Kultura ng pang-aapi

Ni Rey Ian Corpuz

Isang malaking suliranin ng bansang Hapon ang kaliwa’t kanang pang-aapi lalo na sa mga pampublikong paaralan. Marahil kahit saang sulok ng mundo ang pang-aapi o “pambu-bully” ay bahagi na ng kultura. Maraming mga kabataang hindi kinakaya ang ganitong klaseng pagsubok kung kaya’t may ilang bilang na nagpapakamatay upang takasan ito.

Alam ng lahat na malaki ang kakulangan ng kanilang populasyon at nababawasan pa ng lalo dahil sa suliraning sosyal sa mga paaralan. Kahit sino ay nagiging biktima, mayaman man o mahirap. May problema man sa pamilya o wala.

Isa sa mga lugar kung saan nagaganap ang pambu-bully ay sa mga paaralan. Ang pang-aapi ng mga kabataan sa kanilang mga kamag-aral ay nag-uugat sa maraming kadahilanan. Unang-una, marahil kulang sa atensyon ang bata. Sa sobrang abala ng kanilang mga magulang sa pagtatrabaho, ay iyon lamang ang paraan upang sila ay mapansin.

Kalimitan ang pang-aapi na nagaganap sa mga paaralan ay nag-uugat kung sino ang naiiba. Halimbawa, matalino ang bata at siya ang parating nakakasagot sa klase o mataas ang marka. Dala na rin ng inggit ay pwedeng pagkaisahan ng grupo ng mga bata ang kanilang kaklase. Maaari rin na ang nang-aapi ay naiinggit dahil salat sa personal na kagamitan. Sa pampublikong paaralan ay paminsan-minsan nagpapayabangan ng mga bagong “game titles” o mga usong gamit.

Samu’t sari ang ugat ng pang-aapi sa paaralan pero ang nauuso kamakailan ay ang pagpapakalat ng mga “chismis” laban sa isang bata sa cellphone application na “LINE.” Ito ay isang messenger application kagaya ng “Yahoo Messenger” at “Skype” na kung saan libreng makakapagpalitan ng mensahe at tawag. Nauuso ito lalo na sa mga kabataan dahil libre, at “kawaii” ang mga icons nito.

Hindi na bago ang pang-aapi sa henerasyon ng Internet. Nariyan ang “2Channel” na kung saan maraming mga Hapon ang nagpapahayag ng kanilang mga ayaw sa isang tao o isang kumpanya. Ang LINE kamakailan ay nagiging mainit na paksa ukol sa pagsugpo ng pang-aapi lalo na sa paaralan. Ang Kagawaran ng Edukasyon sa Japan ay nagpalabas ng guidelines na kung saan nakasaad ang mga panganib na naidudulot ng ganitong uri ng cellphone application.

Sa aking personal na karanasan, may estudyante akong Pilipino na nakikipag-away sa kanyang kaklase dahil sa hindi pagkakasunduan na mga mensahe sa LINE. Kaya upang maiwasan ang mga ganitong pangyayari, hindi inirerekomenda ng mga guro sa paaralan ang paggamit ng mga ganitong uri ng komunikasyon.

Ang pang-aapi ay hindi lamang nangyayari sa paaralan, ito ay nangyayari rin sa karaniwang opisina o sa kumpanyang pinagtatrabahuan. Sa pagdating ko sa bansang ito, may mga kasamahan akong Hapon sa trabaho na naging mailap sa akin at karamihan ng gawain sa opisina ay ipinapasa sa akin. Sa paglipat ko ng ibang trabaho at pagtira sa labas ng Tokyo, nakita ko rin kung papano “mambully” ang mga Hapon sa mga dayuhan at kapwa nila Hapon.

Mahirap makibagay, gaya na lamang ng naging karansan ko sa unang araw ko sa bago kong trabaho. Pinakita ko ang aking litrato na nagpunta ako sa isang “maid cafe” sa Akihabara. Dahil na rin sa bago ako sa bansang ito at hindi pa masyadong alam ang kanilang kultura ay naging negatibo ang pagtingin sa akin.

Naging tampulan din ako ng tukso at tinawag na “otaku” o taong kakaiba (weird). Matagal-tagal din bago ko napag-aralan ang kanilang kultura at saksi din ako sa pambu-bully sa iba ko pang kasamahan na may kanya-kanyang kinahihiligan na medyo alanganin sa kanilang edad.

Noong nakaraang buwan ay nabalita ang pambabastos ng isang lalakeng pulitiko sa isang babae habang ito ay nagsasagawa ng kanyang talumpati sa Kongreso. Talaga namang walang humpay ang pang-aapi ng mga pulitikong ito. Nasa modernong panahon na tayo at hindi na ito panahon ng mga samurai na kung saan sila ang naghahari.

Lahat tayo ay dapat pantay-pantay at walang lamangan. Ang resulta ng lahat ng pang-aaping ito ay depende na rin sa inaapi kung papano niya lalabanan at lalampasan ang ganitong pagsubok. Kung mahina ka at ikaw ay bibigay, talo ka. Kung ikaw ay lalaban siguro ito pa ang magbibigay sa iyo ng karanasan upang maging mas maparaan at matatag sa kung anumang pagsubok na darating sa iyong buhay.