Aireen Oikawa: Pinay on the Rise

Isa si Aireen Oikawa, na kasalukuyang naninirahan sa Iwate-ken, sa mga Pilipina na gumagawa ng sariling pangalan sa pagkanta. Nito lamang ay siya ang napiling kumanta ng “If We Believe in Love,” kung saan siya rin ang composer, para sa music video ng pelikulang “Maid in London” na pinagbibidahan nina Andi Eigenmann, Matt Evans, at Polo Ravales sa ilalim ng Viva Films. Ipapalabas ang pelikula sa mga sinehan sa Pilipinas ngayong darating na Hunyo 13.

Subalit, hindi naging madali para sa 42-taong-gulang na Pinay ang magkaroon ng karera sa pagkanta sa Japan at tuparin ang pangarap na maging singer-songwriter. Puspusang pag-eensayo at pagsali sa mga singing contests ang ginawa ni Aireen para sanayin ang sarili sa pagkanta at magkaroon ng sapat na karanasan para magtanghal.

Noong bata pa lamang siya ay pinanghihinaan siya ng loob dahil sa hindi siya madalas manalo sa singing contests.

“Sa Bulacan, nasabak ako sa mga singing contest sa iba’t ibang barangay tapos maraming beses na talo ako kasi maraming magagaling sa Bulacan. Lagi akong nagmumukmok kapag natatalo ako tapos sinasabi ko sa pamilya ko na ayoko nang sumali,” pahayag ni Aireen sa Pinoy Gazette.

“Pero sabi ng tatay ko sa akin, ‘paano mo malalaman na mananalo ka kung hindi ka sasali uli.’ Iyong singing contests ang naging training background ko,” dagdag pa ni Aireen na ipinanganak sa Bicol at lumaki sa Bulacan.

Napasali sa isang female band sa Sampaloc, Manila si Aireen noong siya ay 16-toang-gulang at pagkaraan ng dalawang taon ay lumipad siya sa Japan para maging entertainer.

Matiyaga at may pangarap, nagsikap si Aireen at hindi nagsayang ng oras sa pagtatrabaho at pagpapayaman ng kaalaman para mapagbuti ang sarili at mapaghusay ang talento. Aniya, hindi niya iniisip ang mga sakripisyo at hirap dahil sa kanyang pananaw ay bahagi ito upang maging matagumpay sa larangang napili.

“Ako kasi kapag pumasok sa isang bagay, I make sure na mag-stand out ako. Katwiran ko kasi, nandito na ako so why not make the most out of it. Lahat naman tayo may kanya-kanyang kakayahan. Pagyamanin mo ang bagay na alam mong kaya mong gawin at magiging masaya ka,” ani Aireen na nakapag-asawa ng Japanese sa edad na 30.

“Importante kasi na masaya ka sa ginagawa mo,” paninindigan ng Pinay na isa rin asawa, ina, radio DJ at songwriter.

Ilan sa mga piyesang kanyang inawit at isinulat ay ang “Ika’y Biyaya,” “Lahat Para Sayo,” at “Hanggang Kailan.”

Patuloy si Aireen sa pag-aaral ng bagong kanta at lengguwahe ng Japan, pag-alam sa mga pasikot-sikot sa radio broadcasting, at paghingi ng payo mula sa mga tao na mas bihasa sa kanya pagdating sa pagkanta at pagtatanghal.

“Huwag mahiyang magtanong at matuto sa ibang tao. Maging mapagkumbaba na napakaimportante kapag nasa entertainment world ka. Kailangan marunong kang mag-adapt sa lahat ng sitwasyon at taong makakaharap mo,” ani Aireen.

Sa huli, simple lamang ang kahulugan ng tagumpay para kay Aireen.

“Para sa akin, ito iyon malaman mo na suportado ka ng pamilya mo at mga kaibigan mo sa gusto mong gawin at kasama mo silang natutuwa sa mga nangyayari sa career mo,” pagtatapos ni Aireen na nangangarap din na makapagtayo ng restaurant business sa Pilipinas at makagawa ng music video na isasali sa international competition. 

Eco-bricks by Green Antz Builders: An innovative way of repurposing single-use plastic sachets

 “A smarter way to build.”

Ito ang konsepto sa likod ng kumpanyang Green Antz Builders, isang innovative provider ng building – housing solutions kung saan ang mga produkto, serbisyo, sistema, at pamamalakad ng kumpanya ay isinasagawa ang mga eco-friendly practices at gumagamit ng mga teknolohiya at mga materyal na maka-kalikasan.

Gaya na lang ng pangunahing produkto ng Green Antz, ang tinatawag na Eco-brick – na isang halimbawa ng modernong pamamaraan ng “repurposing” sa mga plastic sachets na kadalasan ay isang beses lang ginagamit at tinatapon agad. 

Bagaman halos parehas ang itsura sa ordinaryong hollow blocks na gawa sa semento, tubig, at buhangin, ang eco-brick ay sa kumbinasyon ng semento at dinurog na plastic laminates o sachets.

Building towards green sustainability

“To create sustainable and environmentally responsible communities and to be a leading driver of social values through impactful initiatives on sustainability, poverty alleviation, and improving the access to classroom and shelter.”

Tapat ang Green Antz Builders sa mga panuntunan na ito na siyang nagbubunsod sa mga adhikain at proyekto nito bilang isang responsableng kumpanya.

Hindi lingid sa kaalaman ng publiko na isang pangunahing pollutant ang plastic sachets, at nakalulungkot na makitang kinokontamina nito ang mga karagatan na nagiging dulot pa ng pagkamatay ng mga marine animals.

Sa pamamagitan ng makabagong sistema ng Green Antz ay nagkakaroon ng bagong pakinabang ang plastic sachets. Dagdag pa ng kumpanya, gamit ang materyal, nakatutulong ito para paigtingin pa ang thermal insulating properties ng eco-brick.

Ngunit paano nga ba ang proseso nito para maging kapaki-pakinabang bilang materyal sa paggawa ng eco-bricks?

From waste to resource

Limang hakbang ang prosesong ginagawa para gawing materyal ang plastic sachets – una kinokolekta ang mga ito mula sa industrial at commercial waste plants, hinuhugasan at dinudurog nang pinong-pino, hinahalo sa basang semento para makagawa ng mixture, saka ito binubuhos sa brick pressing machine, at pagkatapos ay patutuyuin na ang naprosesong produkto.

Ang bawat piraso ng isang eco-brick ay ginagamitan ng 100 piraso ng maliliit na plastic sachets.

Maliban pa sa dagdag na thermal insulation properties ng eco-brick, marami rin itong iba pang mga kalamangan kumpara sa tradisyonal na hollow block – 550 PSI compressive strength (in comparison – 158 PSI of hollow blocks) at PhP 830 average price per square meter (PhP 900-1,100 average price per square meter).

Aesthetically versatile

Dagdag pa rito, brick stacking ang pamamaraan ng eco-brick sa halip na brick layering ng hollow blocks. Sinasalansan at hinahanay ang eco-brick sa pamamagitan ng mala-lego na connectors saka nilalagyan ng concrete mortar ang mga butas nito para maging matibay ang pagkakadikit-dikit ng eco-bricks.

May iba’t ibang klase rin ang eco-bricks na pwedeng mapagpilian kaya’t swak ito sa mga gusto nang may disenyo – maliban sa Green Antz, mayroon din Red Antz (with a rusty look similar to the classic red brick), River Sand (pure concrete interlocking brick), Red Earth (red clay with sand and cement, tougher than typical red brick), Classic Glazed (smooth shiny finish concrete interlocking brick), at Red Mosaic (with red brick look and extra coating protection).

Kontribusyon ni Koji Yakusho sa Japanese film industry kikilalanin sa Tokyo Film Fest

Ni Florenda Corpuz

Kuha mula sa TIFF 2018

Inanunsyo ng Tokyo International Film Festival (TIFF) ang pagkakapili sa legendary Japanese actor na si Koji Yakusho bilang “Actor in Focus” sa Japan Now section ng kanilang 31^st edition.

Magsasagawa ang TIFF ng retrospective ng kanyang mga pinagbidahang pelikula mula sa mga classic films hanggang sa pinakabagong masterpiece na nagpapakita ng kanyang hindi matatawarang kontribusyon sa Japanese film industry pati na rin sa mga foreign co-productions.

“Koji Yakusho is Japan’s leading international actor, demonstrating unparalleled versatility in wide-ranging roles across every genre. In one film, he plays the enigmatic defendant in a murder case, changing his story at whim as if he’s a god; in another, he portrays a cop investigating a series of gruesome murders, gradually becoming a monster himself. He has indelibly played dozens of characters, and imbued them with humanism and inimitable imagination. In a romantic comedy, he portrayed a lonely salaryman who becomes obsessed with ballroom dance; in several historical epics, he has portrayed spirited samurai characters.

“His work has been internationally recognized, with accolades and nominations in Japan and overseas, including at Cannes. We are pleased to present a selection of Yakusho’s finest roles,” saad ni Kohei Ando, TIFF Programming Advisor.

Sa mahigit 40 taong karera ni Yakusho, maraming parangal na ang kanyang natanggap mula sa iba’t ibang international film festivals: “Cure” (1997) mula sa TIFF, “Warm Water Under the Red Bridge” (2001) mula sa Chicago International Film Festival, “Walking My Life” (2007) sa Film Madrid, “The Woodsman and the Rain” (2011) sa Dubai International Film Festival at “The World of Kanako” (2014) sa Sitges Film Festival.

Bumida rin siya sa ilang award-winning films: “The Eel” (1997) na nanalo ng Palme d’Or, “Eureka” (2001) na nakatanggap ng Cannes Ecumenical Jury Prize at “Babel” (2006) na nominado ng Academy Award para sa Best Foreign Language Film.

“It has been 40 years since I first developed an interest in acting. For someone who has not been able to stick to a single thing since childhood, it’s a miracle that I’ve been able to pursue this profession for four decades. Our profession is a strange one — no matter how many times you fail and make a fool of yourself, you find yourself thinking, ‘Next time, I just might get it right…’ Perhaps that is the poison we all fall victim to. I am very honored to have my work featured in the Tokyo International Film Festival. I am also indebted to all the people who have inspired me

throughout my life,” komento ni Yakusho.

Gaganapin ang 31^st TIFF mula Oktubre 25 hanggang Nobyembre 3.

Unang 16 na miyembro ng MNL48 pinangalanan na

Kuha mula sa ABS-CBN

Buo na ang kauna-unahang girl idol group ng bansa matapos pangalanan ang 16 na miyembro na bubuo ng MNL48 sa pangunguna ni Sheki Arzaga ng Quezon City, ang tinaguriang center girl nito.

Inilabas ang resulta ng kumpetisyon sa unang general election ng idol group sa “It’s Showtime” kamakailan matapos ang isang linggong botohan na siyang tumukoy kung sinu-sino ang bubuo sa MNL47, ang Pinoy version ng popular na grupong AKB48 ng Japan.

Kilala si Sheki bilang ang “powerful stage queen” ng grupo dahil sa kanyang agaw-pansing paghataw at galing sa pagbirit.

Kasama naman niya sa top seven o “Kami 7” sina Abby Trinidad ng Cavite, Sela Guia ng Laguna, Tin Coloso ng Iloilo, Zen Inot ng Cebu, Alice De Leon ng Quezon City, at Trixie Tano ng Marikina.

Nakaabang sa kanila ang international recording at endorsement deals, at sila rin ang mangunguna sa performances ng grupo sa itatayong MNL48 theater. Bukod pa riyan, mayroon din silang pagkakataong mag-perform kasama ang sister group nilang AKB48 at lilipad patungong Japan para sumailalim sa exclusive trainings.

Pasok din sa grupo bilang first generation members ang top eight to 16 girls o “Senbatsu” na sina Ella Amat at Jem Caldejon ng Quezon, Ash Garcia ng Las Piñas, Gabb Skribikin ng Pasig City, Sayaka Awane ng Legazpi City, Faith Santiago ng Malabon, Lara Layar ng General Santos City, Grace Buenavidez ng Nueva Vizcaya, at Quincy Santillan ng Albay.

Kagaya ng top seven girls, nasungkit din nila ang mga premyo gaya ng recording at endorsement contracts, pati na ang pagkakataong bumida sa music videos ng grupo at mag-perform kasama ang AKB48.

Ang kumpetisyon ay nilikha sa pagsasanib-puwersa ng ABS-CBN at Hallohallo Entertainment (HHE) ng Japan.

May mga sister groups ang AKB48 sa iba’t ibang lugar sa Japan: Ang SKE48 sa Nagoya, NMB48 sa Osaka, HKT48 sa Hakata, at NGT48 sa Niigata. Mayroon din itong sister groups sa ibang bansa: JKT48 sa Jakarta, Indonesia; TPE48 sa Taipei, Taiwan; at BNK48 sa Bangkok, Thailand.

10th Okinawa Int’l Movie Fest, inulan ng bituin at kasiyahan

Ni Florenda Corpuz

Kuha ni Din Eugenio

Dumagsa ang mga sikat na bituin mula sa Japan at ibang bansa sa red carpet event ng ika-10 edisyon ng Okinawa International Movie Festival (OIMF) na ginanap sa Kokusai Dori sa Naha City kamakailan.

Hindi inalintana ng daan-daang movie fans ang malakas na buhos ng ulan at kulog makita lamang ang kanilang mga paboritong artista na lumakad sa red carpet na inilatag sa kahabaan ng dalawang kilometrong kalsada mula Mutsumibashi Intersection hanggang Tenbusu Plaza.

Naghiyawan ang mga tagahanga nang makita ang sikat na Okinawan-born comedian na si Toshiyuki Teruya na direktor ng pelikulang “Born Bone Born” na ipinalabas sa festival.

Pinatingkad din ng presensya ng iba pang Okinawan stars tulad nina Shogen ng inventive drama na “Smokin’ On The Moon,” Rino Nakasone ng food drama na “Jimami Tofu” at Meisa Kuroki ang red carpet event.

“It took 10 years for me to be invited,” biro ni Kuroki na nagsilbi rin bilang host ng “My Favorite Movie” na bagong kaganapan sa festival.

Hindi naman binigo ng sikat na aktor na si Hiroshi Abe ang kanyang mga tagahanga nang siya ay makipagkamay at lumagda ng autographs habang nilalakad ang kahabaan ng red carpet.

“I am so thankful people are here to support us even in the rain,” aniya.

Dumalo rin ang Myanmar-born Hollywood star at Japanese boyband singer na si Win Morisaki na bumida sa pelikulang “Memories of Whale Island.” Ito ang kanyang kauna-unahang international film festival.

Naging bahagi rin ng apat na araw na kasiyahan ang grupong HPN3, ang Japanese comedy trio na naninirahan sa Pilipinas, na binubuo nina Yuki Horikoshi, Tanaka Kazuki at Inoue Kazuo.

Opisyal na nagtapos ang OIMF 2018 sa pagsasagawa ng closing ceremony kung saan nagtanghal ang comedy duo na Garage Sale kabilang si Teruya. Ginawaran din ng Audience Choice Award ang mga pelikulang “In Pursuit of the General,” isang Chinese historical epic na napili ng mga manonood bilang paboritong foreign language film habang ang body-switch comedy na “Reon” naman bilang best-loved Japanese film.

Nagpatuloy ang kasiyahan ng mga tao sa konsyerto na ginanap sa harbor side ng Naminoue Umisora Park kung saan nagtanghal ang mga Okinawan musicians mula sa iba’t ibang grupo kabilang ang Kariyushi58, Begin at Kiiyama Shouten. Kumanta rin sina Rimi Natsukawa, Hiro at Hiroaki Kato.

Ang OIMF ay inisponsoran ng Yoshimoto Kogyo Co, Ltd., ang pinakamalaki at pinakakilalang entertainment agency para sa mga komedyante sa bansa. Sumesentro ang tema nito sa “fun, peace and laughter.”

Songwriting contest tampok sa 2018 Migrant Workers’ Day; ‘Kasarinlan’ ipapalabas na

Tampok ang songwriting contest na pinamagatang “Buhay at Pag-ibig ng OFWs” sa pagdiriwang ng taunang Philippine Migrant Workers’ Day na may layon na magbigay-pugay sa mga masisipag na Overseas Filipino Workers (OFWs) na nasa Japan.

Ayon sa FILCOM Intersocietal Events Organizing Committee (FIEOC) na nangangasiwa sa pagdiriwang, ginagawa ang songwriting contest sa pagdiriwang upang bigyan ng oportunidad ang mga OFWs na may talento sa pagsusulat ng kanta. Ang bawat kanta ay may tema ng buhay at pag-ibig ng mga OFWs.

“As we celebrate this meaningful event this year, we intend to continue to highlight it with the songwriting contest as this will open great opportunities to our ‘kababayans’ who have the passion in writing,” pahayag ng FIEOC.

Gaganapin ang pagtatanghal ng mga orihinal na komposisyon sa pagdaraos ng 2018 Migrant Workers’ Day Celebration sa darating na Hulyo 1 na gaganapin sa Akasaka Kumin Hall. Libre lamang ito para sa mga nais na manood.

Tatayong chairman of the board of judges ng songwriting contest si Trina Belamide, na multi-awarded singer-songwriter, vocal arranger, record producer, at kasalukuyang miyembro ng Board of Trustees ng Filipino Society of Composers, Authors and Publishers, Inc (FILSCAP).

Tatanggap ang tatanghaling Best Songwriter ng ¥100,000 cash at round trip ticket papunta sa Pilipinas habang ang mapipiling Best Singer/Interpreter ay mananalo ng ¥50,000 cash at iba pang prize package.

Katulong ng FIEOC ang Philippine Overseas Labor Office (POLO) at Labor Section ng Philippine Embassy sa Tokyo.

Samantala, ipapalabas naman ang pelikulang “Kasarinlan” na idinirehe ni Joey Manalang sa Hunyo 10, ala-una hanggang alas-siyete ng gabi, sa Philippine Embassy-Tokyo. Ito ay bilang pre-independence celebration para sa mga OFWs sa Japan.

Libre ang palabas ngunit hinihikayat ng FIEOC ang mga Pilipinong dadalo na magsuot ng Barong Tagalog at Filipiniana sa naturang event.

Ang Kasarinlan event na ito ay inorganisa ng Philippine Embassy-Tokyo, Overseas Workers Welfare Administration (OWWA), FIEOC, at POLO.

‘Sid and Aya: Not a Love Story’ tampok ang unang pagtatambal nina ingdong Dantes at Anne Curtis

“Sino ba’ng hindi malungkot? Sino ba’ng hindi galit sa mundo? Lahat naman, ‘di ba? Lahat may kanya-kanyang sira sa utak. Depende na lang kung papa’no mo itatago.”

Ito ang maririnig mula kay Sid (Dingdong Dantes) sa umpisa ng trailer ng pinakabagong pelikula sa panulat at direksyon ni Irene Villamor at produksyon ng Viva Films at N2 Productions, na pinamagatang “Sid and Aya: Not a Love Story.”  

Ipapalabas ito sa mga sinehan simula Mayo 30.

A reunion and first big-screen team-up

“Hindi naman lahat ng may ‘I love you,’ love story na, e,” ang pagsasalaysay ni Sid sa huling bahagi ng trailer kung saan din maririnig ang kantang “’Di Na Muli” ni Janine Teñoso.

Tampok dito ang kauna-unahang pagtatambal nina Dingdong Dantes at Anne Curtis na dating nagkasama sa telebisyon sa ‘90s teen-oriented show ng GMA na “T.G.I.S.” kasama sina Antoinette Taus, Sunshine Dizon, Kim Delos Santos, Dino Guevarra, Maui Taylor, Polo Ravales, at iba pang teen stars noon.

Kasunod nito ay ang pagsasama rin ng dalawa sa 1999 teen romantic-comedy na “Honey My Love So Sweet” kasama ang kanilang T.G.I.S. batch.

Umiikot ang kwento kay Sid (Dantes) na isang insomniac at kung paanong makikilala niya at kukunin bilang confidante ang misteryosong si Aya (Curtis) para may makausap at makasama sa mga gabing hindi siya makatulog.

“I am lucky to have worked with this efficient, ingenious and talented skeletal 20 (plus)-man team of Sid and Aya. Ibang klase talaga ang Pinoy,” ang pagbabahagi naman ni Dingdong sa Instagram ukol sa kanyang karanasan sa produksyon.

Shooting in Japan

Ito rin ang unang beses para kay Dingdong na mag-shoot sa ibang bansa sa loob ng 20 taon nito sa industriya – kinunan ang ilang eksena ng pelikula sa Japan nitong Marso kasabay ng spring season. Unang beses naman para kay Anne na makita ang pag-usbong ng mga sakura sa Japan.

Ibinahagi ni Anne ang karanasan sa shooting experience sa Tokyo sa isang eksklusibong panayam ng Pinoy Gazette sa press preview ng Rockstar KTV and Resto, ang joint business venture nila ng kapwa “It’s Showtime” host na si Karylle.

“Our filming experience in Tokyo was really amazing. We came at a really good time – the snow had just gone. So we came at perfect timing, some of the cherry blossoms were just about to appear,” aniya.

Na-enjoy din ng Kapamilya host sa pagkain at iba’t ibang lugar sa bansa.

“The food was amazing. We got to visit a lot of places like the Tokyo Skytree at night na kami lang ang tao. So it really was just so beautiful. Yeah, we had an amazing time and we were able to shoot on locations that aren’t really like shot often. So abangan ninyo yung Shibuya Crossing namin, pang-Hollywood.”

Samantala, ibinahagi rin ni Anne ang kanyang excitement sa pagsali sa Tokyo Marathon. Kamakailan ay tumakbo siya sa London Marathon kung saan ang mga nalikom na donasyon ay ibibigay niya sa mga bata sa Marawi sa pamamagitan ng UNICEF Philippines.

“I’m gonna join the lottery this year. Sana by next year makapasok ako,” excited na pahayag ng aktres.

Novelty dining service Dinner in the Sky inilunsad sa Solaire Resort and Casino

“The Philippines is the third country in Southeast Asia in which the Dinner in the Sky experience is taking place. We are especially excited about its launch as Filipinos are known to be adventurous and fun-loving people. This experience will be a good boost to the country’s variety of culinary outlets, and both locals and tourists alike should not miss this once-in-a-lifetime experience. We are also excited to work with our local Filipino partners, who share our vision in making the event an unforgettable one for everyone.”

Ito ang pahayag ni Arvin Randahwa (CEO - DITS ASIA) sa naganap na press conference kamakailan sa Solaire Resort and Casino sa Parañaque, ayon sa When in Manila website tungkol paglulunsad ng Belgian-based novelty dining service na Dinner in the Sky kamakailan.

A culinary escapade for the thrill-seekers

Naganap ang paglulunsad na ito sa pamamagitan ng organisasyon ng pinagsama-samang kolaborasyon ng MMI Live, DITS Asia, at Solaire Resort and Casino. At ito ang unang pagkakataon na makarating sa Pilipinas ang binansagang isa sa Top 10 Most Unusual Restaurants sa listahan ng Forbes Magazine.

Mayroon nang lampas sa 5,000 events ang naisagawa para sa Dinner in the Sky na nauna nang ginanap sa mahigit 45 na siyudad sa iba’t ibang panig ng mundo. Ilan lamang dito ang baybayin ng Copacabana sa Rio de Janeiro, Brazil; mga hardin ng King David Hotel sa Jerusalem, Israel; sa taas ng mga burol sa Villa Borghese sa Rome, Italy; mga dalampasigan ng St. Lawrence River sa North America; Cape Town Bay sa South Africa; Strip of Las Vegas, USA; at Petronas Twin Tower sa Kuala Lumpur, Malaysia.

Inumpisahan ang kakaibang dining service sa Brussels, Belgium noong Mayo 2006 at binuo naman ang konsepto nito ng isang Belgian company, ang E.I.T.S. BvBa. Lahat naman ng mga pamamaraan, drawings, calculations, at simulations ay aprubado at sinusuri ng TÜV Rhineland (global provider of technical, safety, and certification services).

“As we celebrate our 5th anniversary, Solaire brings you yet another world-class experience. Dinner in the Sky is a bold testament to our commitment to continuously give our guests memorable experiences that no other property in the Philippines has done before,” ang pahayag naman ni Lorenzo Manalang, Brand & Marketing Vice President ng Solaire Resort and Casino.

A bird’s eye view and the famed Manila Bay sunset

Idinisenyo rin ang mga makinarya at platform na ginagamit ayon sa pamantayan ng Germany ukol sa mga flying structures at gawa sa Belgium ang naturang platform. Istrikto rin ang isinasagawang regular na safety check-up at maintenance para masiguradong ligtas ang naturang culinary heights experience.

“Filipinos now are more receptive to new ideas, eager to try exciting concepts, aggressively chasing experiences they have seen and heard around the globe. The Philippines is ripe for the picking – to be a stop for a unique, world-class dining experience such as Dinner in the Sky,” dagdag naman ni Rhiza Pascua, CEO ng MMI Live.

Iaangat sa ere ang dining table sa taas na 45-50 metro (based on weather conditions) sa pamamagitan ng isang crane kung saan ang mga guests, presenter, at crew ay nakasuot ng safety belts sa loob ng isang oras. Bago naman sumalang, kailangan din dumaan ng mga guests sa isang briefing tungkol sa mga safety regulations. At sa kabuuan ng session ay may regular na monitoring at komunikasyon ang mga crane operator at ground crew.

Nagsisimula ang package sa Php9, 990 kung saan kabilang dito ang isang four-course exclusive dinner at world-class cuisine mula sa mga chef ng Solaire na sina Chef Kenneth Cacho (Director for Culinary Arts of the International School for Culinary Arts and Hotel Management (ISCAHM)), at Michelin-star Chef Yves Mattagne ng Sea Grill – Brussels. Kasama rin sa package ang Dinner in the Sky lounge admission, at ang kaaya-ayang Manila Bay sunset view.

Bukas ito para sa lahat na lampas 13-taong-gulang (minimum height of 145cm and a maximum weight of 150kg), maging sa mga guests na may mild disabilities o gumagamit ng wheelchair ngunit kailangan magsumite ng sulat bago mag-book, 22 katao lamang ang pinapayagan sa bawat session, at kailangan nasa lounge na ang mga guests isang oras bago ang session.

Air New Zealand ilulunsad ang updated version ng Skycouch sa gitna ng taon

“While we initially marketed the Skycouch to couples, we quickly found the product suited parents with young families especially well. Parents can relax while their children are able to have their own space and flat area to play without interrupting other passengers.”

Bahagi ito ng pahayag ni Air New Zealand general manager Anita Hawthorne sa panayam ng Huffington Post UK patungkol sa pinaplanong paglulunsad ng naturang airline sa modified product version ng Skycouch.

The innovative Economy Skycouch

Hindi talaga biro ang long-haul flights lalo na sa mga magulang na may dalang sanggol o kaya naman ay dalawa o tatlong malilikot na mga bata na kadalasan ay nagdudulot ng dagdag pang stress sa kabuuan ng biyahe.

Dahil dito, naisipan ng Air New Zealand na tugunan ito sa pamamagitan ng Economy Skycouch na unang binuo ng airline noong 2011 kung saan bahagi nito ang Skycouch Cuddle Belt na maaaring humiga ang dalawang adults o isang adult at isang bata nang magkatabi ngunit ngayon ay pwede na ang dalawang batang kasama.

Mula rito, siniyasat ng mga airline staff ang mga nakaranas na sa Skycouch para maintindihan ng airline kung ano pang upgrades ang pwede nilang isama sa Skycouch para mas mapagbuti pa ang flexibility at relaxation features nito.

“Imagine a row of three Economy seats that can be turned into a couch after takeoff. So you and your friend or family member can stretch out. It’s so flexible it can be used as seating, a couch or even a play area. You’ll also get some lovely bedding and pillows. It’s a world first.”

Ito ang pagsasalarawan ng Air New Zealand sa Skycouch sa website nito, at sinisigurado rin ng airline na mapanatili ang comfortability at  privacy para sa mga guests dahil ang buong tatlong hilera ng Skycouch ay nakalaan lamang sa nag-book nito at hindi pwedeng ibahagi sa hindi kasama.  

Kapag nag-upgrade sa Economy Skycouch, kasama na rin dito ang pagkain at entertainment.

An ideal space to stretch out for everyone

Bagaman pangunahing market nito ay mga magulang na may bata, para rin ito sa lahat ng klase ng guests – mga mas malalaking pamilya, adults na may kasamang nakatatanda, couples, at solo travelers, para magkaroon ng mas malawak na personal space, stress-free, relaxing, at enjoyable flight experience.

Nakatakda sa gitna ng taong ito ang availability ng Skycouch Infant Harness, Belt and Pod kung saan pwedeng humiga ang isang sanggol sa tinatawag na Skycouch Infant Pod (optional collapsible sleep space) at sa tulong ng safety harness at belt para mapanatiling nakahiga ito mula take-off hanggang landing.

Complimentary ang Skycouch Infant Harness, Belt and Pod sa lahat ng Economy Skycouch customers na may kasamang sanggol.

Kagaya rin ng normal na economy seats ang mga upuan ngunit may adjustable footrest (adjust to 60 and 90 degrees) para maging couch ito. Naitataas ang arm rest sa window side nito at ang mga armrests naman sa mga gitnang upuan ay pwedeng itago sa likod nito. Mayroon din itong extension seat belts.

Nasa 1.55m (5ft 1”) ang haba ng Skycouch kapag nakataas ang side wall armrest at lalim na tinatayang nasa 74cm (29”) kasama ang leg rest at cushion.

Ang mga Economy Skycouch seats ay makikita naman sa forward economy cabin ng lahat ng 777 and 787-9 aircraft ng airline.

Maliban sa domestic flights sa loob ng New Zealand, bumibiyahe ang Air New Zealand sa Australia, Pacific Islands, North America, Canada, South America, Europe, at Asia.

Paggamit ng exit tax isinabatas ng Diet

Isinabatas ng Diet kamakailan ang paglilimita nang paggamit ng kita mula sa ipapataw na exit to departure tax sa mga dayuhang turista at mamamayang Hapon na lalabas ng Japan sa inbound tourism promotion ng bansa.

Gagamitin ng gobyerno ang pera para ma-enjoy ng mga turista ang kanilang pagbisita sa bansa, mapadali ang pag-access sa mga impormasyon sa mga tourist spots at paghahanda sa mga resources para maranasan nila ang kulturang Hapon. Hinihimok din ang mga pampublikong transportasyon na paghusayin ang Wi-Fi service access nila.

Mangongolekta ng ¥1,000 ang gobyerno mula sa mga pasahero na lalabas ng Japan simula Enero 7, 2019. Hindi kabilang dito ang mga transit passengers na aalis ng bansa sa loob ng 24 oras simula ng kanilang pagdating dito pati na rin ang mga batang wala pang dalawang taong gulang.

Idadagdag ang exit tax sa pamasahe sa eroplano at barko at iba pang bayarin sa paglabas ng mga biyahero sa Japan.

Tinatayang aabot sa ¥40 bilyon ang kikitain ng gobyerno mula rito.

Umabot sa 28.7 milyong dayuhang turista ang bumisita sa Japan noong 2017.

Target ng administrasyon ni Prime Minister Shinzo Abe na magtala ng 40 milyong foreign tourist arrivals pagsapit ng taong 2020 kasabay ng pagho-host ng Tokyo sa Olympic at Paralympic Games mula sa kasalukuyang 20 milyon at 60 milyon naman sa taong 2030.