.

Taglay ng smartphone ang karaniwan at kadalasang pangagailangan gaya ng orasan, kaya marami na rin ang hindi nagsusuot ng relos, calculator, mapa at giya sa pagsakay sa tren, navigation sa paghahanap ng lugar, at marami pang iba maliban sa pagbabad sa
social networking sites at surfing sa Internet. Pero alam kaya ninyo na maliban sa personal at pang-negosyong gamit, ang smartphone ay gagamitin na rin sa paggawa ng participatory video documentation film para himukin ang publiko at ang mga mambabatas ng Japan para gumawa ng mga patakaran at batas na papabor sa mga dayuhang migrante sa bansa?

Dahil sa kinakalimutan na at iniiwanan na ang mga hindi natugunan na muling pagbabangon ng kabuhayan ng ating mga kababayan na sinalanta ng tsunami at nuclear radiation pagkatapos ng trahedyang 3.11, kinakailangan nito ang mapanlikhang pamamaraan para sa pagpapalaganap ng pagtatanggol at pagsusulong ng karapatan sa kabuhayan ng ating mga kababayan sa Tohoku. Kailangan na maisadokumento ang kalagayan at sitwasyon ng ating mga kababayan na nagsusumikap bumuo ng panibagong kabuhayan pagkaraan ng unos ng March 11, 2011.

Ang smartphone na palaging bitbit ay isang instrumento na maaring pang-record sa madaliang mga nakikitang importanteng kaganapan na mahalagang maipaalam sa publiko. Upang magawa ang panlipunan pananaliksik sa kalagayan ng mga biktima ng trahedyang 3.11 at sa lahat ng migranteng dayuhan ay nagpasya ang Sagip-Tohoku/Japan, ang pinakamalaking network ng mga komunidad at organisasyon ng mga Filipino sa Tohoku at iba-ibang sulok ng Japan, na maglunsad ng malawakang participatory action research. Ang layunin ay gumawa ng pagsisiyasat upang buuin ang mga patunay sa angking talino ng mga migranteng Filipino na may magandang kapakinabangan ang lipunan ng Japan. Ang proyekto ay para kumalap ng mga mapanghimok na batayan para sa mga mambabatas sa paggawa ng mga patakaran at batas ukol sa taglay na kagalingan ng mga dayuhang migrante.

Ang “Advocacy and Participatory Research on Foreign Migrants in Social Inclusion in Tohoku Reconstruction and in Japanese Society” na proyekto ng Sagip-Tohoku/Japan na iginawad sa Center for Japanese-Filipino Families (CJFF) ang pagpapatupad ng proyekto ay nagwagi ng suportang premyo mula sa Toyota Foundation nitong nakaraang October 31, 2013 para isakatuparan ang programa. Smartphone storytelling ang maiksing pangalan ng proyekto ng Sagip-Tohoku/Japan. Gagamitin ng mga kasapi ng Sagip-Tohoku/Japan ang kanilang mga smartphone video para isadokumento ang mga nagaganap na importanteng pangyayari upang ipalabas sa publiko.

Mga hindi karaniwang istorya ng ating mga kababayan ang lalamanin ng Smartphone Storytelling. Kagaya halimbawa sa gawain bilang caregiver, nais baliin ng smartphone storytelling ang paniniwala na ang trabaho bilang caregiver ay tagapaligo o tagahugas lamang ng mga pasyente. Sapagkat marami pang magigiting na anggulo ang gawain ng caregiver na kung sisipatin mabuti ay maraming pang-serbisyo ang kailangan at maaaring malikha. Isa na rito ay ang pagbuo ng homehelper service upang suportahan ang nag-aalaga sa bahay ng matandang kapamilya na hindi dinadala sa home for the aged.

Ire-record din ng matatalas na lente at matataas na pixels ng mga smartphone video ang mas malalim na panunuri sa kalidad at serbisyo ng mga Filipino English teacher at ambag ng mga ito sa lipunan ng Japan. Sa kabila ng nakikitang tulong ng mga Filipino English teacher ay nais rin gamitin ng smartphone storytelling para ipaalam sa kinauukulan na mas makikinabang ang lahat kung gagawing patakaran ang direct hiring ng mga Filipino English teachers ng mga local na Board of Education. Hindi maikakaila ang napakaraming benepisyo ang idinudulot kung direct-hiring ng local na Board of Education ang gagamitin sa pag-recruit ng mga Assistant Language Teachers o ALT sa mga pampublikong paaralan mula elementartya hanggang high school. Mas matipid ito para sa lokal na pamahalaan, hindi napagsasamantalahan ng pribadong negosyo ang mga English teacher at marami pang benepisyo.

Hindi maaaring mawala sa mga isasadokumento at mga natatanging kalagayan ang mga Japanese-Filipino children lalo na ang mga lumaki sa Pilipinas. Sasalaminin ng mga karanasan ng mga tinatawag na bilingual teacher, mga Filipina na umaalalay sa loob ng silid-aralan sa mga batang Japanese-Filipino na bagong dating mula sa Pilipinas, ang mga suliranin at nakikitang solusyon ng mga kabataan. Ang gawain bilang bilingual teacher ay laganap sa buong Japan subalit parang panakip-butas na programa lamang ang pagtugon sa mga parang kabute na sumusulpot na problema ng mga kabataang Japanese-Filipino sa buong bansa. Susuriin ang kalagayan ng pagsuporta sa pag-aaral sa lengguwahe at ang mga kinakailangan pagpapaunlad nito ay isa sa mga lalamanin ng smartphone storytelling.

Maging sa usapin ng kultura at sining at sa partikular ay sa paggawa ng tradisyunal na produktong gawang-kamay ng Japan, marami rin sa ating mga kababayan ang gumagawa nito. Isa itong pagpapatunay na ang mga Filipino na naninirahan sa Japan ay tunay na kabahagi na ng lipunan sapagkat sa kanila na naisasalin-lahi ang paggawa ng ilang mga tradisyunal craft ng bansa para ipagpatuloy ng mga susunod na henerasyon.

Marami pang mapanlikhang kabuhayan ang ginagawa ng mga Filipino sa Japan na kung mabibigyan lamang ng pansin ay magbibigay ito ng inspirasyon sa marami para iangat at baguhin ang imahe ng mga Filipino sa Japan. Ang mga serye ng smartphone video story telling ay inyong masususbaybayan dito sa Pinoygazette kaya huwag kalimutan na magkaroon ng sipi ng ating pahayagan. Nais rin natin ipaabot ang pasasalamat sa Toyota Foundation sa kanilang tiwala at suporta sa mga migranteng Filipino sa Japan sa pabuya nito para sa ikatatagumpay ng layunin ng paggawa at pagpapalabas sa publiko ng smartphone storytelling.