Philippine Arena ng Iglesia ni Cristo pinasinayaan na

Kuha mula sa Malacanang Photo Bureau

Binuksan na ng religious group na Iglesia ni Cristo ang Philippine Arena, na itinayo sa 50-ektaryang lupain sa Bocaue, Bulacan na kanilang tinawag na Ciudad de Victoria o “City of Victory” kamakailan.

Ang Philippine Arena ang tinagurian ngayon na pinakamalaking indoor arena sa buong mundo na mayroong kapasidad na 55,000-seat --- dalawang beses na mas malaki sa Mall of Asia Arena na kaya ang 20,000-seat at tatlong beses na mas malaki sa Smart-Araneta Coliseum na may kapasidad na 18,000-seat.

Mas malaki rin ito sa ilang popular na arena sa ibang bansa gaya ng Madison Square Garden ng New York City (20,000), Staples Center ng Los Angeles (21,000) at O2 Arena ng London (20,000).

Umabot sa humigit-kumulang sa $200 milyon o P7.8 milyon ang gastos sa pagpapatayo ng Philippine Arena na dinisenyo ng Popolous, ang grupo na nagdisenyo ng O2 Arena at itinayo ng Korean construction firm na Hanwha Engineering and Construction Corp.

Sentro ang Philippine Arena ng ika-100 anibersaryo ng Iglesia ni Cristo na ngayon ay pinamumunuan ni Ka Eduardo Manalo.

Sa naganap na inagurasyon, humigit-kumulang sa 55,000 miyembro ng Iglesia ni Cristo ang dumagsa sa Philippine Arena sa Bocaue upang makita sa unang pagkakataon ang naturang imprastruktura at saksihan ang pagbubukas nito.

Dumalo sa naturang pagdiriwang si Pangulong Benigno Aquino III kasama ang ilan pang opisyal ng gobyerno. Sa kanyang ibinigay na talumpati, sinabi ng Pangulo na ang pagbubukas ng Philippine Arena ay isang simbolo ng maganda at matibay na pagsasamahan ng Iglesia bilang isang pamilya at komunidad.

“Kongkretong patunay nga po ang paglulunsad ng Ciudad de Victoria sa diwa ng pagkakaisang nangingibabaw sa Iglesia ni Cristo. Naipatayo ito mula sa buong-pusong paghahandog ng inyong mga kasapi, kaakibat ang hangaring makatulong sa mabubuting gawain at misyon ng Iglesia. Patunay din po ito sa tayog ng mithiing kayang maabot ng mga Pilipino, at sa kakayahan nating makipagsabayan sa buong mundo,” ani Aquino.

Pinasaringan din ni Aquino ang ilang kritiko ng kanyang gobyerno sa gitna ng kontrobersiyang kinasasangkutan nito hingil sa Disbursement Acceleration Program (DAP).

“Mayroon pong iilan na anuman ang gawin ko, gaya ng pagdalo rito, ay maghahanap pa rin ng puwedeng ibatikos. Paalala ko lang sa kanila: Kung kapwa ko Kristiyano, tungkulin nating magmahalan sa ngalan ng Panginoon, sa halip na maghasik ng agam-agam at ‘di-pagkakaunawaan.”

Ayon sa pamunuan ng Iglesia, bukas sa iba’t ibang organisasyon – lokal man o international – basta’t gagamitin ang Philippine Arena nang naaayon sa mga aral sa Bibliya at kabutihang asal.

Wala rin kunkretong sagot ang Iglesia sa tanong kung papayagan nilang ipagamit sa ibang religious group ang Philippine Arena.

“We reserve the right to determine what kinds of activities will be held here based on wholesome Christian principles and values that our church upholds,” pahayag ni Iglesia ni Cristo evangelist Bro. Bienvenido Santiago, Jr. sa isang panayam.