Negosyo 101: Is simplicity the secret to business and work productivity?

ni MJ Gonzales

Sa isang araw ay makailang beses na nagdedesisyon ang isang tao. Pwedeng sa umaga pa lamang ay  nagtatanong na siya  kung  babangon na ba siya sa higahan o hindi. Sa gabi naman ay matutulog na ba siya o mamaya na? 

Kung aanalisahin ay mas mahirap kung marami kang pinagpipilian kaysa iilan lamang ang iyong pinag-iisipan.  Ang sa huli ay ang kailangan mo lang naman ay sumubok ng ibang paraan para may iba rin na resulta. Malayong-malayo ito sa mga taong paiba-iba o hindi makapagdesisyon sa buhay.

Ano ba talaga?

Lalo na sa panahon na masyado kang abala sa negosyo o trabaho, makakasagabal sa pagiging produktibo ang maraming iniisip.  Kung mabagal o mahina ka sa “decision-making” ay magbubunga rin ito nang matagal na aksyon na posibleng mauwi sa negatibong resulta. Pwedeng mababang kita, dagdag na gastos, ekstrang oras sa trabaho, o kaya naman ay mawala sa iyo ang tiwala ng ibang tao. Pero paano nga ba mapapabilis ang pagdedesisyon?

Ang sabi ng ilan ang isang susi para maging produktibo ay ang pagkakaroon ng “time management.” Tama na mahalaga ang oras para sayangin o ipagpalit lamang sa mga walang saysay na bagay.  Subalit hindi naman lahat ay madaling matukoy kung ano ang may kwenta o wala at kung nararapat o hindi.  Dito na papasok ang pagkakaroon ng simpleng pag-iisip.   

Ang simpleng kaisipan ay hindi nangangahulugan na huwag nang maghangad na maging mainam.  Sa halip ay ipinapaalala nito kung ano ba muna ang mahalaga at dapat inuuna? Tutulungan ka rin nito na iwasan na gawing kumplikado ang bagay-bagay para mayroon kang konsentrasyon.

Ang “Beginner’s Mind”

Ang Japanese chef at may-ari ng Sukiyabashi Restaurant sa Ginza, Chuo, Tokyo na si Jiro Ono ay kinikilalang “Sushi Master.” Ayon sa panayam sa kanya ni Faisal Hoque ng Fast Company Magazine, ang isa sa  mga sekreto umano  nito ay pagkakaroon ng “beginner’s mind” sa paggawa ng sushi. 

Mula sa terminong ginagamit ng Zen Buddhism na “Shoshin,” ang Beginner’s Mind ay may kinalaman hindi sa pagpapalagay base sa naunang pangyayari o susunod.  Ito rin ay ang pagiging bukas sa posibilidad o matutuhan. 

Sa kaso halimbawa ni Ono ay hindi nito uman

o iniisip ang nauna o kasunod niyang gagawing na sushi, sa halip nakatuon lamang ang kanyang konsentrasyon sa bawat piraso na kanyang ginagawa. Hindi niya iniisip ang kanyang magandang reputasyon pagdating sa sushi kundi sa kung ano ang kanyang gagawin lamang. 

Bagay na bagay ang simpleng ideya ng Beginner’s Mind ay hindi lamang sa kalilipat lang ng kumpanya, katatayo lang na negosyo, o sa mga taong may bagong yugto ng buhay.  Ito ay bagay din sa bawat araw ng trabaho at pagnenegosyo para maging produktibo.

Iwasan ang “decision fatigue”   

Sa larangan ng pamumuno ay nagagamit din ang pagiging simple o simplicity para maiwasan ang “decision fatigue” o stress na nag-uugat lamang sa pag-iisip sa bagay-bagay.  Kilala mo ba si dating U.S Pres. Barack Obama at Facebook CEO Mark Zuckerberg? Kung mapapansin ay laging naka-blue or gray suit lamang ang pinalitang pangulo ni Donald Trump noon samantalang lagi namang naka-gray t-shirt at jeans si Zuckerberg. 

Kung bagsak man sa fashion ang dalawa ay hindi nito nababawasan ang kanilang kumpiyansa at galing sa pamumuno. Katunayan base sa isang panayam ng Vanity Fair kay Barack Obama ay sinabi nitong ayaw na niyang paglaanan pa ng lakas at oras kung ano ang kanyang susuutin o kakainin dahil mas maraming mabigat na bagay na dapat niyang gawan ng desisyon.

Sa ibang personalidad gaya ng artista, ang ginagawa nila para mabawasan ang kumplikasyon sa kanilang trabaho ay  kumukuha sila ng personal shoppers at glam team para sa kanilang pananamit at itsura.  Ang iba namang negosyante ay nag-a-outsource  o umuupa ng tauhan  para sa mga  simple tasks gaya ng encoding, researching, transcribing, posting sa social media, lead generation, selling, at iba pa.  Sa halip nga naman na sila ang magpatakbo ng araw-araw na operasyon, ang pinagtutuunan nila ay mga gawain na  makakapagpalago ng kanilang kabuhayan.   

Le Cordon Bleu, naglunsad ng Japanese Cuisine Diploma

Ni Florenda Corpuz

 Nagpakita ng knife skills at iba pang cooking
techniques si chef Kiyoaki Deki, ang Technical
Director ng Japanese Cuisine, sa mga miyembro ng media. 

Opisyal na inilunsad ng Le Cordon Bleu Japan ang pinakabago nitong kurso na Japanese Cuisine Diploma sa isang press event na dinaluhan ng mga miyembro ng domestic at foreign press sa Tokyo kamakailan.

Sinimulan ng Le Cordon Blue Japan ang kanilang Japanese Cuisine Diploma noong Oktubre 2017. Ito ay anim na buwang kurso na nahahati sa apat na antas: ang initiation na matatapos sa loob ng 129 oras kung saan ipapakilala ang fundamental cooking techniques sa Japanese cuisine; ang basic na may 135 oras kung saan patuloy na ide-develop ng mga mag-aaral ang mga technical skills at paggamit ng mga sangkap sa Japanese cuisine at pag-apply nito sa mas kumplikadong recipe; ang intermediate na may 135 oras kung saan patuloy na matututuhan ng mga mag-aaral ang mga advanced techniques at tradisyunal na Japanese dishes sa mas mataas na antas at i-apply ito sa regional Japanese cuisine; at ang superior na may 132 oras kung saan matututuhan ng mga mag-aaral ang dynamism ng Japanese cuisine at ang ebolusyon nito mula sa makasaysayan patungo sa modernong cuisine.

Magsasagawa rin ng mga practical classes, cultural experience activities at industry visits.

Igagawad ng Le Cordon Bleu Japan ang Japanese Cuisine Diploma kapag nakumpleto na ng mag-aaral ang apat na antas ng kurso. Ito ay itinuturing na prestihiyosong kwalipikasyon para sa maraming oportunidad sa buong mundo.

Ang Le Cordon Bleu Japan ay kinikilala bilang unang international culinary institute sa Japan na accredited ng TOW Co. Ltd., ang application body na nag-i-isyu ng “Certification of Cooking Skills for Japanese Cuisine in Foreign Countries,” official guidelines na binuo ng Ministry of Agriculture, Forestry and Fisheries.

May siyam na mag-aaral sa autumn session ng Japanese Cuisine Diploma course: Tatlo mula sa China, tatlo mula sa Taiwan, dalawa mula sa Korea at isa mula sa Brazil, Canada, Hong Kong, Norway, Japan at Pilipinas.

Ang Le Cordon Bleu ay itinatag noong 1895 at may mahigit sa 35 paaralan sa 20 bansa.

           

Emperor Akihito, bababa sa trono sa Abril

Ni Florenda Corpuz

Kuha mula sa © The Imperial Household Agency

Itinakda na ang Abril 30, 2019 bilang petsa nang pagbaba sa trono ni Emperor Akihito, 83.

Ito ay matapos aprubahan ito ng Gabinete ni Prime Minister Shinzo Abe kamakailan.

Matatandaang nagpahiwatig ng kagustuhan si Akihito na bumaba sa trono dahil sa kanyang edad at kalusugan na hadlang umano sa kanyang pagtupad sa tungkulin.

“I am already 80 years old, and fortunately I am now in good health. However, when I consider that my fitness level is gradually declining, I am worried that it may become difficult for me to carry out my duties as the symbol of the State with my whole being as I have done until now,” aniya sa isang pre-recorded video message na inere sa telebisyon noong Agosto 8, 2016.

Naluklok bilang emperador si Akihito noong siya ay 55-anyos matapos pumanaw ang kanyang ama na si Emperor Hirohito (Emperor Showa). Sumailam siya sa operasyon dahil sa prostate cancer noong 2003 at coronary-artery bypass noong 2012.

Nabisita na niya ang 47 prepektura sa buong Japan at napuntahan na rin ang 50 bansa simula nang siya ay Crown Prince pa lamang kabilang ang Pilipinas noong Enero 2016 kung saan inalala nila ni Empress Michiko ang mga sundalong Pilipino at Hapon na nasawi sa World War II.

Nakatakdang pumalit sa kanya bilang emperador ng Japan ang anak na si Crown Prince Naruhito, 57.

Si Akihito ang unang emperador ng Japan na magbibitiw sa tungkulin sa loob ng humigit-kumulang 200 taon. Ito ay matapos gumawa ng panukalang batas ang pamahalaan kasunod nang pagpapahiwatig ni Akihito na bumaba sa trono. Isinabatas ito ng Diet noong Hunyo 9.  

           

Nakasaad sa kasalukuyang Imperial system na hindi maaaring bumaba sa trono ang isang emperador hangga’t siya ay nabubuhay.

Plano ng gobyerno na magsagawa ng Enthronement Ceremony sa taglagas ng taong 2019. Inaasahan din ang pag-anunsyo ng bagong era sa kalagitnaan ng 2018.

Matatapos ang kasalukuyang Heisei era sa pagbaba sa trono ni Akihito.

Plano rin ng gobyerno na magdeklara ng 10 araw na sunud-sunod na holiday kabilang ang mga national holidays sa panahon ng Imperial accession.

‘Loving Vincent’: Vincent van Gogh’s masterpieces come alive to cinema art

Ni Jovelyn Javier

“I want to touch people with my art. I want them to say ‘he feels deeply, he feels tenderly’.” – Vincent van Gogh

History in the making

Itinuturing na isang ‘groundbreaking homage’ ang award-winning animated film na “Loving Vincent” na siyang kauna-unahang fully-oil painted feature film sa kasaysayan ng paggawa ng pelikula kung saan tampok ang  65,000 hand-painted keyframes na gawa ng 123 professional artists sa studios sa Poland at Greece.  

Para maipinta ng mga artists para sa big screen ang mga napiling obra na ayon sa istilo ng iconic Dutch artist na si Vincent Willem van Gogh, dumaan muna sila sa masusing pagsasanay bago opisyal na sinimulan ang design painting animation process.

Unang kinunan ang mga eksena bilang live action (with actors) at ang mga ito ang ginamit na templates ng mga artists sa pamamagitan ng idinisenyong Painting Animation Work Station (PAWS) na may nakakabit na computer, camera, lamp, at projector sa canvas ng mga artists habang ipinipinta nila ang mga eksena at backgrounds.

Ang epekto ay parang pinapanood mo ang mga obra ni Van Gogh na nabubuhay sa screen mula sa kumbinasyon ng pagganap ng mga aktor at pagpipinta ng painting animators.

Remarkable passion and talent but ill-fated life  

Hango ang kwento mula sa 800 sulat ng artist sa kanyang nakababatang kapatid na si Theo. Nagsisimula naman ang pelikula noong summer 1891, isang taon mula nang pumanaw si Vincent (Robert Gulaczyk) sa Auvers-sur-Oise (northwestern suburbs of Paris, France).

At dahil sa naiwan nitong huling sulat para kay Theo, ito ang magbubunsod sa paglalakbay ni Armand Roulin (Douglas Booth), anak ni postmaster Joseph Roulin (Chris O’Dowd) at malapit na kaibigan ni Vincent. Ito ay para unti-unting maintindihan at tuklasin ang misteryo ng pagkatao at pagkamatay ni Van Gogh.  

Kabilang din sa cast sina Saoirse Ronan, Eleanor Tomlinson, Jerome Flynn, John Sessions, Aidan Turner, Helen McCrory, James Greene, Bill Thomas, Robin Hodges, at Martin Herdman. Mula sa BreakThru Films, direksyon ni Dorota Kobiela/Hugh Welchman at suportado ng Polish Film Institute, Van Gogh Museum at iba pang organisasyon sa sining.

Seeing the world in the eyes of Van Gogh

“We cannot speak other than by our paintings.”

Tinatayang 125 paintings ni Van Gogh ang ginamit para sa pagbuo ng kabuuan nito na tampok ang mga mahahalagang lugar at tao sa buhay ng artist. Ilan dito ay kanyang mga pinakatanyag na gawa gaya ng “The Yellow House,” “Café Terrace at Night,” “Starry Night over the Rhone,” “Church at Auvers,” “Portrait of Paul Ferdinand Gachet,” “Wheatfield with Crows,” “Portrait of Pere Tanguy,” “Bank of the Oise at Auvers,” “Portrait of Postman Joseph,” at “Marguerite Gachet at the Piano in the Garden.”

Sadyang totoo sa kanyang mga salita ang tinaguriang “Father of Modern Art” dahil sa istilo niya ng pagpipinta na repleksyon ng kanyang emosyon at kung paano niya nakikita ang mga bagay-bagay sa mundo. Makikilala agad ang mga obra niya dahil sa mga natatanging katangian nito ng dramatic brush strokes at intense vibrant colors na nagpapahiwatig ng kahulugang higit sa panlabas na anyo ng anumang paksa nito.

Dahil sa payo at suporta ng kapatid na si Theo, nagsimulang magpinta si Van Gogh sa edad na 28-taong-gulang. At bagaman walong taon lamang siya naging pintor, nakagawa siya ng mahigit sa 800 oil paintings at 1,100 na drawings at sketches sa gitna ng kanyang pakikipaglaban sa mental illnesses at pang-aalipusta ng mga nakasalamuha niyang tao sa kanyang maraming paglalakbay sa Europa dahil sa pagiging iba nito.

Whang-Od Oggay: Isang ehemplong simbolo ng preserbasyon ng kultura ng pambabatok

Via Pinterest

Dumayo kamakailan sa Maynila ang tinaguriang pinakamatandang “mambabatok” na si Apo Whang-od Oggay sa nakaraang Manila FAME 2017, isang pangunahing design-lifestyle event na nagsasagawa ng exhibition ng mga design innovation, artisanal products at craftsmanship na isinasagawa sa World Trade Center. 

Ito ang una kauna-unahang beses na bumisita sa siyudad ang sikat na traditional Kalinga tattoo artist kasama ang ilang kamag-anak mula sa tirahan niya sa Buscalan, isang mabundok na nayon na matatagpuan sa probinsiya ng Kalinga.

Dinala sa Maynila ng Center for International Trade Expositions and Missions (DTI-CITEM) ang centenarian para iendorso ang nominasyon nito sa National Living Treasure Awards.

“Masaya ako na ma-invite kami sa Manila FAME, proud kami... ‘Pag nag-uusap kami, gusto niya. Sabi ni lola, gusto niya rin daw makita ang Maynila. Sabi ko, kung gusto mo, sige para ma-meet din niya ‘yung ibang kultura,” ang tinuran ni Grace Palicas, pamangkin sa tuhod ni Whang-od, tungkol sa naging karanasan nila sa naturang event.

Traversing the times: Continuing a deep-seated tradition

Bago nito, napakaraming mga banyagang turista at mga kapwa-Pinoy ang masugid na nilalakbay pa ang kalayuan ng Buscalan para lamang magkaroon ng pagkakataon na makakuha ng tattoo na gawa ni Apo Whang-od gamit ang tradisyonal at natatanging kultura ng “pambabatok” (ancient art of hand-tapped tattoos).

Ayon sa panayam sa kanya ni Kate Springer ng CNN, “Magpapatuloy ang tradisyon hangga’t may mga taong pumupunta para magpa-tattoo. Hangga’t nakakakita ako ng malinaw ay patuloy ko pa rin gagawin ito. Saka lamang ako titigil kapag nagsimula nang lumabo ang mga mata ko,” ang pahayag ng centenarian tattoo artist.

Bagaman wala siyang sariling anak, nanindigan siyang mananatiling buhay ang tradisyonal na sining ng pambabatok sa pamamagitan ng kanyang mga babaeng pamangkin-sa-tuhod na sina Grace Palicas at Elyang Wigan na maraming taon na niyang sinasanay hanggang ngayon.

Tunay na hindi simple ang pagpapanatili sa tradisyon lalo na’t maaari lamang ito ipasa sa mga kamag-anak dahil sa paniniwalang masisira ang sinaunang kultura na higit na pinapangalagaan ni Apo Whang-od.

Dagdag pa ni Apo Whang-od, noong unang panahon ay tanging mga Butbut warriors ang nabibigyan ng batok tattoo kapag sila ay nakapatay sa gitna ng digmaan. Itinuturing naman na aksesorya ang mga tattoo sa mga kababaihan noon, isang bagay na nagpapatingkad ng kagandahan at simbolo ng tapang.

The traditional process of Apo Whang-od

Malayo sa modernong paraan ng tattooing ang proseso ni Apo Whang-od ngunit ito mismo ang dahilan kung bakit itinuturing na kulturang kayamanan ang pambabatok.

Simple lang ang mga materyales na kailangan ng centenarian – isang tinik mula sa puno ng pomelo, bamboo stick, uling at tubig.

Maaari rin mamili ang mga magpapa-tattoo ng mga traditional designs gaya geometric patterns, centipedes, hugis ng puno at iba pa na para sa mga mambabatok ay may malalim na kahulugan.

Nagmumula ang tinta sa pinaghalong tubig at uling, pagkatapos nito ay maaari nang iguhit ni Apo Whang-od ang iyong napiling disenyo gamit ang manipis na tangkay ng damo. Susundan ito ng hand-tapping nang unti-unti gamit ang tinik at bamboo stick para maiukit sa iyong balat ang tinta. At bilang pagtatapos, iuukit ni Whang-od ang kanyang lagda na binubuo ng tatlong tuldok. Saka niya ito papahiran ng virgin coconut oil.

Aniya, ‘di tumatanggap ng customized na disenyo si Apo Whang-od.  Nagsisimula naman sa Php300-500 ang presyo ng batok tattoo at nasa Php100 naman ang 3-dot signature ni Apo Whang-od. 

ReTuna Aterbruksgalleria: Kauna-unahang recycled goods mall

Isa sa pangunahing problema ng anumang bansa ang maayos na waste management. Mahalaga na nahahati ang mga iba’t ibang uri ng mga basura sa dalawang klase — biodegradable (nabubulok) at non-biodegradable (plastic products/packagings, grocery bags, styrofoam, aluminum cans, bottles, glass, metal scraps, wood scraps) na kadalasan ay maaaring i-recycle o gamitin muli.

Ang ideyang ito ng recycling ang konsepto sa likod ng ReTuna Återbruksgalleria, ang unang shopping center sa mundo na ang mga produkto ay tanging repaired at upcycled goods lamang. Matatagpuan ang naturang mall sa bayan ng Eskilstuna na may 100 kilometro pakanluran ang layo mula sa capital city ng Sweden na Stockholm.

Traditional yet innovative: Re-use, recycle and redesign

Ayon sa 2017 report ng World Economic Forum at Ellen MacArthur Foundation na inilunsad sa Davos, Switzerland, ang The New Plastics Economy: Catalysing action, ipinapanukala nito ang makabagong perspektibo sa nakasanayan nang konsepto ng “reduce, re-use, and recycle” patungo sa “re-use, recycle and redesign.”

Alinsunod sa panukalang ito ang ginagawa ng ReTuna Återbruksgalleria, na nagbukas noong  2015 at pinapamahalaan ng munisipalidad nito ngunit nakikipagkolaborasyon sa mga pribadong negosyo at social enterprises. At dahil dito, nabubuksan ang mas maraming oportunidad para sa mga bagong negosyo, mga trabaho, mga local artisans at workshops sa naturang lugar.

At dahil ‘di ito pangkaraniwang shopping mall, mayroon din itong conference facilities, exhibition area, cafe restaurant (with variety of organic options), at training college kung saan maaaring mag-aral ng recycling.

Sa recycling depot ng mall, inaayos rito ang mga dropped-off incoming goods na maaari pang ayusin (repair) at gawing bago muli (refurbish). Pagkatapos, ipinapasa ito sa mga workshops para kumpunihin at gawing maayos na produkto uli saka ito ibabalik sa mall at ibebenta sa 14 na specialist shops na may iba’t ibang mga produkto – ilan lamang dito ang furniture, building materials, clothes, gardening tools, bikes, toys, computers, at audio equipment.

The circular economy: Turning waste into opportunities

Bahagi ng tagumpay ng ReTuna Återbruksgalleria ay ang kontribusyong mula sa mga mamamayan. At sa pagsuportang ito ay nakatutulong din sila sa tinatawag na “circular economy,” isang alternatibong industrial production model na hindi lang tungkol sa recycling. Isang konsepto na ‘di gaanong nakadepende sa mga pangunahing enerhiya at materyales. 

Inilarawan ng The Conversation ang circular economy na isang restorative process “that involves fundamental redesign (so they last longer, so they can be repaired and upgraded, so they can be reused or resold, and so their materials can be used in remanufacture).”

Kaugnay nito, mula sa New Plastics Economy ay ilulunsad din sa susunod na taon ang dalawang global innovation challenges – (1) redesign of materials and packaging formats, (2) building a set of global common standards (global plastics protocol) for packaging design.

At sa pamamagitan ng Circular Design Guide, maaaring sumali ang mga designers, innovators, at entrepreneurs para mapag-aralan ang iba’t ibang mga sistema at hakbang ukol sa circular economy nang sa gayon ay makatulong sa patuloy na pagsusulong ng circular economy bilang pangkalahatang modelo ng produksyon sa buong mundo.

Paggamot sa Alzheimer’s disease gamit ang blood infusion, pinag-aaralan

Inilabas kamakailan ang resulta ng isang modernong pag-aaral ng mga siyentipiko ng Stanford University tungkol sa paggamot sa Alzheimer’s disease sa pamamagitan ng pagsasalin ng dugo sa isang presentasyon sa Clinical Trial on Alzheimer’s Disease conference.

Sa naturang pag-aaral, sinuri ang mga naging epekto ng blood infusion na nanggaling sa mga nakababatang donors sa mga pasyente na mayroong mild-moderate na estado ng Alzheimer’s disease.

Connecting the blood system through parabiosis

Sa pamamagitan ng binuong proseso na tinatawag na parabiosis, unang sinubukan ang eksprimento kung saan napagkokonekta sa parehas na blood system ang mga bata at nakatatandang daga, saka ito sinundan ng pagsasalin ng dugo ng batabng daga sa as matandang dugo.

Mula sa unang bahagi, nakitaan ng malakihang pagbabago ang mga batang daga gaya na lang ng pagkakaroon ng senyales ng chronic diseases at older metabolism na kadalasang mayroon sa mga mas matandang daga. At sa ikalawang bahagi, nagpakita naman ng memory improvement (ability to execute mazes, easily locate definite target) ang mga matandang daga na epekto ng blood infusion ng mga batang daga. 

   

Significant improvements on functioning independently  

“We were expecting to find that the plasma (colorless liquid part of blood) was safe. I wasn’t expecting to find any change in cognitive measures,” ang pahayag ni Dr. Sharon Sha, Stanford clinical associate professor - neurology and neurological sciences.

Bunsod nito, napagpasyahan ng mga siyentipiko na alamin kung magkakaron din ng parehas na resulta sa mga human subjects (na nasa unang bahagi ng Alzheimer’s). Isinagawa ito sa siyam na volunteer participants sa loob ng apat na linggo kung saan tumanggap sila ng blood infusion isang beses isang linggo mula sa mga young donors na nanggaling sa Stanford blood bank.

Pagkatapos nito ay binibigyan ng anim na linggong interval ang mga volunteers para maobserbahan nila ang mga epekto. Sa ikalawang hakbang ay kumuha rin ng siyam na dagdag pang volunteers. Sa kabuuan ay may 18 na volunteer participants ang naturang pag-aaral.

Nakita sa resulta ng 18 participants na nagkaroon sila ng malakihang positibong pagbabago sa kanilang abilidad sa paggawa ng mga ilang bagay gaya ng kakayahang mamili at lumabas nang mag-isa at walang tulong, gayon din ang abilidad na kontrolin ang kanilang paggastos o pananalapi at balansehin ang kanilang checkbooks.

Sa kabila nito, inamin ng mga siyentipiko na marami pang kailangang pag-aralan at alamin, gaya na lang ng proseso kung paano nga ba nakatutulong ang young plasma sa pagpapabuti ng independent function ability ng mga Alzheimer’s patients. Hindi rin tinukoy sa pag-aaral kung may mga pagbabago sa cognitive functions, gayon din kung may nagbago sa brain protein plaques na isang senyales na nakikita sa utak ng mga pasyente. 

Permanenteng ‘Sailor Moon’ store sa Harajuku, bagong sentro ng atraksyon sa Moonie fandom

Ipinagdiriwang ngayong taon ang ika-25 anibersaryo ng “Sailor Moon,” na nagsimula bilang manga noong 1991 mula kay Naoko Takeuchi at nasundan ng animated TV series ng sumunod na taon na natapos noong 1997. Simula noon, lumawak ang following nito sa loob at labas ng Japan.

At bahagi ng anibersaryo ay inilunsad na rin kamakailan sa publiko ang opisyal at permanenteng Sailor Moon store na matatagpuan sa Laforet building sa Harajuku district. Mayroong dalawang bahagi ang shop – ang Sailor Moon area at isang base sa isang misteryosong fantasy world.

Ito ang kauna-unahang permanenteng specialty shop kung saan makakabili ng mga exclusive Sailor Moon-inspired goods – iPhone cases, flip cases, acryclic keychains (classic Sailor Moon or special Princess Serenity versions), clear files, drop can, caramel tin, dessert tea, shirts, handkerchief, make-up powder, bags, at accessories.

Pinamamahalan ito ng Toei Animation at bukas mula 11:00am hanggang 9:00pm. Makakakuha rin ng updates mula sa kanilang official Twitter account: @sailormoonstore. 

Sailor Moon at the heart of Japanese street fashion

“Because more goods have been released since the 20th anniversary, many fans are requesting a permanent store,” ang pahayag ng isang Toei Animation Co. spokeswoman sa panayam ng The Japan Times.

Ayon pa sa Anime News Network, kung mayroon mang anime series na pinakabumabagay sa Harajuku, na kilala bilang fashion district, wala nang iba kundi ang Sailor Moon.

 Simula nang sumikat ang series ay naging patok ang mga alahas at aksesorya na ginagamit ng pangunahing karakter na si Tsukino. Nagkaroon pa nga ng maraming kolaborasyon ang Sailor Moon sa high-end accessory brand na Q-Pot. Mayroon din mga pop-up stores sa Harajuku at iba pang mga Sailor Moon-themed shops.

Sailor Moon Café

Binuksan din ang temporary Sailor Moon café sa Tokyo nito lamang habang bukas ang store sa Osaka, Nagoya at Fukuoka hanggang Disyembre 3. Inaasahan naman na gagawin na rin na permanente ang Sailor Moon café gaya ng store sa mga susunod na plano ng Toei Animation at ni Naoko Takeuchi.

Bahagi ng menu nito ang Good Friends Luna and Artemis Burger (¥1,690), Tuxedo Mask Jet-Black Curry (¥1,490), Legendary Holy Grail Rainbow Moon Chalice Parfait (¥1,490), Silver Millenium Pancakes (¥1,490), Sailor Mercury Bubble Spray Cheesecake, Sailor Mars Burning Mandala Anmitsu, Sailor Jupiter Supreme Thunder Cream Puff, Sailor Venus Love Me Chain Waffles, Sailor Moon Mango Cream Smoothie (¥990), Chibi Moon Strawberry Milk Smoothie (¥990), Luna P Cotton Candy Soda (¥1,090), at Forbidden Smoothie of Haruka and Michiru (¥1,190).

Kinakailangan ang advanced reservation dito na may cover charge na ¥650 at makakakuha ng isang poster at isang luncheon mats na may Sailor Moon Café artwork. Mayroon din mga merchandise na mabibili rito.

PAL nagdagdag ng direktang biyahe sa probinsya

Para   makalipad sa iba pang destinasyon, ang mga taga-Davao ay bumabiyahe pa sa Cebu at ang taga-Cebu ay pumupunta pa ng Maynila. Sa dagdag na eroplano at biyahe ng Philippine Air Lines (PAL) ay mababawasan na ang ganitong abala. Kamakailan lang ay inilunsad na ng PAL ang ruta na Davao to Cagayan de Oro, Davao to Tagbiliran, at Davao to Zamboanga City.  

Mayroon na rin Cebu to Beijing flight, bukod pa sa mga biyaheng Cebu-Camiguin, Cebu-Legazpi, Cebu-Ozamiz, at Cebu-Siargao.  Ang isa pang susunod na bagong international flight ng PAL ay mula sa Cebu papuntang Bangkok, Thailand.

Inaasahang makatutulong ang mga flight na ito sa mga pasaherong may kapasanan at may ibang espesyal na pangangailangan. Bukod dito ay mas madaling mapapaigting ang turismo sa Davao, Cebu at iba pang lalawigan. 

Samantala, parating na rin ang bagong biling eroplano ng PAL. Ilan sa nakatakda nilang magamit ay walong A321 Neo na may 200 upuan, dalawang B347, at apat na A350 aircraft. Ang huling dalawa ay may 280 upuan bawat isa. 

“Additional airplanes means we can do more flights to more destinations,” saad ni Ronald Mangahas, ang Express Assistant Vice President For Airport Services Outstation ng PAL, sa media.

Lodging tax ipapataw ng Kyoto sa mga turista

Ipinasa kamakailan ang isang ordinansa na magpapataw ng lodging tax sa mga lokal at dayuhang turista na mananatili sa mga hotels, inns at pribadong lodging services sa lungsod ng Kyoto.

Ipapatupad ang ¥200 hanggang ¥1,000 na lodging tax kada gabi sa bawat turista na mananatili sa lungsod base sa halaga ng kanyang kwartong tinutuluyan. Sisimulan ito mula Oktubre 2018.

Tinatayang aabot sa ¥4.56 bilyon ang malilikom dito ng lungsod ng Kyoto na gagamitin sa promosyon nito sa turismo.

Aabot sa humigit-kumulang 55 bilyong katao ang bumisita rito noong 2016.

Nasa halos 2,500 lodging services ang matatagpuan dito na karamihan ay mga guest houses at boarding houses.

Nakapagtala ng record breaking na 7.86 milyong pananatili ng mga dayuhang turista sa mga hotel at inn sa buong Japan noong nakaraang Abril kung saan pumangatlo ang Kyoto sa 689,600 kasunod ng Tokyo sa unang pwesto at Osaka sa pangalawang pwesto. Hindi naman kabilang dito ang mga dayuhang turista na nanatili sa mga pribadong lodging services tulad ng Airbnb at mga cruise ships.

Samantala, sinimulan nang tugunan ng pamahalaan ang problema sa kakulangan sa mga hotel at inn sa pamamagitan nang pagpayag sa pagpapaupa ng mga Airbnb hosts sa Japan ng kanilang mga bahay at kwarto sa mga turista. Isinabatas ito ng Diet noong Hulyo.