Summer blooms: Flower field destinations within the Philippines

Tuwing summer, nakagawian na ang magpunta sa mga baybayin o magtampisaw sa malamig na tubig ng mga talon para maibsan ang init ng panahon. Subalit may kakaiba at espesyal na pakiramdam ang maglakad-lakad at simpleng damahin lang ang simoy ng hangin habang napapalibutan ng mga makukulay at iba’t ibang klase ng mga bulaklak sa mga tinatawag na flower field o flower farm destinations sa bansa.

Gaya ng dinadayong sakura sa Japan at wisteria flower tunnel sa Kawachi Fuji Garden sa Kitakyushu, kaaya-aya rin na gawin ang ganito sa Pilipinas na may mga maipagmamalaking magagandang bulaklak din.

Stroll amongst the flowers

At bagaman walang malawak na flower field gaya ng Hitachi Seaside Park sa Hitachinaka, Ibaraki Prefecture, mayroon naman tayong sariling atin gaya ng Liwasan Cosmos Flower Field sa Masungi Georeserve sa Tanay, Rizal; Bahong Rose Gardens sa Barangay Bahong, La Trinidad, Benguet; King Louis Flower Farm sa Lamtang, Benguet; Celosia Flower Farm sa Barangay Sirao, Cebu; at lotus flower sa Lake Sebu, South Cotabato.

Umuusbong na destinasyon ang Masungi Georeserve na isang conservation area at rock garden, at maliban sa giant rope hammock at spider web viewing deck, bubungad muna ang nakakahalinang matitingkad na kulay dilaw na cosmos flowers sa tinatawag na Liwasan Cosmos Flower Field. Maglakad-lakad muna rito bago simulan ang nakakapagod ngunit magandang pisikal na aktibidad sa discovery trail.

Pangunahing supplier din ng mga bulaklak at nakapasong halaman gaya ng carnations, chrysanthemums, calla lily bulbs, poinsettia, gerbera daisies, at hydrangeas ang King Louis Flower Farm sa iba’t ibang panig ng bansa.

Rose Capital and Little Amsterdam

Tinaguriang “Rose Capital of the Philippines” naman ang Barangay Bahong sa La Trinidad dahil sa Bahong Rose Gardens na hindi kalayuan mula sa La Trinidad Strawberry Farm. Peak flower season nito ay mula Nobyembre hanggang Marso. Dito nagmumula ang 80 porsyento ng mga bulaklak sa Maynila. Bukas ang  flower farm mula Lunes – Linggo (7am-3pm) at may Php20-50 entrance/per guest at 200-300/tour guide (maximum of 10 persons).

Binansagan namang “Little Amsterdam” ang Celosia Flower Farm sa Cebu dahil sa pagkakahawig nito sa tulip fields sa Netherlands. Ang mga naunang Celosia seeds sa lugar ay dinala ng mga Cebuanong bumisita sa Haarlemmermeer, Netherlands noong 1991.

Nagmula sa salitang Greek ang pangalang Celosia at ang mga matingkad na kulay nito na pula, dilaw, kahel, at rosas ay sumisimbolo sa apoy dahil sa masigla at maalinsangan na kumbinasyon ng mga kulay. Tinagurian din itong Official Sinulog Festival Flower sa tuwing ipagdiriwang ang pista.

Animo’y nasa Netherlands ka talaga dahil may replika pa rito ng windmill at pwede rin mag-renta ng Dutch costume sa halagang Php30 para sa mas kumpletong Netherlands in Cebu experience.

May mga mabibilhan na rin ng pagkain at mga souvenir shops. Malaking tulong din ito sa mga flower farmers dahil ‘di na nila kailangang ibiyahe pa ang mga bulaklak papunta sa bayan dahil dito pa lang ay marami nang mga mamimili.

Peak season ng Celosia Flower Farm ay mula Abril-Mayo at Oktubre-Nobyembre at may entrance fee na Php20. Maigi rin puntahan ang ibang kalapit na atraksyon gaya ng Sirao Pictorial Garden and Campsite na nitong nakaraang taon lang binuksan kung saan may mga celosia flowers din at ang Terrazas de Flores Botanical Garden.

Tuwing maririnig naman ang Lake Sebu, kasama na nito ang maisip din ang mga pink lotus flowers na nagpapakulay sa lawa. Magandang mamangka kapag dapit-hapon at pagmasdan ang paglubog ng araw o umaga sa pagsikat naman ng araw kasama ng mga bulaklak.

Summer adventure through waterfall-hopping in the province of Laguna

Maliban sa pagiging makasaysayan ng Laguna, kinikilala rin ito bilang waterfall haven dahil sa napakaraming waterfalls na makikita rito sa probinsiya.

Sa halip na pumunta pa sa Boracay o sa mga nakasanayan nang beach destinations, ‘di na kailangan lumayo mula sa Maynila para sa isang mas refreshing at mala-paraisong summer adventure ngayong taon, na dala ng mga matatayog at napakalamig na tubig mula sa mga waterfalls ng Laguna.

The stunning cascades of Luisiana

Ang Luisiana ay nanggaling sa Luis y Ana na mga pangalan ni Don Luis Bernardo at asawang si Ana, na nagpasimula sa pagkakatatag ng munisipalidad na dati ay bahagi lamang ng isang mas malaking bayan.

Wala pang standard guide rates sa pagpunta sa mga nabanggit na falls ngunit kapag pupuntahan ang tatlong falls o higit pa ay magbayad ng Php600 at Php300 para sa isa.

Unang stop ng trail ang two-tier falls na Talay Falls na mas madali-dali para sa mga baguhan ngunit madulas at maputik pa rin ang daan papunta rito. May ilang batis din na kailangan tawirin bago makarating sa Talay. Ang mas maliit na bahagi nito ay nasa bukana at ang mas malaking bahagi naman ay medyo natatakpan ng mga puno. Mas kalmado rin ang agos ng tubig dito kumpara sa iba.

Nakatago naman sa likod ng malalaking bato ang Hidden Falls at ang paakyat dito ay matarik na. Tamang-tama naman ang laki nito bilang panggitna sa Talay at Hulugan.

Pangunahing atraksyon naman ang 90-meter high na Hulugan Falls na nagmula ang pangalan pagkatapos mahulog ang isang kalabaw mula sa tuktok nito. Kapag hapon naman, mayroon din maliit na  bahaghari na lumilitaw dito sa may paanan ng falls.

Maganda rin mag-side trip sa 65-feet Aliw Falls na 30 minuto lang ang trek dahil mas patag ang daan papunta rito mula Hulugan Falls.

Be daring in Pagsanjan,  explore more in Nagcarlan, Balian, Majayjay and Mt. Romelo

Sa Pueblo El Salvador naman ang jump off point ng Pagsanjan Falls o Cavinti Falls. Dalawa ang klase ng exploration options – boating/shooting the rapids (Php600/kada tao) na mula pa noong Spanish Colonial Era ay popular na atraksyon na rito at hiking/rapelling (Php270/kada tao) kasama na ang bamboo raft kung gustong magpunta sa Devil’s Cave.

Nariyan din ang tinaguriang virgin waterfalls na Sumucob Twin Falls na mas mapangahas ang daan at para sa mga mas malalakas ang loob.

Isang natural spring at waterfall naman ang Bukal Falls na sikat din sa crystal blue waters nito na gaya ng Enchanted River ng Surigao del Sur.

Nariyan din ang Imelda Falls o Taytay Falls na isang 2-storey falls na ipinangalan kay dating first lady Imelda Marcos dahil sa pagpondo nito ng turismo ng Majayjay. Sa Nagcarlan, mamangha naman sa luntiang rain forest at nakaka-relax na agos sa sapa sa Bunga Twin Falls na madali lang puntahan (5-10 min-trek). Mag-cliff diving sa 49-foot drop at 32-ft na pool basin nito. 

Nasa may Sierra Madre Mountain Range naman ang Buntot Palos Falls na nasa Balian sa bayan ng Pangil, na may 80-meter height at mararating sa pamamagitan ng Pangil Eco Park o Barangay Balian trail (2-3 hr-trek).

‘Di rin nagpapahuli ang 180-foot tall na Buruwisan Falls na nagmumula sa Siniloan River sa Mt. Romelo, Siniloan kung saan makikita rin ang Lanzones Falls, Batya-Batya Falls at Sampaloc Falls. Maaaring mag-rapelling pababa sa falls para sa ‘di malilimutang karanasan.

Bagong logo ng Tokyo inilunsad para itaguyod ang turismo sa ibang bansa

Kuha mula sa Tokyo Metropolitan Government

Inilunsad na ng Tokyo Metropolitan Government (TMG) ang bagong logo at slogan ng lungsod para i-promote ang turismo nito sa ibang bansa kamakailan.

Gagamitin ang logo na may slogan na “Tokyo Tokyo Old Meets New” sa iba’t ibang promotional activities para epektibong ipakilala ang mga atraksyon ng Tokyo.

Makikita sa disenyo ng logo ang pagkakasulat sa “Tokyo” gamit ang dalawang klase ng fonts at kulay para ibahagi ang imahe ng siyudad. Ang kaliwang “Tokyo” na isinulat gamit ang black brushstrokes at ang kanang “Tokyo” na isinulat gamit ang light-blue Gothic font.

“The brushstroke of Tokyo and Gothic block typeface of Tokyo represent the originality of the city, where traditions dating back to the Edo period (1603-1868), coexist alongside the cutting edge culture of today,” ayon sa website ng TMG.

“The tradition is expressed in black ink, while the new Tokyo is expressed in blue, like the sky spreading forward to express the innovative future,” saad pa rito.

Sa gitna ng dalawang logo ay makikita ang maliit na traditional stamp na nagpapakita sa isa sa pinakakilalang landmarks sa Tokyo, ang Shibuya “scramble” crossing, isa sa pinakaabalang intersections sa buong mundo.

Gusuku Sites and Related Properties of the Kingdom of Ryukyu: Symbol of Okinawa’s History

Ni Florenda Corpuz

Kilala ang Okinawa, ang pinakatimog na prepektura ng Japan, dahil sa magaganda at malilinis na beach resorts dito, magigiliw na mga tao na sinasabing may pinakamahahabang buhay sa buong mundo, at World Heritage Sites na sumisimbolo sa natatanging kultura at relihiyosong paniniwala ng Kingdom of Ryukyu na minsan ay yumabong dito.

Ang mga isla na aabot sa 160 na bumubuo sa Okinawa ay kilala rin bilang Ryukyu Islands na dating tributary state ng China sa loob ng ilang dantaon hanggang sa ito ay pasukin ng Satsuma domain (Kagoshima Prefecture ngayon) noong 1609 at gawing tributary state ng Japan ngunit sa ilalim pa rin ng pamamahala ng royal family mula sa Shuri Castle. Ilang taon matapos ang Meiji Restoration ay binuwag ito at opisyal na isinama sa Japan bilang Okinawa Prefecture.

Noong ika-10 hanggang ika-12 siglo ay nilalagyan ng simpleng stone walls ng mga Ryukyuan farming communities ang kanilang nayon bilang proteksyon. Ngunit nang magsimula ang diktaturya ng mga makapangyarihang grupo na kung tawagin ay  “aji” ay pinalaki nila ito at gumawa ng mga castle-like na gusali, ang “gusuku” na itinuturing na sagrado ayon sa lokal na paniniwala.

Nang pumasok ang ika-14 na siglo ay pinag-isa ang bawat lugar sa tatlong counties: ang Hokuzan sa hilaga, ang Chuzan sa gitna at ang Nanzan sa timog, hanggang sa itatag ang pinag-isang Kingdom of Ryukyu noong 1429 kung saan ang naging simbolo ay ang Shuri-jo Castle na itinuring na nag-iisang “Gusuku.”

Ang “Gusuku Sites and Related Properties of the Kingdom of Ryukyu” na opisyal na itinalaga bilang UNESCO World Heritage Sites noong Disyembre 2, 2000 ay binubuo ng siyam na sites at archaeological ruins: dalawang stone monuments, limang castles at dalawang cultural landscapes na matatagpuan sa iba’t ibang bahagi ng Okinawa.

Ang mga ito  ay ang mga sumusunod: Shuri Castle na nagsilbing central government office at royal residence ng Ryukyu Kingdom; Nakagusuku Castle Ruins na isa sa mga best preserved castles sa Okinawa; Katsuren Castle Ruins kung saan naghari ang sakiting bata na naging makapangyarihang lider na si Lord Amawari noong ika-15 siglo; at Zakimi Castle Ruins na itinayo ng Chuzan Kingdom noong ika-14 na siglo at nagsilbi bilang proteksyon mula sa Hokuzan Kingdom.

Kasama rin ang Nakijin Castle Ruins na itinayo noong ika-12 siglo at nagsilbing kastilyo ng hari ng Hokuzan bago ito sakupin ng Chuzan; Tamaudun Mausoleum na itinayo noong ika-16 na siglo at nagsilbing mausoleum para sa royal family ng Ryukyu Kingdom; Sonohyan Utaki Stone Gate na daanan patungo sa maliit na sagradong gubat na nagsilbing guardian shrine ng Ryukyu Kingdom; Shikinaen Garden na pangalawang residence ng Ryukyu Kingdom kung saan tinatanggap ang mga prominenteng bisita; at ang Sefa Utaki na isa sa pinakasagradong lugar ng sinaunang relihiyon ng Okinawa.

Dumaan man sa maraming kaganapan ay napanatili ng mga Ryukyuan ang 500 taon nilang kasaysayan na makikita sa pamamagitan ng Gusuku Sites and Related Properties of the Kingdom of Ryukyu.

Mararating ang Okinawa dalawang oras at kalahati sakay ng eroplano mula Tokyo.

                                                                                   

Sources: UNESCO, JNTO

Anim na magagandang investments para sa OFWS

Ni MJ Gonzales

Ang kumita ng pera ay hindi biro lalo na kung ang trabaho mo ay sa  labas ng Pilipinas.  Pero maraming Pinoy pa rin ang nakikipagsapalaran para sa magandang oportunidad.  Kaya naman para sulit ang hirap, hindi lamang dapat puro  sahod ang naitatabi.  Dapat ay yaman na mapapakinabangan nang pangmatagalan at para sa kinabukasan ng pamilya.  Anu-ano nga ba ang nababagay na investments sa Pilipinas para sa mga Overseas Filipino Workers (OFWs)?

Real estate

Kung mayroong matagal na klaseng investment na nababagay sa mga OFWs ay isa na rito ang real estate.  Kumpara sa iba, sa real estate ay may pisikal na ari-arian na titulado at mapapakinabangan.   Ayon pa nga sa Philippine Statistics Authority (PSA), noong nakaraang taon ay ang aspetong ito ang naging isa sa susi sa malagong ekonomiya ng Pilipinas.  

Ilang suhestiyon para kumita sa real estate investments ay bumili ng property para gawing paupahan o i-develop para ibenta sa mas malaking halaga. Kung babalikan ang ulat ng PSA na 6.6% ang inilago ng  real estate business  at salik dito ang mga banyaga sa  Pilipinas.  Ang mga ito ay nangangailangan ng pansamantalang matitirhan habang nagbabakasyon, nagtatrabaho o nagnenegosyo.

Mutual fund, bonds, at trust funds

Depende sa lakas ng loob, bagay din sa mga OFWs ang paglalagak ng pera sa isang “investment vehicle.” Ang mga halimbawa nito ay stock market, mutual fund, bonds, at Unit Investment Trust Funds (UITF). Ang hangarin dito ay mapalago ang ipinupuhunan na pera ng investors ng katuwang na financial company o gobyerno. 

Ang pera sa mutual funds ay pamamahalaan ng fund managers na siyang bahala kung paano at saan magandang mag-invest.  Bagaman kahit hindi na masyadong kailangang i-monitor ito, ma-access online ang mutual fund account, na madalas ay insurance company. Ilan sa nag-aalok nito ay ang Philam Strategic Growth Fund, Sun Life Prosperity Philippine Equity Fund, at First Metro Save and Learn Equity Fund.

Samantala, wala  namang   halos  ipinagkaiba sa  proseso  ng  mutual  funds  sa  UITF na may fund manager  din na  bahala  sa “per unit” na investment. Ito namang uri ng investment vehicle ay mga bangko ang naghahatid gaya na lamang ng BPI, BDO, Union Bank, EastWest Bank, PNB, Chinabank, Metrobank, at Security Bank.

Ang bonds ay may pagkakahawig  sa bank time deposit account pero mas malaki ang interes, may moderate risk, at ang makakasama rito ay mga korporasyon na. Kung baga, ang korporasyon ang hihiram sa investor na nakapaloob sa bond.  Para naman makakuha nito ay kailangan din dumaan sa mga ilang bangko na nag-aalok nito.  Samantala, sa Retail Treasury Bonds ay gobyerno ng Pilipinas ang nag-aalok at ito ay isang medium to long term na investment.

Stock market at business

Mas risky ang stock market at pagtatayo ng sariling business pero maaaring malaki rin ng balik ng pera. Ang kita sa pagbili ng share sa isang publicly traded company ay dedepende sa lagay nito sa merkado.  Mamo-monitor na rin ang stock market account online o sa tulong ng personal broker.

Samantala, ang pagtatayo ng negosyo ay bagay  din naman sa mga OFWs pero kumporme kung ano, sino ang katuwang, at  paano ito palalaguin.   

Pagtuturo ng money management sa mga bata

Ni Hoshi Lawrence

Madalas naitatanong natin sa ating sarili kung bakit kaya may mga taong palautang? Bakit mayroong  nakadepende sa  suportang pera ng kamag-anak? O kaya ay bakit nahihirapan kang makaipon ng pera kahit ang sipag-sipag mo naman? Ang kasagutan dito ay maaaring dahil sa maraming salik  at isa na roon ay ang nakalakhan na pananaw ng isang tao sa paghawak ng pera.

Alam na natin na sa tahanan nagsisimula ang edukasyon ng bata. Ang kanilang mga magulang ang kanilang kauna-unahang guro at sandigan para sa pundasyon ng kanilang  pagkatao.   Kaya hindi kataka-taka na  pagdating sa paghawak  ng pera   ay may  impluwensya  rin  kung ano ang naituro sa kanila. 

Noong ikaw ay bata pa, ano bang alam mo sa pera? Nahihingi mo ba ito ng basta o sesermunan ka muna bago mo makuha ito?  Ang masaklap dito ay kapag maling ideya at pag-uugali tungkol sa pera ang maitanim sa isipan ng isang bata ay baka ito ang dahilan kung bakit siya magiging madamot, mapagmataas, magastos, at tamad. 
  

Paano turuan ang mga bata tungkol sa pananalapi?

Kung may pag-aalinlangan ang mga magulang dahil sa seryosong bagay ang usaping pera ay mayroong mga paraan para maturuan ang mga bata. Ayon sa artikulo ng Money Management International Inc., na pinamagatang “Everyday Lessons to Teach Kids about Money,” ang ilang  hakbang para maturuan ang mga bata: pagbibigay sa kanila ng allowance na  kailangang i-budget, paggabay sa kanila na magkaroon ng munting negosyo,  pagbuksan sila ng sarili nilang bank savings o check account na kanilang mapag-iimpukan, at gawing money management tutorial ang gawain  gaya ng pamimili sa supermarket.

“Teach children how to shop by value rather than brand. Remember to always shop with a list. Shopping with a list helps children understand how prior preparation can lead to great savings in the end,” payo pa ng MMI na isang international non-profit organization na nagbibigay ng financial education programs.

Mahalaga ba ang Math sa pagtuturo ng money management?

Maraming propesyonal at naging negosyante na mahina sa Math. Pwede namang mag-hire ng accountant, financial consultant, o isang tao na mamamahala sa kabuhayan. Ganoon pa man ay nangangailangan pa rin ng pangunahing kaalaman sa pagkukuwenta para mapalago ito at  hindi maloko.

Sa panayam ng Wall Street Journal (WSJ)  kay Harvard Business School finance professor Shawn Cole, sinabi nitong malaki ang tsansa na magkaroon ng malalang pagkakamali sa pera kung may kakulangan sa Math skill. Aniya, ang taong walang ganitong skill ay posibleng mag-impok, gumastos, at mamuhunan base sa kanilang nararamdaman lamang.  

Dagdag pa sa report ng WSJ na “The Smart Way to Teach Children About Money” ay mainam na magkaroon ng kamalayan sa paghawak ng pera nang maaga  para maiwasaan din ang pagiging sensitibo sa  pagtalakay nito.

“A lot of decisions in finance are just easier if you’re more comfortable with numbers and making numeric comparisons,” saad pa ni Cole.

Sa ibang banda, ang paglalaan ng oras para maturuan ang isang bata tungkol sa pananalapi ay naghahatid din ng iba pang bentahe. Bukod sa nagkakaroon ng bonding time, masusuri rin ng guro ang kanyang sariling kaalaman sa money management. Mababalikan niya ang kanyang napag-aralan noon, may madidiskubre pa siyang bagong praktikal na ideya. Dagdag pa rito ay maitatama na niya ang maling money mindset.

Kung magnenegosyo ka, ano ang pinakalayunin mo?

Ni MJ Gonzales

Ika nga sa kasabihan, ang permanente lamang sa buhay ay pagbabago.  Hindi magiging eksaktong katulad  nang nakalipas ang iyong ngayon,  at nang  iyong kasakuluyan ang iyong hinaharap. Sa larangan ng karera ay may mga pagbabago  na  kusang dumarating at  mayroon  din naman pagbabago na mismo ang tao na rin ang nagsagawa. Hindi nga ba’t may mga manggagawa noon na matatagumpay na  negosyante  na ngayon?

Kumpara sa  pagpapalit-palit ng trabaho o kahit pa palipat-lipat ng kumpanya, isang matinding “re-careering” ang pagiging negosyante. Ikaw ang boss, ikaw ang may hawak ng oras mo, at ikaw din bahala sa perang kikitain mo.  Ibig sabihin, kasama ng pagtatamasa mo ng naiibang  mga pribilehiyo ay ang mas  maiigting na responsibilidad. Ano nga ba ang nagtutulak sa tao para magpursige ng ibang karera? 

Ayon sa Investopedia, ang re-careering o  “career shift” ay kadalasang ginagawa ng mga tao sa katagalan ng kanilang paghahanap-buhay para sa kapangyarihan, pera, kasikatan,  hilig at pagbabago sa kanilang pamumuhay. Iugnay din natin ito sa mga gustong magnegosyo.

Kapangyarihan.  Isa sa  dahilan ng pagnenegosyo ay paghahangad na matamasa ang pagiging makapangyarihan.  Ito ang nakapaloob sa pagiging “amo” dahil ikaw ang magtatakda kung kailan, paano,  sino, at ano ang  dapat gawin.   Bagaman malawak at mapangahas ang ganitong prinsipyo, masasabing nakakamit naman ito basta handang makipagsapalaran.

Sa kabilang banda, dapat din isaalang-alang na  hindi lahat  ay kakayanin ang ganitong klaseng  layunin. Bakit? Hindi naiisip ng ilan na sa kabila ng kapangyarihan ay  dapat marunong din magpakumbaba, patuloy na mag-aral, at maging responsible sa kanilang aksyon.

Malalim na hilig.  May ilan na sumasabak sa pagnenegosyo para mapursige ang kanilang passion o kinahihiligang gawain. Posibleng sa pagtatrabaho ay isang kasanayan (skill) lamang ang kanilang  nagagamit  kaya sa  kanilang  panibagong karera ay gusto naman nilang magawa ang kanilang passion.

Hindi nga ba’t nakakaaliw na isang batikang lawyer na gaya ni Atty. Raymond Fortun ay isa rin na wedding photographer?  Ganito rin ang singer na si  Rachael Aleandro  na may “Sexy  Chef” (healthy diet food delivery), at  ang magkapatid na John at Camille Prats  na may  Divine Angels Montessori school.

Karangalan. Mahalaga ang pagkakaroon ng reputasyon sa lipunan na mapanghusga. Gayon din ay may naiibang saya kapag nagkaroon ka  nito dahil  napatunayan mo sa sarili mo na kaya mong magtagumpay. Posibleng may iba na nalulunod sa  pagitan ng kayabangan at  karangalan. Subalit, hindi naman lahat ng nag-aasam nito ay may masamang intensyon dahil ito rin ay personal na bagay sa bawat tao.

Pagbabago sa pamumuhay. May mga pagkakataon na  ang re-careering ay dahil din sa “lifestyle change.” Ito ay bunsod ng pagbabago para sa   kalusugan, edad, o kaya naman ay pag-iiba ng prayoridad. Katunayan ay maraming  ina na nagiging mahusay na work at home moms (WAHM) at “mompreneurs” dahil sa una  ay naghangad silang  magkaroon ng flexible time para sa  kanilang mga anak.

Pera. Ito na marahil ang pinakasimple at praktikal na rason kaya marami ang nagbabago o nagdagdag  ng klase ng kabuhayan. Karaniwan din kasi ay hindi sumasapat ang kita sa  pagiging manggagawa kaya nagkukunsidera  ng iba pang mapagkukunan ng pera nang “full time.”

Dahil hindi pag-a-update ng resume at pag-aayos lamang ng iyong work requirements, ang transisyon mula sa pagiging empleyado hanggang negosyante  o anumang karera ay ibayong tibay ng loob ang kailangan. Tandaan na hindi lahat ay magiging madali kaya dapat sinasabayan din  ito ng  pag-aaral,  paghingi ng tulong, at kung maaari ay pondo.

Disaster preparedness program ng Iloilo modelo para sa ibang komunidad sa Pilipinas

Idinisplay ng  Iloilo City Disaster Risk Reduction Information
and Exhibit Center ang mga information materials on
disaster risks and preparedness. (Kuha mula sa JICA)

Nakikita bilang modelo para tularan ng ibang komunidad sa Pilipinas ang disaster preparedness project ng Iloilo City.

Ang programang Community-Based Adaptation and Resilience Against Disasters (CBARAD) ay sinimulan sa limang disaster-prone barangays sa Iloilo City na naglunsad ng KABALAKA volunteer program na kinabibilangan ng 9,238 lokal na residente na binubuo ng mga estudyante, guro, persons with disabilities (PWDs), mga matatanda at mga bata sa disaster preparedness advocacy campaigns.

Inilunsad ito ng Japan International Cooperation Agency (JICA), Japanese non-profit group CITYNET na naka-base sa Yokohama at ng Iloilo City Government para mapahusay ang disaster preparedness and response sa lokal na antas habang tinataguyod ang palitan ng kaalaman sa pagitan ng Japan at Pilipinas.

“Japan and the Philippines share common experiences in disasters since both nations are located on the Pacific Ring of Fire. Given our vulnerability to earthquakes, floods, and other natural disasters, disaster awareness and preparedness is critical at the community level to minimize risks and losses,” ani Kazuko Kurashina, Director of the Partnership Program Division ng JICA Yokohama.

Ibinahagi rin dito ang mga karanasan ng Japan sa disaster preparedness and recovery sa pamamagitan ng study visits ng mga LGUs sa Japan para pag-aralan ang study crisis management, resilient infrastructure, at collaboration models kasama ang academe, communities, at PWDs.

Inilunsad din ang KABALAKA gallery, isang interactive exhibit tampok ang disaster preparedness and survival, sa ilalim ng CBARAD project.

“We hope that the Iloilo City community-based disaster preparedness model will be sustained and adopted by other LGUs,” dagdag ni Kurashina.

Sinundan ng CBARAD project ang nauna ng tulong ng JICA sa flood control project sa Iloilo City kasunod ng pinsala ng bagyong Frank noong 2008 kung saan 254,000 katao ang naapektuhan at umabot sa US$16.41 milyon ang naitalang pinsala sa ekonomiya ng lungsod.

Mensahe ng kapayapaan hiling ng Hiroshima kay Pope Francis

Ni Florenda Corpuz

Magpadala ng mensahe ng kapayapaan sa buong mundo mula sa Hiroshima City ang kahilingan ni Gov. Hidehiko Yuzaki mula kay Pope Francis sa kanyang ginawang pagbisita sa Vatican kamakailan.

Ayon sa ulat ng Kyodo News, ipinahayag ito ng gobernador sa harap ng publiko kasama ang Santo Papa sa St. Peter’s Square. Ito ay sa gitna ng umiigting na tensyon sa isyu ng nuclear weapon.

“Hiroshima is a symbol of reconstruction, hope and peace. The pope’s visit would attract worldwide attention and provide a chance for everybody to think about abolition of nuclear weapons,” pahayag ni Yuzaki.

Magugunitang binomba ng Amerika ang Hiroshima noong Agosto 6, 1945 na ikinasawi ng 140,000 katao. Sumunod ang Nagasaki noong Agosto 9 kung saan sumuko ang Japan makalipas ang anim na araw na naging hudyat nang pagtatapos ng World War II.    

Nakipagkita rin si Yuzaki kay Cardinal Secretary of State Pietro Parolin at inihayag ang parehong kahilingan na ayon naman sa huli ay pinag-aaralan na ng Vatican kung ito na ang tamang panahon para bisitahin ng Santo Papa ang Hiroshima.

Kung matutuloy, ito ang magiging kauna-unahang papal visit sa Japan matapos magtungo rito si Pope John Paul II noong 1981 kung saan siya ay lumuhod at nagdasal sa harap ng Hiroshima Peace Park.

             

Enero nang hilingin din ni Prime Minister Shinzo Abe na bisitahin ni Pope Francis ang Hiroshima para palaganapin ang kamalayan tungkol sa mga panganib ng nuclear weapons kung saan siya ay nakipagkita kay Archbishop Paul Gallagher.

‘Womenomics’ ni Abe kinilala ng mga women leaders

Ni Florenda Corpuz

         Tinanggap ni Prime Minister Shinzo Abe Abe ang Global Women’s 

Leadership Award mula kay Summit Founder and President Irene 

Natividad. (Kuha ni Din Eugenio)

Kinilala ng mga kababaihan mula sa iba’t ibang panig ng mundo ang kontribusyon ni Prime Minister Shinzo Abe sa pagtataguyod ng women empowerment at gender equality sa Japan sa ginanap na Global Summit of Women 2017 sa Grand Prince New Takanawa kamakailan.

Napili si Abe bilang recipient ng Global Women’s Leadership Award dahil sa kanyang “womenomics” policy kung saan nais niyang paramihin ang mga kababaihan na nagtatrabaho upang makatulong na maiangat ang ekonomiya ng bansa.

Sa kanyang talumpati sa opening ceremony ng forum, sinabi ni Abe na nakatuon ang kanyang administrasyon sa pagbuo ng “society where women shine.”

“I believe women’s advancement in the society can contribute to create a stronger, diversified society,” aniya.

Nangako ang lider na babaguhin ang mahabang oras nang pagtatrabaho sa bansa upang maging mas madali para sa mga kababaihan na makapagtrabaho habang nag-aalaga ng mga anak at patuloy na sosolusyunan ang kakulangan sa mga day care centers.

Pinasalamatan din niya ang forum sa pagkilala sa kanyang pulisiya.

“This is quite an honor for me. This is not only for myself, but for everyone who is working for the women empowerment in Japan,” aniya.

           

Siya ang ikalawang lalake na nakatanggap ng nasabing parangal.

Dinaluhan ng 1,300 women leaders sa larangan ng negosyo at pulitika mula sa mahigit sa 60 bansa ang tatlong araw na forum kabilang si Vice President Leni Robredo na may temang “Beyond Womenomics: Accelerating Access” na sumasalamin sa nais gawin ni Abe sa kanyang bansa.

Samantala, napili naman si Tokyo Governor Yuriko Koike ng Japan Host Committee bilang recipient ng Japan Women’s Leadership Award. Si Koike ang kauna-unahang babaeng