Japan papasok sa Reiwa era simula Mayo 1

Ni Florenda Corpuz

Simula Mayo 1 ay papasok na ang Japan sa Reiwa era kasabay nang pag-upo ni Crown Prince Naruhito sa Chrysanthemum Throne bilang bagong emperador ng bansa kapalit ng kanyang ama na si Emperor Akihito na bababa naman sa trono sa Abril 30.

Nitong Abril 1 ay inanunsyo ni Chief Cabinet Secretary Yoshihide Suga ang pangalan ng bagong era pagkatapos ng espesyal na pagpupulong ng Gabinete kung saan itinaas niya ang isang karatula na nakasulat ang kanji characters nito.

Ayon kay Suga, ang pangalan na “Reiwa” ay hango mula sa “Manyoshu,” ang pinakalumang koleksyon ng tula ng Japan. Ang unang kanji character na “rei” ay sumisimbolo sa “good fortune” habang ang pangalawang kanji character naman na “wa” ay nangangahulugang “peace” o “harmony.”

Ang tula kung saan ito hinango ay naglalarawan sa “ume” (Japanese apricot flower) na namumulaklak sa panahon ng tagsibol matapos ang panahon ng taglamig.

Ang Reiwa ang pang-248 na era name ng Japan simula nang itatag ang Chinese-style system noong 645. Ito ang unang beses na kinuha ang era name ng bansa mula sa classical Japanese literature imbes na sa Chinese.

“On May 1, His Imperial Highness the Crown Prince will accede to the Imperial throne, and this new era name will be used from that day forward. I ask for the understanding and cooperation of the people on this.

“The government is taking all possible measures to prepare for this historic succession to the Imperial throne from a living Emperor – the first such instance in approximately 200 years – to take place smoothly, and for the Japanese people to celebrate the day with one accord,” pahayag ni Prime Minister Shinzo Abe sa isang press conference na ginanap matapos ang pag-anunsyo.

“Era names have, together with the long-standing tradition of the Imperial Household and a profound wish for the peace and security of the nation and the well-being of the people, woven together the history of our nation that spans almost 1,400 years,” aniya.

Ang pangalan ng era o “gengo” sa Japan ay ginagamit sa mga barya, kalendaryo, papeles at iba pa. Ginagamit din ito sa Japan sa pagbibilang ng taon.

“Era names are also integrated into the hearts and minds of the Japanese and support the Japanese people’s inner sense of unity. It is my sincere wish that this new era name will also be widely accepted by the public and take root deeply within the daily lives of the Japanese people,” dagdag pa ng lider ng Japan.

Pagbaba sa trono

Kasabay nang pagbaba sa trono ni Emperor Akihito, 84, ay ang pagtatapos din ng Heisei (achieving peace) era na nagsimula noong Enero 8, 1989.

Nagsimula ang Japan sa pagpili sa pangalan ng bagong era simula noong Meiji Period tuwing may bagong emperador na uupo sa trono.

Sa panayam kay Emperor Akihito nitong Pebrero sa selebrasyon ng ika-30 anibersaryo ng pag-upo niya sa Chrysanthemum Throne ay sinabi nito na patuloy siya sa pag-iisip kung paano siya magiging magandang simbolo sa taumbayan.

“Ever since I ascended the throne, I have spent my days praying for the peace of the country and the happiness of its people, as well as contemplating how I should behave as a symbol,” pahayag ng Emperor.

“The journey to figure out the idea of a symbolic emperor, as defined by the Constitution, has been endlessly long, and I hope my successors in the next eras to come will keep exploring an ideal form of this symbolic role and build on the version from this departing era,” aniya.

Matatandaan na noong 2016 ay nagbigay ng talumpati ang Emperor na nagbibigay senyales ng kanyang hangarin na bumaba na sa trono dahil sa kanyang edad at kalusugan. Siya rin ang kauna-unahang emperador na bababa sa kanyang trono sa loob ng 200 taon.

                                                                                                                                

Bagong simbolo ng Japan

Ipinanganak noong 1960 si Crown Prince Naruhito, 59, na siyang panganay sa tatlong magkakapatid. Siya ang magsisilbing ika-126 na emperor sa kasaysayan ng Japan at sinasabing hinog na para mamuno sa Imperial Throne sa dami na ng ginagawa nitong opisyal na trabaho.

Maging siya mismo ay tahasang nagsasabi na handa na siya sa mga responsibilidad.

“When I think of what is coming up, I feel very solemn,” pahayag ni Crown Prince Naruhito noong kanyang kaarawan nitong Pebrero.

Lumaki sa Tokyo, nagtapos si Crown Prince Naruhito sa Gakushuin University ng kurso sa kasaysayan. Pagkaraan ay nag-aral siya sa Merton College ng Oxford University ng kursong history transportation sa loob ng dalawang taon.

Siya ang kauna-unahang tagapagmana sa trono na pinayagang mag-aral sa ibang bansa. Nilarawan niya ang kanyang pag-aaral sa Oxford na “happiest years of my life” sa isang libro na inilathala.

Nakilala rin si Crown Prince Naruhito sa matagal niyang panliligaw kay Princess Masako at ang pagprotekta niya sa kanya lalo na noong mayroong matinding pressure na mag-anak ng lalaki.

Mayroong anak sina Prince Naruhito at Princess Masako na si Aiko, 17.

May pera sa paglilinis

Maraming bentahe ang palilinis gaya ng pagkakaroon ng malusog na kapaligiran at mainam na kalusugan.  Sa usapin ng mapagkakakitaan, ang paglilinis ng bahay ay magdudulot din ng kabuhayan o dahilan para makatipid. Kaya kung tinatamad kang linisin ang pinaglumaan mo noong  2018 ay narito ang ilang dahilan para sipagin ka: 

Handmade products made in recycled materials.  Offline o online ay marami ang handmade business na may kinalaman sa  paggamit ng recycled materials. Kung ikaw ay malikhain, dapat kang maglinis ng iyong kuwarto o bahay para makaipon ng materyal  na iyong mare-recycle at maibebenta. 

Ilan sa posibleng mapaggamitan ng iyong recycled materials ay pagdidisenyo ng scrapbook, dekorasyon sa bahay, at  ilang kagamitan. Maaari rin na recycled material mismo ang magamit para makagawa ng  burloloy, bag, damit, apron, at organizer. 

Kumita sa segunda-manong gamit. Maaaring ang iyong pinaglumaan pero  may maganda pang kalidad na kagamitan ay maibenta online.   Kung tutuusin nga ay kahit ano ay pwedeng ibenta sa mga online buy and sell sites. Kaya tiyak na kung maglilinis ka ay may mapagkakakitaan ka.

Ilan sa pwedeng maibenta online o offline ay segunda-manong libro, mobile phone, printer, music player, camera, accessories sa camera o computer, cabinet, at iba pang gamit sa bahay.  

Magbenta sa junk shop. Magpahanggang sa ngayon ay patok pa rin ang mga junk shops sa Pilipinas. Ilan sa mabenta sa mga ito ay boteng babasagin o plastic, bakal, diyaryo, papel na puti, karton, at kahit  mga sirang appliances. 

Bukod sa mga junkshops ay mayroon din iba pang namimili ng junk materials. Ilan na rito ang namimili ng tansan, retaso ng damit para gawing basahan, foil wrapper ng mga junk food  para ipalaman sa stuff toys, papel para sa paper mache crafts, at iba pa.

Makamenos sa sunod na pagbili. Maituturing na gastos ang pagbili ng bagay  na hindi naman kailangan.  Hindi kailangan kasi mayroon naman pala sa bahay na natatago o natatakpan lamang. Sa paglilinis ay nakikita ang mga bagay na nawawala o maaaring magamit muli.

Isa pa’y maoorganisa rin ang mga ito sa tamang lagayan para madaling makuha sa susunod na kakailanganin.  Kadalasan ang mga bagay na nakukuha sa paglilinis ay maliliit pero malaki ang pakinabang  gaya ng paper clip, hairpin,  safety pin, tape, panulat, can opener, at screw driver.

Gayon din ay maaaring makita ang pwedeng gamitin na alternatibo. Halimbawa ay bag na pamasok, container para sa mga pagkain sa  kusina, o kaya lalagyan ng mga libro.

Masuri ang mga kagamitan para makatipid sa bill. Maraming bahagi ng bahay na hindi kadalasang napapansin maliban na kung ikaw ay maglilinis.  Kasama sa mga  bahagi nito ang malalaking kasangkapan gaya ng refrigerator, heater, air-conditioner, oven, at mga ilaw. Ganoon din ang mga kable, tubo, at bubong.

Hindi ba, sinong makakaalam na may butas ang tubo na pwedeng sanhi ng mataas na bill sa tubig? O kaya malapit na palang mapatid ang kable sa bahay na kapag nangyari ay disgrasya ang hatid. Kung makikita ang mga ito agad ay ‘di ka lang nakatipid kundi naligtas mo rin ang iyong sangbahayan.

Sa kasangkapan naman ay pwedeng masuri ang kalidad gaya sa mga ilaw na kaya pala hindi  ganoon kaliwanag ay dahil puno ng alikabok at mga appliances na kailangan ng palitan dahil mataas na ang konsumo sa kuryente.

Handa ka na bang magpamilya?

Ni MJ Gonzales

Tapos na ang Valentine’s Day pero hindi pa rin kayo nakakapag-date o hanggang ngayon wala ka pa rin ka-date? Huwag mag-alala dahil ganyan din ang pag-aasawa. Hindi iyan base sa petsa kundi sino ang iyong makakasama at kung handa ka ba sa inyong  date.  Kaya nga okay din ang hindi basta  mag-asawa lalo na kung bibigyan ng malaking kunsiderasyon ang pinansyal na aspeto.

Handa na kayong bumukod

Uso sa pamilyang Pinoy ang kaisipan na mas marami ay mas masaya. Kaya kahit may apo na ang apo ay nasa bahay pa rin nina lolo at lola. Sa mga mag-asawa na gustong bumukod para hindi pakialaman ng biyenan, bayaw at hipag, o ng buong angkan ay kailangan silang maging “financially independent” din. Ibig sabihin ng “financially independent” ay kaya nilang pangatawanan ang kanilang sariling mga gastos o pangangailangan. Kaya magiging problema talaga sa mag-asawa kung wala silang matitirhan o makikitira sa kamag-anak.

Handa kayong magkaanak

Isa sa madalas na paksa na ikinakabit sa pag-aasawa ay ang pagkakaroon ng anak. Subalit, kung aanalisahin ay maraming nagpapapakasal ang hindi rin naman handang maging magulang.  Sa usapin ng reproductive health ay may mga babaeng  likas na madaling magbuntis kaya kung walang family planning ay may lalabas na “stressful pregnancy” o “unwanted child.” 

Iba ang ihip ng hangin kung ang mag-asawa ay handa sa anumang aspeto, kabilang na ang aspetong pinansyal. Sa siyam na buwang pagbubuntis ni misis ay matutugunan ang kailangan nitong bitamina.

Hindi rin siya magiging stressed kaya makakaiwas siya sa sakit at lalo na sa  pag-aanak ng kulang sa buwan. Kung magkataon din na caesarean birth, na mas malaki ang bayad at mas matagal ang gamutan, ay kakayaning ipanganak ang bata nang walang gaanong pait sa pagbabayad ng hospital bill.

Handa kang magpakilig

Sabi nga nakakadagdag ng kiliti, saya, anghang, o lusog sa relasyon ng mag-asawa kung may panahon silang magliwaliw na dalawa. Posibleng-posible iyan kung may extra silang budget para manood ng sine,  kumain sa labas, o magbakasyon sa malayong lugar.

Dagdag pa rito iyong mga pagkakataon na kaya mong ilibre, sorpresahin, at ibigay ang regalong gustong-gusto ni mister o misis.

Pareho na kayong mas mature

Ang maganda sa pagsasama ng  dalawang taong mature nang mag-isip ay mas kaya nilang harapin ang problema na magkasama.  Sa usapang pera ay mas malawak  at malalim na rin ang pang-unawa nila sa kani-kaniyang kapasidad. Kaya naman mas magiging kaswal din ang pag-uusap nila tungkol sa gastusin, pamumuhunan, o plano sa hinaharap. Gayon din ay makakayang magkumpromiso ng isa’t isa para magkasundo sa magkaiba nilang pananaw pagdating sa pera.

Parehong masaya sa sitwasyon

Kahit na may conjugal properties, dumarami ang mga mag-asawa ngayon na may kani-kaniyang pera.  Mainam ito lalo na kung aktibo sa kani-kaniyang karera o negosyo ang mag-asawa. May laya ang mga ito na pausbungin ang kanilang indibidwalidad habang pinagtitibay ang kanilang pagsasamang dalawa. 

Samantala, may mga mag-asawa na isa lang ang nagtatrabaho para magkatulungan sa pag-aalaga ng pamilya. Walang problema naman kung iisa o dalawa ang nagtatrabaho, basta may balanse, pang-unawa, at suporta sa isa’t isa.

Tokyo 2020 medal project, tagumpay

Malapit na makumpleto ang kailangan na recycled metals para sa
paggawa ng mga medalya na gagamitin sa 2020 Olympic
 at Paralympic Games. (Kuha mula sa Tokyo 2020)

Inanunsyo ng Tokyo Organising Committee of the Olympic and Paralympic Games kamakailan na malapit na nilang maabot ang target para sa koleksyon ng mga recycled na metal mula sa mga luma at sirang mobile phones at electronic gadgets para gamitin sa paggawa ng 5,000 medalya na igagawad sa mga mananalong atleta sa Tokyo 2020.

Ayon sa komite, matatapos ang kanilang kampanya para sa Tokyo 2020 Medal Project sa darating na Marso 31.

“Thanks to the huge levels of support from the public and companies across Japan and from national and international athletes, it is estimated that the remaining amounts of metals required to manufacture all Olympic and Paralympic medals can be extracted from the devices already donated,” saad ng Tokyo 2020 sa isang pahayag.

Inilunsad ang proyekto noong Abril 2017 at nitong nakaraang Nobyembre 18 ay mayroong humigit-kumulang sa 2,400 NTT Docomo stores at 1,594 municipal authorities sa buong Japan ang nagsisilbing collection centers para sa mga luma at sirang mobile phones at electronic gadgets.

Nakakolekta naman ng humigit-kumulang sa 47,488 tonelada ng discarded devices ang mga municipal authorities habang mahigit sa limang milyong gamit na mobile phones naman ang nai-donate sa mga NTT Docomo stores hanggang noong Oktubre 2018.

“The targeted amount of bronze – some 2,700kg – was already extracted from these by June of last year. By October 2018, 28.4kg of gold (93.7% of the targeted 30.3kg) and 3,500kg of silver (85.4% of the targeted 4,100kg) had been sourced from the donated devices.”

Samantala, ilulunsad ang disenyo ng Tokyo 2020 Olympic and Paralympic medals sa darating na summer ngayong taon.

‘The Girl in the Orange Dress’ nina Jericho at Jessy pasok sa Osaka Film Fest

Ni Florenda Corpuz

Isa ang “The Girl in the Orange Dress” nina Jericho Rosales at Jessy Mendiola sa tatlong pelikula mula sa Pilipinas na lalaban sa Competition section ng 14^th Osaka Asian Film Festival (OAFF) na gaganapin mula Marso 8 hanggang 17.

Ang rom-com na idinirehe ni Jay Abello ay umiikot sa istorya ng isang misteryosong babae na nakasuot ng kulay kahel na damit (Jessy) at showbiz superstar na si Rye (Jericho).

Matatandaang dumalo si Echo sa 2016 edition ng OAFF bilang kinatawan ng “#WalangForever” na pinagtambalan nila ng aktres na si Jennylyn Mercado sa direksyon ni Dan Villegas.

Lalaban din sa parehong kategorya para sa Grand Prix at Most Promising Talent Award ang “With All My Hypothalamus” ng direktor na si Dwein Baltazar at “Tanabata’s Wife” nina Lito Casaje, Charlson Ong at Choy Pangilinan kasama ang 11 pang pelikula mula sa Asya.

Samantala, ipapalabas naman sa Special Programs (New Action! Asia) section ng festival ang dalawa pang pelikulang Pilipino: ang “Billie and Emma” ni Samantha Lee at “Eternity Between Seconds” ni Alec Figuracion.

Noong nakaraang taon ay nasungkit ni Ryza Cenon ang Yakushi Pearl Award bilang Most Brilliant Performer para sa kanyang mahusay na pagganap sa pelikulang “Mr. and Mrs. Cruz” na idinirehe ni Sigrid Andrea Bernardo. Itinanghal naman na Most Promising Talent ang batang direktor na si Mikhail Red para sa kanyang magaling na pagdirehe sa pelikulang “Neomanila.”

Isang bentahe nga ba ang pagiging ‘workaholic’ sa negosyo?

Dalawa sa sumikat na ekspresyon ng mga millennial ay ang “You Live Only Once” (YOLO) at ang “Fear of Missing Out” (FOMO).  Maraming mabuti at masamang kahulugan ang mga ito gaya na lamang ng pagiging workaholic o “work addict.” Ang tanong ay mabuti o masama pa ba ang pagiging workaholic? May paraan din ba na walang napapalagpas nang hindi subsob sa pagtatrabaho?

Workaholic is work addiction

Maraming tao na ipinapalagay na kapag sila ay abala sa trabaho o negosyo ay nangangahulugan na sila ay may silbi o mahalaga. May pagkakataon na posible, pero maaari rin na hindi totoo.  Iyan ay lalo na kung nagpapakaabala sa mga bagay na hindi naman talaga magpapasaya sa kanila. Ganoon din kung ibibigay nitong tagumpay ay walang saysay sa bandang dulo.

Sa artikulong “Overcome Your Work Addiction” ni Leslie A. Perlow, isang manunulat at leadership professor sa Harvard Business School, ay iniugnay niya ang pagiging workaholic sa “successholic” o adiksyon para makamit ang tagumpay.  Aniya, maraming tao ang may maling  pakahulugan sa salitang tagumpay.

“We’re obsessed with work because of the satisfaction we get from the kudos for achievement, not because of some deep-seeded satisfaction from working long hours, as an end in itself,” saad pa ni Perlo na founder din ng Better Work Institute. Dagdag pa niya ay dapat  baguhin kung alin ang pahahalagahan, sa halip na baguhin mismo ang sarili para magtagumpay.

Work addiction is not a solution

Kailangan doblehin ang sipag ng mga maliit at bago pa lang sa pagnenegosyo.  Iyan ay dahil na rin sa kinakapa pa ang sistema, operasyon, at gastusin. Isa pa’y ang negosyante mismo ang gumagawa ng lahat ng gawain, maliit man o malaki.  Bunsod nito, sila ay napapakiling na magpaka-workaholic sa bandang huli.

Subalit gaya rin ng mga empleyado, ang  pagiging workaholic ng negosyante ay makakasama sa kanya at kanyang pagnenegosyo. Kung titingnan ang mga extreme workaholic ay palaging puyat, nagugutuman,  at walang oras para sa sarili. 

Siyempre hindi makakabuti una sa kalusugan  gayon din sa  sariling pag-unlad at pamamahala ng negosyo. Ilan sa kumplikasyon ng pagiging workaholic ng isang negosyante ay pagkakaroon ng mababang produksyon at benta. Nangyayari iyan paunti-unti dahil nauupos na ang pinakamahusay na bersyon niya. Iyan ay dahil masyado na siyang abala at pagod sa iba’t ibang bagay.

Work smart versus work hard

Kung nais umabante sa  karera o negosyo man, sa halip na working harday  dapat kumiling sa  “working smart.”  Ang ideyang ito ay ang pagkakaroon ng  mahusay at mainam na istratehiya sa pagtatrabaho. Hindi naman kailangang bago o naiiba ang istratehiya kundi  kailangang pag-aralan at gawin para mapainam ang produksyon.

Sa mga negosyante, “working smart” ang paggamit ng teknolohiya para mabilis magawa ang bagay-bagay gaya ng online banking,  online meeting, at webinar para iwas  sa paggasyos sa transportasyon.

Isang halimbawa rin ng working smart ang pagkuha ng mga empleyado na magtatrabaho sa kani-kanilang bahay.  Makakatipid  ang negosyante sa   office at salary expense,  gayon din mababawasan ang kanyang mga tinatrabaho. Kung ganoon ay mas luluwag ang kanyang oras at uunlad ang kanyang negosyo nang hindi niya kailangang magpaka-workaholic. 

Para sa dagdag na kita, galingan ang ‘cross-selling’ at ‘upselling’

Ni Lorenz Tecson

Halos sa bawat kalye ngayon sa Pilipinas ay mayroong sari-sari at grocery stores. Parami na rin nang parami ang mga negosyong itinatayo kahit saang sulok ng bayan o lalawigan. Isang indikasyon na ito na kailangang itaas ang antas ng paraan ng pagbebenta dahil mas matindi na ang kumpetisyon.  Kaya naman mainam na palakasin ang paraan ng pagbebenta sa pamamagitan ng “cross-selling” at “upselling.”

Kung nakakain ka na  sa ilang nangungunang food chains ay madalas ay maririnig mo sa service crew ang kanilang pagtatanong at pagmumungkahi na dagdagan moa ng iyong order.  Dahil madalas ay parang masarap o bagay sa inorder mo ang ibang inaalok nitong produkto ay mapapabili ka na rin. Ang  tawag sa ganitong uri ng pag-aalok ay cross-selling at ginagawa na ito ngayon sa halos anong klaseng retail business. 

Para magawa ang cross-selling ay dapat gawin ito nang tama at may istratehiya. Paano?

Maging magaling sa pagterno ng mga produkto. Isang klase ng cross-selling ay ang pagdi-display ng produkto nang magkakasama at bagay sa isa’t isa. Ang halimbawa nito ay ang pagte-terno ng damit at burloloy na isinusuot sa mannequin. Kung magaling sa pagdi-display o pag-iistilo ay maaakit ang customers na bilhin ang bawat produktong suot ng mannequin.

Maging mahusay sa pagpapaliwanag sa produkto.  May mga customer na may gusto lamang bilhin pero hindi ganoon kaalam sa produkto o iba pang magandang kasama nito. Kaya naman ang salesman ay dapat hindi lang marunong mag-alok kundi magaling din na maipaliwanag  at gumabay sa customer para bumili pa ito ng ibang produkto.  Halimbawa nito ay ang pagbibigay suhestiyon ng salesman ng pagkuha rin memory card, screen protector, casing,  o monopod kung bibili ng smartphone.

Mag-alok ng diskwento kung isang package o grupo ng produkto ang bibilhin.   Matagal na rin paraan para lumaki ang kita ay ang bultuhang  pagbebenta.  Kinakagat ito ng customers dahil  tiyak na sila ay makakamura sa wholesale kaysa  patingi-tinging pagbili.

Maaari mong ipakete ang magkakaibang produkto na mabibili ng may diskwento kung bibilhin ng magkakasama.  

May dalawang bentahe sa ganitong istratehiya. Una ay magkakaroon ng kamalayan ang customer sa iba pang produktong mabibili na swak sa  mismong produktong gusto niya. Pangalawa ay mahihirapan siyang tumanggi lalo na kung malaki ang diskuwento na makukuha niya. Isang halimbawa nito ay grocery package na may items gaya ng pasta, tomato sauce, cheese, at corned beef. Mapapadali ang kanyang pagbili dahil lahat ng sangkap sa pagluluto ng spaghetti ay narito na, may basket pa siya.

Itodo ang benta sa upselling

Balik  tayo sa  pag-aalok ng  mga service crew sa food chains.  Hindi ba nagsusuhestiyon din sila na “upsize,” o palakihin pa ang sukat ng pagkain. Kadalasan litanya nila ito sa mga produktong French fries, hamburger, sundae ice cream, at soft drinks.  

Dahil mas mabubusog ka nga naman at mas malinamnam ang soda na may sundae na kahalo kaya pihadong mapapa-order ka na rin. Kung ginawa ni service crew iyon sa iyo, ang tawag  doon ay upselling.  Upselling kasi pareho ang produkto pero mas malaking sukat o mainam na bersyon.  Siyempre kapag itinaas ang bilang o kalidad ay mabibili rin ito sa mataas  na halaga kaya mas tataas ang kita ng kumpanya.