Nadine Lustre, bibida sa pelikulang ‘Ulan’ ngayong Marso

Inilunsad na kamakailan ang trailer ng pinakabagong romantic film ng Viva Films na pinamagatang “Ulan” na nagtatampok kay Nadine Lustre kasama sina Carlo Aquino, Marco Gumabao at AJ Muhlach.

Nakatakdang ipalabas ito sa mga sinehan sa Pilipinas sa darating na Marso 13 at mula sa direksyon at panulat ni Irene Emma Villamor, na nasa likod din ng mga hit local films nitong nakaraang taon na “Meet Me in St. Gallen” (Carlo Aquino, Bella Padilla) at “Sid & Aya” (Dingdong Dantes, Anne Curtis).

Kwento tungkol sa pagmamahal at pagtanggap sa sarili

Makikita ang batang si Maya sa naturang trailer na tinatanong niya ang kanyang lola kung bakit umuulan kahit pa maganda naman ang panahon—kung saan ang kwento ng kanyang lola ay dahil may nagpapakasal na tikbalang ngunit tutol ang langit sa kanilang pagmamahalan.

Ngunit ang inosente at magandang pananaw ni Maya sa ulan bilang bata ay magbabago sa kanyang paglaki—na ngayon ay nagpapaalala na sa kanya ng sawing pag-ibig, mga pangakong hindi tinupad at kalungkutan.

Saka naman niya makikilala si Peter (Carlo Aquino) na magdadala ng liwanag sa kanya gaya ng mga pangyayaring maihahalintulad sa kadalasang pagtingin sa ulan na minsan ay itinuturing na pagpapala o kaya naman ay sumpa.

Sa kabila ng bagong ngiti ni Maya, tila may nakaambang pagsubok muli sa kanya na kung saan siya ay masasaktan.

Bagong kumbinasyon

Sa unang pagkakataon ay hindi kasama ni Nadine ang partner at loveteam na si James Reid, na nauna nang magkaroon ng pelikula na wala rin si Nadine noong nakaraang taon sa pelikulang “Miss Granny,” na local remake ng Korean hit film na parehas ang pamagat, kasama si Sarah Geronimo at Xian Lim.  

Ngunit wala naman aniyang kaso kay Nadine ang desisyon na ito ng Viva Artists. “I think it’s a career move which is for our own good. We should have individual careers of our own and not just as a love team,” ang kwento pa ng aktres.

Unang beses naman na makakatrabaho ni Nadine ang premyadong aktor na si Carlo Aquino na kagagaling lang sa matagumpay na repeat concert nila ni Matteo Guidicelli kamakailan, gayon din sa 2018 box office hit na “Exes Baggage” na reunion project nila ni Angelica Panganiban. 

Huling napanood sa pelikula ang tambalang JaDine sa “Never Not Love You” (2018) at “This Time” (2016), ngunit nakatakda rin na magbalik-tambalan ang dalawa sa remake ng “Pedro Penduko” kung saan siya ay gaganap bilang Maria Makiling.

Ilalabas din ngayong taon ang isa pang pelikula si Nadine na katambal si Sam Concepcion bilang summer offering ng Viva na may pamagat na “Indak” at siyang directorial debut ng concert director na si Paul Basinillo.

Japanese films, talents nominado sa 14 na kategorya sa Asian Film Awards

Ni Florenda Corpuz

Dumalo si Sakura Ando (pangalawa mula sa kaliwa) sa
 ika-30 Tokyo International Film Festival. (Kuha ni Din Eugenio)

Papangunahan ng 2018 Palme d’Or winning film na “Shoplifters” ang mga Japanese films at talents na nominado sa 13^th Asian Film Awards na gaganapin sa TVB City sa Hong Kong sa Marso 17.

Nakatanggap ng anim na nominasyon ang nasabing pelikula kabilang ang Best Film, Best Director para kay Kore-Eda Hirokazu, Best Actress para kay Sakura Ando at Best Supporting Actress para kay Mayu Matsuoka, na nagsilbing 31^st Tokyo International Film Festival ambassador.

Nominado naman sa Best Actor category si Koji Yakusho para sa pelikulang “The Blood of Wolves” na naging focus ng retrospective tribute sa 31^st TIFF kasabay nang pagdiriwang nito sa kanyang ika-40 anibersaryo bilang aktor.

Kabilang naman si Shinichiro Ueda sa mga nominado bilang Best New Director para sa pelikulang “One Cut of the Dead,” isa sa biggest at longest-running hits sa Japanese box office noong nakaraang taon.

Magsisilbi naman bilang Celebrity Juror ang Academy Award at Tony Award nominee na si Ken Watanabe.

Ang AFA Academy o AFAA ay binuo ng TIFF katulong ang Hong Kong International Film Festival at Busan International Film Festival upang itaguyod ang Asian cinema at ang mga talento nito.

Alfonso Cuaron’s most personal film ‘Roma’ claims the Golden Lion at the Venice Film Festival

“It is no mere movie – it’s a vision… where every image and every emotion is perfectly set in place.”

Ganito ang pagsasalarawan ni film critic Owen Gleiberman sa pinakabagong obra ng award-winning Mexican filmmaker na si Alfonso Cuaron (Children of Men, Gravity) na pinamagatang “Roma,” na siyang ginawaran kamakailan ng Golden Lion award, ang pinakamataas na parangal sa prestihiyosong 75^th Venice Film Festival na ginanap sa Lido di Venezia, Italy.

Nagwagi rin ang “The Favourite” ni Yorgos Lanthimos ng Silver Lion – Grand Jury Prize, gayon din sina Willem Dafoe (Best Actor, At Eternity’s Gate), Olivia Colman (Best Actress, The Favourite), Joel Coen at Ethan Coen (best screenplay, The Ballad of Buster Scruggs), Jennifer Kent (Special Jury Prize, The Nightingale), Baykali Ganambarr (Best Young Actor), at Jacques Audiard (Silver Lion for Best Director, The Sisters Brothers).

Mula sa Participant Media at Esperanto Filmoj, si Cuaron din ay nagsilbing editor at producer ng pelikula. Hawak naman ng Netflix ang distribusyon nito ngunit wala pang inaanunsyong petsa para sa theatrical release.

A rapturously beautiful masterpiece

Sinusundan ng kwento ng Roma ang isang domestic worker na si Cleo, isang indigenous na babaeng mula sa Mixteco heritage at nagtatrabaho para alagaan ang mga pamilya ng isang middle-class family sa Mexico City noong 1971.

Ipinangalan ang Spanish-language drama mula sa distrito ng Roma kung saan lumaki ang writer-director-cinematographer nito na si Cuaron. Ito rin ang unang beses na siya mismo ang cinematographer.

Inilarawan naman ng AFP na “luminous performance” at “heart of the film” ang pagganap ni Yalitza Aparicio bilang Cleo, na unang pagkakataon pa lang umarte sa pelikula.

Dagdag naman ni Cuaron sa AFP, “Cleo is based on my babysitter when I was young. We were a family together. But when you grow up with someone you love you don’t discuss their identity. So for this film I was forced to see myself as this woman, a member of the lower classes, from the indigenous population. This is a point of view I had never had before.”

Ipinalabas din ang Roma sa Telluride Film Festival, Toronto International Film Festival, at New York Film Festival.

His most essential film

Sa isang eklusibong panayam ng IndieWire, ibinahagi ni Cuaron ang naging paglalakbay niya sa paggawa ng naturang pelikula, na aniy,a ang matagal na niyang pinagtatrabuhan simula pa sa kanyang unang pelikula na “Sólo con Tu Pareja” (1991).

“I always wanted to make a film and be comfortable with it when I finished it. With ‘Roma,’ I was satisfied with it when we finished. I was very happy with it, and that’s because it’s the first film I was fully able to convey what I wanted to convey as a film. It’s a story in many different shapes and hints of emotions that have been present since the moment I wanted to be a director.”

Itinuturing din ang obra na semi-autobiographical dahil makikita rin dito ang bahagi ng kabataan ng Oscar-winning director sa Mexico kung saan hango ang mga eksena sa kanyang mga alaala noong 1960-1970s. At maliban kay Cleo, matingkad ang pangkalatang representasyon nito sa mga kababaihan kabilang ang ina ng director at isa pang domestic helper sa kabuuan ng pelikula.

Hudyat din ng Roma ang pagbabalik ni Cuaron sa Mexico na unang beses simula nang gawin nito ang “Y Tu Mamá También” (2001), at inilarawan ng director ang pagkakataon na isang “charged experience” dahil kinailangan niyang harapin muli ang kanyang nakaraan.

“It’s about a moment of time that shaped me, but also a moment of time that shaped a country. It was the beginning of a long transition in Mexico,” ang kwento ni Cuaron sa IndieWire.

Carlo Aquino at Angelica Panganiban nagbabalik sa bagong pelikula na ‘Exes Baggage’

Ni  Jovelyn Javier

“Nakakatakot na rin magmahal, eh? ‘Di ko maintindihan ‘yung mga taong takot nang magmahal pagkatapos masaktan.”

Bahagi ito ng palitan ng usapan nina Carlo Aquino at Angelica Panganiban sa kaabang-abang na pagbabalik-tambalan ng dalawa sa pinakabagong pelikula na pinamagatang “Exes Baggage.” 

Hunyo nang maglabas ng mga nakakakilig na larawan sina Carlo at Angelica sa Instagram, na labis na kinasabikan ng mga masugid na tagahanga ng dalawa.

Itinatampok ang pelikula bilang maiden offering ng bagong studio na Black Sheep, sister film outfit ng Star Cinema at sa direksyon ng award-winning writer-director na si Dan Villegas  na siyang nasa likod ng mga pelikulang “English Only, Please,” “The Breakup Playlist,” “Walang Forever,” “Always Be My Maybe,”  “How to Be Yours,” “Changing Partners,” at “All of You.”

The ultimate exes movie

“So ikaw willing kang magmahal ulit kahit na doble ang sakit? Oo naman, basta huwag mo na kong sasaktan.”  

Hindi naman magkamayaw ang mga CarGel fans na matagal nang naghihintay sa pagbabalik tambalan ng dalawa lalo na nang ilabas ang teaser kung saan makikita ang mga karakter nilang si Nix at Pia sa kanilang unang pagkakakilala sa isang bar habang naririnig naman ang kantang “Maybe the Night” ng indie-folk band na  Ben&Ben.

Sinundan pa ito ng isa pang seryosong pag-uusap ng mga karakter sa second teaser ng pelikula na makikitang binabalikan ng dalawa ang nakaraan sa kani-kanilang naging mga relasyon at mga saloobin sa pagmamahal mula sa mga karanasan na ito.

“Siguro doon tayo sa tungkol siya sa ano ba ang gusto mong matutuhan. Ano ba ang mga gusto mong iwasan sa relasyon para maiwasan na maging mag-ex kayo,” ang kwento ni Angelica sa sentro ng kanilang pelikula.

Reigniting the nostalgic chemistry of CarGel

Isa ang tambalang Carlo at Angelica sa mga pinakapaboritong tambalan noong 90s na mula sa kanilang pagsasama sa youth-oriented shows na “G-Mik” at “Berks.” Parehas na nagsimula sa industriya bilang mga child stars at nakagawa ng pangalan sa kanilang galing sa pag-arte, sabay na lumaki ang dalawa at gumawa ng maraming proyekto nang magkasama.

Nauwi sa totohanan ang tambalan ng dalawa at nagtagal ang relasyon nang anim na taon bago naghiwalay noong 2006. Sa kabila ng nakaraan nila, nanatili ang malapit na pagkakaibigan sa pagitan ng dalawa hanggang ngayon.

Kwento pa ng aktor sa Push website, mas kumportable pa siya ngayon kay Angelica. “Siguro dahil nagsimula kami sa friendship tapos naging kami kaya rin siguro ganoon kami sa isa’t isa. Kumbaga kung ano ‘yung meron kami, kumbaga special siya sa akin, kung ano ‘yung sasabihin ng ibang tao hindi ko na iisipin. And ever since talagang mahal ko naman si Angelica,” aniya.  

Usap-usapan din ang pagdalo ni Angelica kamakailan sa kaarawan ni Carlo kung saan tinukso sila ng mga kaibigan, gayon din ang malalim na mensahe ng aktres sa  Instagram kung saan niya sinabing “Sayo lang hindi nagbago ang salitang pagmamahal. Maligayang kaarawan.”

Balik-telebisyon din ang CarGel sa teleseryeng “Playhouse” ni Angelica at Zanjoe Marudo. Huling napanood si Angelica sa “Dalawang Mrs. Reyes,” samantalang napanood din si Carlo  sa  “Goyo: Ang Batang Heneral” at “Meet Me in St. Gallen.”

Aireen Oikawa: Pinay on the Rise

Isa si Aireen Oikawa, na kasalukuyang naninirahan sa Iwate-ken, sa mga Pilipina na gumagawa ng sariling pangalan sa pagkanta. Nito lamang ay siya ang napiling kumanta ng “If We Believe in Love,” kung saan siya rin ang composer, para sa music video ng pelikulang “Maid in London” na pinagbibidahan nina Andi Eigenmann, Matt Evans, at Polo Ravales sa ilalim ng Viva Films. Ipapalabas ang pelikula sa mga sinehan sa Pilipinas ngayong darating na Hunyo 13.

Subalit, hindi naging madali para sa 42-taong-gulang na Pinay ang magkaroon ng karera sa pagkanta sa Japan at tuparin ang pangarap na maging singer-songwriter. Puspusang pag-eensayo at pagsali sa mga singing contests ang ginawa ni Aireen para sanayin ang sarili sa pagkanta at magkaroon ng sapat na karanasan para magtanghal.

Noong bata pa lamang siya ay pinanghihinaan siya ng loob dahil sa hindi siya madalas manalo sa singing contests.

“Sa Bulacan, nasabak ako sa mga singing contest sa iba’t ibang barangay tapos maraming beses na talo ako kasi maraming magagaling sa Bulacan. Lagi akong nagmumukmok kapag natatalo ako tapos sinasabi ko sa pamilya ko na ayoko nang sumali,” pahayag ni Aireen sa Pinoy Gazette.

“Pero sabi ng tatay ko sa akin, ‘paano mo malalaman na mananalo ka kung hindi ka sasali uli.’ Iyong singing contests ang naging training background ko,” dagdag pa ni Aireen na ipinanganak sa Bicol at lumaki sa Bulacan.

Napasali sa isang female band sa Sampaloc, Manila si Aireen noong siya ay 16-toang-gulang at pagkaraan ng dalawang taon ay lumipad siya sa Japan para maging entertainer.

Matiyaga at may pangarap, nagsikap si Aireen at hindi nagsayang ng oras sa pagtatrabaho at pagpapayaman ng kaalaman para mapagbuti ang sarili at mapaghusay ang talento. Aniya, hindi niya iniisip ang mga sakripisyo at hirap dahil sa kanyang pananaw ay bahagi ito upang maging matagumpay sa larangang napili.

“Ako kasi kapag pumasok sa isang bagay, I make sure na mag-stand out ako. Katwiran ko kasi, nandito na ako so why not make the most out of it. Lahat naman tayo may kanya-kanyang kakayahan. Pagyamanin mo ang bagay na alam mong kaya mong gawin at magiging masaya ka,” ani Aireen na nakapag-asawa ng Japanese sa edad na 30.

“Importante kasi na masaya ka sa ginagawa mo,” paninindigan ng Pinay na isa rin asawa, ina, radio DJ at songwriter.

Ilan sa mga piyesang kanyang inawit at isinulat ay ang “Ika’y Biyaya,” “Lahat Para Sayo,” at “Hanggang Kailan.”

Patuloy si Aireen sa pag-aaral ng bagong kanta at lengguwahe ng Japan, pag-alam sa mga pasikot-sikot sa radio broadcasting, at paghingi ng payo mula sa mga tao na mas bihasa sa kanya pagdating sa pagkanta at pagtatanghal.

“Huwag mahiyang magtanong at matuto sa ibang tao. Maging mapagkumbaba na napakaimportante kapag nasa entertainment world ka. Kailangan marunong kang mag-adapt sa lahat ng sitwasyon at taong makakaharap mo,” ani Aireen.

Sa huli, simple lamang ang kahulugan ng tagumpay para kay Aireen.

“Para sa akin, ito iyon malaman mo na suportado ka ng pamilya mo at mga kaibigan mo sa gusto mong gawin at kasama mo silang natutuwa sa mga nangyayari sa career mo,” pagtatapos ni Aireen na nangangarap din na makapagtayo ng restaurant business sa Pilipinas at makagawa ng music video na isasali sa international competition. 

‘Sid and Aya: Not a Love Story’ tampok ang unang pagtatambal nina ingdong Dantes at Anne Curtis

“Sino ba’ng hindi malungkot? Sino ba’ng hindi galit sa mundo? Lahat naman, ‘di ba? Lahat may kanya-kanyang sira sa utak. Depende na lang kung papa’no mo itatago.”

Ito ang maririnig mula kay Sid (Dingdong Dantes) sa umpisa ng trailer ng pinakabagong pelikula sa panulat at direksyon ni Irene Villamor at produksyon ng Viva Films at N2 Productions, na pinamagatang “Sid and Aya: Not a Love Story.”  

Ipapalabas ito sa mga sinehan simula Mayo 30.

A reunion and first big-screen team-up

“Hindi naman lahat ng may ‘I love you,’ love story na, e,” ang pagsasalaysay ni Sid sa huling bahagi ng trailer kung saan din maririnig ang kantang “’Di Na Muli” ni Janine Teñoso.

Tampok dito ang kauna-unahang pagtatambal nina Dingdong Dantes at Anne Curtis na dating nagkasama sa telebisyon sa ‘90s teen-oriented show ng GMA na “T.G.I.S.” kasama sina Antoinette Taus, Sunshine Dizon, Kim Delos Santos, Dino Guevarra, Maui Taylor, Polo Ravales, at iba pang teen stars noon.

Kasunod nito ay ang pagsasama rin ng dalawa sa 1999 teen romantic-comedy na “Honey My Love So Sweet” kasama ang kanilang T.G.I.S. batch.

Umiikot ang kwento kay Sid (Dantes) na isang insomniac at kung paanong makikilala niya at kukunin bilang confidante ang misteryosong si Aya (Curtis) para may makausap at makasama sa mga gabing hindi siya makatulog.

“I am lucky to have worked with this efficient, ingenious and talented skeletal 20 (plus)-man team of Sid and Aya. Ibang klase talaga ang Pinoy,” ang pagbabahagi naman ni Dingdong sa Instagram ukol sa kanyang karanasan sa produksyon.

Shooting in Japan

Ito rin ang unang beses para kay Dingdong na mag-shoot sa ibang bansa sa loob ng 20 taon nito sa industriya – kinunan ang ilang eksena ng pelikula sa Japan nitong Marso kasabay ng spring season. Unang beses naman para kay Anne na makita ang pag-usbong ng mga sakura sa Japan.

Ibinahagi ni Anne ang karanasan sa shooting experience sa Tokyo sa isang eksklusibong panayam ng Pinoy Gazette sa press preview ng Rockstar KTV and Resto, ang joint business venture nila ng kapwa “It’s Showtime” host na si Karylle.

“Our filming experience in Tokyo was really amazing. We came at a really good time – the snow had just gone. So we came at perfect timing, some of the cherry blossoms were just about to appear,” aniya.

Na-enjoy din ng Kapamilya host sa pagkain at iba’t ibang lugar sa bansa.

“The food was amazing. We got to visit a lot of places like the Tokyo Skytree at night na kami lang ang tao. So it really was just so beautiful. Yeah, we had an amazing time and we were able to shoot on locations that aren’t really like shot often. So abangan ninyo yung Shibuya Crossing namin, pang-Hollywood.”

Samantala, ibinahagi rin ni Anne ang kanyang excitement sa pagsali sa Tokyo Marathon. Kamakailan ay tumakbo siya sa London Marathon kung saan ang mga nalikom na donasyon ay ibibigay niya sa mga bata sa Marawi sa pamamagitan ng UNICEF Philippines.

“I’m gonna join the lottery this year. Sana by next year makapasok ako,” excited na pahayag ng aktres.

Kobe Bryant, masaya sa tagumpay ng kanyang animated short film na ‘Dear Basketball’

“My God. I feel better than winning championships. This is crazy, man, it’s crazy.”

Ito ang sinasambit ni NBA legend Kobe Bryant sa backstage habang hindi nito maialis ang tingin at ngiti sa golden statuette sa kamakailan awarding ceremony ng 90^th Academy Awards pagkatapos hirangin ang “Dear Basketball” na best animated short film, na siya rin kauna-unahang pagkakataon para sa isang NBA player na magawaran ng ganitong parangal.

Kasama ni Bryant na tumanggap ng parangal si Disney animator Glen Keane bilang animator at director ng animated short film, na unang parangal din nito sa Oscars. Si Keane ay ang isa sa mga animators sa likod ng “Aladdin,” “Beauty and the Beast,” at “The Little Mermaid.”

The ‘Black Mamba’ scores at the Oscars

Nagretiro man ang dating Los Angeles Lakers superstar sa basketball, sa mundo naman ng storytelling siya ngayon namayagpag. Patunay na hindi lamang pala sa basketball ang talento ni Bryant.

Base ang naturang animated short film sa isang sulat na ginawa ni Bryant para sa The Players Tribune noong 2015, bilang pormal na pag-anunsyo sa kanyang noo’y nalalapit na pagreretiro sa basketball.

“Dear Basketball, from the moment I started rolling my dad’s tube socks and shooting imaginary game-winning shots in the Great Western Forum, I knew one thing was real: I fell in love with you.”

Ito ang isang bahagi ng madamdaming sulat ni Bryant sa kanyang pagsasalarawan sa malalim na pagmamahal niya sa basketball, na nag-umpisa sa murang edad – mula sa kanyang mga noo’y matayog na pangarap bilang bata hanggang sa 20-taong mataginting na karera.

Aniya, nakuha niya ang ideya na gawing short film ito dahil sa kanyang 11-taong-gulang na anak na si Gianna, na sinabi sa kanyang, “Dad, you always tell us to go after our dreams, so man up.”

Maliban sa panulat ito ng NBA legend, siya rin ang nag-salaysay nito at executive producer ng Dear Basketball. Tampok din ang musika nito mula kay award-winning composer John Williams. Produksyon naman ito ng Believe Entertainment Group, Kobe Inc., at Glen Keane Productions, distribusyon ng Gunpowder & Sky at go90.

Nag-debut release ang animated short film sa Tribeca Film Festival nitong nakaraang taon. 

Second career in TV and film: Succeeding off the court

“I wake up in the morning, I can’t wait to write, I can’t wait to get to the studio.”

Naniniwala ang sports superstar na ang pagkilalang tinanggap niya sa Oscars ay kumpirmasyon na marami pa siyang kayang gawin, na ngayo’y sa labas na ng basketball court. Bagaman nakatanggap ng dismissive comments noon si Bryant nang sinabi niyang gusto niyang maging isang storyteller pagkatapos magretiro, ‘di pinanghinaan ng loob si Black Mamba.

 “As basketball players, we’re told to shut up and dribble. I’m glad we did a little bit more than that. The hardest thing when you start over, you have to quiet the ego and begin again. You have to learn the basics of things,” ang pagbabahagi ni Black Mamba sa kanyang acceptance speech.

Nagsalita rin siya ng Italian habang pinapasalamatan din ang kanyang asawang si Vanessa at tatlong anak na babae at sinabing “You are my inspiration” sa kanyang pamilya.

Nagbigay din siya ng kredito kina Oprah Winfrey at writer-producer Shonda Rhimes sa kanilang pagbabahagi ng kaalaman sa industriya ng entertainment. “When you have mentors like that in your life, everything tends to work itself out,” ang dagdag pa nito.

Nagpaabot naman ng mga pagbati ang mga kaparehas nitong Hall of Famers na sina Magic Johnson, Bill Russell, Shaquille O’Neal, gayon din ni LeBron James at ang Los Angeles Lakers sa Twitter.

Abala rin si Bryant bilang writer, producer, presentor ng “Detail,” isang ESPN series kung saan aanalisahin niya ang mga detalye ng isang game, gayon din ang isang series of novels.

Kauna-unahang Japanese color film na ‘Gate of Hell’ mapapanood na sa TIFF

Kuha mula sa Kadokawa Corporation 1953

Ipapalabas sa special night event ng 30^th Tokyo International Film Festival (TIFF) ang 4K digitally restored version ng “Gate of Hell (Jigokumon),” ang unang Japanese color film na ipinalabas sa ibang bansa, sa Kabukiza Theatre sa Oktubre 26.

Idinirehe ni Teinosuke Kinugasa, ipinalabas ang “Gate of Hell” sa 1954 Cannes Film Festival at tinawag na “the pinnacle of beauty” ng jury president na si Jean Cocteau. Napanalunan nito ang Cannes Grand Prix ng taong iyon at Academy Awards for Best Foreign Language Film and for Costume Design noong 1955.

Bida rito sina Kazuo Hasegawa, Machiko Kyo at Isao Yamagata. Base sa nobela ni Kan Kikuchi, umiikot ang istorya nito sa isang samurai na lubos na umibig sa isang babaeng may asawa. Dahil sa takot at pagsisisi ng babae ay napagdesisyunan niya na isakripisyo ang kanyang sarili para iligtas ang buhay ng kanyang asawa at ang karangalan nito. 

Samantala, magtatanghal naman sa isang Kabuku performance na pinamagatang “Otokodate Hana no Yoshiwara” ang Kabuki stalwart na si Ichikawa Ebizo pagkatapos ng screening.

Ang “Special Night Event at Kabukiza Theatre” ay isa sa mga highlights ng 30^th Tokyo International Film Festival na gaganapin sa Roppongi Hills at iba pang venues sa Tokyo mula Oktubre 25 hanggang Nobyembre 3.

Bela Padilla, dumalo sa Kyoto Film Festival

Ni Florenda Corpuz

Kuha mula sa KIFF2016

Bela Padilla and Jacky Woo

Dumalo ang aktres na si Bela Padilla sa kakatapos pa lamang na 3^rd Kyoto International Film and Art Festival (KIFF) kung saan ipinalabas ang kanyang pelikula na “Tomodachi.”

Dinaluhan ni Padilla ang opening ceremony ng KIFF na ginanap sa makasaysayang Nijo Castle kasama ang aktor na si Woo.

Ginampanan ni Padilla ang papel ng Pilipinang si Rosalinda na nagkaroon ng relasyon sa Hapon na si Toshiro na ginampanan naman ng Japanese-Chinese actor na si Jacky Woo. Malapit na kaibigan ng nakakatandang kapatid ni Rosalinda na si Edilberto (Pancho Magno) si Toshiro na kilala bilang tomodachi (kaibigan) sa Cavite.

Nang pumutok ang World War II, bumalik si Toshiro bilang opisyal ng Japanese Imperial Army at ang dalawang magkaibigan ay nagkaroon ng hindi pagkakasunduan dahil si Edilberto ay lumalaban para sa mga guerilla.

Ito ay idinirehe ng batikang direktor na si Joel Lamangan.

“It wasn’t conventional for Rosalinda to be in love with a Japanese soldier so she had to be strong, stick by her decision. I guess in that era things were simpler…so if you liked someone back then there was a 100% chance you were going to end up with them. So I think that is where the characters were coming from,” paliwanag ng batang aktres sa mga press at manonood na dumalo sa screening ng pelikula na ginanap sa Aeon Cinema Kyoto Katsuragawa.

Napanaluhan ng World War II drama ang Best Foreign Language Feature Film at Best Musical Score sa 2016 Madrid International Film Festival.

Pagkatapos sa KIFF ay nakatakda rin itong ipalabas sa Berlin Art Film Festival at Milano Film Festival sa Italy.

Samantala, inaasahan din na dadalo si Padilla sa 29^th Tokyo International Film Festival kung saan ang kanyang pelikulang “I America” ay lalaban sa Asian Future section ng prestihiyosong festival.

Jericho Rosales, dumalo sa Osaka Asian Film Festival

Ni Florenda Corpuz

 Antoinette Jadaone, Dan Villegas at Jericho Rosales
kasama si Hiroyuki Yamamoto (moderator) sa symposium
na ginanap sa National Museum of Art, Osaka kamakailan.
(Kuha ni Din Eugenio)

Pinasaya ng aktor na si Jericho Rosales ang kanyang mga tagahanga sa Osaka nang siya ay bumisita sa lungsod para daluhan ang 11^th Osaka Asian Film Festival (OAFF) kung saan ipinalabas ang kanyang pinakabagong pelikula na “Walang Forever.”

Pinangunahan ni Echo ang pagdalo sa festival kasama ang direktor na si Dan Villegas at screenwriter na si Antoinette Jadaone. Katambal niya rito ang aktres na si Jennylyn Mercado.

“To be here at OAFF means a lot to us because this is a proof that our film is special,” saad ng magaling na aktor na hindi ininda ang karamdaman para lamang makadalo.

Dumalo rin ang tatlo sa isang symposium na ginanap sa National Museum of Art, Osaka kung saan mas naipaliwanag nila ang tema ng kanilang pelikula at naibahagi ang kultura at kalagayan ng industriya sa Pilipinas.

“It’s my first time to attend a festival as a director so I’m really happy to be invited here by OAFF,” ani Villegas na dumalo rin noong nakaraang taon bilang producer naman ng pelikulang “That Thing Called Tadhana.”

Bigo man ang “Walang Forever” pati na rin ang “Sleepless” ng first time director na si Prime Cruz na maiuwi ang Grand Prix (Best Picture Award) na nasungkit ng Korean movie na “My Sister, The Pig Lady,” ay nakuha naman ng mga ito ang paghanga at respeto ng mga hurado at manonood mula Japan at iba pang bansa sa Asya.

Mainit din na tinanggap ang “Honoy Thy Father” na pinagbibidahan ni John Lloyd Cruz sa direksiyon ni Erik Matti na ipinalabas sa Special Programs (New Action! Southeast Asia) section ng OAFF.

Samantala, namasyal din si Echo sa mga popular na tourist spots sa Osaka tulad ng Umeda Sky Building at Dotonbori kung saan siya nakasalubong ng mga tagahangang OFWs. Tuwang-tuwa ang mga ito na makita ang idolong aktor na masaya namang nagpaunlak ng litrato.

“Thank you for the support. I know how hardworking OFWs are. Mahal ko kayo,” sabi ni Echo sa mga ito.

Ang Osaka Asian Film Festival ay taunang film festival na may temang “From Osaka to All of Asia!” Layon nitong pasiglahin ang ekonomiya ng lungsod at palakasin ang turismo nito sa pamamagitan ng pagbibigay ng pagkakataon sa mga manonood na makapanood ng mahuhusay na pelikulang Asyano at suportahan ang mga Asian filmmakers at filmmaking sa lungsod.

Indie film tungkol sa mga OFWs sa Japan, pinuri sa Fukuoka

Ni Florenda Corpuz

(Mula kaliwa) Dumalo sina Boy Yniguez, Bernardo Bernardo,
Cynthia Luster, Lawrence Fajardo at Herlyn Alegre sa
Focus on Asia International Film Festival Fukuoka 2015 na ginanap kamakailan.

Kinilala ng mga organizers ng Focus on Asia International Film Festival Fukuoka 2015 at mga Hapon at dayuhang manonood ang husay ng pelikulang “Imbisibol” na tumatalakay sa buhay ng apat na Overseas Filipino Workers (OFWs) sa Japan.

Dinaluhan ng direktor na si Lawrence Fajardo, producer na si Krisma Fajardo, screenwriter na si Herlyn Alegre, cinematographer na si Boy Yniguez, bidang aktor na si Bernardo Bernardo at Japanese actress na si Cynthia Luster ang opening ceremony ng prestihiyosong festival na ginanap sa Canal City Hakata kamakailan.

“It’s actually my first red carpet abroad so kakaiba, saka foreign language kaya nag-a-adjust ka. Maganda, very warm welcome. Kakaiba doon sa Toronto International Film Festival na hectic din. I look upon these two festivals, at mga susunod na mag-iimbita sa ‘Imbisibol’ na major blessing kasi it started as a one-act play, maswerte kami,” pahayag ng batikang aktor na si Bernardo Bernardo sa eksklusibong panayam ng Pinoy Gazette.

“Natutuwa ako na binibigyan pa ako ng pagkakataon na makadaupang-palad ang mga tumatangkilik. I’m praying for more opportunities to make people laugh, cry and share the Filipino journey. Mahal ko ang mga Pilipino abroad. Kayo ang ipinakikipaglaban ko hanggang ngayon. The last 12 years ko sa Amerika, ang ipinakikipaglaban ko talaga ay mga OFWs. Much neglected, but very important component ng ating lipunan sa Pilipinas,” dagdag na mensahe nito para sa kanyang mga kababayang tagasubaybay sa Japan.

Ibinahagi naman ng direktor na si Fajardo na pangatlong beses na niyang pagdalo ito sa festival.

Bigo man ang “Imbisibol” na maiuwi ang Audience Award na nakuha ng pelikulang “Little Big Master (Hong Kong-China), nakuha naman nito ang respeto at paghanga ng mga hurado at manonood mula sa Japan at iba pang bansa sa Asya.

Ang “Imbisibol” ay kinunan sa iba’t ibang lugar sa Japan kabilang ang Fukuoka sa tulong ng Fukuoka Film Commission. Pinagbibidahan din ito nina JM De Guzman, Allen Dizon, Ces Quesada at Ricky Davao.

Layon ng ika-25 edisyon ng Focus on Asia International Film Festival Fukuoka na ipakilala sa buong mundo ang mga dekalidad na pelikulang Asyano.