Lagalag sa Moscow: Ang Palibot ng Patriarch's Pond

Ni Herlyn Alegre

Patriarch's Pond sa Moscow, Russia

Isang bansang napakayaman sa kasaysayan ang Russia. Makikita ito sa kanilang naglalakihang mga palasyo, nagkalat na mga museum at teatro, mga estatwa ng mga kilalang tao sa bawat kanto at sulok ng siyudad, mga gusaling kulay pastel na gawa sa solid na bato, mga cobbled streets at maging sa pananaw ng mga taong nakatira rito. 

Marahil ang Red Square, kung saan matatagpuan ang St. Basil’s Cathedral, at Kremlin, kung saan nakalagak ang labi ng makapangyarihang soviet leader na si Lenin, ang pinakakilalang mga lugar sa Moscow na dinadagsa ng milyun-milyong turista bawat taon. Pero bukod sa mga ito, marami pang ibang lugar na dapat bisitahin sa Moscow. Isa na rito ang Patriarch’s Pond o Patriyarshiya Prudy. Isa itong malaking pond sa gitna ng isang high-end residential area kung saan maraming mga kilalang tao ang nanirahan. Sa kasalukuyan, mayroon na lamang isang malaking pond na natira rito pero sinasabing may iba pang pond sa lugar na ito mahigit na 200 taon na ang nakakalipas. 

Mainam puntahan ito ng mga taong mahilig mag-relax at maglakad-lakad sa mga parke, mga taong mahilig sa kasaysayan at pati na rin ng mga taong mahilig kumain!

Ang Patriarch's Pond ay matatagpuan sa Malaya Bronnaya Utilisa at maaaring marating gamit ang Mayakovsky o Tverskaya Metro station. Mayroong isang malaking pond na napapaligiran ng mga puno at mga kahoy na bangko kung saan maaaring magpahinga at masdan ang ganda ng kalikasan. May malapit din na playground dito kung saan maaaring maglaro ang mga kasamang bata. Tuwing winter naman ay ginagawa itong ice skating rink. Sa lugar na ito naka-set ang unang kabanata ng nobelang “Master and Margarita” na isinulat ng kilalang manunulat na si Mikhail Bulgakov.

Sa paligid ng Patriarch's Pond

Sa isang gilid ng pond matatagpuan ang Cafe Margarita. Maaaring magbasa ng libro sa mga upuan sa labas ng cafe o ‘di kaya naman ay makinig sa live jazz, folk at acoustic music sa gabi. 

Ang bahay ni Anton Chekhov ay matatagpuan sa ‘di kalayuan. Ginawa ng museum ang bahay na ito na nagbukas sa publiko noong Abril 25, 1912. Nagkakahalaga ng 250 rubles ang entrance rito at maaaring kumuha ng litrato sa loob ng bahay kung magdaragdag ng 100 rubles. 

Si Chekhov ang isa sa pinakakilalang kwentisya at mandudula sa Russia. Nabuhay siya mula 1860-1904. Ilan sa kanyang mga kilalang likha ay ang “The Cherry Orchard,” “Uncle Vanya,” “The Seagull” at “The Three Sisters.” Tumira si Chekhov sa bahay na ito mula 1886 hanggang 1890 kasama ang kanyang ina na si Yevgenya Yakolevna at mga kapatid na sina Maria at Mikhail. Sa study room ng bahay na ito siya tumatanggap ng mga bisita kabilang na ang kilalang kompositor na si Pyotr Tchaikovaky.

Marami rin na ibang mga manunulat at pintor ang tumira sa lugar na ito. Sa ‘di kalayuan ay matatagpuan ang apartment unit na tinirhan ni Mikhail Bulgakov, isang nobelista at mandudula na nagpasikat sa mga akdang “Master and Margarita” at “Heart of a Dog.” Nabuhay siya noong 1891-1940. Tumira si Bulgakov dito noong 1921-1924 kasama ang kanyang unang asawa na si Tatyana Nikolaevna Lappa.

Binuksan sa publiko ang bahay na ito noong 2007. Katabi  lamang nito ang isa pang museum ni Bulgakov kung saan naka-display ang ilan sa kanyang mga personal na kagamitan. Libre ang museum at may bayad naman ang pagbisita sa bahay ni Bulgakov. Nasa ikaapat na palapag ng gusali ang apartment ni Bulgakov pero bago makarating dito ay madadaanan muna ang makukulay na graffiti na iginuhit ng mga tagahanga ni Bulgakov sa dingding ng gusali. 

Food trip

Kung magutom dahil sa pag-iikot sa lugar, maaaring mananghalian sa Mari Vanna. Napaka-homey ng ambience ng restaurant na ito. Mukha  itong tipikal na bahay  noong 18th century. May mga puting bookshelves sa paligid nito, mga lumang libro at picture frames na inaayos upang magmukhang nasa bahay talaga ang mga kumakain dito. Mayroon din cute na cute na gray na pusa na palakad-lakad sa loob ng restaurant na minsan ay nakikipaglaro sa mga kumakain dito. Russian food ang specialty ng lugar na ito. Huwag palagpasing hindi matikman ang Pirozhki at kompote. Nagkakahaga ng 400-700 rubles ang isang putahe rito.

Para naman sa dessert, subukan ang malahiganteng serving ng Brownie Chocolate Cafe na walking-distance lang din mula sa pond. Maraming iba't ibang flavor ng cake rito tulad ng Brownie Love, cake na gawa sa pinagpatung-patong na brownies at binudburan ng berries sa ibabaw; Titan Berry, chocolate cake na mayroong ding mga strawberries at blueberries sa ibabaw; Titan Nuts, chocolate cake na pinalibutan ng pecan nuts; pistachio, matingkad na kulay green ang kulay nito at malalasahan talaga ang maliliit na piraso ng pistachio sa bawat kagat, at siyempre ang Franklin cheesecake na mayroong mga brownies na nakapatong sa ibabaw nito na nilagyan ng white chocolate at caramel. Nagkakahalaga ng 450 rubles ang isang slice ng cake. Maaari itong ternohan ng double espresso o earl gray tea.

Kung napagod sa pag-iikot, sulit na maghapunan sa Cafe Pushkin, isang high-end restaurant na parang mansyon noong 20th century ang pagkakaayos ng loob. Nagkakahalaga ng 890-8,500 rubles ang bawat putahe. Kilala itong puntahan ng mga businessman, diplomats, expats at siyempre mga turista. Ang unang palapag nito ay parang 19th century drugstore, sa ikalawang palapag naman matatagpuan ang library room at ang ikatlong palapag naman ay ang entresol. Mayroon din itong summer terrace sa may bubong ng restaurant. 

Malaki ang Russia, maraming lugar ang masarap tuklasin, makulay ang kanilang pinagdaanan bilang isang bansa. Hindi dapat palagpasin ang pagkakataong masilip ang kasaysayang ito sa bahaging ito ng Moscow.

Tottori Sand Dunes: Pinakasikat na sand hills sa Japan

Ni Florenda Corpuz

Sino ang mag-aakala na sa isang bansa tulad ng Japan kung saan ang klima ay masasabing temperate na may apat na uri ng panahon ay may matatagpuang sand hills na kadalasan ay sa disyerto lamang makikita?

Sa silangang bahagi ng Tottori Prefecture ay matatagpuan ang Tottori Sand Dunes (Tottori Sakyu), ang pinakasikat at pinakamalaking sand hills sa bansa. Ito ay may habang 16 na kilometro (east to west) at lapad na 2.4 kilometro (north to south) sa tabi ng Sea of Japan.

Ang Tottori Sand Dunes ay nabuo sa pamamagitan ng isang paulit-ulit na cycle na nagsimula sa weathering ng mga bato mula sa mga bundok ng Chugoku na naging buhangin. Ang mga buhangin na ito ay tinangay ng hangin papunta sa dagat at muling bumalik sa pinanggalingan nito sa loob ng humigit kumulang na 100,000 taon.

Isa sa natatanging katangian ng Tottori Sand Dunes ay ang laki ng taas nito at ang mga halaman na dito lamang makikita. Ito ay bahagi ng San’in Kaigan Geopark na itinalagang Global Geopark ng Japan, isang pandaigdigang programa ng UNESCO na may layong gawing world parks ang mga mahahalagang geological heritage sites.

Sa pagbisita sa Tottori Sand Dunes, asahan ang nakakamanghang tanawin tulad ng 40-meter-deep basins, 50-meter-tall hills, wind ripples at pagbaba ng mga buhangin sa ibabaw ng hills na tila isang avalanche. Sa tuktok nito ay masisilayan din ang nakakamanghang tanawin ng karagatan at buhangin.

Bukod dito, dagdag na atraksyon din ang camel at horse drawn cart rides na bumabaybay sa dunes. Maaari rin mag-paragliding o sandboarding dito. Kung gusto naman tanawin lang ang ganda nito ay maaari itong gawin sa observation deck ng Sakyu Center.

Sa kalapit naman na Sand Museum ay makikita ang mga sand sculptures ng mga artists mula sa iba’t ibang bansa. Ngayong taon ay Germany ang tema ng exhibition na tatagal hanggang Enero 3, 2016.

Mula Tottori Station ay mararating ang Tottori Sand Dunes sa pamamagitan ng pagsakay ng bus. May entrance fee rito na ¥600.

Ngayong panahon ng tag-init, mainam na magtungo rito para sa naiibang desert experience!

Japan naglaan ng ¥19.5B ODA sa Pilipinas para sa pagsasaayos ng traffic congestion, flood risk management

Ni Florenda Corpuz

Pinirmahan nina Finance Secretary Cesar V. Purisima 

at Chief Representative of the JICA Philippine Office Noriaki Niwa 

ang loan agreement na nagkakahalaga ng ¥19.5 bilyon. 

(Kuha mula sa Department of FInance)

Naglaan ang pamahalaang Hapon, sa pamamagitan ng Japan International Cooperation Agency (JICA) ng ¥19.5 bilyon Official Development Assistance (ODA) sa Pilipinas para sa mga proyekto sa road interchange at flood risk protection ng bansa.

Nilagdaan nina Department of Finance (DOF) Secretary Cesar Purisima at JICA Chief Representative to the Philippines Noriaki Niwa ang loan agreement para sa pagsasaayos ng traffic congestion sa Metro Manila at implementasyon ng flood control project sa Cagayan de Oro River, Northern Mindanao.

Nakapaloob sa ODA ang pagsasakatuparan ng Metro Manila Interchange Construction Project (Phase VI) na nagkakahalaga ng ¥7.929 bilyon at ang Flood Risk Management Project for Cagayan de Oro River Basin na aabot sa ¥11.576 bilyon, sa pakikipagtulungan ng Department of Public Works and Highways (DPWH).

Tutulungan ng JICA ang DPWH sa paggawa ng mga flyovers at road links o interchanges sa EDSA/Roosevelt/Congressional, EDSA/West/North, at C-5/Green Meadows at North/Mindanao Ave. upang masolusyunan ang traffic congestion sa Metro Manila.

“To help Metro Manila sustain growth, and develop it as an attractive investment destination, we aim to continue working with the government to enhance connectivity, and mitigate traffic congestion and other hazard risks and urban issues through our cooperation projects,” pahayag ni Niwa.

Katulong ang JICA, ginagawa ng Pilipinas ang Transport Infrastructure Roadmap para sa Metro Manila at karatig-lugar kung saan nakalagay ang “short and long-term strategies to decongest traffic, develop regional growth centers, and enhance the living conditions of people living in Metro Manila, and nearby areas.”

           

Ayon sa JICA, tinatayang aabutin ng anim na bilyon piso kada araw ang taffic cost sa Pilipinas pagsapit ng taong 2030 mula sa kasalukuyang mahigit sa dalawang bilyon piso kung hindi aayusin ang traffic congestion dito.

Tinutulungan din ng JICA ang DPWH sa implementasyon ng structural at non-structural measures para mabawasan ang flood risks sa Cagayan de Oro River Basin. Makakatulong din ang bagong proyekto sa paggawa ng bagong dike at iba pang mga hakbang na proteksyon sa baha sa paligid ng river basin upang tugunan ang mga problema ng pagbaha, at bilang kontribusyon sa sustainable economic development sa mga lugar sa Northern Mindanao. Matatandaang umabot sa humigit-kumulang 1,250 ang nasawi sa paghagupit ng bagyong Sendong sa Cagayan de Oro noong 2011.

Ang JICA ay strategic development partner ng Pilipinas mula pa noong 1960s kung saan umabot na sa 70 bilyon yen ODA (as of 2012) ang nailaan nito sa bansa at nanatiling top donor.

Pangulong Aquino, balik-Japan sa Hunyo

Ni Florenda Corpuz

Pangulong Benigno Aquino (Kuha ni Din Eugenio)

Tokyo, Japan – Halos isang taon matapos ang kanyang huling pagpunta sa bansa ay muling bibisita rito si Pangulong Benigno S. Aquino III para sa isang state visit sa imbitasyon ng pamahalaang Hapon mula Hunyo 2 hanggang 5.

Sisimulan ni Aquino ang kanyang pagbisita sa pamamagitan ng isang state call kina Emperor Akihito at Empress Michiko sa Imperial Palace kung saan isang welcome ceremony at state banquet ang maghihintay sa kanya.

 “As a State Guest, the President will be received by His Majesty Emperor Akihito and Her Majesty Empress Michiko at the Imperial Palace in Tokyo for a Welcome Ceremony and a State Call. Their Majesties will also host a State Banquet in honor of the President,” sabi ng Department of Foreign Affairs (DFA) ng Pilipinas sa isang pahayag.

Makikipagpulong din si Aquino kay Prime Minister Shinzo Abe kung saan tatalakayin ng dalawang lider ang pagpapaunlad sa strategic partnership ng Pilipinas at Japan. Magpapalitan din sila ng pananaw tungkol sa pinakabagong pag-unlad sa rehiyon.

Dadaluhan din ng pangulo ang state dinner na ihahanda ni Abe.

Samantala, sinabi ng DFA na magaganap ang state visit “at an auspicious and important juncture in bilateral ties, which are presently at their most dynamic and excellent levels heading into the 60th anniversary of relations next year.”

           

Samantala, nagpahayag din ng kasiyahan ang pamahalaang Hapon sa nakatakdang pagbisita ni Aquino sa bansa.

“The Government of Japan sincerely welcomes the visit of the President, which will further strengthen the friendly relations between Japan and the Republic of the Philippines,” pahayag ng Ministry of Foreign Affairs (MOFA).

Huling bumisita si Aquino sa Japan noong Hunyo 24, 2014 upang makipagpulong kay Abe sa Tokyo at magbigay ng keynote address sa “Consolidation for Peace for Mindanao Conference” na ginanap sa Hiroshima.

Matatandaan na ilan sa tinalakay sa luncheon meeting nina Aquino at Abe noong 2014 ay ang pagpapatibay sa pagtutulungan ng dalawang bansa sa disaster response at seguridad at agawan sa teritoryo sa rehiyon.

“The President and I agreed to further strengthen our cooperation and security in areas such as disaster relief, building on the track record of cooperation, such as that I have described,” ani Abe.

Ipinaliwanag din ni Abe noon ang mga hakbang na kanilang isinasagawa “under the policy of proactive contribution to peace” para maresolba ang alitan sa rehiyon kabilang na ang muling pagtingin sa Japanese Constitution upang magawa ng bansa na ma-exercise ang “right to collective self-defense” kasama ang Pilipinas at iba pa nitong kaalyado. Matatandaang parehong may sigalot sa teritoryo ang Pilipinas at Japan kontra sa China dahil sa agawan sa West Philippine Sea (South China Sea) at East China Sea.

“In the face of the regional situation becoming increasingly severe, both nations are closely coordinating. I reaffirmed with President Aquino today the significance of the three principles of the rule of law, which I outlined at the Shangri-La dialogue and at the G7 Meeting,” pahayag ni Abe.

Darren Espanto: From ‘The Voice’ stage to MOA Arena

Ni Len Armea

Naging mabilis ang pag-usad ng music career ni Darren Espanto simula nang maging runner-up siya sa “The Voice Kids” noong nakaraang taon. Simula ng matapos ang palabas, dumagsa ang mga proyekto sa 13-taong-gulang na bata tulad ng kanyang first solo concert sa Music Museum at ang pagkakaroon niya ng self-titled debut album, “Darren.”

Lahat ng proyekto na kanyang gawin ay pumapatok gaya ng kanyang album na noong lumabas nitong Disyembre 2014 ay agad na nag-number one sa music stores at maging sa iTunes chart at naging gold record kaagad.

Inamin ni Darren sa ibinigay sa kanya na mini-presscon ng MCA Music na hindi siya makapaniwala sa tagumpay na kanyang nakamit sa loob ng halos isang taon simula ng pumunta siya ng Pilipinas mula sa Calgary, Canada kung saan siya lumaki.

“It’s been less than a year since The Voice Kids. After po ng show, parang ang bilis po ng mga pangyayari and up until now I’m still adjusting but I’m enjoying everything that I do and I’m taking things step by step,” pahayag ni Darren sa panayam ng Pinoy Gazette.

Kaya naman puspusan ang paghahanda ni Darren sa gaganaping major concert sa Mall of Asia Arena sa darating na Mayo 29 bilang regalo sa kanyang mga fans partikular na ang Darrenatics. Pinamagatang “Darren Espanto D birthday Concert,” aminado ang binatilyo na kinakabahan siya lalo na’t malaking venue ang Mall of Asia Arena na kayang pumuno ng 20,000 katao.

“I was a bit nervous but I’m very excited because it’s my first time to perform at MOA Arena. Meydo kinakabahan po ako sa magiging reaction ng tao pero sabi po nila the sales are going well and it’s almost sold out. I’m hoping that it’s going to be a soldout concert,” pag-amin ni Darren.

Kaya naman puspusan ang kanyang paghahanda at pag-eensayo upang mabigyan ng magandang palabas ang libu-libo niyang tagahanga na nagpahayag ng pagsuporta sa kanyang birthday concert. Nagdiriwang ng kanyang kaarawan si Darren ngayong Mayo 24.

Sinabi ni Darren na maraming sorpresa ang kanyang ihahanda partikular na ang pagkanta niya ng medley songs, ballads at acoustic. Mayroon din dancing production numbers na aniya ay kakaiba dahil unang beses niya itong gagawin sa concert.

“Marami pong pasabog and there are things that I’ll be doing for the first time. I am very happy and excited to perform the setlist.

“Mayroon pong acoustic, marami pong medley anf ballads. We’re going to do production numbers that I hope have the same effect as when we’re doing The Voice Kids. Marami pong surprises, there’s a lot of dancing, too,” ani Darren na binansagang “The Total Performer.”

Ilan sa special guests ni Darren sa concert ay ang “The Voice of the Philippines” Season 1 and 2 Grand Champion Mitoy Yonting at Jason Dy, at ang runner-up na si Alisah Bonaobra, host/actor Robi Domingo at marami pang iba.

Kung mayroon man natutuhan si Darren sa mga nagaganap sa kanyang karera, ito ay ang pagiging mapagpakumbaba sa gitna ng tinatamasang kasikatan. Kaya naman hindi maikakaila na magiging isa sa pinakamalaking pangalan sa music industry si Darren sa mga darating na panahon.

“Always stay humble. Without humility, you wouldn’t go as far as you would want to go and always look back to where you started. Sa The Voice po, hindi mo kailangang manalo para mapatunayan ang sarili mo. Just keep doing your best, sabi po sa akin ni coach Sarah [Geronimo],” pagtatapos ni Darren.

  

Japan Fashion Week: Pinakamalaking fashion event sa bansa

Ni Florenda Corpuz

           

Muling nagtipun-tipon ang mga fashion designers, models, manufacturers, apparel retailers, fashion journalists at bloggers mula sa iba’t ibang bansa para daluhan ang pinakamalaking fashion event sa Japan, ang Japan Fashion Week (Mercedes-Benz Fashion Week Tokyo) na ginanap sa Shibuya Hikarie at iba pang lugar.

Tinatayang 52 fashion brands (46 Japanese brands, 6 international brands) ang nagsagawa ng runway show at installation para ipakita sa publiko ang kanilang 2015-16 Autumn/Winter collection.

Bawat brand ay nagpamalas ng orihinal at kakaibang konsepto at tema sa kanilang mga palabas. Sinimulan ito ng “Sretsis,” isang popular na brand mula Thailand sa kanilang floral at fairy tale-inspired show.

Dalawa rin sa mga runway shows na pinakaabangan ng publiko ay mula sa mga sikat na Japanese fashion brands na Hanae Mori at Jotaro Saito.

Tampok sa Hanae Mori ang kanilang 2015-16 Autumn/Winter collection na idinisenyo ng Japanese fashion designer na si Yu Amatsu. Makikita sa kanyang disenyo ang basic brand concept ng Hanae Mori na “Graceful, Gorgeous and Stylish.”

Nagsimula ang karera ni Yu noong 2002. Lumipat siya sa New York noong 2004 kung saan niya unang inilunsad ang kanyang koleksyon. Ang “edgy design and creative theme” na kanyang ipinakita sa GEN ART International Design Competition ang nagbigay-daan upang siya ay makilala internationally. Sa magkasunod na taon ng 2006 at 2007 ay iginawad sa kanya ang “Avant-Garde Grand Prix.”

           

Ang Hanae Mori ay isa sa pinakasikat na Japanese fashion houses sa buong mundo.

Hindi naman binigo ng sikat na Japanese kimono designer na si Jotaro Saito ang kanyang mga tagahanga sa kanyang nakakabighaning 2015-16 Autumn/Winter collection.

Sumabak si Saito sa fashion industry noong siya ay 27-taong-gulang at tinaguriang pinakabatang kimono fashion designer ng bansa. Kilala siya sa istilo na may “classic and contemporary sensibilities, in the pursuit of creating kimono as fashion that compliments contemporary space.” Sa kasalukuyan, kanyang ipino-promote ang “lifestyle of enjoying Japanese taste,” sa kanyang interior at product designs.

           

Ang Japan Fashion Week ay isa sa pinakasikat at pinakamalaking fashion events sa buong mundo na kinabibilangan din ng Milan, Paris, London at New York.

Ilang Japan-based Pinoy bloggers na ang naimbitahang dumalo rito tulad nina Gervin Paulo Macion ng “Jenne Chrisville”, Carey Kho-Watanabe ng “Chic Sensei,” Ashley Dy ng “Candy Kawaii Lover” at Florenda Corpuz ng “The Filipino-Japanese Journal.”

Ang Japan Fashion Week ay isang by invitation only event na ginanap dalawang beses kada taon. Ito ay inoorganisa ng Japan Fashion Week Organization.

Japan, Pilipinas nagsagawa ng joint exercise sa Cavite

Binigyan ng arrival honors ng PCG personnel si Admiral Yuji Sato, 

commandant of JCG nang bumisita nito sa headquarters ng PCG. 

(Kuha mula sa Philippine Coast Guard)

Nagsagawa ng joint exercise ang Japan Coast Guard (JCG) at Philippine Coast Guard (PCG) sa karagatan ng probinsiya ng Cavite upang mapalakas ang pwersa ng dalawang bansa laban sa pirate at magnanakaw sa karagatan noong Mayo 6.

Nakibahagi sa 5th Joint Maritime Law Enforcement (MARLEN) Exercise ang PCG at ang JCG vessel na PLH22 Yashima na dumaong sa South Harbor ng Pilipinas noong Mayo 4.

“The event aims to further enhance the capabilities of PCG and JCG to combat piracy and armed robbery at sea, to acquire knowledge and skills in conducting airlift rescue operations, and to established friendship and mutual understanding among the Heads of Asian Coast Guard agencies specifically between JCG and PCG,” pahayag ng PCG.

           

Ang PLH22 Yashima ay may habang 130 metro at may bigat na 5,204 gross tons. Ito ay pag-aari ng Ministry of Land, Infrastructure and Transport at naka-base sa Coast Guard Office sa Fukuoka.

Sa joint exercise, ginamit ng PLH22 Yashima ang mga assets nito tulad ng Bell 412 helicopter, rigid hull inflatable boat for board at search and seizure procedure habang dineploy naman ng PCG ang floating at air assets.

Nag-obserba sa drill ang mga pinuno ng Asian Coast Guard Agencies na nasa Pilipinas mula Mayo 3-7 para daluhan ang 11th Heads of Asian Coast Guard Agencies-High Level Meeting na ginanap sa Malate, Maynila.

Parehong may sigalot ang Japan at Pilipinas laban sa China dahil sa agawan sa teritoryo sa East China Sea at South China Sea.

‘Omotenashi’ program ng Narita airport para sa int’l transit passengers mas pinalawak

Ni Florenda Corpuz

Kuha mula sa Wikipedia

 Dinarayo ng milyun-milyong dayuhang turista taun-taon ang Japan kaya naman upang mas lalo pang maengganyo ang mga ito na bisitahin ang bansa ay mas pinalawak ng Narita airport ang kanilang “Omotenashi” o Japanese hospitality program para sa mga international transit passengers ngayong Abril.

Kabilang sa hospitality program ang libreng paggamit ng mga international transit passengers (lilipat sa pagitan ng dalawang international flights sa Narita airport) sa Traveler’s Lounge Rassurants na kadalasan ay may bayad na ¥1,030. Dito ay may kape, tsaa at wifi connection.

Magagamit din ng mga international transit passengers ang shower rooms sa halagang ¥500 mula sa dating ¥1,030 sa Terminal 1 at ¥1,000 sa Terminal 2.

Para ma-enjoy ang mga serbisyong ito ay kailangan lamang ipakita ng mga international transit passengers ang kanilang connecting flight ticket o boarding pass sa reception counter ng pasilidad na gustong gamitin.

Bukod sa mga special offers na ito ay may cultural events din na mae-enjoy ang mga international transit passengers na layong hikayatin sila na bumalik sa bansa.

Rickshaw Ride

Masasakyan ang rickshaw, isang tradisyonal na Japanese vehicle, na kadalasang makikita lamang sa mga popular na tourist spots sa bansa. Lilibot ito sa Narita Sky Lounge “WA”, isang bagong pasilidad na nagbukas noong Abril 24. Maaari rin itong kunan ng litrato.

Kimono Experience

Kung nais naman maranasan na makapagsuot ng kimono ay hindi ito imposible sa loob ng Narita Sky Lounge “WA.” May shooting spot din dito kung saan maaaring magpakuha ng litrato habang suot ang kimono.

Maiko Apprentice Geisha Walk-by Event

Tiyak na hahangaan ang mga “maiko” o apprentice geisha na lumilibot sa boarding area sa kanilang naggagandahang suot na kimono at mahinhin na paggalaw.

Bukod sa mga ito ay mayroong din na calligraphy at origami workshops, Japanese concerts at bonsai exhibition.

Mga produktong gawang Pinoy tampok sa trade exhibit sa Tokyo

Ni Florenda Corpuz

Kuha mula sa ASEAN-Japan Centre

Tokyo, Japan – Bumida ang mga produktong Pinoy sa tatlong araw na ASEAN Showcase na ginanap sa ASEAN-Japan Centre sa Onarimon kamakailan.

Ang mga produktong pang-interior at lifestyle ang naging atraksyon sa trade exhibit na may temang “ASEAN Showcase the Philippines: Innovation, Creativity, Naturally Philippines.”

Kabilang sa mga produktong ibinida ay ang mga bag, sapatos, accessories, pottery at gardening items na karamihan ay gawa sa pinya, abaka at sungay ng kalabaw. Agaw-atensyon din ang mga bag gamit ang bamboo basket na gawa ng lokal na tribo sa pamamagitan ng tradisyonal na kasanayan.

Labing-apat na kumpanya mula sa iba’t ibang parte ng Pilipinas ang naimbitahan sa trade exhibit. Sila ay inirekomenda ng Center for International Trade Expositions and Missions (CITEM), at pinili ng Japanese trade expert na ipinadala ng ASEAN-Japan Centre.

Ang nasabing mga kumpanya ay kinabibilangan ng Adante Leyesa Atelier, Ai-She Footwear, Aranaz, CSM Philippines, Inc., Delza's Native Products, Floreia, Julie Anne's Handicrafts, Kilus Foundation Multi-Purpose Cooperative, Lolo Bobby Handicraft, Marsse Tropical Timber Plantations Inc., Nature's Legacy Eximport, Inc., Nooks Manufacturing Intl. Corp., Oricon Corporation at Papel Handicrafts.

Dinaluhan ng humigit kumulang 950 katao ang trade exhibit na patunay sa popularidad ng produktong Pinoy sa mga Japanese buyers na nagsabing mataas ang kalidad ng mga ito. Habang 140 business meetings naman ang isinagawa kung saan ilang kumpanyang Hapon ang nag-trial order sa mga exhibitors.

Ang ASEAN-Showcase ay isang country-specific trade exhibition na ino-organisa ng ASEAN-Japan Centre upang i-promote ang export ng mga ASEAN Member States sa Japan.

Fukushima brewers, nagsama-sama para i-promote ang ligtas na sake

Ni Florenda Corpuz

 Pinangunahan ni Fukushima Sake Brewery 

Association Chairman Inokichi Shinjo ang pagtitipon.

“Fukushima sake is tasty and safe,” ito ang pahayag ng mga miyembro ng Fukushima Sake Brewery Association sa isang pagtitipon na ginanap sa Palace Hotel Tokyo kamakailan.

           

Ayon kay Inokichi Shinjo, chairman ng asosasyon, sa kabila ng kanilang pagsisikap na gawing ligtas, maasahan at masarap ang kanilang sake, isang alcoholic na inumin na gawa mula sa fermented na bigas at tubig, ay nananatili pa rin ang alinlangan ng publiko dahil sa epekto ng 3/11 disaster.

Matatandaang apat na taon na ang nakakalipas simula nang maganap ang Fukushima Daiichi nuclear disaster kung saan tatlo sa anim na reactors ang nagkaroon ng meltdown dahil sa pagkasira ng cooling systems ng mga ito matapos magkaroon ng tsunami na dulot ng lindol.

“Our Association conducts tests on the rice used for making sake. The Fukushima prefectural government examines all the rice produced in the prefecture, and only rice below the measurable limit is used,” saad ng grupo sa isang pahayag.

“Sake breweries in the prefecture have been conducting tests on their own on mother water, unprocessed sake, and sake lees, to be able to distribute only safe, reliable sake onto the market,” dagdag ng grupo.

Siniguro rin ng grupo na ligtas mula sa radiation ang iba pang agricultural products ng Fukushima, at ito ay dumaan sa mahigpit na quality at safety test ng pamahalaan.

Dalawang bansa na ang huminto sa pagbili ng sake mula Fukushima, ito ang China at South Korea. Ngunit patuloy naman ang pagtaas ng sales sa Amerika at mga bansa sa Europa. Hindi man kalakihan ay bumibili rin ang Pilipinas ng sake mula sa lugar.

“There are still negative rumors within Japan, and international exports are also affected. Exports to Asia have been severely restricted, and other countries require radiation tests, showing that there is still significant distrust overseas.”

Sa kasalukuyan ay tatlong sake breweries sa no-entry zone sa paligid ng Fukushima Daiichi Nuclear Power Plant ang nanatiling sarado sa produksyon.