Pantasya at bangungot sa pyramid at multilevel network marketing

Ni Cesar Santoyo

Sumulpot ngayon ang multilevel marketing na ang prinsipyo ay direktang ibigay sa consumer o customer ang laan na budget sa promotions and marketing pati na ang kikitain ng department store. Kaya sa multilevel marketing ang mga consumer na rin mismo ang nagpapatalastas at nagbebenta ng mga produkto na hindi mabibili sa mga tindahan at department store.

Hindi naman sa dahilan na makapaggawang gawa ang mga kumpanya ng mga produktong pang multilevel marketing. Idinisenyo ang paraan ng negosyong multilevel marketing sa kadahilanan rin na hindi kakayanin tapatan ang mahal na advertisement at may kahirapan rin na mapabilang ang kanilang produkto sa tinda ng mga department store. Sa madaling salita ay para masiguro ng korporasyon ang kanyang malaking tubo sa pamamagitan ng multilevel marketing.

Karaniwang terminolohiya sa multilevel marketing ang upline or downline at iba pang iskema gaya ng binary, step ladder at iba pa para ang lahat, mula sa downline hanggang sa upline ay nakakakuha ng puntos na may katumbas na halaga sa piso.

Sa multilevel marketing na kung saan ang karamihan ay nagbebenta ng mga food supplements at health and beauty products ay may produktong nahahawakan ang namuhunan na maaring gamit pangpersonal or pambenta. Ang pagkakaroon ng palitan ng produkto sa multilevel marketing ang kaibahan sa tinatawag na “pyramid.”

Sa mga pahayagan sa Pilipinas kasama na ang telebisyon na mapapanood din sa YouTube at sa Facebook kahit nasa Japan ay may isang direktang binansagan na “pyramid scam” ang Securities and Exchange Commission o SEC. Ito ay ang Emgoldex Philippines. Dahilan ng paglalabas ng pahayag ng SEC ay batay sa dami ng mga nagrereklamo kasama ang mga OFW sa South Korea at Dubai laban sa Emgoldex Philippines na hindi rehistradong korporasyon o partnership sa ilalim ng SEC.

Bilang mga naninirahan sa Japan ay mabilis naman pinabuluanan ng mga nasa kampo ng Emgoldex ang pahayag ng SEC. Sapagkat ayon sa mga tagapagtanggol ng Emgoldex sa Japan ay marami sa kanila ang nakatanggap ng kanilang tinubo mula sa pamumuhunan. Pagkatapos maiere ang babala ng SEC laban sa Emgoldex Philippines ay mas dumami pa nga ang may iba-ibang magkarugtong na pangalan “goldex” na iniaalok sa mga Pinoy sa buong Japan.

Kumpara sa multilevel marketing, at kung ang pagbabasehan ng “pyramid” ay ang modelo ng Emgoldex ay makikita ang magkaibang istraktura kung papaano kikita ang mga sumasali. Sa multilevel marketing ang tinatawag na upline ay may nakukuhang benepisyo sa bawat produktong naibenta ng kanilang tinatawag na downline.

Sa matiyagang pagpapaliwanag naman ng isang tagapagtangkilik ng Emgoldex, ang kanilang pinakatinatawag na upline ang nasa pinakaibaba ng kanilang istraktura at ang mga downline ang nasa itaas. May table silang tinatawag na 15 tao ang kailangan para mabuo ang isang table na binubuo ng 8 na initial “investor” at 7 tao na nasa ibaba. Ang 8 tao ay magbibigay ng  ng “initial” investment sa halagang Php36,000 na karaniwan din kino-convert ng mga naggodex sa Japan sa 10 lapad. Kailangan din na mag-invest ang 7 para mapuno ang kanilang table na aabot sa Php540,000 ang suma total ng 15 tao na nag-invest ng tig-36,000 pesos.

Nahahati sa apat na level ang isang table ng mga goldex na ang pinaka level 4, ang nasa ibaba, ang makakakuha ng 180,000 Pesos pagkatapos mabuo ang table na ang lahat ay nag-invest ng tig-36,000 pesos. “Exit” na ang nasa level 4 bilang katawagan sa nakakuha ng 180,000 Pesos. May 14 pang natira sa loob ng table na kailangan ding maka “exit” batay sa kanilang abilidad o kung minsan ay sa tulong ng humikayat sa kanilang mag-invest sa goldex.

Ayon naman sa mga kababayan na nakapanayam na minsang inanyayahan na sumali sa Emgoldex, kahit gustuhin rin niya, ay binantaan sila ng kanyang asawang Japanese na pirmahan na niya ang divorce paper sakaling sasali siya sa Emgoldex. Wika pa ng isa nating kababayan ay hindi niya matatanggap na kung sakaling maka-exit siya, o napuno niya ang kanyang mga level ng recruitment, ay may labing-apat siyang maiiwanan na hindi niya siguradong makaka-exit rin. Kawawa naman daw kung sakaling hindi naka-exit ang kaniyang marecruit at kung sakaling hindi maibalik ang ipinuhunan.

Sa nakaraang tatlong dekada ng paninirahan ng malaking bilang nating mga Pinoy sa Japan ay ngayon lamang natin natutunghayan ang taglay na husay ng Pinoy sa pangangalakal sapagkat hindi madali at hindi biro ang ibinigay na oras, tiyaga, at mapanlikhang paraan para maka-exit ang mga nasa “pyramid” at kumita ng sobrang halaga sa pagmu-multilevel marketing. Mas mapapaunlad pa ito kung sakaling ang mga ipinakitang husay ng ating mga kababayan sa pyramid at multilevel marketing ay mabigyan ng mas magandang alternatibong paraan ng pagkakakitaan.

Dapat rin lamang nating unawain na ang isa sa dahilan ng paglipana ng mga multilevel marketing at pyramiding ay dahil sa kawalan ng ating kamalayan at edukasyon sa praktikal na pamumuhay. Wala namang nag-aalok sa ating mga Pilipino sa Japan na magkaroon ng literasiya sa pinansya at suporta para sa pagkakaroon ng bagong pagkakakitaan mula sa mga pamahalaan at maliban na lamang sa mga miminsang inisyatiba ng ating mga kababayan na nagtatawag ng financial literacy session.

Sa ating pagninilay-nilay sakali mang sumali sa multilevel marketing o kaya ay sa binansagan na pyramid, tandaan lamang na ang mga ganitong uri ng pagkakakitaan ay hindi sustenido at pangmatagalan. Alalahanin din na marami sa ating mga kababayan ang nagkaroon ng sariling kabuhayan mula sa pansariling pagsisikap mula sa wala o maliit na puhunan.

Mahirap ang nabubuhay sa pantasya na maka-exit na may limpak-limpak na salapi sa pyramiding at ang mapabilang sa mga millionaires row ng multilevel marketing company kaya susuungin ito. Walang madaliang kitang salapi ang nagtatagal at hindi rin habang panahon ang kitaan sa pyramiding at multilevel marketing.

At kung sakaling nawala ang pinagkatiwalaang tao sa pyramid o nawala ang kanilang website na karaniwan ng karanasan ay totoong bangungot ang kauuwian ng ating pantasya. Kaya ingat lang mga kabayan sa pagdedesisyon at pag-aralan na mabuti ang inyong papasukin kung sakaling interasadong mag-pyramid o mag-multilevel marketing.

Pa-simple lang tayo tuwing uuwi ng Pilipinas

 Ni Elvie Okabe, DBA/MAE

“Ang Pinoy ‘pag umuwi ng ‘Pinas galing sa ibang bansa ay buong pamilya, kaibigan o barangay ay sasalubungin siya. Ito naman kababayan nating ito ay bigay dito bigay doon ng pera at pasalubong. Tapos wala pang isang buwan sa ‘Pinas na nagbabakasyon ay broke na siya at umuutang na siya. Ganyan ang Pinoy.

“Kaya paalala lang huwag kayong uuwi na ipamigay lang ninyo ang pinaghirapan ninyo kasi bandang huli pag wala na kayong pera lahat ng sumalubong sa inyo ay tatalikuran kayo. Gaya ng mga nakilala ko rito na galing sa ibang bansa. Kawawa naman sila noong wala na silang datung ayon kinakawawa sila. Be wise every day ang financial security ay nakasalalay sa pananaw sa buhay na tatahakin mo. Pwede naman magbigay pero magtira ka sa sarili mo. Have a great life!”

Ito ang Facebook status ng aking kaibigan na hiningi ko ang permiso para mailathala at maibahagi ko sa inyo. Marahil marami po sa atin ang tinamaan ng status na ito o naiintindihan kung saan nanggagalin ang aking kaibigan. Kahit ako man po ay parang naging Santa Claus na nagpamudmod ng pera sa aking mga kamag-anak sa probinsiya nang una kong balik sa Pilipinas bandang 1990.

Mga ilang balik din po taun-taon ay saka tumimo sa aking isipan na kailangan ng strategy upang kahit konti man o malaki ang aking baon ay hindi ako mauubusan ng dalang pera.

Narito po ang aking mga suggestions upang maging simple sa buhay at mapagkasya natin ang ating pera tuwin uuwi tayo ng ‘Pinas para magbakasyon:

1.    Bago umuwi ng ‘Pinas ipadala ang pera bank-to-bank o thru remittance door-to-door kung lalampas ng “100 lapad” ang pera upang sa gayon ay kaunti lamang ang pera sa bulsa. Kung equivalent to US$10,000 or more ang dala sa bulsa ay maaaring makumpiska ng Philippine Immigration o saan man na Immigration ng ibang bansa pag nahulihan po tayo dahil paglabag ito sa international money laundering law.

2.    Huwag ipaalam sa iba na uuwi ka maliban sa magulang at kapatid na susundo. Huwag po isang jeep ang sasalubong at dagdag pa po sa gastos.

3.    Kung maaari ay magpa-schedule ng flight sa gabi o ang dating sa ‘Pinas ay hatinggabi na para lahat ay tulog na at pagdating ay maaari na rin kayo kaagad magpahinga.

4.    Combine giving money with goods o ‘di kaya ay goods lang: magulang, kapatid at mga pamangkin – sanayin natin silang tumanggap sa atin ng mga recycle goods mula sa ukay-ukay sa Japan. Ibigay na lang ang pera sa charity o talagang mahihirap na hindi natin kilala at hindi tayo masusuklian dahil ang sabi ng Diyos, “hanapin muna ninyo ang paghahari ng Diyos at ang kaniyang katuwiran, at ang lahat ng mga bagay na ito ay idaragdag sa inyo” (Mateo 6:33).

5.    Magplanong magkaroon ng investment (real estate o maliit na business) at ilaan ang dalang pera para rito upang sa gayon kapag mayroong mangungutang ay sabihin na lang na, “Sorry nagastos ko na po ang dala kong pera. Bigyan ko na lang po kayo ng kaya ko.”

6.    Huwag pong magsuot ng maraming burloloy o alahas sa katawan kung aalis ng bahay dahil mainit sa mga mata ng mga snatcher o holdaper ang mga ito. Ang iba rin po ay maaaring mainggit o magalit sa atin dahil sa inggit kaya mabuti na po iyong simple lang, may pera man o wala.

7.    Magblow-out na lang minsanan sa lahat.  Lutong-bahay ang ihanda upang makamura at makarami ng handa (kung kaya pa ng bulsa). Maaaring one week bago bumalik ng Japan o depende sa schedule.

Sana po ay nakatulong ang aking mga suhestiyon dahil kailangan din naman po nating protektahan an gating pinaghihirapang kitain sa ibang bansa. God bless po sa ating lahat and have a happy and meaningful life with God in our everyday lives! 

Paglahok sa 2016 eleksyon

Ni Rey Ian Corpuz

Bilang isang OFW at kahit na tayo ay permanent resident visa holders dito sa Japan, importante bilang isang Pilipino na makilahok sa nalalapit na eleksyon. Totoo na talagang nakakawalan ng gana ang pagboto dahil sa ang mga nahahalal sa mga posisyon na kalimitan ay nasasangkot sa mga katiwalian pero responsibilidad pa rin natin ang piliin ang kandidatong nararapat.

Ayon sa istatistika, may mahigit 200,000 Pilipino ang naninirahan sa buong Japan, pangatlo sa pwesto kasunod ng mga Instik at Koreano. Kung tutuusin ay maliit na bilang lamang ito kung ikukumpara sa bilang ng mga botante sa Pilipinas na umaabot ng milyun-milyon. Subalit sa pangkahalatan, kung ang lahat ng mga OFW at mga permanent resident visa holders sa ibang bansa gaya ng Saudi Arabia, USA, Australia, UK at marami pang iba ay tiyak na aabot din tayo ng milyun-milyon.

Sa talaan ng Philippine Statistics Authority noong 2012, nasa 2.2 milyon na ang mga Pilipino ang nagkalat sa iba’t ibang panig ng mundo. Karamihan ay nagtatrabaho bilang guro, engineer, nurses at mga skilled labor.

Sa tingin ko, kung ang mga 2.2 milyong OFWs ay boboto sa bisa ng Overseas Absentee Voting Act ay magiging isa tayong malaking sektor ng mga Pilipino na kayang maghalal ng isang presidente, bise presidente o mga senador.

Ano nga ba ang Overseas Absentee Voting Act?

Matagal na itong aprubadong batas na nagbibigay oportunidad sa lahat ng mga Pilipinong nagtatrabaho sa labas ng Pilipinas na bumoto tuwing may eleksyon. Ibig sabihin, hindi mo na kailangang umuwi ng Pilipinas para bumoto. Kailangan mo lang ay magparehistro sa pinakamalapit sa Philippine Embassy o Consular Office. Ipapadala lang sa iyo ang abiso sa pagboto sa inyong bahay. Hindi mo na kailangang lumiban sa trabaho para lang pumunta sa embahada o consular office para lang bumoto.

Sa buong buhay ko, ngayon lang ako nagparehistro dahil sa tingin ko magiging makulay ang darating na eleksyon. Karamihan sa mga Pilipino rito sa Japan ay walang pakialam masyado sa nangyayari sa eleksyon sa atin dahil unang-una karamihan ng nahahalal ay mga trapo at kurakot. Nakakasawa kung baga.

Sa bagay kung wala ka ba namang pagpipiliang magandang alternatibo, nakakawalan ng gana talagang bumoto. Ang mga Pilipino din sa Japan ay napakaabala sa trabaho na ultimo Sabado o Linggo ay may trabaho. Kulang din sa panahon upang siyasatin at kilatisin ang mga kumakandidato. Basta para sa karamihan, ay sikat o maamo ang mukha, eh tiyak iboboto natin. Tama ba?

Pero sa panahon ng social media kagaya ng Facebook at mga online news sutes, madali lang natin malaman ang background ng mga tatakbo sa eleksyon. Tiyak at nakikita ninyo rin ito sa mga libreng videos na ina-upload ng mga TV networks sa kanilang Facebook accounts.

Malapit na ang May 13, 2016 elections. Labing-isang buwan na lang. At ang deadline para sa rehistro ng Overseas Absentee Voting ay hanggang Oktubre na lamang. May napupusuan ka na ba?

Sana naman tayong mga OFWs ay maghalal ng karapat-dapat na presidente. Sawang-sawa na po tayo sa mga pangako ng mga pulitiko.

May tatlo pong dahilan kung bakit tayo nakikipagsapalaran dito. Una, dahil in-demand iyong skills natin dito at nagkukulang sa workforce ang Japan. Pangalawa, baka kayo po ay nakapag-asawa ng Hapon kaya napili ninyo na rito manirahan. At pangatlo, baka walang magandang trabaho sa Pilipinas kaya napilitan tayong mangibang-bayan.

Karamihan sa profile ng karamihan sa Japan, pasok ito sa pangalawa, o ang pagkakaroon ng asawang Hapon pero ang pangatlo na kung saan hindi kayang ibigay ng ating bansa ang magandang trabaho ang nagtutulak sa halos lahat ng mga Pilipinong mangibang bansa. Kasali po ang inyong abang lingkod sa pangatlo.

Parami na ng parami ang bilang ng OFWs sa iba’t ibang bansa na nagpapadala ng pera sa Pilipinas. Maganda para sa ating lokal na ekonomiya pero ang tanong, hanggang kailan po tayo magiging OFW sa ibang bayan?

Sana po ay magkaroon na po ng long-term solutions ang ating pamahalaan na dagdagan ang trabaho para sa lahat upang hindi na tayo mangibang-bayan. Ang 200,000 mahigit na mga OFWs sa Japan at ang dalawang milyong OFWs sa buong mundo ay kayang maghalal ng karapat-dapat na pangulo kaya maging mapagmasid at maging wais po sa ating desisyon. 

Kobe Port Tower: Ang Matayog na Simbolo ng Kobe

Ni Florenda Corpuz

Isa ang Kobe sa 10 pinakamalaking siyudad sa Japan. Ito ang kapital ng Hyogo prefecture at matatagpuan sa pagitan ng Rokko mountain range at dagat. Ang port o daungan ng lungsod ang isa sa pinakaunang nagbukas sa foreign trade noong ika-19 na siglo.

Nagbukas sa kalakalan ang Port of Kobe noong 1868 habang itinayo naman ang Kobe Port Tower noong 1963 sa Meriken Park, isang waterfront park na nasira ng Great Hanshin Earthquake noong 1995 at muling isinaayos ngunit may bahagi ito na iniwan para alalahanin ang mga biktima ng lindol.

Ang matayog na Kobe Port Tower ang itinuturing na simbolo ng lungsod na may taas na 108 metro. Ito ang kauna-unahang tore sa buong mundo na may pipe structure. Tinatawag itong “Steel Tower Beauty” dahil sa kakaibang istruktura at hugis nito na tila isang Japanese drum. Sa katunayan, ito ay nakatanggap ng Best Work award mula sa Architectural Institute of Japan noong 1963.

Ito ay may limang palapag kung saan ang dalawang palapag ay may mga restaurant at rotating café habang ang tatlo naman ay may observation decks.

Sa observation platform ay tiyak na mamamangha sa 360 degree panorama kung saan masisilayan ang Osaka sa silangan, Akashi Great Bridge sa kanluran, Kobe Airport sa timog at Mt. Rokko sa hilaga.

Mamamangha rin sa isang seksyon na gawa sa espesyal na salamin na nagiging transparent kapag lumalapit ang mga tao. Sa kisame naman ay may mga optical fibers na nilagay para makalikha ng mga bituin sa kalangitan. Tuwing gabi ay nagpapailaw din ng 7,000 LEDs na nakalutang sa madilim na alapaap para sa nakakamanghang night view ng Kobe.  

Mag-e-enjoy din sa rotating café na umiikot kada 20 minuto kung saan makikita ang magagandang tanawin ng Kobe. Siyempre pa, hindi mawawala ang souvenir shop at amusement area rito. Matutuwa rin kay Captain Tower-kun na siyang mascot ng Kobe Port Tower.

           

Mararating ang Kobe Port Tower 15-minutong lakad mula sa JR at Hanshin Motomachi Stations. At 10-minutong lakad mula sa Municipal Subway Kaigan Line Minato-Motomachi Station. Bukas ito araw-araw at may bayad ang pagpasok dito: ¥600 for adults, ¥300 for elementary school and junior high school students.

Mga Pinoy pangalawa sa pinakamaraming nabigyan ng Japanese visa

Ni Florenda Corpuz

Kuha mula sa MOFA

Pangalawa ang mga Pilipino sa pinakamataas na bilang ng mga dayuhan na nabigyan ng Japanese visa noong 2014, ito ang pahayag ng Ministry of Foreign Affairs (MOFA) kamakailan.

Ayon sa ulat na inilabas ng MOFA, umabot sa 163,386 ang mga Pilipinong nabigyan ng Japanese visa noong nakaraang taon na katumbas ng anim na porsyento ng kabuuang total.

Umabot sa 2,871,639 ang mga Japanese visa na naibigay sa mga dayuhan mula Enero hanggang Disyembre, mas mataas ng 54% mula sa 1,864,425 noong 2013.

Bukod sa mga Pilipino, kasama rin sa top 10 ang mga Chinese na umokupa ng unang pwesto kung saan 2,048,106 ang nabigyan ng Japanese visa o 71% ng kabuuang total. Pangatlo ang mga Indonesian na may 141,321 o limang porsyento, pang-apat ang mga Vietnamese na umabot sa 96,648 o tatlong porsyento.

Panglima naman ang mga Indian na umabot sa 66,696 o dalawang porsyento, pang-anim ang mga Russian sa 57,606 o dalawang porsyento, pampito ang mga Brazilian sa 34,217 o isang porsyento, pang-walo ang mga Thai sa 21,322 o isang porsyento, pang-siyam ang mga Amerikano na may 19,017 o isang porsyento at pang-sampu ang mga Korean na may 18,861 o isang porsyento. Habang ang ibang nasyonalidad ay umabot naman sa 204,459 o pitong porsyento.

“With the weakening yen, the expansion of the consumption tax exemption program and other factors, the number of visitors exceeded 13,410,000. Along with this, the total number of visas issued marked a record high,” ito ang pahayag ng Japan National Tourism Organization (JNTO).

Matatandaang inaprubahan ng pamahalaang Hapon ang pagpapatupad sa mas pinaluwag na pagkuha ng multiple-entry visa at single-entry tourism visa ng mga Pilipinong turista patungong Japan simula noong nakaraang taon.

Ambeth Ocampo, na-appoint sa Advisory Board ng Japan Foundation Asia Center

Ni Florenda Corpuz

Dr. Ambeth R. Ocampo kasama si Japanese Prime Minister Shinzo Abe
 (Kuha mula sa Facebook page ni Dr. Ambeth Ocampo)

Pormal na ang appointment ng kilalang mananalaysay ng kasaysayan, mamamahayag at manunulat na si Dr. Ambeth R. Ocampo sa Advisory Committee ng Japan Foundation Asia Center.

Sa kanyang Facebook post ay ibinalita ni Ocampo na tinanggap niya ang appointment.

“Accepted an appointment to the Advisory Board of the Japan Foundation Asia Center. After our recent meeting in Tokyo the ASEAN members paid a courtesy call on the Prime Minister of Japan.”

Isa si Ocampo sa 15 miyembro ng kumite na nagsagawa ng courtesy call kay Prime Minister Shinzo Abe sa Prime Minister’s Office noong Marso 31.

Mainit na tinanggap ng lider ng Japan sina Ocampo na nagpahayag ng pagkalugod para sa kanilang ambag sa promosyon ng kultura at pagkakasundo sa rehiyon.

“I would like to extend a warm welcome to the Prime Minister’s Office to all the ‘WA Project: Towards Interactive Asia through “Fusion and Harmony’ Advisory Board members.”

“The WA Project deepens the spiritual bonds between Japan and the other ASEAN nations, and I am delighted to welcome all of you who play such an important role as advisors to the project,” pahayag ni Abe.

Ang WA Project ay sinimulan base sa anunsyo ni Abe sa ASEAN-Japan Commemorative Summit Meeting noong Disyembre 2013 bilang bagong Asian cultural exchange policy na magpapatupad sa mga cultural exchanges sa pagitan ng mga bansa sa Asya, pangunahin ang mga kasaping bansa sa ASEAN.

Ang Japan Foundation Asia Center ay binubuo ng 21 cultural figures at experts mula sa Japan at kasaping bansa sa ASEAN kung saan si Ocampo ang kinatawan ng Pilipinas. Itinatag ito upang itaguyod at palakasin ang bilateral cultural exchange sa pagitan ng Japan at mga bansa sa Asya.

Pag-aaralan ng board ang mga ipinapatupad na programa ng Asia Center bago magsagawa ng rekomendasyon sa pangulo nito. Napag-usapan sa una nilang pulong ang progreso ng mga proyekto sa loob ng mga nakalipas na taon at mga plano sa hinaharap.

‘Japan Day Project’ bumida sa Cannes

Ni Florenda Corpuz

Kuha mula sa kaliwa: Mika Morishita, Kundo Koyama, Kiki Kirin, Yoko Narahashi

(Kuha ni Tristan Fewings/Getty Images for Japan Day Project)

Pormal na inilunsad kamakailan ang pinakabagong promotional campaign ng Japan na tinawag na “Japan Day Project” (JDP) sa Foreign Correspondents’ Club of Japan na may layong pasiglahin ang global market para sa entertainment at pop culture ng bansa.

 Ngayong 2015 ang tinaguriang debut year ng proyekto kung saan nakalinya ang iba’t ibang JDP events na gaganapin sa mga film festivals, conventions at content markets sa Cannes, Paris, Taipei at Tokyo.

At bilang inisyal na handog ng JDP, nakibahagi ito sa Cannes Film Festival noong nakaraang buwan kung saan pitong pelikulang Hapon ang ipinalabas: Ang “Our Little Sister” ni Hirokazu Kore-eda (Competition), “AN” ni Naomi Kawase (Un Certain Regard’s Opening Film), “Journey to the Shore” ni Kiyoshi Kurosawa (Un Certain Regard) at “Yakuza Apocalypse: The Great War of the Underworld” (Director’s Fortnight) ni Takashi Miike. Sa Classics program naman ay ipinalabas ang “The Story of the Last Chrysanthemums” ni Mizoguchi Kenji, “Battles Without Honor and Humanity” ni Fukasaku Kinji at “Ran” ni Akira Kurosawa.

Bumida naman ang sikat na Japanese actor na si Ken Watanabe sa “Sea of Trees” ni Hollywood director Gus Van Sant (Competition) habang si Satoshi Tsumabuki naman ay lumabas sa “The Assassin” ng Taiwanese na si Hou Hsiao-Hsien. Dumalo rin ang sikat na aktres na si Kirin Kiki na bahagi ng mga pelikulang “Our Little Sister” at “AN.”

 “I’m truly grateful that this effort is being made on behalf of Japanese actors in Cannes,” pahayag ni Kirin.

 “I hope many people will take advantage of this amazing opportunity,” dagdag pa nito.

Sa Japan Pavilion ng Cannes International Village ay matatagpuan ang koleksyon ng mga bagong manga, anime at nobela. Nagkaroon din ng mga serye ng seminar na tinawag na “New Gateways to the Japanese Industry” kung saan tinalakay ang mga istratehiya sa pagkakaroon ng rights at co-produce. Ito ay pinangunahan ng mga kilalang personalidad mula sa Japanese at international movie industry. Nagkaroon din ng pagkakataon ang mga buyers na masilayan ang mga pinakabagong pelikulang Hapon.

Nagtapos ang JDP sa Cannes sa pamamagitan ng “Kanpai Night” na pinangunahan ni Kundo Koyama, ang lumikha ng sikat na TV series na “Iron Chef.”

“Through this project, I would like to convey to the rest of the world that Japan is a treasure chest of culture and entertainment content,” pahayag ni Koyama.

Itinuturing ito na pinakamalaking partisipasyon ng Japan sa prestihiyosong festival sa nakalipas na dekada.

May temang “Connecting People, Driving Culture,” ang JDP ay suportado ng Ministry of Economy, Trade and Industry (METI) of Japan.

PNoy, bitbit ang Japanese investments sa ‘Pinas

Ni Florenda Corpuz

Hinikayat ni Pangulong Aquino ang iba’t ibang Japanese
 trade organizations na mamuhunan sa Pilipinas sa ginanap na
Philippine Investment Forum sa New Otani Hotel sa kanyang
state visit sa Japan kamakailan. (Kuha ni Din Eugenio)

Balik-Pilipinas na si Pangulong Benigno S. Aquino III matapos ang apat na araw na state visit sa Japan bitbit ang pangako ng dagdag na Japanese investments at pagtalakay sa mga isyu ng South China Sea.

Lumapag sa Ninoy Aquino International Airport ang Pangulo sakay ng Philippine Airlines Flight PR 001 kung saan siya ay sinalubong ng mga miyembro ng kanyang Gabinete kabilang sina Executive Secretary Paquito Ochoa, Interior and Local Government Secretary Manuel Roxas, Justice Secretary Leila de Lima, MMDA Chairman Francis Tolentino, DOLE Secretary Rosalinda Baldoz, DOH Secretary Janette Garin at Tourism Secretary Ramon Jimenez.

Sa kanyang unang state visit sa Japan mula Hunyo 2-5 sa imbitasyon ng pamahalaang Hapon, nakatanggap ang Pangulo ng Php13.5 bilyon investment pledges mula sa 11 kumpanya na lumagda sa letters of intent na magbukas o palawakin ang kanilang operasyon sa Pilipinas.

Ayon kay Aquino, nagbabalak ang clothing company na Uniqlo na kasalukuyang may 22 outlets sa bansa na magdagdag pa ng 200 shops. Habang ang ibang kumpanya naman ay nasa manufacturing ng electric tricycles, printers, smart glasses at medical devices tulad ng aortic catheter, invitro diagnostics at para sa hemodialysis treatment ang interes.

“Sa pagdadala nila ng mga produktong ito sa Pilipinas, malinaw na lumalawak ang pagkilala ng mundo sa talino at talento ng Pilipino,” saad ni Aquino na sinabi rin na ang ibang kumpanya ay nagpahayag ng  plano na Pilipinas ang gawing sentro ng kanilang operasyon sa ASEAN region.

“Dahil alam naman nating kapag mas mataas sa value chain ang produktong nililikha ay mas mataas din ang pasahod at mas mabilis na matatamasa ang ginhawa at dignidad ng buhay para sa nakakaraming Pilipino,” dagdag ng Pangulo sa mga investment pledges na maaaring makalikha ng nasa 30,721 na trabaho.

Nilagdaan din ng Japan at Pilipinas ang mga kasunduan sa health, maritime safety at trade pati na rin ang concessional loan na nagkakahalaga ng P136.9 bilyon infrastructure projects.

“Ito pong concessional loan ang pautang na sobrang gaan ng interes at ipinagkakaloob ng kaibigan sa kanyang kapwa kaibigan. Nagpapakita po ito ng kagustuhang tunay na makatulong kaysa maging pabigat,” ani Aquino.

Lumagda rin sina Aquino at Japanese Prime Minister Shinzo Abe ng Joint Declaration on Strengthened Strategic Partnership sa summit meeting na ginanap sa Akasaka State Guest House.

“Tunay nga pong pinapalalim ang ugnayan ng ating mga bansa sa maraming sektor, kabilang na ang seguridad. Napapanahon po itong pagtaas ng antas ng ating relasyon sa Japan sa harap ng mga banta sa estabilidad sa West Philippine Sea,” sabi ng Pangulo.

“Ang mahalaga nga po ay nakikita nating nagtutugma ang mga prinsipyo ng Japan at Pilipinas tungkol sa paggalang sa mga karapatan ng bawat bansa, sa malayang paglalayag sa international waters, at sa paghahari ng batas at mapayapang ugnayan upang matugunan ang anumang di-pagkakaintindihan. Sa tulong nga po ng Japan, natatawag ang pansin ng mas marami pang mga bansa sa sitwasyon sa mga dagat ng Asya,” dagdag pa nito.

Pakikipagkita sa mga opisyal

Sinimulan ni Aquino ang kanyang state visit sa Japan sa pamamagitan ng isang state call kina Emperor Akihito at Empress Michiko sa Imperial Palace kung saan isang welcome ceremony at state banquet ang maghihintay sa kanya. Ginawad sa kanya ng Japanese monarchy ang “Grand Cordon of the Supreme Order of the Chrysanthemum,” ang pinakamataas na karangalan na ibinibigay sa natatanging indibidwal. Habang binigay naman niya kay Emperor Akihito ang “Order of Lakandula with rank of Supremo.”

Nagbigay din ng talumpati si Aquino sa National Diet, na huling ginawa ni dating Pangulong Carlos Romulo at sa Nikkei 21st International Conference on the Future of Asia. Dinaluhan din niya ang Philippine Investment Forum kung saan niya inimbitahan ang mga Japanese investors na mamuhunan sa Pilipinas.

           

Nakipagkita rin siya sa mga miyembro ng Filipino community sa Okura Hotel kung saan hinimok niya ang mga ito na patuloy na suportahan ang kanyang mga reporma kahit na matapos ang kanyang termino.

Sa pagtatapos ng kanyang state visit, nagpaalam si Aquino kina Emperor Akihito at Empress Michiko sa Imperial Hotel. Pagkatapos nito ay nagtungo siya sa Japan National Press Club kung saan sinagot niya ang mga katanungan ng mga mamamahayag. Nilagdaan din niya rito ang guestbook kung saan niya nakita ang mensahe na nilagdaan ng kanyang ina na si dating pangulo Corazon Aquino noong November 13, 1986.

Top 6 na kumpulan ng mga Pilipino sa Japan

Ni Rey Ian Corpuz

Mga aktibidad na ginagawa ng mga Pilipino kung saan sila ay nakikitang grupu-grupo o ‘di kaya ay medyo maramihan.

1. Misa tuwing Lingo (Sabado para sa ibang relihiyon). Karamihan ng mga simbahan sa mga malalaking siyudad sa Japan ay karamihan binubuo ng mga Pilipino ang kanilang miyembro. Halimbawa para sa mga Katoliko sa Tokyo, sikat ang simbahan sa Yotsuya (St. Ignatius), Roppongi (St. Francis) at Meguro (St. Anselmo) na karamihan mga Pilipino ang dumadalo lalo na sa English mass nito. Hindi lang ang mga nananampalataya kung hindi pati na rin ang mga kumakanta sa choir at mga tumutugtog sa misa ay karamihan binubuo ng mga Pilipino. Kalimitan ang Lingong misa ay nagiging mini-reunion ng mga dating magkatrabaho, kaklase o kahit na sinong Pilipino. Minsan lalo na sa mga baguhan dito sa Japan, ang simbahan ang isang magandang lugar upang makahanap ng taong pwedeng tumulong o gumabay sa iyo sa pasikot-sikot sa Japan. Kahit na ipinagbabawal, minsan marami kang nakikitang mga kapwa Pilipino na nagtitinda ng mga pagkain, kakanin at kung anu-ano pang gamit sa labas ng simbahan. Kapag wala namang naninitang pulis ay tiyak na maraming Pilipinong nagkukumpulan habang kumakain at nag-uusap sa gilid ng daan. Parang nasa Pilipinas lang ano?

2. Christmas party at food bazaar sa mga lokal na simbahan. Tiyak na ito ang isa sa mga pinakasikat na aktibidad ng halos lahat ng simbahan, ang Christmas party. Sa Christmas party din, nararamdaman ng mga Pilipino rito ang totoong diwa ng Pasko sa pamamagitan ng pagbibigay ng mga regalo lalo na sa mga bata at ang ispiritwal na totong diwa ng Pasko. Tiyak din na may mga grupong Pilipino ang magpe-perform tulad ng sayaw, kanta o ‘di kaya ay isang dula ukol sa Nativity. At dahil potluck party, siguradong lahat ay nagdadala ng kani-kanilang sariling lutong Pilipinong putahe. Maliban sa Christmas party, ang mga international food bazaars o mga fund drive bazaars naman ang isang siguradong okasyon na maraming mga Pilipino. Mahilig tayong kumain at minsan nakakasawa rin ang puro mga Japanese food ang ating kinakain kaya’t tiyak na hindi mo matitiis na pumunta sa mga food bazaar.

3. Fund raising activities ng mga Filipino groups at maging ng Philippine Embassy. Tulad ng Barrio Fiesta na taun-taun ginaganap, ito ay dinadagsa ng maraming Pilipino. Maraming mga sikat na artista galing Pilipinas ang pumupunta rito upang magbigay aliw at saya para sa ating mga kababayan. May mga fund raising din ang halos lahat ng mga aktibong grupo tulad ng “Lumad” at Samahang Pilipino na kung saan ay dinadaan nila sa konsiyerto at mga shows upang makatulong sa mga foundation sa Pilipinas. Walang humpay naman ang suporta ng mga kapwa Pilipino at maging ibang lahi kaya taun-taun ito ay nagiging matagumpay.

4. Beauty pageants, singing at talent contests. Maraming magaganda at gwapong mga Pilipino na sumasali sa mga patimpalak na ito kaya marami rin na mga Pilipinong nanonood. Marami mga paligsahan sa pag-awit at pagpapakita ng talento ang ginaganap sa buong Japan ng bawat organisadong Pilipinong grupo kaya tiyak na dinudumog ito ng mga kapwa natin Pilipino.

5. Bus tours ng mga Filipino groups. Isa sa masayang gawin kasama ng mga Pilipino ay ang bus tours. Mura na, masaya pa! Iyan ang isa sa mga pang-akit ng mga Filipino groups sa mga bus tours. Hindi mo na kailangan gumastos ng pagkamahal hindi tulad ng mga tours na naka-advertise sa mga sikat na travel agencies. Maganda pa dahil puro kayo Pilipino at hindi mo kailangan maging nakapakatahimik at talagang mararamdaman mo ang Filipino hospitality na ibang-iba sa kulturang Hapon. Mapa-onsen man, o mga flower parks, zoo, Mt. Fuji, factories, museums, at theme parks, lahat ito ay dinudumog ng mga Pilipino.

6. Laban ni Manny Pacquiao. Sa may mga cable TV o magaling maghanap ng libreng online streaming, tiyak maraming Pilipino ang nagkumpulan noong Mayo 3. Masaklap nga lang at natalo ang ating “Pambansang Kamao” pero sa puso ng bawat Pilipino, si Manny Pacquiao pa rin ang champion. Rematch ba kamo? Hindi bale na lang. Kung ang makakalaban din naman niya ay takbo lang nang takbo, mabuti pa huwag na lang. Marahil maraming nagsigawan, hiyawan at nag-cheer para kay Manny noong Mayo 3. Tiyak na naging maingay ang pagtitipon ng mga Pilipino nating kababayan.

Iza Calzado, busy with a musical and new international film

Iza Calzado

Tuluy-tuloy ang magagandang pangyayari at proyekto sa karera ni Iza Calzado ilang taon mula nang lumipat ito bilang isang exclusive talent sa ABS-CBN nitong 2012 sa ilalim ng Star Magic. Naging exlusive talent si Calzado sa GMA Artist Center mula 2004-2011. Nakapirma rin si Calzado sa isang non-exclusive contract sa Star Cinema, ang film production arm ng ABS CBN.

Kamakailan natupad ang isa sa pangarap ni Calzado na maipinta ng isa sa nirerespetong pangalan sa industriya ng sining sa bansa, ang National Artist for Visual Arts na si Benedicto “BenCab” Cabrera.  Hindi naitago ng aktres ang kanyang kagalakan sa natatanging pagkakataon na ito. Ipininta si Calzado ng dalawang portrait ni Cabrera, kung saan ang isa rito ay ginamit bilang publicity poster para sa musical na “Sabel” na pinagbibidahan din ni Iza.

Kauna-unahang pagkakataon ito para kay Calzado  na maging pangunahing karakter ng isang musical. Aniya, isang bagong karanasan ito para sa kanya. Dagdag ng aktres, magandang pagkakataon din ito para matuto ng ibang mga bagay at maipakita ang ibang Iza Calzado mula sa kanyang mga pagganap sa telebisyon at pelikula. Naniniwala rin siya ng lubos sa kakayahan ng direktor nitong si Freddie Santos. Isinulat din ni Santos ang mga liriko at libretto sa naturang musical.

‘Sabel: Love and Passion’

Pinamagatang “Sabel: Love and Passion” ang musical na tungkol sa buhay ni Sabel, ang inspirasyon ni Bencab sa kanyang pagpipinta. Tinalakay ng kwento sa pamamagitan ng interpretasyon ng sayaw mula sa Philippine Ballet Theater (PBT) at sinasabayan ng mga makaantig damdaming mga kanta ang pagkasilang ni Sabel hanggang sa pagiging comfort woman, nightclub dancer, isang ina at kalaunan bilang isang babaeng sumasayaw sa kalye na siyang magbibigay inspirasyon sa isang batang magpipinta para sa kanyang pinakamagandang obra.

Nakatakda ang kwento ng Sabel sa mga panahong mahalaga sa kasaysayang ng bansa, nang umalis ang mga Kastila at namuno ang mga Amerikano. Nagmula ang inspirasyon ng Sabel sa 1965 na obra ni Cabrera ng isang babaeng nagngangalang Sabel na namumulot ng mga basura. Nagsilbi rin na pangunahing handog ang Sabel bilang selebrasyon ng ika-50 anibersaryo ni Cabrera sa industriya. Ginanap ang World Premiere Gala ng Sabel kamakailan at regular run sa Hunyo 26-27 sa Music Museum.

‘Showdown in Manila’

Maliban sa musical, abala rin si Calzado sa upcoming international film na “Showdown in Manila” kasama ang mga Fil-Am Hollywood stars na sina Tia Carrere at Mark Dacascos, Casper Van Dien at Cary Hiroyuki Tagawa. Gaganap si Calzado bilang isang pulis sa pelikula na mula sa direksyon ni Dacascos.

Ayon kay Calzado, nagustuhan nito ang kanyang karanasan sa pelikula dahil hindi siya na-typecast. Itinuturing din niyang kakaibang karanasan ang karakter niya bilang pulis. Bagaman natatakot siya kapag may baril, ginawa pa rin ni Calzado ang lahat ng kanyang makakaya para sa karakter niya.

Pangalawang beses na ito kay Calzado sa isang international film, una sa “The Echo” (2008) na English remake ng pelikulang “Sigaw” (2005) kung saan kabilang din siya sa cast. Aniya, bukas siya sa posibilidad na subukan ang mga proyekto sa Hollywood kung mayroong casting calls. Nagbigay inspirasyon din sa kanya ang pagiging bahagi niya ng Showdown in Manila para subukan mag-aral ng acting sa Los Angeles.

Inilunsad din ni Calzado ang isang instructional fitness video, ang “Level Up! Make That Change Now.”

Kilala si Calzado sa mga pelikulang “Moments of Love,” “Mulawin The Movie,” “Batanes: Sa Dulo Ng Walang Hanggan,” “Maria Leonora Teresa” at “Starting Over Again” at sa telebisyon sa “Encantadia,” “Atlantika,” “Impostora,” “Kahit Puso’y Masugatan” at “Hawak Kamay.”