Ramen with Pinoy twist: Combining Filipino favorites’ dinuguan and bagnet

“Feeling gloomy this rainy season? Wake up your senses with some of the country’s beloved dishes – mixed up with a Japanese twist!”

Iyan ang nakakaengganyong caption sa Facebook page ng Bitesized.ph, sa exciting mash-up recipe na tinawag nitong Dinuguan Ramen with Bagnet.

Ang Bitesize ay isang Pinoy grub culture website – ‘your go-to resource for binge-worthy recipes and food marvels’ -- na nagbabahagi ng mga kakaibang kumbinasyon ng samu’t saring Pinoy and international recipes na bagay sa mga Pinoy na mahilig magluto.

At dahil maagang pumasok ang tag-ulan sa Pilipinas buwan pa lang ng Hunyo at maging dito sa Japan ay kalat-kalat din ang pag-ulan at pagkidlat ay swak na swak subukang lutuin ang hindi pangkaraniwang ‘ramen with Pinoy twist’ recipe. Bagay ito sa mga naghahanap ng pambihirang klase ng ramen sa kumbinasyon ng kulturang Japanese at Filipino.

Warmly soothing: Spiced-up traditional ramen

Ang servings nito ay dalawa hanggang apat at isang oras at 15 minuto ng preparation-cooking time. Para sa mga sangkap, ihanda ang mga sumusunod: 

Para sa pork stock: kalahating kilo ng baboy na hiniwa ng maliliit, asin, anim na tasa ng tubig, dalawang piraso ng bay leaves,  isang kutsara ng pamintang buo, isang maliit na pulang sibuyas na hinati sa apat at isang pirasong pork broth cube. 

Para sa dinuguan soup: dalawang kutsara ng mantika, isang piraso ng puting sibuyas, apat na piraso ng bawang, ginadgad na luya, tatlong tasa ng pork stock, isang tasa ng dugo ng baboy, isang bungkos ng tanglad, dalawang piraso ng siling haba, kalahating tasa ng suka, isang kutsarita ng asukal, asin at paminta.

Para sa pag-assembly: dalawang tasa ng sariwang ramen noodles, hiniwang bagnet, tinadtad na spring onions, itlog ng pugo.

Some of the most-craved Pinoy dishes of OFWs and balikbayans

Narito naman ang paraan ng pagluluto:

Para sa pork stock ay lagyan ng asin ang karne saka ito pakuluan sa tubig para palambutin. Isama rito ang bay leaves, pamintang buo, sibuyas at pork broth cube. Hayaan lang ito kumulo hanggang maluto ang karne at ‘pag luto na ay hayaan muna itong nakasalang nang 20 pang minuto. Saka ito tanggalin sa kalan (cool for awhile) at pwede nang salain at ihiwalay ang karne.

Para sa dinuguan soup naman ay igisa ang sibuyas, bawang at luya hanggang sa lumabas ang mabangong amoy nito. Idagdag ang pork stock at karne at ihalo na ang dugo at hintaying kumulo habang hinahalo. Isunod naman ang tanglad, siling haba at suka at hayaang kumulo hanggang tuluyan nang manuot ito sa sabaw. Tanggalin ang tanglad at siling haba, pagkatapos ay timplahan na ito ng paminta, asin at asukal.

Sa pag-assemble, lutuin ang ramen sa loob ng isang minute at saka salain ito habang hinuhugasan sa malamig na tubig. Kumuha ng malaking mangkok at ilagay na ang dinuguan soup at noodles, saka ihalayhay ang lutong bagnet, itlog ng pugo, siling haba at lasona.

Savor the flavor

Pwedeng-pwede mo nang lasapin ang sarap ng traditional ramen ng mga Japanese at paboritong dinuguan at bagnet na ulam ng mga Pinoy.

Bagaman nasa Japan ang maraming Pinoy, maaari pa rin naman lutuin ang dinuguan at bagnet kahit nasaan basta’t susundin lang ang tradisyonal na paraan ng pagluluto nito. Kung may kaibigang magagawi sa Ilocos Norte, maigi na rin ang  magpabili na para sa authentic crispy-savory Ilocos bagnet. Sa Batac at Paoay, Ilocos Norte, nariyan ang Malabed Toledo Snack Hauz na mula 1960 pa ay gumagawa na ng bagnet at Herencia’s Restaurant at Marsha’s Delicacies sa Bantay at Vigan, Ilocos Sur.

Masako Wakamiya: An 82-year-old Japanese ‘ICT evangelist,’ the oldest attendee at Apple’s WWDC

“I didn’t see any apps for the elderly, so I decided to create my own. We easily lose games when playing against young people, since our finger movements can’t match their speed. I wanted to create a fun app to get elderly people interested in smartphones. It took about half a year to develop. Technology has now become my new hobby,” ang masayang pahayag ng 82-taong-gulang na retired banker na si Masako Wakamiya, na ngayon ay isa nang app developer sa panayam ng CNN Money at Fortune sa kanya.

Shattering stereotypes in technology

Madalas natin naririnig ang mga batang advanced ang kaalaman sa teknolohiya, pero pagdating sa mga nakatatandang henerasyon ay ‘di gaano, kaya’t tunay na kahanga-hanga ang mga katulad ni Wakamiya. Patunay ito na ang abilidad na matuto ay walang pinipiling edad kundi nasa  dedikasyon, interes at pagpupursige.

Sa pagsisimula ng Apple Worldwide Developers Conference ngayong buwan, sentro muli ng atensyon ang “technology evangelist” na si Wakamiya, bilang oldest attendee sa conference.

The best part of life is after 60

Unang nakilala ng publiko si Wakamiya, noo’y 79 nang maging tagapagsalita siya sa TEDxTokyo 2014 kung saan niya ibinahagi kung paano siya nagsimulang matutong gumamit ng computer at internet.

“One day, I picked up a magazine and it said, ‘If you have a computer, without stepping outside your house you can chat with people.’ And I thought, ‘Wow, this is it!’ And I immediately – although it was expensive back then – did some impulsive shopping and bought my computer. This one simple shopping changed the second part of my life.”

Aminadong hindi “tech-savvy,” isang “struggle” ang mga sumunod na araw para sa noo’y 60-taong-gulang lalo na’t ‘di pa user-friendly ang mga computers noon.  Subalit, sa kagustuhang maalagaan ang ina habang nagkakaroon pa rin ng komunikasyon sa iba, binuno niya ang tatlong buwan para i-set-up ang computer at makapag-online nang walang tulong ng iba.

Mula rito, sumali siya sa isang “silver club” (online club for over 60s) at natuwa siya sa welcome message ng naturang website – “The best part of life is after 60.”

A wonderful silver life

Dito siya nakakilala ng mga bagong kaibigan at natuto ng maraming bagay gaya ng video editing. Aniya, masaya siyang makipag-usap sa mga ka-edaran niya tungkol sa mga malalalim na paksa.

Inspirado ng stitching hobby ng mga senior citizens at traditional Japanese patterns, nakagawa siya ng Excel art na ginagamit sa computer school classes at maging sa NASA. Bumuo rin siya ng sarili niyang PC textbooks dahil napansin niyang ang mga computer study books ay masyadong boring.

Natuto siya ng Apple Swift programming language sa tulong ng isang kabataan sa pamamagitan ng Skype at Messenger. Kaya’t sa edad na 81 ay nailunsad na niya ang kanyang unang iOS game app, ang Hinadan na base sa traditional Hinamatsuri festival. Ngayon, regular siyang nagbibigay ng computer classes at blogs, at marami na siyang naiisip na ideya para sa apps.

“I have a request for the young folks out there. After you leave, please tell my story to your parents and grandparents,” ang huling mensahe ni Wakamiya sa mga tagapakinig sa TEDxTokyo. 

Anime tourism isinusulong ng JTB, Kadokawa, JAL, at iba pang organisasyon

“Animation can change the times.”

Ito ang saad ni Tsugihiko Kadokawa, association vice president/Kadokawa Corp. Chairman, sa isang news conference kaugnay ng paglulunsad ng Japan Anime Tourism Association.

Inilunsad kamakailan ang Anime Tourism Association mula sa pagtutulungan at pangunguna ng publisher at film studio na Kadokawa Corp., travel agency JTB Corp., Narita International Airport at Japan Airlines Co., upang mas paigtingin pa ang industriya ng turismo sa bansa at pagyamanin ang mga pang-rehiyong ekonomiya sa pamamagitan ng anime at manga. Nagmula ang konsepto mula sa 88-temple route na nilakad ng mga relihiyosong manlalakbay sa isla ng Shikoku.

Sa inisiyatibong ito, mabubuo ang isang travel route na naglalaman ng 88 sacred animation spots o “seichi” sa buong Japan sa pamamagitan ng isang survey pagdating ng Disyembre na mula sa mga itinampok na lugar sa iba’t ibang manga at animation works, maging ang mga museo na nakalaan sa mga nasabing anime at manga at kahit ang mga tirahan ng mismong mga manga artists na may likha ng mga ito.

Maging si Tokyo Governor Yuriko Koike, na isang anime enthusiast ay nangangampanyang gawing “anime land” ang Tokyo. Si Koike ay mula sa Toshima ward kung saan matatagpuan ang Tokiwa-so, ang naging tirahan ng mga legendary artists na sina Osamu Tezuka, Shotaro Ishinomori at Fujiko Fujio.

Aniya, sentro ng asosasyon ang iba pang bansa sa Asya na mayroon nang matibay at malawak na following sa anime at manga, samantalang ipo-promote naman ang mga packaged tours tampok ang mga nasabing lokasyon ng JTB.

Ilan sa mga popular na anime ay ang “Slam Dunk,” “Whisper of the Heart,” “Lucky Star,” “Kimi no na wa,” “Rurouni Kenshin,” “Dragon Ball,” “One Piece” at iba pa.

Key motivation by foreign tourists

Maaaring bumoto ang mga tagahanga ng anime-manga ng kanilang mga paboritong spots para mapabilang sa travel route sa website na ito, animetourism88.com/en/, at base sa magiging resulta nito ay bubuuin ang mga packaged tours na kabilang ang pagbisita sa nasabing 88 animation spots.

“Manga and anime have made a lot of young people from around the world very interested in coming to Japan,” ang pahayag ni Motohisa Tachikawa, JTB spokesman sa isang panayam.

 “We want the anime experience to be not just something people watch but something they traveled to see in person,” dagdag pa ni Yoshiyuki Tomino na siyang association president at Gundam robot series anime creator.

Ayon pa sa Japan Tourism Agency (JTA), sa isang survey nito sa mga turistang French at Thai, bagaman may pagkakaiba sa mga gusto nilang gawin ay parehas naman na naging interesado sila sa Japan dahil sa entertainment – pelikula, drama, anime at manga.

Nakakatulong din ang exposure rito para matutuhan ang salita at kulturang Japanese. Suhestiyon din ang pagkakaroon ng character costumes na maaaring isuot ng mga bumibisita at mga manga-anime related products sa mga anime sites.

Cool Japan initiative

Sa ilalim ng “Cool Japan” initiative, pumalo na sa 19.73 milyon ang foreign visitors nitong nakaraang taon at nito lamang Hulyo ay  umabot na sa 14 milyon na mas mataas nang 26.7 porsyento, ayon sa Japan National Tourism Organization (JNTO).

Pinag-iisipan ngayon kung paano mahihikayat ang mga turista na dumayo sa countryside areas ng Japan, bagaman marami na rin ang mga pumupunta sa Osaka at Kyoto na nagdudulot pa ng accommodation shortages.

“Despite the increasing number of tourists, we haven’t taken full advantage of the abundant resources in rural areas. To lure more foreign visitors to lesser-known areas, I believe promoting tours featuring anime locations can be a good thing,” ani JTA Commissioner Akihiko Tamura.

Alodia Gosiengfiao: Pinay Super Doll

Ni Enrique Toto Gonzaga

Alodia Gosiengfao

Usong-uso na ang cosplay, shortcut para sa “costume play”, na isang klase ng pagtatanghal kung saan ang mga sumasali ay gumagamit ng mga costumespara gayahin ang isang anime character. Ang mga cosplayer ay palaging nakikisalamuha para makagawa ng isang kulturang nakasentro sa pagganap ng isang karakter. Manga o mga komiks na libro at babasahin ang mga paboritong basehan ng mga cosplayer hindi lamang sa Japan kundi sa Pilipinas din.

Isa na ito sa mabilis na tinatanggap na kultura sa Pilipinas na nagbibigay daan din sa isa pang termino na kung tawagin ay “costripping” na galing sa cosplay tripping. Nagpapakita ang mga cosplayer ng sobrang kumpletong kagamitan tuwing may mga kumpetisyon, malaking pagpupulong-pulong, mga kaganapan at pagkikita-kita o “eye ball.”

Isa sa pinakapopular sa larang ng cosplaying sa Pilipinas ay si Alodia Almira Arraiza Gosiengfiao, tubong Quezon City. Bukod sa pagiging cosplayer, isa rin siyang model, recording artist, cosplay props designer at showbiz artist. Naging paborito siyang laman ng mga magazine, diyaryo at mga programa sa telebisyon at radio dahil sa pagiging cosplayer

Halos 10 taon ng nagco-cosplay si Alodia na minsang nakita ng isang Japanese producer sa Singapore at agad siyang inimbitahan na pumunta sa Japan. Lingid sa kanyang kaalaman ay isasama na pala siya sa isang grupo bilang lider ng Super Dolls, isang anime musical group.

Binubuo ang Super Dolls ng tatlong miyembro na kinabibilangan ni Alodia,  Rie at Furaaja. Si Rie ang nanalo sa 2009 Cosplay Summit habang si Furaaja naman ay isa ring popular na cosplayer at anime voice actress.

“Tungkol ito lahat sa cosplay at ang pagtataguyod sa cosplay music, mga damit, gamit, make-up at mga sayaw nito,” ani Alodia nang tanungin siya kung ano ang ginagawa ng grupo.

Magkakaroon ng official launch ang Super Dolls ngayong darating na Abril at magtatanghal din sila sa Akihabara sa Abril 7 kung saan limang kanta ang kakantahin ng Pinoy pride.  Nais ni Alodia na makasama ang mga Pilipino sa Japan upang maging inspirasyon sa mga ito sa larangan ng cosplay at musika.

Tumatayong manager ni Alodia sa pagsisimula ng karera niya sa Japan si Shuichi Fujiyasu, contents producer ng My Style Inc. sa Tokyo.

Siguradong mabilis na makilala si Alodia sa Japan at maganda ang magiging karera niya rito dahil malaking bahagi na ito ng kultura ng bansa. Sa katunayan, maraming mga kabataan ang lumalahok sa cosplaying dito at ilan sa kanila ay halos araw-araw nakasuot ng cosplay outfits.

Nabuo ang Super Dolls noong nakaraang taon kung saan nagkikita-kita ang tatlo sa ginanap na 2012 Big Show. Simula noon, nagkasundo ang tatlo na bumuo ng grupo na siyang magtataguyod sa cosplaying.

Nagsimula si Alodia na mag-cosplay noong 2003 sa edad na 15 matapos na himukin ng kanyang mga kaibigan na sumali sa mga cosplay competitions. Una niyang ginawa ang Priestess mula sa Ragnarok Online sa Ragnalaunch sa Glorietta Mall. Nag-umpisang mapansin si Alodia ng manalo siya ng 3^rd place sa 2003 C3 Convention nang gayahin niya si Gun Mage Rikku ng Final Fantasy X-2.