Career tips & tricks: Kamtin ang pinakamahusay na bersyon mo sa pamamagitan ng personal routine

Negosyante man o hindi, napakahalaga nang tamang paggamit ng oras ay. Ito sa lahat ng kayamanan ang lumilipas at hindi na maibabalik pa.  Kaya naman ang isang inirerekomendang paraan para masulit ang iyong kakayahan at oras ay sa pamamagitan ng pagkakaroon ng personal routine.

Ang routine ay kalakaran o hilera ng mga gawain na kadalasang sinusunod sa araw-araw. Kung isa kang regular na empleyado,  ang routine mo ay iikot sa  paggising sa umaga, pagbiyahe papuntang opisina, pagtatrabaho sa oras na itinakda ng kumpanya, pagbiyahe pauwi,  pagkain, at pagtulog.  Ang ganitong kalakaran ay maaaring nakakapagod at nakakabagot pero kung susumahin ito ay nagbibigay ng disiplina, nag-oorganisa ng iyong schedule at nagpapadali rin ito ng pagsusunud-sunod o pagpaprayoridad ng iyong mga gawain.

Kaya nga kahit sa mga negosyante, freelancers, at para sa personal na buhay ay mainam ang pagkakaroon ng personal routine.

Pagkakaroons ng personal routine

 Kung tutuusin ang bawat tao ay may iba’t ibang sistema.  May iba na mas produktibo sa umaga, hapon, o sa gabi.  Kaya kung kaya mong ikaw ang gumawa ng iyong routine ay mainam na ilagay mo ang iyong pagtatrabaho sa oras na ganado ka. Dito ay mas makakagawa ka ng maraming bagay kahit pa iyong mabibigat at madalas mong kinatatamaran gawin.

 Sa ibang banda, pwede rin ibase ang iyong personal routine sa ninanais mo gaya ng pag-iwas sa stress kapag nagtatrabaho.  Pwedeng sa halip na magbasa ng email at balita sa umaga ay ilagay mo sa bandang hapon ang mga ito.  Kung gusto mo namang  palaging makasagap ng mga ideya ay maaaring bahagi ng routine mo ang magbasa ng may isang oras sa umaga, maglakad-lakad ng 15 minuto sa hapon o magkaroon ng brainstorming session sa iyong ka-grupo kada isang linggo. 

Anu-ano pa ang positibong epekto ng personal routine?

Para sa kalusugan.  Isa sa positibong epekto ng personal routine ay may kinalaman sa kalusugan. Mas naaayos ng taong may routine ang oras ng kanyang pagkain, ehersisyo, at pagkamit ng kumpleto at magandang tulog.  Mahirap ang mga ito para sa isang taong walang sinusunod na routine. Dahil hindi niya naisasaayos ang kanyang oras at limitasyon kaya nauuwi ito sa pagiging malilimutin, walang nagagawa, palaging tinatamad, at stressed.

Hirap din itong makatulog dahil sa panahon na dapat tulog siya ay gising na gising ang kanyang diwa. Kapag inaantok naman siya ay pinipilit niyang magising at kadalasan sinasabayan ng sobrang pag-inom ng kape. Iba ang senaryo kapag nasanay na ang katawan at isipan sa takdang oras ng pagtulog at pagkain.

Para mas maging produktibo. Ang isa pang bentahe ng personal routine ay ang mapaglaanan din ng oras ang iba-ibang bagay sa iyong buhay. 

Ang problema din kasi sa kawalan ng klarong routine ay pagkunsumo ng sobrang oras sa mga bagay na halos walang saysay araw-araw.   Halimbawa ay bahagi ng iyong dating routine ay manood ng TV na gagawin mo pagkauwi mula sa trabaho hanggang sa antukin ka na.  Bunsod niyan ay ibinuhos mo na ang natitirang oras at enerhiya sa pag-upo lang sa harap ng TV.  Maaaring gawin itong isang oras na lamang at isabay sa pagkain, at ilaan ang ibang oras sa ibang bagay gaya ng paglilinis, pagliligpit ng iyong gamit at pagdarasal.

Sa umpisa ay nakakatamad ito pero dahil susundin mo ang ganitong kalakaran ay unti-unti nitong  mababali ang iyong dating mga nakasanayan. Tandaan din na hindi mag-iiba ang resulta kundi muna mag-iiba ang aksyon sa iyong ginagawa. 

Para sa magandang pagbabago. Dahil kung tutuusin ay walang pangarap na nakukuha nang mabilisan, kailangan itong trabahuin ng may determinasyon.  Kaya kung gusto mong makamit ang iyong mga nilalayon ay ngayon pa lang ay simulan na itong isama sa ayos ng iyong routine.

Halimbawa na gusto mong magnegosyo ng pagkain sa hinaharap pero sa kasalukuyan ay namamasukan ka bilang empleyado, maaaring araw-araw ay may isa o hanggang dalawang oras kang magbasa tungkol sa pagluluto at pagnenegosyo.   Isingit mo rin sa iyong linggo-linggong araw ng pahinga ang pagbisita sa mga kainan, paglikha ng recipe, at pagpapatikim ng iyong mga luto sa iyong kakilala.

Ang  isang ideya rin  kasi sa personal routine ay ipursige ka na gumawa ng hakbang kahit maliit lang para sa iyong layon.  

Bakit hindi mo dapat itinatabi ang iyong pera?

Ni MJ Gonzales

Nag-trending sa Youtube ang video na “Kapuso Mo Jessica  Soho: Inanay na pera, mapapalitan pa ba?” Dalawa sa itinampok na paksa rito ay nasira ang mga perang papel na itinabi nila sa kanilang cabinet kung saan ang isa ay gumamit ng leather wallet habang isa naman ay kawayang alkansya.  

Ang nasabing segment episode ay hindi nagsasabing huwag mag-impok ng pera.  Tama ang disiplina at hangarin na maging masinop sa pera subalit ipinaaalala nito kung paano maging wais sa pag-iipon. Katunayan, ang pagkasira ng mga  perang papel dahil sa anay at bukbok ay ilan lamang sa pisikal na pwedeng mangyari sa iyong pera.  Maaari rin itong mawaglit sa isipan, manakaw ng iba at mawalan ng halaga.

Ano ang pakinabang ng perang ibinabangko?

Matrabaho ang pagdedeposito at pagwi-withdraw ng pera lalo na’t may regulasyon ang mga kumpanya ng bangko.  Ang kapalit naman nito ay magagandang bentahe, isa na rito ang insurance sa iyong deposito. Sa Pilipinas, ang bahala rito ay ang Philippine Deposit Insurance Corporation (PDIC) na kung saan sinisuguro ang deposito basta hanggang Php 500, 000.

Dagdag pa sa bentahe ng pagbabangko ay mas mabilis na pakikipagtransaksyon sa negosyo, trabaho at  pagkakaroon ng mas malawak na kaalaman sa pananalapi.  Hindi nga ba’t kapag nagbabangko ay nakilala mo ang mga terminong deposit, withdrawal, time deposit, credit card, house/car loan, autodebit, internet banking, at marami pang iba. Bukod sa kaalaman ay mas makatutulong ang pagbabangko sa iyong disiplina sa pag-iipon.   

Mga epekto ng pagtatago ng pera

Ang pag-iipon ay hindi lang tungkol sa pagtatabi ng pera. Ito ay tungkol din sa layunin sa buhay  o iyong  tinatawag na financial goals at  disiplina.  Ilan sa mga halimbawa na kadalasan na pinag-iipunan ay edukasyon, retirement, pagpapakasal, at iba pa.   Kaya masasabing may silbi pa rin naman ang pag-aalkansya at wallet, partikular na sa maliliit at short-term goals. Pero bakit nga hindi dapat itinatabi ang pera nang matagal o para sa mga long-term goals?

Dagdag gastos para sa Bangko Sentral ng Pilipinas (BSP) o gobyerno. Sa panig ng BSP ay nagkakaroon sila ng dagdag na gastos dahil sa “warehousing” o pagtatago ng pera lalo na ang mga barya.   Kapag kasi may “artificial shortage” o kakulangan ng umiikot na pera sa merkado ay kailangan gumawa ng pera gaya ng mga barya. Alam mo bang mas malaki pa sa halaga sa piso (Php 1) ang gastos sa paggawa  ng kada piraso nito (Php 1.55).  

Noong 2014 ay ipinasa sa kongreso ang House Bill 4411, akda ni Batangas Rep. Sonny Collantes, na may kinalaman sa “anti-hoarding of coins.”  Ang mapapatunayan na magkakasala rito ay maaaring makulong nang may walong taon at pagmumultahin ng Php 300,000.  Ito ay laban na rin sa mga taong iniimbak ang mga baryang pera para ikalakal.  Lalo na ang mga naunang inilabas noon, gawa sa copper at nickel ang mga barya na pwedeng tunawin para magamit na materyales sa ibang bagay.

Pahirap sa pamimili at pagbebenta.   Hindi lahat ng binibili sa mall ay sakto o sarado ang presyo. May ilan dito ay may butal gaya halimbwa Php 499.75 o kaya Php 499.95. Kung walang maibibigay na barya o maipapanukling pera ay mapipilitang mabili ito sa presyong Php500.

Mas bumababa ang tunay na halaga ng pera.  Ang isa pang masasabing “anay” sa itinatabing pera ay ang pagpapababa ng halaga nito ng hindi namamalayan. Ito ay dahil na rin sa pagtaas ng mga bilihin na humihila pababa ang halaga ng pera o tinatawag na “inflation.” 

Halimbawa na nakakapagtabi ka ng Php 10, 000 kada buwan at ginawa mo ito sa buong taon mula pa noong Mayo 2017.  Kung susumahin ay aabot sa Php 120,000 nitong Mayo 2018. Pero dahil sa inflation rate na ayon sa huling tala ng BSP at Philippine Statistics Authority ay pumalo na sa 4.6 porsyento nitong Mayo 2018 ang aktuwal na halaga nito ay Php 114,480. 

Ito ang dahilan kung bakit hinihikayat ng mga financial experts na subukan ang pamumuhunan para hindi matulog ang pera at sa halip ay mapalago pa ito at malabanan ang inflation rate.  Sa bangko ay naglalaro lamang sa .63 porsyento hanggang 1.85 porsyento ang interest rate sa iyong perang ipinapatabi. Wala pa rito ang ibabawas na buwis.

Songwriting contest tampok sa 2018 Migrant Workers’ Day; ‘Kasarinlan’ ipapalabas na

Tampok ang songwriting contest na pinamagatang “Buhay at Pag-ibig ng OFWs” sa pagdiriwang ng taunang Philippine Migrant Workers’ Day na may layon na magbigay-pugay sa mga masisipag na Overseas Filipino Workers (OFWs) na nasa Japan.

Ayon sa FILCOM Intersocietal Events Organizing Committee (FIEOC) na nangangasiwa sa pagdiriwang, ginagawa ang songwriting contest sa pagdiriwang upang bigyan ng oportunidad ang mga OFWs na may talento sa pagsusulat ng kanta. Ang bawat kanta ay may tema ng buhay at pag-ibig ng mga OFWs.

“As we celebrate this meaningful event this year, we intend to continue to highlight it with the songwriting contest as this will open great opportunities to our ‘kababayans’ who have the passion in writing,” pahayag ng FIEOC.

Gaganapin ang pagtatanghal ng mga orihinal na komposisyon sa pagdaraos ng 2018 Migrant Workers’ Day Celebration sa darating na Hulyo 1 na gaganapin sa Akasaka Kumin Hall. Libre lamang ito para sa mga nais na manood.

Tatayong chairman of the board of judges ng songwriting contest si Trina Belamide, na multi-awarded singer-songwriter, vocal arranger, record producer, at kasalukuyang miyembro ng Board of Trustees ng Filipino Society of Composers, Authors and Publishers, Inc (FILSCAP).

Tatanggap ang tatanghaling Best Songwriter ng ¥100,000 cash at round trip ticket papunta sa Pilipinas habang ang mapipiling Best Singer/Interpreter ay mananalo ng ¥50,000 cash at iba pang prize package.

Katulong ng FIEOC ang Philippine Overseas Labor Office (POLO) at Labor Section ng Philippine Embassy sa Tokyo.

Samantala, ipapalabas naman ang pelikulang “Kasarinlan” na idinirehe ni Joey Manalang sa Hunyo 10, ala-una hanggang alas-siyete ng gabi, sa Philippine Embassy-Tokyo. Ito ay bilang pre-independence celebration para sa mga OFWs sa Japan.

Libre ang palabas ngunit hinihikayat ng FIEOC ang mga Pilipinong dadalo na magsuot ng Barong Tagalog at Filipiniana sa naturang event.

Ang Kasarinlan event na ito ay inorganisa ng Philippine Embassy-Tokyo, Overseas Workers Welfare Administration (OWWA), FIEOC, at POLO.

Pilipinas at Japan pipirma na sa MRT-3 rehabilitation and maintenance deal

Ni Florenda Corpuz

Nagpalitan na ng Note Verbales ang Japan at Pilipinas kaugnay ng kinakailangang rehabilitasyon at maintenance ng MRT-3, ito ang pahayag ng Department of Transportation (DOTr) kamakailan.

Kasama sa kasunduan sa Japan ang pagkuha ng Official Development Assistance (ODA) financing sa ilalim ng Special Terms for Economic Partnership (STEP) ng Japan International Cooperation Agency (JICA).

Ayon sa DOTr, kabilang sa nakasaad sa ilalim ng ODA ang 0.1% interest per annum, 40 years payment period, at 12 years grace period para sa principal.

Magsasagawa ang JICA ng feasibility study na sasala sa scope of works ng proyekto simula ngayong buwan hanggang Pebrero na susundan nang pag-apruba ng gobyerno.

Susundan ito ng paglalagda ng loan agreement at procurement ng rehabilitasyon at maintenance provider sa darating na Marso hanggang Abril. Inaasahan naman ang mobilisasyon ng Japanese provider sa ikalawang bahagi ng taon.

“These developments show that we are wasting no time and effort in rehabilitating and restoring the reliability and capacity of MRT-3. This year, we will make significant improvements to MRT-3, and that is our commitment to the Filipino commuters,” ani DOTr OIC Undersecretary for Railways TJ Batan.

Una nang ipinahayag ng DOTr na kukunin nitong muli ang serbisyo ng Sumitomo Corporation at technical partner nito na Mitsubishi Heavy Industries bilang maintenance at rehabilitation service provider ng MRT-3 na nagdisenyo, bumuo at nag-maintain ng MRT-3 sa unang 12 taon ng operasyon nito. Ito ay kabilang sa four-point strategy na ipinapatupad ng ahensya dahil sa walang-tigil na pagpalya ng MRT-3.

Una nang itinigil ng DOTr ang maintenance service contract ng Busan Universal Rail Inc. (BURI) noong Nobyembre 6 nang nakaraang taon dahil sa “non-performance of its obligations under the contract.” 

Overseas Filipinos sa Japan, isa sa pangunahing cash remitters sa Pilipinas

Ni Florenda Corpuz

Isa ang mga Overseas Filipinos (OFs) sa Japan sa mga pangunahing pinanggagalingan ng cash remittances na ipinadala sa Pilipinas sa unang 10 buwan ng 2017, ito ang pahayag ng Bangko Sentral ng Pilipinas (BSP) kamakailan.

Umabot sa US$ 23.1 bilyon ang total cash remittances na ipinadala sa pamamagitan ng mga bangko ng mga OFs simula Enero hanggang Oktubre 2017, mas mataas ng 4.2 porsyento kumpara sa US$22.1 bilyon noong 2016.

Nagtala naman ng 8.4 porsyentong pagtaas sa US$2.3 bilyon noon lamang buwan ng Oktubre kumpara sa parehong buwan noong 2016.

Ayon sa BSP, kabilang ang Japan sa mga bansang bumuo ng 80.2 porsyento ng total cash remittances. Kasama rin sa listahan ng top cash remitters ang mga OFs sa mga bansang U.S., UAE, Saudi Arabia, Singapore, United Kingdom, Qatar, Kuwait, Germany at Hong Kong.

Samantala, tumaas din ng 5.2 porsyento ang personal remittances mula sa mga OFs na umabot sa US$25.7 bilyon. Nakapagtala ng US$2.6 bilyon noong Oktubre, mas mataas ng 9.7 porsyento kumpara sa US$2.3 bilyon sa parehong buwan noong 2016, ayon kay BSP Governor Nestor A. Espenilla, Jr.

Tumaas din ng 4.2 porsyento sa US$19.8 bilyon ang personal remittances mula sa mga land-based OFs na may kontratang isang taon at higit pa sa US$19.8 bilyon habang ang mga sea-based at land-based OFs naman na may kontrata na hindi aabot sa isang taon ay tumaas ng 4.1 porsyento sa US$5.3 bilyon mula Enero hanggang Oktubre 2017. 

Trump, bibisita sa Japan at Pilipinas sa Nobyembre

Ni Florenda Corpuz

Nagpulong noong Nobyembre nang nakaraang taon sina
U.S President Donald Trump at Japanese Prime Minister sa
Trump Tower sa New York City.  (Kuha mula sa Cabinet Public Relations Office)

Nakatakdang bumisita sa Japan at Pilipinas si U.S. President Donald Trump at First Lady Melania Trump sa darating na Nobyembre.

Ito ay bahagi ng kanilang 12-day trip sa limang bansa sa Asya.

Ayon sa anunsyo na inilabas ng White House, bibiyahe si Trump at maybahay nito sa Japan, South Korea, China, Vietnam, Pilipinas at Hawaii mula Nobyembre 3 hanggang 14.

Lalahok ang pangulo ng Amerika sa serye ng bilateral, multilateral at cultural engagements kabilang ang Asia-Pacific Economic Cooperation (APEC) summit na gaganapin sa Vietnam at ang Association of Southeast Asian Nations (ASEAN) summit na gaganapin sa Pilipinas para ipakita ang kanyang patuloy na pangako sa mga kaalyado ng U.S. sa rehiyon.

Tatalakayin din ang kahalagahan ng “free and open Indo-Pacific region to America’s prosperity and security.”

Bibigyang-din din ni Trump ang kahalagahan ng “fair and reciprocal economic ties with America;s trade partners.”

Isa rin sa layunin ng Asian tour ni Trump ay para “strengthen the international resolve to confront the North Korean threat and ensure the complete, verifiable, and irreversible denuclearization of the Korean Peninsula.”

Dalawang Mindanao road projects popondohan ng Japan

Ni Florenda Corpuz

Iprinisinta ni DPWH Secretary Mark Villar sa 3rd Philippines-Japan Joint
Committee Meeting on Infrastructure Development and Economic Cooperation
na ginanap sa Tokyo kamakailan ang ilang proyekto na popondohan ng Japan.
(Kuha mula sa Department of Public Works and Highway)

 

Inanunsyo ng Department of Public Works and Highway (DPWH) na nakakuha ito ng tulong mula sa Japan para sa pagpopondo ng dalawang road projects sa Mindanao.

Nakuha ito ng Mindanao sa ginanap na 3rd Philippines-Japan Joint Committee Meeting on Infrastructure Development and Economic Cooperation na ginanap sa Tokyo kamakailan.

Iprinisinta ni DPWH Secretary Mark Villar ang Bangsamoro Road Network Development Project, isang infrastructure project kung saan kabilang ang pagpapabuti at pagtatayo ng 200 km road network sakop ang 11 access roads at bridges na nag-uugnay sa ARMM at iba pang rehiyon sa Mindanao na nagkakahalaga ng Php10 bilyon.

“Japan International Cooperation Agency has already funded the feasibility study of the Bangsamoro Road Network Development Project. We have already formed a multi-sectoral steering committee, which will be chaired by Undersecretary Emil Sadain,” ani Villar.

“We are confident that by 2022, the road network in Bangsamoro will be fully completed,” dagdag niya.

Kabilang dito ang Matanog-Barira-Alamada-Libungan Road, Parang-Balabagan Road, Sibutu-Blensong-Nuro Road, Nuro-Pinansaran Road, Maganoy-Lebak Road, Tapian-Lebak Coastal Road, Marawi City Ring Road, Parang East Diversion Road, Manuangan-Parang Road, Tunggol 2 Bridge (On Davao-Cotabato Rd.) at Pagalungan Bridge (On Davao-Cotabato Rd.).

Bukod dito ay susuportahan din ng pamahalaang Hapon ang Davao City Bypass, ang 44.6 km by-pass road na may 2.28 km tunnel, na inaasahang makababawas sa travel time mula Digos patungo sa Panabo mula sa isang oras at 44 minuto sa pamamagitan ng Pan-Philippine Highway sa 49 minuto sa pamamagitan ng Davao By-Pass Road.

“The detailed engineering design of the 19.8 billion peso Davao City by-pass is already on-going. The first phase of the project will be completed in 2022,” ani Villar.

“As the Philippines pursue it’s biggest, boldest, and most ambitious infrastructure program, we thank the Japanese government for being a great partner in our economic development,” dagdag pa niya.

Tutulong din ang Japan sa pagsasakatuparan ng key flood control projects sa Pilipinas kabilang ang Paranaque Spillway (Tunnel) Project, Cavite Industrial Area Flood Management Project at Davao River Basin Flood Control Project.

Iprinisinta rin ni Villar ang Cavite Industrial Area Flood Management Project, na inaasahang poprotekta sa 7,000 kabahayan o 556 ektarya sa tabi ng Cavite Industrial Area, sakop ang Imus, San Juan, at Canas River Basins.

“Our JICA Loan for the financial assistance on the Cavity Industrial Area Flood Management Project is targeted to be approved by November 2017,” saad niya.

“In the Philippines pursuit of ushering in the Golden Age of Infrastructure, we thank the Japanese government for being a great partner in our economic development by constantly providing us with development assistance, financing, and innovative technology,” dagdag ng kalihim.

‘Araw ng Pasasalamat’ idinaos ng The Kingdom of Jesus Christ sa Japan

Tinatayang mahigit sa 500 miyembro ng The Kingdom of Jesus Christ The Name Above Every Name kasama ang Kingdom Light Congregation of Japan ang nagsama-sama sa Amagasaki City para sumamba at magpasalamat para sa mga biyayang dumarating sa kanilang grupo.

Pinangunahan ni Appointed Son of God, Pastor Apollo C. Quiboloy, ang special thanksgiving at worship presentation bilang pagdiriwang sa 10 taon simula nang maitatag ang relihiyon sa iba’t ibang lugar sa Japan.

“The Appointed Son of God, Pastor Apollo C. Quiboloy, and the Kingdom Nation thank the Almighty Father, our Lord Jesus Christ, for all the marvelous blessings that have enabled us to help the needy; for the continuous growth and unstoppable expansion that has empowered us to reach the unreached and spread the light of salvation from its first inception in the year 2003,” ani ng religious group.

Mayroon ng anim na Kingdom of Sentinels of Light ang The Kingdom of Jesus Christ The Name Above Every Name sa Tokyo, Saitama, Gunma, Ibaraki, Nagoya, at Osaka at balak nila na magtayo pa sa iba pang mga lugar sa Japan.

Sa pamamagitan ng mga kongregasyon na ito ay milyun-milyong katao na nangangailangan na ang kanilang natulungan sa biyaya ng Diyos. Malaking bahagi nito ay kanilang ipinagpapasalamat kay Pastor Quiboloy sa pangunguna sa kongregasyon at pagiging ilaw sa gitna ng dilim.

Nagpapasalamat ang grupo na mula sa Pilipinas ay nakarating ang “Salita ng Diyos” at ang kanilang pananampalataya sa Japan na makakapagpatunay na wala ang lahi, relihiyon o antas ng pamumuhay ang makakahadlang sa pagsamba sa Diyos.

“The recent King Is Coming Tour in Amagasaki City, Osaka was nothing short of victorious for hundreds of truth seekers, not only Filipinos but also Japanese brethren and other nationalities have received the light of salvation through the message of repentance and love,” dagdag pa ng grupo.

Mga bagong opisyal ng PAG, nanumpa

Nanumpa sa kanilang tungkulin ang bagong PAG officers na sina 

(mula kaliwa) Alden Estolas, Ningning Tomiyama, Robert Alcamfor,

 Dr. George Cabrera, Eleanor Fukuda, Joyce Ogawa, Evangeline 

Yamamoto, Olive Akatsu, at Corazon Kasuga na pinangunahan

 ni Amb. Jose C. Laurel V. (Kuha mula sa Philippine Embassy, Tokyo)

 

Pormal nang nanumpa sa kanilang tungkulin ang mga bagong opisyal ng Philippine Assistance Group (PAG) sa isinagawang induction rites sa Philippine Embassy sa Tokyo kamakailan.

Pinangasiwaan ni Philippine Ambassador to Japan Jose C. Laurel V ang panunumpa ng mga bagong halal na opisyal ng PAG para sa taong 2017-2018.

Nanumpa bilang mga bagong opisyal sina Eleanor Fukuda ng ODAN-J (Organization for the Development and Advancement of Negros in Japan) bilang Chairman; Dr. George Cabrera ng CASTLE (Christian Association Serving Traditional Laymen’s Evangelization) bilang Vice-Chairman; Joyce Ogawa ng Sinag Japan bilang Treasurer; Robert Alcamfor ng TIMD (Tong-Il Modo Phil-Japan), Evangeline Yamamoto ng UFGY (Unified Filipino Group of Yokohama) at Olive Akatsu ng HAKMI (Hawak Kamay sa Mahal na Ina) bilang Executive Committee Members; Ningning Tomiyama ng TIFC (Takayasu International Fan Club), Corazon Kasuga ng FICAP (Filipina Circle for Advancement and Progress) at Alden Estolas ng AAIJ (Abraenian Association in Japan) bilang mga opisyal ng Membership Committee ng PAG.

Sa induction ceremony, binanggit ni Laurel ang kahalagahan ng pagkakaisa sa mga organisasyon sa Filipino community. Kinilala rin niya ang serbisyo ng mga outgoing officers ng PAG. Sinaksihan din niya ang pagtanggap sa Philippine Federation of Panay Islands in Japan (PFPIJ) bilang bagong miyembro ng PAG.

Ang PAG ang umbrella organization ng mga rehistradong organisasyon sa Filipino community sa Kanto region. Ito ay itinatag 20 taon na ang nakalilipas at nakatuon sa pagbibigay ng tulong sa mga Pilipinong mahirap na kalagayan partikular sa paglalaan ng medical assistance at pondo para sa kanilang repatriation sa pamamagitan ng Philippine Assistance Fund.

            

Japan at Pilipinas pag-iibayuhin ang kooperasyon sa emergency warning broadcasting system

Kuha ni Avito Dalan/Presidential Photo

Nilagdaan na ng Japan at Pilipinas ang kasunduan para pag-ibayuhin ang kooperasyon sa “Emergency Warning Broadcasting System and Data Broadcasting of Digital Terrestrial Television Broadcasting.”

Sinaksihan nina Presidential Communications Operations Office (PCOO) Secretary Martin Andanar at Japan Minister and Consul General Atsushi Kuwabara ang paglalagda na ginanap sa pagdiriwang ng 2^nd ASEAN-Japan Television Festival sa Seda Vertis North Hotel sa Quezon City kamakailan.

Kumatawan para sa Pilipinas sina PCOO Undersecretary Noel Goerge Puyat at People’s Television Network General Manager Dino Antonio Apolonio habang sa Japan naman ay si Vice-Minister for Policy Coordination (International Affairs) of the Ministry of Internal Affairs and Communications Masahiko Tominaga.

Taong 2013 nang i-adopt ng Pilipinas ang Japanese digital TV standard o Integrated Services Digital Broadcasting-Terrestrial (ISDB-T). Ang bansa ang kauna-unahang miyembro ng ASEAN na nagsagawa nito.

Matatandaan na sinabi ni dating pangulo Benigno Aquino III na ang dahilan kung bakit mas gusto ng Philippine industry experts ang Japanese standards ay ang kakayahan nito para sa isang emergency broadcast sa panahon ng sakuna.

“We are told that it was used during the Fukushima incident. Iyong Shinkansen bullet trains managed to stop x number of seconds on a minute prior to the earthquake hitting, (and) saved lives; iyong ability to turn on television sets to broadcast this warning maski na naka-off,” paliwanag ng dating pangulo.

Philippine Festival 2017 gaganapin sa Hibiya Park

Ni Florenda Corpuz

Nakatakdang ganapin ang pinakamalaki at pinakamakulay na pistang Pilipino sa Japan – ang Philippine Festival 2017 sa Hibiya Park, Tokyo sa darating na Setyembre 30 at Oktubre 1.

Tinawag na “Barrio Fiesta” noong 2012 at 2013, napagdesisyunan na palitan ang pangalan nito at gawing “Philippine Festival” upang lalo itong mapagtibay sa taunang pagdiriwang ng kasiyahan sa Japan.

Nakatakdang ipamalas sa dalawang araw na kapistahan ang kulturang Pilipino sa pamamagitan ng mga awitin at sayaw. Hindi rin mawawala ang mga booths kung saan iba’t ibang uri ng produktong Pilipino tulad ng mga handicrafts, damit at souvenir ang mabibili.

Nariyan din ang mga paboritong pagkaing Pilipino tulad ng adobo, mga kakanin, halu-halo at marami pang iba. Inaabangan din ang mga patimpalak tulad ng singing contest at celebrity impersonation, at serbisyo ng mga kumpanya para sa mga kababayan.

Inaasahan din ang pagpapamalas ng talento ng mga lokal na mang-aawit at mananayaw mula sa Filipino community.

Dadalo rito ang ilang sikat na bituin mula sa Pilipinas tulad nina Miss International 2016 Kylie Verzosa, Xian Lim at KZ Tandingan.

Ang Philippine Festival 2017 ay proyekto ng Filipino community sa Japan sa pakikipagtulungan ng Embahada ng Pilipinas sa Tokyo. Layon nito na pagbuklurin ang mga Pilipino sa Japan at palaganapin ang pag-unawa at pagpapahalaga sa kulturang Pilipino sa tinaguriang “Land of the Rising Sun.”

Gurong Hapon tumutulong sa mga kabataang may kapansan sa Bohol

Nagbalik sa Bohol si dating Japan Overseas Cooperation Volunteer 

Akiko Sugiyama sa Bohol para ipagpatuloy ang pagtulong sa mga PWDs.

Para sa mga kabataan na nagtapos sa mataas na paaralan, walang katapusan ang mga posibilidad ng buhay. Maaari silang mag-aral sa mga unibersidad, kumuha ng nais na kurso, sumabak sa sports, o mamuhay sa kanilang nais.

Ngunit ang kaso ay naiiba para sa mga kabataan na intellectually handicapped o disabled na kadalasan ay hindi nabibigyan ng pagkakataon na maranasan ang kasiyahan sa high school maliban na lamang kung kuntento na sila na manatili sa bahay.

Ito ay binabago ng isang gurong Hapon sa Bohol na tinutulungan ang mga kabataan na may mga kapansanan na magkaroon ng pantay na pagkakataon sa buhay.

Si Akiko Sugiyama, isa sa mga volunteers ng Japan Overseas Cooperation Volunteers (JOCV) Program of Japan International Cooperation Agency (JICA)  ay nagtayo ng support center para sa mga kabataan na may kapansanan na nakapagtapos sa SPED Center.

Isang guro sa Yokohama at Kyoto si Sugiyama na nakumpleto ang volunteer work sa ilalim ng JICA para sa Tagbilaran City Central School SPED Center noong 2015 bago bumalik sa Bohol.

“This is my personal project. I really wanted to help young people with disabilities lead productive lives,” ani Sugiyama.

Tinawag na Babita House, isang two-storey dormitory at native house kung saan ang mga kabataan na may kapansanan ay tinuturuan ng Math, sign languages, pagbabasa, pagsusulat at mga gawaing pangkabuhayan tulad nang paggawa ng miniature toy tricycles.

Tulad sa mga centers para sa mga persons with disabilities (PWDs) sa Japan, sinabi ni Sugiyama na ang mga aktibidad sa Babita House ay maaaring makatulong sa mga batang PWDs sa Bohol na maging produktibo at kumita para sa kanilang mga sarili.

Ang mga toy matchboxes na gawa ng mga intellectually handicapped na mga kabataan sa Babita House ay ginaya sa popular na motor tricycle sa Bohol na isang cultural symbol.

Noong una ay isang estudyante lamang ang nakagagawa ng toy tricycle gamit ang matchboxes ngunit ngayon ay mas marami na ang nakagagawa nito gamit ang chipboards.

Sa tulong ng isa pang Japanese volunteer na si Shiro Takaki na nakatalaga sa isang design fabrication laboratory sa Bohol, ang mga materyales para sa mga laruan ay laser cut at dinidikit, pinipintahan at binubuo ng mga kabataan sa Babita House. Ngayon ay ibinebenta ito bilang mga souvenir items kung saan ang pinagbentahan ay binibigay bilang allowance sa mga kabataan na gumagawa nito at suporta sa center.

“The center also receives donations from people in Japan and every now and then we host study tours for Japanese visitors who want to learn more about PWDs and how they can be supported,” dagdag ni Sugiyama.

“Boholanos are kind people. Life here is slow, but for volunteers like me, it makes us happy to see that people with disabilities are able to enjoy life without discrimination,” pagbabahagi pa niya.

Ang mga kabataang may kapansanan ay nahaharap sa mga hamon upang gawin ang mga bagay na ginagawa ng mga normal na bata. Ngunit ang proyekto ng Babita House ay nagpapakita na ang makabuluhang pagbabago ay maaaring mangyari kapag ang mga kabataan ay binibigyan ng pantay na pagkakataon sa buhay.

Japanese businessmen hinimok ni Duterte na mamuhunan sa Pilipinas

Ni Florenda Corpuz

Hinikayat ni Pangulong Rodrigo Duterte ang mga Japanese businessmen na mamuhunan sa Pilipinas sa mga sektor ng manufacturing, infrastructure, agriculture at energy sa kanyang pagdalo sa Philippine Economic Forum.

“We would like to see more investors and businesses setting up shops in the Philippines,” pahayag ni Duterte sa kanyang talumpati sa harap ng 1,000 partisipante na dumalo sa business forum na ginanap sa Prince Park Tower Tokyo Hotel noong Oktubre 26.

Sinabi rin ng Pangulo na patuloy na magiging prayoridad ng Pilipinas ang Japan lalo na at ginugunita ngayong taon ang ika-60 taon ng diplomatikong relasyon ng dalawang bansa.

“We look to Japan as a steady fulcrum in our regional engagement as the Philippines’ first and only bilateral free trade partner today,” aniya.

Dinagdag din ni Duterte na ang Japan ang pangunahing trade partner ng bansa, pangunahing pinagmumulan ng pamumuhunan at pangalawang pinagmumulan ng official development assistance (ODA).

Ayon pa sa Pangulo, determinado ang pamahalaan na makalikha ng mas maraming trabaho sa pamamagitan ng mas madali at mas kaakit-akit na pagnenegosyo sa bansa.

Umaasa rin si Duterte na patuloy na susuportahan ng Japan ang hangarin ng Pilipinas na pagtataguyod sa rural development, pagtaas ng agriculture productivity, pagpapabilis ng infrastructure spending at pamumuhunan sa human capital development.

Tiniyak din ng Pangulo sa mga Japanese businessmen na ang kanyang pagbisita sa China ay tungkol lamang sa ekonomiya at hindi tungkol sa usapin sa seguridad.

“You know I went to China for a visit. And I would like to assure you that all there was, was economics. We did not talk about arms. We avoided talking about alliances,” aniya.

Nangako rin si Duterte na papanig sa Japan pagdating sa usapin sa South China Sea.

Umangat ang gross domestic product ng Pilipinas sa 6.3 porsyento sa nakalipas na mga taon kaya naman itinuturing ito bilang isa sa fastest growing economy sa buong mundo.

Pagbisita sa Japan ni Duterte, inaabangan na

Ni Florenda Corpuz at Len Armea

File photo: Presidential Communications

Nakatakdang bisitahin ni Pangulong Rodrigo Duterte ang Japan mula Oktubre 25 hanggang 27, ito ang kinumpirma ng Ministry of Foreign Affairs (MOFA) kamakailan.

Sa pagbisita ni Duterte ay magsasagawa siya ng state call kay Emperor Akihito. Makikipagpulong din siya kay Prime Minister Shinzo Abe at dadalo sa isang hapunan na inihanda para sa kanyang pagdating. Makikipagkita rin si Duterte sa Filipino community sa Japan.

Magugunitang nanguna si Duterte sa overseas absentee voting matapos itong makakuha ng 11,216 boto mula sa 14,886 rehistradong Pilipinong botante sa Japan. Mahigit sa 237,000 ang mga Pilipino na naninirahan sa Japan sa kasalukuyan.

“The Government of Japan sincerely welcomes the visit of the President and hopes the visit will further strengthen the friendly relations between Japan and the Republic of Philippines,” sabi ng MOFA sa isang pahayag.

Ito ang kauna-unahang pagbisita ni Duterte sa Japan matapos niyang tanggapin ang imbitasyon ni Prime Minister Shinzo Abe sa kanilang unang pagkikita sa pulong sa sidelines ng 28th ASEAN Summit na ginanap sa Vientiane, Laos noong Setyembre 6 kung saan kanilang pinagtibay ang paglutas sa sigalot sa South China Sea sa pamamagitan ng mapayapang paraan.

Matatandaang pumayag si Abe na magbigay ng dalawang 90-meter patrol vessels sa Pilipinas, ang pinakamalaki na ipapahiram ng Japan, at magpahiram ng limang gamit na TC-90 training aircraft ng Japan Maritime Self-Defense Force sa gitna ng sigalot sa teritoryo laban sa China. Una nang pumayag ang Japan na magbigay ng 10 40-meter patrol boats na sinimulan nang i-deliver sa bansa.

Pinasalamatan ni Digong ang Japan sa makabuluhang papel nito sa pag-unlad ng Pilipinas lalo na sa Mindanao sa kanilang pagkikita ni Abe.

Nito lamang ay sinabi ni Duterte sa isang talumpati sa Malacañang na ang pamahalaang Hapon ang pinakamalaking aid donor ng Pilipinas.

Pakikipag-alyansa sa China, Russia

Bago tumulak sa Japan ay bumisita muna si Duterte sa Brunei at China upang paigtingin ang bilateral relations nito sa bansa at makapagbukas ng mas marami pang oportunidad. Nakatakda rin itong pumunta sa Russia pagkaraan ng kanyang state visit sa Japan.

Naging bukas kamakailan ang Pangulo sa kanyang pagpapahayag ng kanyang plano na magsagawa ng military joint exercises kasama ang China at Russia. Ito ay matapos niyang sabihin na ipapatigil na niya ang military joint exercises sa pagitan ng Pilipinas at Estados Unidos.

100 days bilang Pangulo

Nitong unang linggo ng Oktubre ang ika-100 araw ni Duterte mula ng manumpa siyang Pangulo ng bansa. Higit na pinag-usapan sa loob ng kanyang tatlong buwang pamumuno sa bansa ay ang kampanya sa ilegal na droga, ang isyu ng extrajudicial killings, ang kanyang tapang sa pananalita, at ang kagustuhan nitong tapusin ang pakikipag-alyansa sa Estados Unidos.

“We have three million drug addicts, and it’s growing. So if we do not interdict this problem, the next generation will be having a serious problem ... You destroy my country, I’ll kill you. And it’s a legitimate thing. If you destroy our young children, I will kill you. That is a very correct statement. There is nothing wrong in trying to preserve the interest of the next generation,” pahayag ni Duterte sa panayam sa kanya ng Al Jazeera News.

Hindi rin nagustuhan ni Duterte ang pagbatikos sa kanyang administrasyon ng Estados Unidos dahil sa pamamaraan niya ng paghawak sa kampanya laban sa droga. Sa kasalukuyan ay halos 3,500 drug suspects na ang napapatay.

Pasado naman sa mga Pilipino ang liderato ni Duterte kung saan nakakuha ito ng 86 porsyento approval at trust ratings ayon sa ginawang survey ng Pulse Asia kamakailan.

Isa ang Migrante International, ang pinakamalaking grupo ng overseas Filipino, sa nagbigay ng pasadong marka sa Pangulo na nasa 84 porsyento.

“We gave him a satisfactory grade based on his administration’s accomplishments on the immediate ‘do-ables’ and on his notable actions on urgent issues and concerns of OFWs (Overseas Filipino Workers) and the nation. This, by far, is the highest score that we have given to a president in their first 100 days,” pahayag ni Mic Catuira, Migrante’s acting Secretary General.

Japanese Defense Minister inaasahang bibisita sa Pilipinas sa Abril

Ni Florenda Corpuz

Nagsagawa ng bilateral meeting sina Philippine Secretary of

National Defense Voltaire T. Gazmin at  Japan’s Minister of Defense 

Gen Nakatani sa sidelines ng ASEAN Defence Ministers’ 

Meeting (ADMM-Plus) noong nakaraang taon. 

(Kuha mula sa Department of National Defense)

Inaasahan ang lalo pang paglakas ng pwersang pang-seguridad ng Pilipinas at Japan sa nakatakdang pagbisita sa bansa ng kanilang Defense Minister.

Sa ulat ng Kyodo News, maaaring maganap ang pagbisita sa Pilipinas ni Gen Nakatani sa huling bahagi ng Abril hanggang unang bahagi ng Mayo.

Makikipagkita si Nakatani kay Philippine Secretary of National Defense Voltaire T. Gazmin upang pag-usapan ang pagpapalakas ng security ties ng Pilipinas at Japan sa gitna ng patuloy na gusot sa agawan ng teritoryo sa South China Sea/West Philippine Sea.

Parehong may alitan sa teritoryo ang Pilipinas at Japan laban sa China.

Maaaring talakayin ni Nakatani kay Gazmin ang pagbibigay ng Japan ng TC-90 training aircraft sa Pilipinas na magagamit sa pagsasagawa ng surveillance sa South China Sea/West Philippine Sea.

Inaasahan din ang pagtalakay ng dalawa tungkol sa pagpapalawak ng joint exercises sa pagitan ng Japan Maritime Self-Defense Force (JMSDF) at Philippine Navy, pati na rin ang iba pang hakbang ng Japan para suportahan ang iba pang aspeto ng Philippine military.

Ipapaabot din ng Japanese Defense Minister ang suporta ng kanyang bansa sa pagsisikap ng pamahalaan ng Pilipinas na maisaayos ang gusot sa agawan sa teritoryo laban sa China sa pamamagitan ng kasong isinampa nito sa UN Arbitral Tribunal sa The Hague, Netherlands.

Matatandaang ipinagtibay nina Pangulong Benigno S. Aquino III at Prime Minister Shinzo Abe noong APEC Summit sa Maynila ang defense at security relations ng Pilipinas at Japan sa pamamagitan ng kanilang pagsang-ayon sa Transfer of Defense Equipment and Technology na inaasahan nilang malalagdaan sa nalalapit na panahon.

Produktong Pinoy bumida sa design exhibit sa Tokyo

Ni Florenda Corpuz

Kuha ni Din Eugenio

Tokyo, Japan – Isang furniture at home décor exhibition na tinawag na “Philippine Design Exhibition” ang binuksan sa publiko sa Tokyo Midtown Design Hub sa Roppongi noong Pebrero 18 hanggang Marso 22.

Kabilang sa mga produktong ibinida (yari sa fibers, textiles, papel, coconut, shells, kahoy at metal) ay mga obra ng mga pamosong Pinoy designers na sina Al Caronan, Ann Pamintuan, Antonio “Budji’ Layug, Carlo Cordaro, Kenneth Cobonpue, Luisa Robinson, Maria Cristina “Maricris” Floirendo-Brias, Miguel Carlos Aguas, Milo Naval, Renato Vidal, Rene Alcala, Tes Pasola, Tony Gonzales at Vito Selma. Sila ay mga miyembro ng Movement 8, isang alyansa ng mga Pinoy designers na hangad ay ibahagi ang kanilang talento at pagiging malikhain upang isulong ang disenyong Pilipino sa buong mundo.

Pinangunahan ni Philippine Ambassador to Japan Manuel M. Lopez ang pagbubukas ng exhibit na inilarawan niya bilang “a venue to showcase in the world stage the Filipino excellence, ingenuity and unique creativity.”

Sa kanyang opening remarks, sinabi ni Lopez na “this path of creativity and tradition of excellence continues to be proudly carried by all the designers featured in this exhibit today – how their works reflect life, nature, the human spirit and this generation’s responsibility to preserve the environment.”

 “Philippine designers pool their God-given talents to foster greater awareness and appreciation of the value of design – especially how ideas add value to products and the quality of human life and how innovation promotes linkages between world-wide communities. Designers exemplify the philosophy that dreams should be bigger, allow to travel further and create new things that mange to keep this world a constant place of wonder,” dagdag pa ni Lopez.

Dinaluhan din ng humigit-kumulang 100 mga bisita at importers mula sa iba’t ibang kumpanyang Hapon ang pagbubukas.

Ang exhibit ay inorganisa ng Office of Trade and Investment, Philippine Embassy, sa pangunguna ni Commercial Counsellor Maria Bernardita Angara-Mathay, sa suporta ng ASEAN Japan Centre, at dinaluhan ng 14 exporters mula sa iba’t ibang rehiyon ng Pilipinas na nagtataguyod ng Philippine artistry at craftsmanship.