Rhian Ramos: Out of her comfort zone

Isa ang magandang aktres na si Rhian Ramos sa mga parating handa na sumabak sa kakaibang papel sa loob at labas ng showbusiness. Malakas ang loob at bukas sa mga bagong kaganapan na sa tingin niya ay makakatulong sa paglago ng kanyang karera at personalidad, nagbubunga ang pagiging “risk-taker” ng dalaga dahil dagsa ang proyekto sa kanya ngayon.

Matapos ang matagumpay niyang serye na “My Destiny” kasama sina Tom Rodriguez at Carla Abellana, abala ang 24-taong-gulang na si Rhian sa pagganap bilang Jade sa primetime series ng Kapuso network na “The Rich Man’s Daughter” na tungkol sa pag-iibigan ng dalawang babae.

Kung gaano naging maingay at makulay ang naturang serye, ganoon din ang pagpasok ni Rhian dito bilang pangunahing tauhan. Ito ay dahil para sana kay Marian Rivera ang naturang papel ngunit kinailangan nitong mag-backout dahil sa pagbubuntis sa unang anak kay Dingdong Dantes.

Biglaan at wala man sa kanyang plano, walang kagatol-gatol na tinanggap ni Rhian ang proyekto na isang malaking hamon dahil ito ang unang beses na magkakaroon ng ganitong tema sa primetime series ng GMA-7.

“Naisip ko, ‘Lord, may dahilan kung bakit mo binibigay sa akin ito. Kaya kung anong blessing ito galing sa inyo, tatanggapin ko’,” pag-amin ng dalaga hinggil sa pagtanggap niya ng bagong proyekto na ito.

Aminado si Rhian na labis siyang kinabahan dahil wala siya masyadong naging preparasyon sa ginagampanan papel at sa magiging reaksiyon ng mga manonood sa kakaibang teleserye na ito. Umiinog ang istorya sa papel ni Rhian na si Jade, na mula sa mayamang pamilya, na magkakagusto sa isang babae sa katauhan ni Althea na ginagampanan naman ni Glaiza de Castro na pagmumulan ng iba’t ibang kumplikasyon.

“Sobrang natakot ako sa magiging reaksiyon ng mga tao kasi hindi ko talaga siya napaghandaan. Nalaman ko na ako iyong papalit kay Marian two days before the taping day. Kinabahan talaga ako kasi baka magkaroon ng comparison,” bulalas ni Rhian.

Nakahinga ito ng maluwag dahil bukod sa suporta na nakuha niya sa cast and crew tulad nina Glaiza, Luis Alandy, Katrina Halili, Chynna Ortaleza at Direk Dom Zapata ay positibo ang naging reaksiyon ng mga manonood simula ng umere ito noong nakaraang buwan. Sa katunayan ay mataas ang rating ng bawat episode at laging nagti-trending sa Twitter.

“Masaya kasi may approval na siya ng fans. Mas may freedom na ako mag-explore sa character ko, sa bawat scenes dahil kahit paano nawala ang worries ko,” ani Rhian sa kanyang papel na hindi karaniwan sa mga ginagawa niya.

Ibang interes

Hindi lamang nakakahon sa showbiz ang atensiyon ni Rhian. Kapag hindi abala sa shootings at tapings, makikita ang dalaga sa racing track na nag-eensayo. Nito lamang Marso ay sumali si Rhian sa Toyota Vios Cup kasama ang ilang celebrities tulad nina Derek Ramsay, Jasmine Curtis, Kylie Padilla, at Phoemela Baranda.

“Sinubukan ko lang siya and talagang nagustuhan ko na. When I’m racing, I feel so free and wala akong ibang iniisip kundi iyon lang,” pahayag ni Rhian sa isang panayam hinggil sa kanyang mapanganib na interes.

Bukod sa car racing, interes din ni Rhian ang fashion at sa katunayan ay marunong itong mag-design at manahi. Isa sa pinagtutuunan niya ng pansin bago mapasabak sa The Rich Man’s Daughter ay ang pagtatayo ng website kung saan kanyang pagsasamahin ang mga local fashion designers.

“Before I got the call for The Rich Man’s Daughter I was working on a passion project: a website that features the wonderful clothes we have in our backyard.

“I wasn’t expecting to get so busy so quickly and this sudden switch forces me to put this project on hold for a while. But it's coming. Because local talent needs to be discovered, appreciated, and shared,” ani Rhian sa kanyang Intagram account.

Dennis Trillo: The perfect leading man

Isa si Dennis Trillo sa tinitilian ng mga showbiz fans sa kahit na anumang proyekto na pasukin nito – gwapo, malakas ang appeal, at magaling umarte. Itinuturing siya na isa mga paboritong leading men ng henerasyon na ito kaya naman dagsa ang proyektong ibinibigay sa kanya.

Pagkatapos ng matagumpay at pinag-usapang serye na “My Husband’s Lover,” muling lumabas si Dennis kasama si Maja Salvador at Richard Yap sa pelikulang “You’re Still the One” na nagbukas sa mga sinehan kamakailan lamang.

Ito ang unang pagkakataon na nagbida si Dennis sa isang proyekto ng Star Cinema at Regal Films lalo na at contract artist siya ng GMA. Ginagampanan ni Dennis ang papel ni Jojo sa isang love story kung saan kanyang naipakitang muli ang husay sa pag-arte.

Road to stardom

Nagsimula ang karera ng gwapong aktor noong 2000 nang maging bahagi ito ng Batch 10 ng Star Circle (Star Magic) ng ABS-CBN. Ipinakilala siya sa telebisyon sa mga popular na serye gaya ng “Pangako Sa’yo” at “Sa Dulo ng Walang Hanggan.”

Lumipat ito sa GMA pagkatapos ng dalawang taon kung saan bumida siya sa maraming serye sa telebisyon gaya ng “Twin Hearts,” “Mulawin,” “Darna,” “Majika,” “Etheria: Ang Ikalimang Kaharian ng Encantadia,” “Super Twins,” “Sinner or Saint,” “Legacy,” Filipino remake ng “Temptation of Wife,” “Endless Love” at marami pang iba.

Dumating ang pinakamalaking break ni Trillo sa showbiz sa kanyang unang pagganap sa pelikula ni Joel Lamangan na “Aishite Imasu 1941: Mahal Kita” noong 2004 bilang Ignacio Basa, isang espiya na nagpanggap na isang babae noong panahon ng Japanese occupation sa bansa noong World War II.

Nag-uwi ng maraming parangal sa pag-arte ang aktor sa kanyang magaling na pagganap sa naturang pelikula gaya ng Best Supporting Actor mula sa Gawad Tanglaw Awards, Metro Manila Film Festival, Gawad Urian Awards at Young Critics Circle; Best Actor sa FAMAS Awards, FAP Luna Awards, Gawad PASADO Awards at ENPRESS Golden Screen Awards; at Movie Actor of the Year sa PMPC Star Awards for Movies.

Lumabas din ang aktor sa mga pelikulang gaya ng “The Janitor,” “Blue Moon,” “Mulawin: The Movie,” “Mano Po 3: My Love,” “Yesterday, Today, Tomorrow,” at “Mano Po 6: A Mother’s Love.”

Susunod na mapapanood si Trillo sa dalawa pang malaking proyekto sa pelikula na muli siyang makikitaan ng galing sa pagganap, ang “Felix Manalo: The Last Messenger” kung saan gagampanan niya ang tagapagtatag ng Iglesia ni Cristo.

Siya rin ang bida sa “One Pedal At A Time” bilang isang environmentalist/ mountain biker kung saan makakasama niya si Solenn Heussaff na mula sa direksyon ni Ellen Ongkeko-Marfil. 

Sinasabing makulay din ang lovelife ng actor na na-link sa mga naggagandahang aktres gaya nina Christine Reyes, Bianca King, at Jennylyn Mercado. Usap-usapan din ngayon ang pakikipagmabutihang muli sa dating kasintahan na si Jennylyn. Matatandaang hindi nagging maganda ang pahihiwalay nila noong 2011.

Nilinaw ni Dennis na masaya siya sa estado ng buhay niya ngayon at ayaw niyang madaliin ang muling pagpasok sa bagong relasyon. Inamin din nito na masaya rin siya na maayos na muli ang samahan nila ng dating kasintahan at hindi rin niya isinasara ang pintuan sa posibilidad na magkabalikan sila sa hinaharap.

Bidding para sa dagdag na sports event sa Tokyo 2020, binuksan

Ni Florenda Corpuz

Tokyo, Japan – Pormal nang binuksan ng Tokyo 2020 Organising Committee ang application process para sa karagdagang sports events sa darating na 2020 Tokyo Olympics, ito ay kasunod nang pag-apruba ng International Olympic Committee (IOC) sa Olympic Agenda 2020 noong Disyembre.

Tutukuyin ng Tokyo 2020 Additional Event Programme Panel ang isa o dalawang karagdagang sports event na imumungkahi ng Tokyo 2020 sa IOC batay sa ilang mahahalagang alituntunin.

“The additional event(s) will serve as a driving force to promote the Olympic Movement and its values, with a focus on youth appeal,” pahayag ng kumite.

“The additional event(s) will add value to the Games by engaging the Japanese population and new audiences worldwide, reflecting the Tokyo 2020 Games vision,” dagdag pa nito.

Sinabi rin ng kumite na magiging bukas at patas ang selection procedure.

Naglunsad ang Tokyo 2020 Organising Committee ng two-stage procedure kung saan ang una ay inimbitahan ang mga IOC Recognised International Federations (IF) na magpasa ng aplikasyon.

“Phase I will involve response forms, which will include a brief set of questions, being sent to all IOC Recognised International Federations (IF) that control sports currently not on the Tokyo 2020 Olympic Games programme and that are not exclusively practiced on snow or ice.”

Pag-aaralan ng Additional Event Programme Panel ang mga aplikasyon kung saan ang mga mapipili ay dadaan sa Phase II na magsisimula sa Hunyo 22.

“The Additional Event Programme Panel will examine each application to ensure that it complies fully with Tokyo 2020’s key principles.”

Magsasagawa ng presentasyon ang mga finalists sa Tokyo sa darating na Agosto habang magbibigay naman ng rekomendasyon ang kumite sa IOC sa Setyembre 30. Maglalabas ng pinal na desisyon ang IOC sa Agosto 2016 sa Rio de Janeiro.

Ilan sa mga paboritong laro na kinukunsidera ay ang baseball, softball at karate.

Samantala, isinabatas naman ng Diet kamakailan ang bill kung saan isang sports agency sa ilalim ng pamamahala ng Ministry of Education, Culture, Sports, Science and Technology ang ilulunsad upang mangasiwa sa sports administration bago ang 2020 Tokyo Olympics. Inaasahan na mas palalakasin nito ang performance ng mga atletang Hapon.

Ang pagpapatupad ng K to 12 program

Ni Al Eugenio

Sinasabi na sa buong mundo iilan na lamang ang mga bansa ang hindi nagpapatupad ng sistemang K to 12 o mula sa kindergarten ay 12 taon pang pagpasok sa eskwelahan ang kailangan ng mga batang mag-aaral bago sila maka-graduate sa high school. Pagkatapos nito ay saka pa lamang nila maipagpapatuloy ang pagpapakadalubhasa nang anumang kurso na gusto nilang pag-aralan sa kolehiyo.

Dito sa Japan, ang sistemang K to 12 ang matagal nang sinusunod ng bawat paaralan. Ang sistema rin na ito ang ginagamit sa mas nakakaraming bansa maging mga mayayaman na o mga bansang developing pa lamang. Sinasabi na rito sa Asya, Pilipinas na lamang ang natatanging bansa ang hindi nagpapatupad ng sistemang K to 12.

Nang maupo sa pagkapangulo si Pangulong Benigno Aquino III,  agad niyang sinabi na ang Pilipinas ay magpapatupad na rin ng sistemang K to 12. Ang pamahalaan ng Pilipinas ay binigyan ng bilyong pisong budget para maisakatuparan ang sistemang ito.

Upang maipatupad ang K to 12, kakailanganin ng mga bagong subject na mapag-aaralan sa loob ng dalawang taong idadagdag. Siyempre, kasama nito ang mga bagong mga textbooks at mga libro bukod pa sa mga pasilidad at mga kagamitan tulad halimbawa ng mga laboratory at iba pa.

Mangangailangan din ng mga karagdagang silid-aralan ang bawat eskwelahan upang makapagpatuloy ang mga mag-aaral sa karagdagang dalawang taon pang pag-aaral upang makatapos ng high school. Mangagailangan din ng mga guro na may kaalaman sa mga bagong subject na ibibigay sa mga mag-aaral ng bawat paaralan. Ang paghahandang ito ay hindi madali kaya’t bilyong salapi ang inilaan para rito ng ating pamahalaan.

Sa panig naman ng mga mag-aaral at ng kanilang mga magulang, ang karagdagang dalawang taon para sa pangkaraniwang pamilya na halos sapat lamang ang kita at talagang iginagapang na lamang ang pag-aaral ng mga anak, ito’y mistulang parusa sa pangarap na mapagtapos ang kanilang mga anak at nang baka sakali ay makaahon sila sa matagal na nilang dinaranas na hirap ng buhay.

Hindi katulad dito sa Japan, ang bawat bata ay kinakailangang makatapos ng K to 12 kahit na walang kakayahang pinansiyal ang mga magulang. Tungkulin ng pamahalaan na suportahan ang bawat mag-aaral sa anumang paraan. Ang mga guro, lalo pa at sila ay nagtuturo sa mga pampublikong paaralan, bilang kaanib ng pamahalaan ay sinisiguro nila na nabibigyan ng nararapat na kaalaman ang bawat mag-aaral upang maging isang mabuting mamamayan.

Sa kung anong kadahilanan, sa loob ng ilang taong nakaraan mula noong unang pag-usapan ang pagpapatupad ng K to 12, napakalaking kakulangan sa paghahanda ang naipapakita ng ating pamahalaan sa mga mamamayan. Kakulangan sa silid-aralan, mga maling paglilimbag ng mga aklat na matapos maiimprenta ay lumalabas na hindi na kailangan. Kaya ang tanging paraan ay itapon na lamang o gawing pandewang.  Kakulangan sa mga paaralan na makapagtuturo ng karagdagang dalawang taong pag-aaral.

Papaano kung walang sapat na pantustos sa mga pangangailangan ng mga mag-aaral tulad ng pamasahe, proyekto, baon sa araw-araw? Papaano na ang mga mag-aaral sa mga lugar na malayo sa kabihasnan? Kapag masama ang panahon, naiisip kaya ito ng ating mga nasa pamahalaan habang sila ay na sa loob ng kanilang mga airconditioned na inuupuan? 

Walang masama sa K to 12, matagal na itong kailangan. Hindi natin sinasabi na  ito ay mali. Dapat nga ay noon pa ito isinakatuparan. Ngunit sa uri ng ating mga nanunungkulan na isang tambak na hindi maaasahan. Napakahina ng mga pamamaraan. Laging iginigiit ang mga sariling kapakanan. 

“Nakakainis na,” ang sigaw ng bawat mamamayan. Kailan kaya tayo makaaalis  sa pagiging isang developing na bansa. Marami ng kababayan natin ang ipinanganak at namatay, iilang porsyento lamang ang nagkaroon ng dignidad at kaginhawahan sa buhay. Marami sa kanila ay ang mga nakatapos ng pag-aaral. Kailan kaya magkakaroon ng pagkakataon na ang bawat kabataang Pilipino ay magkakaroon ng kasiguruhan na makakatapos ng pag-aaral?

Hindi salapi ang kakulangan ng ating bansa, marami tayo niyan! Tayong mga OFW na lamang ay Php 22 bilyong ang naiaambag sa kaban ng ating bayan. Isipin na lamang natin ang daan-daang milyong pisong kinukurakot ng marami sa mga nanunungkulan sa ating pamahalaan. Kung nagagamit lamang ng tama  ay wala sana tayo sa ganitong kahihiyan.

Habang isinusulat ang artikulong ito, pilit na ipinatutupad na ng ating pamahalaan ang K to 12 sa kabila ng maraming protesta. Hindi lamang mula sa mga magulang, kasama rin dito ang maraming guro, mga iba’t ibang mga organisasyon. 

Marami rin sa ating mga mambabatas ang hindi sang-ayon sa agad na pagpapatupad nito. Marami ang nagsasabi na kahit hindi pa man lubos na handa ang pamahalaan, at kahit na marami sa ating mamamayan ang magdurusa, ipipilit pa rin ang K to 12 upang maisama ito sa legacy na masasabi ng kasalukuyang administrasyon. 

Hindi sa hindi natin sinasang-ayunan ang K to 12, napapanahunan upang ito ay ikasatuparan. Subalit sana ay kung ang lahat ay nakahanda na. Hindi ito dapat madaliin lalo pa’t ang mga nanunungkulan ay mahina ang mga pamamaraan. Huwag nating isipin na ang kabataang Pilipino ay maiiwanan. Mayroong sadyang talino at galing ang ating mga kababayan. Kaya nilang makipagsapalaran kahit saan. Hindi nga ba’t ang mga nakikipagsapalarang mga kababayan nating ito, na nasa mga bayang sila ay dayuhan,   ang siyang patuloy na sumasapo sa ekonomiya ng ating bayan?

Pantasya at bangungot sa pyramid at multilevel network marketing

Ni Cesar Santoyo

Sumulpot ngayon ang multilevel marketing na ang prinsipyo ay direktang ibigay sa consumer o customer ang laan na budget sa promotions and marketing pati na ang kikitain ng department store. Kaya sa multilevel marketing ang mga consumer na rin mismo ang nagpapatalastas at nagbebenta ng mga produkto na hindi mabibili sa mga tindahan at department store.

Hindi naman sa dahilan na makapaggawang gawa ang mga kumpanya ng mga produktong pang multilevel marketing. Idinisenyo ang paraan ng negosyong multilevel marketing sa kadahilanan rin na hindi kakayanin tapatan ang mahal na advertisement at may kahirapan rin na mapabilang ang kanilang produkto sa tinda ng mga department store. Sa madaling salita ay para masiguro ng korporasyon ang kanyang malaking tubo sa pamamagitan ng multilevel marketing.

Karaniwang terminolohiya sa multilevel marketing ang upline or downline at iba pang iskema gaya ng binary, step ladder at iba pa para ang lahat, mula sa downline hanggang sa upline ay nakakakuha ng puntos na may katumbas na halaga sa piso.

Sa multilevel marketing na kung saan ang karamihan ay nagbebenta ng mga food supplements at health and beauty products ay may produktong nahahawakan ang namuhunan na maaring gamit pangpersonal or pambenta. Ang pagkakaroon ng palitan ng produkto sa multilevel marketing ang kaibahan sa tinatawag na “pyramid.”

Sa mga pahayagan sa Pilipinas kasama na ang telebisyon na mapapanood din sa YouTube at sa Facebook kahit nasa Japan ay may isang direktang binansagan na “pyramid scam” ang Securities and Exchange Commission o SEC. Ito ay ang Emgoldex Philippines. Dahilan ng paglalabas ng pahayag ng SEC ay batay sa dami ng mga nagrereklamo kasama ang mga OFW sa South Korea at Dubai laban sa Emgoldex Philippines na hindi rehistradong korporasyon o partnership sa ilalim ng SEC.

Bilang mga naninirahan sa Japan ay mabilis naman pinabuluanan ng mga nasa kampo ng Emgoldex ang pahayag ng SEC. Sapagkat ayon sa mga tagapagtanggol ng Emgoldex sa Japan ay marami sa kanila ang nakatanggap ng kanilang tinubo mula sa pamumuhunan. Pagkatapos maiere ang babala ng SEC laban sa Emgoldex Philippines ay mas dumami pa nga ang may iba-ibang magkarugtong na pangalan “goldex” na iniaalok sa mga Pinoy sa buong Japan.

Kumpara sa multilevel marketing, at kung ang pagbabasehan ng “pyramid” ay ang modelo ng Emgoldex ay makikita ang magkaibang istraktura kung papaano kikita ang mga sumasali. Sa multilevel marketing ang tinatawag na upline ay may nakukuhang benepisyo sa bawat produktong naibenta ng kanilang tinatawag na downline.

Sa matiyagang pagpapaliwanag naman ng isang tagapagtangkilik ng Emgoldex, ang kanilang pinakatinatawag na upline ang nasa pinakaibaba ng kanilang istraktura at ang mga downline ang nasa itaas. May table silang tinatawag na 15 tao ang kailangan para mabuo ang isang table na binubuo ng 8 na initial “investor” at 7 tao na nasa ibaba. Ang 8 tao ay magbibigay ng  ng “initial” investment sa halagang Php36,000 na karaniwan din kino-convert ng mga naggodex sa Japan sa 10 lapad. Kailangan din na mag-invest ang 7 para mapuno ang kanilang table na aabot sa Php540,000 ang suma total ng 15 tao na nag-invest ng tig-36,000 pesos.

Nahahati sa apat na level ang isang table ng mga goldex na ang pinaka level 4, ang nasa ibaba, ang makakakuha ng 180,000 Pesos pagkatapos mabuo ang table na ang lahat ay nag-invest ng tig-36,000 pesos. “Exit” na ang nasa level 4 bilang katawagan sa nakakuha ng 180,000 Pesos. May 14 pang natira sa loob ng table na kailangan ding maka “exit” batay sa kanilang abilidad o kung minsan ay sa tulong ng humikayat sa kanilang mag-invest sa goldex.

Ayon naman sa mga kababayan na nakapanayam na minsang inanyayahan na sumali sa Emgoldex, kahit gustuhin rin niya, ay binantaan sila ng kanyang asawang Japanese na pirmahan na niya ang divorce paper sakaling sasali siya sa Emgoldex. Wika pa ng isa nating kababayan ay hindi niya matatanggap na kung sakaling maka-exit siya, o napuno niya ang kanyang mga level ng recruitment, ay may labing-apat siyang maiiwanan na hindi niya siguradong makaka-exit rin. Kawawa naman daw kung sakaling hindi naka-exit ang kaniyang marecruit at kung sakaling hindi maibalik ang ipinuhunan.

Sa nakaraang tatlong dekada ng paninirahan ng malaking bilang nating mga Pinoy sa Japan ay ngayon lamang natin natutunghayan ang taglay na husay ng Pinoy sa pangangalakal sapagkat hindi madali at hindi biro ang ibinigay na oras, tiyaga, at mapanlikhang paraan para maka-exit ang mga nasa “pyramid” at kumita ng sobrang halaga sa pagmu-multilevel marketing. Mas mapapaunlad pa ito kung sakaling ang mga ipinakitang husay ng ating mga kababayan sa pyramid at multilevel marketing ay mabigyan ng mas magandang alternatibong paraan ng pagkakakitaan.

Dapat rin lamang nating unawain na ang isa sa dahilan ng paglipana ng mga multilevel marketing at pyramiding ay dahil sa kawalan ng ating kamalayan at edukasyon sa praktikal na pamumuhay. Wala namang nag-aalok sa ating mga Pilipino sa Japan na magkaroon ng literasiya sa pinansya at suporta para sa pagkakaroon ng bagong pagkakakitaan mula sa mga pamahalaan at maliban na lamang sa mga miminsang inisyatiba ng ating mga kababayan na nagtatawag ng financial literacy session.

Sa ating pagninilay-nilay sakali mang sumali sa multilevel marketing o kaya ay sa binansagan na pyramid, tandaan lamang na ang mga ganitong uri ng pagkakakitaan ay hindi sustenido at pangmatagalan. Alalahanin din na marami sa ating mga kababayan ang nagkaroon ng sariling kabuhayan mula sa pansariling pagsisikap mula sa wala o maliit na puhunan.

Mahirap ang nabubuhay sa pantasya na maka-exit na may limpak-limpak na salapi sa pyramiding at ang mapabilang sa mga millionaires row ng multilevel marketing company kaya susuungin ito. Walang madaliang kitang salapi ang nagtatagal at hindi rin habang panahon ang kitaan sa pyramiding at multilevel marketing.

At kung sakaling nawala ang pinagkatiwalaang tao sa pyramid o nawala ang kanilang website na karaniwan ng karanasan ay totoong bangungot ang kauuwian ng ating pantasya. Kaya ingat lang mga kabayan sa pagdedesisyon at pag-aralan na mabuti ang inyong papasukin kung sakaling interasadong mag-pyramid o mag-multilevel marketing.

Pa-simple lang tayo tuwing uuwi ng Pilipinas

 Ni Elvie Okabe, DBA/MAE

“Ang Pinoy ‘pag umuwi ng ‘Pinas galing sa ibang bansa ay buong pamilya, kaibigan o barangay ay sasalubungin siya. Ito naman kababayan nating ito ay bigay dito bigay doon ng pera at pasalubong. Tapos wala pang isang buwan sa ‘Pinas na nagbabakasyon ay broke na siya at umuutang na siya. Ganyan ang Pinoy.

“Kaya paalala lang huwag kayong uuwi na ipamigay lang ninyo ang pinaghirapan ninyo kasi bandang huli pag wala na kayong pera lahat ng sumalubong sa inyo ay tatalikuran kayo. Gaya ng mga nakilala ko rito na galing sa ibang bansa. Kawawa naman sila noong wala na silang datung ayon kinakawawa sila. Be wise every day ang financial security ay nakasalalay sa pananaw sa buhay na tatahakin mo. Pwede naman magbigay pero magtira ka sa sarili mo. Have a great life!”

Ito ang Facebook status ng aking kaibigan na hiningi ko ang permiso para mailathala at maibahagi ko sa inyo. Marahil marami po sa atin ang tinamaan ng status na ito o naiintindihan kung saan nanggagalin ang aking kaibigan. Kahit ako man po ay parang naging Santa Claus na nagpamudmod ng pera sa aking mga kamag-anak sa probinsiya nang una kong balik sa Pilipinas bandang 1990.

Mga ilang balik din po taun-taon ay saka tumimo sa aking isipan na kailangan ng strategy upang kahit konti man o malaki ang aking baon ay hindi ako mauubusan ng dalang pera.

Narito po ang aking mga suggestions upang maging simple sa buhay at mapagkasya natin ang ating pera tuwin uuwi tayo ng ‘Pinas para magbakasyon:

1.    Bago umuwi ng ‘Pinas ipadala ang pera bank-to-bank o thru remittance door-to-door kung lalampas ng “100 lapad” ang pera upang sa gayon ay kaunti lamang ang pera sa bulsa. Kung equivalent to US$10,000 or more ang dala sa bulsa ay maaaring makumpiska ng Philippine Immigration o saan man na Immigration ng ibang bansa pag nahulihan po tayo dahil paglabag ito sa international money laundering law.

2.    Huwag ipaalam sa iba na uuwi ka maliban sa magulang at kapatid na susundo. Huwag po isang jeep ang sasalubong at dagdag pa po sa gastos.

3.    Kung maaari ay magpa-schedule ng flight sa gabi o ang dating sa ‘Pinas ay hatinggabi na para lahat ay tulog na at pagdating ay maaari na rin kayo kaagad magpahinga.

4.    Combine giving money with goods o ‘di kaya ay goods lang: magulang, kapatid at mga pamangkin – sanayin natin silang tumanggap sa atin ng mga recycle goods mula sa ukay-ukay sa Japan. Ibigay na lang ang pera sa charity o talagang mahihirap na hindi natin kilala at hindi tayo masusuklian dahil ang sabi ng Diyos, “hanapin muna ninyo ang paghahari ng Diyos at ang kaniyang katuwiran, at ang lahat ng mga bagay na ito ay idaragdag sa inyo” (Mateo 6:33).

5.    Magplanong magkaroon ng investment (real estate o maliit na business) at ilaan ang dalang pera para rito upang sa gayon kapag mayroong mangungutang ay sabihin na lang na, “Sorry nagastos ko na po ang dala kong pera. Bigyan ko na lang po kayo ng kaya ko.”

6.    Huwag pong magsuot ng maraming burloloy o alahas sa katawan kung aalis ng bahay dahil mainit sa mga mata ng mga snatcher o holdaper ang mga ito. Ang iba rin po ay maaaring mainggit o magalit sa atin dahil sa inggit kaya mabuti na po iyong simple lang, may pera man o wala.

7.    Magblow-out na lang minsanan sa lahat.  Lutong-bahay ang ihanda upang makamura at makarami ng handa (kung kaya pa ng bulsa). Maaaring one week bago bumalik ng Japan o depende sa schedule.

Sana po ay nakatulong ang aking mga suhestiyon dahil kailangan din naman po nating protektahan an gating pinaghihirapang kitain sa ibang bansa. God bless po sa ating lahat and have a happy and meaningful life with God in our everyday lives! 

Paglahok sa 2016 eleksyon

Ni Rey Ian Corpuz

Bilang isang OFW at kahit na tayo ay permanent resident visa holders dito sa Japan, importante bilang isang Pilipino na makilahok sa nalalapit na eleksyon. Totoo na talagang nakakawalan ng gana ang pagboto dahil sa ang mga nahahalal sa mga posisyon na kalimitan ay nasasangkot sa mga katiwalian pero responsibilidad pa rin natin ang piliin ang kandidatong nararapat.

Ayon sa istatistika, may mahigit 200,000 Pilipino ang naninirahan sa buong Japan, pangatlo sa pwesto kasunod ng mga Instik at Koreano. Kung tutuusin ay maliit na bilang lamang ito kung ikukumpara sa bilang ng mga botante sa Pilipinas na umaabot ng milyun-milyon. Subalit sa pangkahalatan, kung ang lahat ng mga OFW at mga permanent resident visa holders sa ibang bansa gaya ng Saudi Arabia, USA, Australia, UK at marami pang iba ay tiyak na aabot din tayo ng milyun-milyon.

Sa talaan ng Philippine Statistics Authority noong 2012, nasa 2.2 milyon na ang mga Pilipino ang nagkalat sa iba’t ibang panig ng mundo. Karamihan ay nagtatrabaho bilang guro, engineer, nurses at mga skilled labor.

Sa tingin ko, kung ang mga 2.2 milyong OFWs ay boboto sa bisa ng Overseas Absentee Voting Act ay magiging isa tayong malaking sektor ng mga Pilipino na kayang maghalal ng isang presidente, bise presidente o mga senador.

Ano nga ba ang Overseas Absentee Voting Act?

Matagal na itong aprubadong batas na nagbibigay oportunidad sa lahat ng mga Pilipinong nagtatrabaho sa labas ng Pilipinas na bumoto tuwing may eleksyon. Ibig sabihin, hindi mo na kailangang umuwi ng Pilipinas para bumoto. Kailangan mo lang ay magparehistro sa pinakamalapit sa Philippine Embassy o Consular Office. Ipapadala lang sa iyo ang abiso sa pagboto sa inyong bahay. Hindi mo na kailangang lumiban sa trabaho para lang pumunta sa embahada o consular office para lang bumoto.

Sa buong buhay ko, ngayon lang ako nagparehistro dahil sa tingin ko magiging makulay ang darating na eleksyon. Karamihan sa mga Pilipino rito sa Japan ay walang pakialam masyado sa nangyayari sa eleksyon sa atin dahil unang-una karamihan ng nahahalal ay mga trapo at kurakot. Nakakasawa kung baga.

Sa bagay kung wala ka ba namang pagpipiliang magandang alternatibo, nakakawalan ng gana talagang bumoto. Ang mga Pilipino din sa Japan ay napakaabala sa trabaho na ultimo Sabado o Linggo ay may trabaho. Kulang din sa panahon upang siyasatin at kilatisin ang mga kumakandidato. Basta para sa karamihan, ay sikat o maamo ang mukha, eh tiyak iboboto natin. Tama ba?

Pero sa panahon ng social media kagaya ng Facebook at mga online news sutes, madali lang natin malaman ang background ng mga tatakbo sa eleksyon. Tiyak at nakikita ninyo rin ito sa mga libreng videos na ina-upload ng mga TV networks sa kanilang Facebook accounts.

Malapit na ang May 13, 2016 elections. Labing-isang buwan na lang. At ang deadline para sa rehistro ng Overseas Absentee Voting ay hanggang Oktubre na lamang. May napupusuan ka na ba?

Sana naman tayong mga OFWs ay maghalal ng karapat-dapat na presidente. Sawang-sawa na po tayo sa mga pangako ng mga pulitiko.

May tatlo pong dahilan kung bakit tayo nakikipagsapalaran dito. Una, dahil in-demand iyong skills natin dito at nagkukulang sa workforce ang Japan. Pangalawa, baka kayo po ay nakapag-asawa ng Hapon kaya napili ninyo na rito manirahan. At pangatlo, baka walang magandang trabaho sa Pilipinas kaya napilitan tayong mangibang-bayan.

Karamihan sa profile ng karamihan sa Japan, pasok ito sa pangalawa, o ang pagkakaroon ng asawang Hapon pero ang pangatlo na kung saan hindi kayang ibigay ng ating bansa ang magandang trabaho ang nagtutulak sa halos lahat ng mga Pilipinong mangibang bansa. Kasali po ang inyong abang lingkod sa pangatlo.

Parami na ng parami ang bilang ng OFWs sa iba’t ibang bansa na nagpapadala ng pera sa Pilipinas. Maganda para sa ating lokal na ekonomiya pero ang tanong, hanggang kailan po tayo magiging OFW sa ibang bayan?

Sana po ay magkaroon na po ng long-term solutions ang ating pamahalaan na dagdagan ang trabaho para sa lahat upang hindi na tayo mangibang-bayan. Ang 200,000 mahigit na mga OFWs sa Japan at ang dalawang milyong OFWs sa buong mundo ay kayang maghalal ng karapat-dapat na pangulo kaya maging mapagmasid at maging wais po sa ating desisyon. 

Kobe Port Tower: Ang Matayog na Simbolo ng Kobe

Ni Florenda Corpuz

Isa ang Kobe sa 10 pinakamalaking siyudad sa Japan. Ito ang kapital ng Hyogo prefecture at matatagpuan sa pagitan ng Rokko mountain range at dagat. Ang port o daungan ng lungsod ang isa sa pinakaunang nagbukas sa foreign trade noong ika-19 na siglo.

Nagbukas sa kalakalan ang Port of Kobe noong 1868 habang itinayo naman ang Kobe Port Tower noong 1963 sa Meriken Park, isang waterfront park na nasira ng Great Hanshin Earthquake noong 1995 at muling isinaayos ngunit may bahagi ito na iniwan para alalahanin ang mga biktima ng lindol.

Ang matayog na Kobe Port Tower ang itinuturing na simbolo ng lungsod na may taas na 108 metro. Ito ang kauna-unahang tore sa buong mundo na may pipe structure. Tinatawag itong “Steel Tower Beauty” dahil sa kakaibang istruktura at hugis nito na tila isang Japanese drum. Sa katunayan, ito ay nakatanggap ng Best Work award mula sa Architectural Institute of Japan noong 1963.

Ito ay may limang palapag kung saan ang dalawang palapag ay may mga restaurant at rotating café habang ang tatlo naman ay may observation decks.

Sa observation platform ay tiyak na mamamangha sa 360 degree panorama kung saan masisilayan ang Osaka sa silangan, Akashi Great Bridge sa kanluran, Kobe Airport sa timog at Mt. Rokko sa hilaga.

Mamamangha rin sa isang seksyon na gawa sa espesyal na salamin na nagiging transparent kapag lumalapit ang mga tao. Sa kisame naman ay may mga optical fibers na nilagay para makalikha ng mga bituin sa kalangitan. Tuwing gabi ay nagpapailaw din ng 7,000 LEDs na nakalutang sa madilim na alapaap para sa nakakamanghang night view ng Kobe.  

Mag-e-enjoy din sa rotating café na umiikot kada 20 minuto kung saan makikita ang magagandang tanawin ng Kobe. Siyempre pa, hindi mawawala ang souvenir shop at amusement area rito. Matutuwa rin kay Captain Tower-kun na siyang mascot ng Kobe Port Tower.

           

Mararating ang Kobe Port Tower 15-minutong lakad mula sa JR at Hanshin Motomachi Stations. At 10-minutong lakad mula sa Municipal Subway Kaigan Line Minato-Motomachi Station. Bukas ito araw-araw at may bayad ang pagpasok dito: ¥600 for adults, ¥300 for elementary school and junior high school students.

Mga Pinoy pangalawa sa pinakamaraming nabigyan ng Japanese visa

Ni Florenda Corpuz

Kuha mula sa MOFA

Pangalawa ang mga Pilipino sa pinakamataas na bilang ng mga dayuhan na nabigyan ng Japanese visa noong 2014, ito ang pahayag ng Ministry of Foreign Affairs (MOFA) kamakailan.

Ayon sa ulat na inilabas ng MOFA, umabot sa 163,386 ang mga Pilipinong nabigyan ng Japanese visa noong nakaraang taon na katumbas ng anim na porsyento ng kabuuang total.

Umabot sa 2,871,639 ang mga Japanese visa na naibigay sa mga dayuhan mula Enero hanggang Disyembre, mas mataas ng 54% mula sa 1,864,425 noong 2013.

Bukod sa mga Pilipino, kasama rin sa top 10 ang mga Chinese na umokupa ng unang pwesto kung saan 2,048,106 ang nabigyan ng Japanese visa o 71% ng kabuuang total. Pangatlo ang mga Indonesian na may 141,321 o limang porsyento, pang-apat ang mga Vietnamese na umabot sa 96,648 o tatlong porsyento.

Panglima naman ang mga Indian na umabot sa 66,696 o dalawang porsyento, pang-anim ang mga Russian sa 57,606 o dalawang porsyento, pampito ang mga Brazilian sa 34,217 o isang porsyento, pang-walo ang mga Thai sa 21,322 o isang porsyento, pang-siyam ang mga Amerikano na may 19,017 o isang porsyento at pang-sampu ang mga Korean na may 18,861 o isang porsyento. Habang ang ibang nasyonalidad ay umabot naman sa 204,459 o pitong porsyento.

“With the weakening yen, the expansion of the consumption tax exemption program and other factors, the number of visitors exceeded 13,410,000. Along with this, the total number of visas issued marked a record high,” ito ang pahayag ng Japan National Tourism Organization (JNTO).

Matatandaang inaprubahan ng pamahalaang Hapon ang pagpapatupad sa mas pinaluwag na pagkuha ng multiple-entry visa at single-entry tourism visa ng mga Pilipinong turista patungong Japan simula noong nakaraang taon.

Ambeth Ocampo, na-appoint sa Advisory Board ng Japan Foundation Asia Center

Ni Florenda Corpuz

Dr. Ambeth R. Ocampo kasama si Japanese Prime Minister Shinzo Abe
 (Kuha mula sa Facebook page ni Dr. Ambeth Ocampo)

Pormal na ang appointment ng kilalang mananalaysay ng kasaysayan, mamamahayag at manunulat na si Dr. Ambeth R. Ocampo sa Advisory Committee ng Japan Foundation Asia Center.

Sa kanyang Facebook post ay ibinalita ni Ocampo na tinanggap niya ang appointment.

“Accepted an appointment to the Advisory Board of the Japan Foundation Asia Center. After our recent meeting in Tokyo the ASEAN members paid a courtesy call on the Prime Minister of Japan.”

Isa si Ocampo sa 15 miyembro ng kumite na nagsagawa ng courtesy call kay Prime Minister Shinzo Abe sa Prime Minister’s Office noong Marso 31.

Mainit na tinanggap ng lider ng Japan sina Ocampo na nagpahayag ng pagkalugod para sa kanilang ambag sa promosyon ng kultura at pagkakasundo sa rehiyon.

“I would like to extend a warm welcome to the Prime Minister’s Office to all the ‘WA Project: Towards Interactive Asia through “Fusion and Harmony’ Advisory Board members.”

“The WA Project deepens the spiritual bonds between Japan and the other ASEAN nations, and I am delighted to welcome all of you who play such an important role as advisors to the project,” pahayag ni Abe.

Ang WA Project ay sinimulan base sa anunsyo ni Abe sa ASEAN-Japan Commemorative Summit Meeting noong Disyembre 2013 bilang bagong Asian cultural exchange policy na magpapatupad sa mga cultural exchanges sa pagitan ng mga bansa sa Asya, pangunahin ang mga kasaping bansa sa ASEAN.

Ang Japan Foundation Asia Center ay binubuo ng 21 cultural figures at experts mula sa Japan at kasaping bansa sa ASEAN kung saan si Ocampo ang kinatawan ng Pilipinas. Itinatag ito upang itaguyod at palakasin ang bilateral cultural exchange sa pagitan ng Japan at mga bansa sa Asya.

Pag-aaralan ng board ang mga ipinapatupad na programa ng Asia Center bago magsagawa ng rekomendasyon sa pangulo nito. Napag-usapan sa una nilang pulong ang progreso ng mga proyekto sa loob ng mga nakalipas na taon at mga plano sa hinaharap.

‘Japan Day Project’ bumida sa Cannes

Ni Florenda Corpuz

Kuha mula sa kaliwa: Mika Morishita, Kundo Koyama, Kiki Kirin, Yoko Narahashi

(Kuha ni Tristan Fewings/Getty Images for Japan Day Project)

Pormal na inilunsad kamakailan ang pinakabagong promotional campaign ng Japan na tinawag na “Japan Day Project” (JDP) sa Foreign Correspondents’ Club of Japan na may layong pasiglahin ang global market para sa entertainment at pop culture ng bansa.

 Ngayong 2015 ang tinaguriang debut year ng proyekto kung saan nakalinya ang iba’t ibang JDP events na gaganapin sa mga film festivals, conventions at content markets sa Cannes, Paris, Taipei at Tokyo.

At bilang inisyal na handog ng JDP, nakibahagi ito sa Cannes Film Festival noong nakaraang buwan kung saan pitong pelikulang Hapon ang ipinalabas: Ang “Our Little Sister” ni Hirokazu Kore-eda (Competition), “AN” ni Naomi Kawase (Un Certain Regard’s Opening Film), “Journey to the Shore” ni Kiyoshi Kurosawa (Un Certain Regard) at “Yakuza Apocalypse: The Great War of the Underworld” (Director’s Fortnight) ni Takashi Miike. Sa Classics program naman ay ipinalabas ang “The Story of the Last Chrysanthemums” ni Mizoguchi Kenji, “Battles Without Honor and Humanity” ni Fukasaku Kinji at “Ran” ni Akira Kurosawa.

Bumida naman ang sikat na Japanese actor na si Ken Watanabe sa “Sea of Trees” ni Hollywood director Gus Van Sant (Competition) habang si Satoshi Tsumabuki naman ay lumabas sa “The Assassin” ng Taiwanese na si Hou Hsiao-Hsien. Dumalo rin ang sikat na aktres na si Kirin Kiki na bahagi ng mga pelikulang “Our Little Sister” at “AN.”

 “I’m truly grateful that this effort is being made on behalf of Japanese actors in Cannes,” pahayag ni Kirin.

 “I hope many people will take advantage of this amazing opportunity,” dagdag pa nito.

Sa Japan Pavilion ng Cannes International Village ay matatagpuan ang koleksyon ng mga bagong manga, anime at nobela. Nagkaroon din ng mga serye ng seminar na tinawag na “New Gateways to the Japanese Industry” kung saan tinalakay ang mga istratehiya sa pagkakaroon ng rights at co-produce. Ito ay pinangunahan ng mga kilalang personalidad mula sa Japanese at international movie industry. Nagkaroon din ng pagkakataon ang mga buyers na masilayan ang mga pinakabagong pelikulang Hapon.

Nagtapos ang JDP sa Cannes sa pamamagitan ng “Kanpai Night” na pinangunahan ni Kundo Koyama, ang lumikha ng sikat na TV series na “Iron Chef.”

“Through this project, I would like to convey to the rest of the world that Japan is a treasure chest of culture and entertainment content,” pahayag ni Koyama.

Itinuturing ito na pinakamalaking partisipasyon ng Japan sa prestihiyosong festival sa nakalipas na dekada.

May temang “Connecting People, Driving Culture,” ang JDP ay suportado ng Ministry of Economy, Trade and Industry (METI) of Japan.

PNoy, bitbit ang Japanese investments sa ‘Pinas

Ni Florenda Corpuz

Hinikayat ni Pangulong Aquino ang iba’t ibang Japanese
 trade organizations na mamuhunan sa Pilipinas sa ginanap na
Philippine Investment Forum sa New Otani Hotel sa kanyang
state visit sa Japan kamakailan. (Kuha ni Din Eugenio)

Balik-Pilipinas na si Pangulong Benigno S. Aquino III matapos ang apat na araw na state visit sa Japan bitbit ang pangako ng dagdag na Japanese investments at pagtalakay sa mga isyu ng South China Sea.

Lumapag sa Ninoy Aquino International Airport ang Pangulo sakay ng Philippine Airlines Flight PR 001 kung saan siya ay sinalubong ng mga miyembro ng kanyang Gabinete kabilang sina Executive Secretary Paquito Ochoa, Interior and Local Government Secretary Manuel Roxas, Justice Secretary Leila de Lima, MMDA Chairman Francis Tolentino, DOLE Secretary Rosalinda Baldoz, DOH Secretary Janette Garin at Tourism Secretary Ramon Jimenez.

Sa kanyang unang state visit sa Japan mula Hunyo 2-5 sa imbitasyon ng pamahalaang Hapon, nakatanggap ang Pangulo ng Php13.5 bilyon investment pledges mula sa 11 kumpanya na lumagda sa letters of intent na magbukas o palawakin ang kanilang operasyon sa Pilipinas.

Ayon kay Aquino, nagbabalak ang clothing company na Uniqlo na kasalukuyang may 22 outlets sa bansa na magdagdag pa ng 200 shops. Habang ang ibang kumpanya naman ay nasa manufacturing ng electric tricycles, printers, smart glasses at medical devices tulad ng aortic catheter, invitro diagnostics at para sa hemodialysis treatment ang interes.

“Sa pagdadala nila ng mga produktong ito sa Pilipinas, malinaw na lumalawak ang pagkilala ng mundo sa talino at talento ng Pilipino,” saad ni Aquino na sinabi rin na ang ibang kumpanya ay nagpahayag ng  plano na Pilipinas ang gawing sentro ng kanilang operasyon sa ASEAN region.

“Dahil alam naman nating kapag mas mataas sa value chain ang produktong nililikha ay mas mataas din ang pasahod at mas mabilis na matatamasa ang ginhawa at dignidad ng buhay para sa nakakaraming Pilipino,” dagdag ng Pangulo sa mga investment pledges na maaaring makalikha ng nasa 30,721 na trabaho.

Nilagdaan din ng Japan at Pilipinas ang mga kasunduan sa health, maritime safety at trade pati na rin ang concessional loan na nagkakahalaga ng P136.9 bilyon infrastructure projects.

“Ito pong concessional loan ang pautang na sobrang gaan ng interes at ipinagkakaloob ng kaibigan sa kanyang kapwa kaibigan. Nagpapakita po ito ng kagustuhang tunay na makatulong kaysa maging pabigat,” ani Aquino.

Lumagda rin sina Aquino at Japanese Prime Minister Shinzo Abe ng Joint Declaration on Strengthened Strategic Partnership sa summit meeting na ginanap sa Akasaka State Guest House.

“Tunay nga pong pinapalalim ang ugnayan ng ating mga bansa sa maraming sektor, kabilang na ang seguridad. Napapanahon po itong pagtaas ng antas ng ating relasyon sa Japan sa harap ng mga banta sa estabilidad sa West Philippine Sea,” sabi ng Pangulo.

“Ang mahalaga nga po ay nakikita nating nagtutugma ang mga prinsipyo ng Japan at Pilipinas tungkol sa paggalang sa mga karapatan ng bawat bansa, sa malayang paglalayag sa international waters, at sa paghahari ng batas at mapayapang ugnayan upang matugunan ang anumang di-pagkakaintindihan. Sa tulong nga po ng Japan, natatawag ang pansin ng mas marami pang mga bansa sa sitwasyon sa mga dagat ng Asya,” dagdag pa nito.

Pakikipagkita sa mga opisyal

Sinimulan ni Aquino ang kanyang state visit sa Japan sa pamamagitan ng isang state call kina Emperor Akihito at Empress Michiko sa Imperial Palace kung saan isang welcome ceremony at state banquet ang maghihintay sa kanya. Ginawad sa kanya ng Japanese monarchy ang “Grand Cordon of the Supreme Order of the Chrysanthemum,” ang pinakamataas na karangalan na ibinibigay sa natatanging indibidwal. Habang binigay naman niya kay Emperor Akihito ang “Order of Lakandula with rank of Supremo.”

Nagbigay din ng talumpati si Aquino sa National Diet, na huling ginawa ni dating Pangulong Carlos Romulo at sa Nikkei 21st International Conference on the Future of Asia. Dinaluhan din niya ang Philippine Investment Forum kung saan niya inimbitahan ang mga Japanese investors na mamuhunan sa Pilipinas.

           

Nakipagkita rin siya sa mga miyembro ng Filipino community sa Okura Hotel kung saan hinimok niya ang mga ito na patuloy na suportahan ang kanyang mga reporma kahit na matapos ang kanyang termino.

Sa pagtatapos ng kanyang state visit, nagpaalam si Aquino kina Emperor Akihito at Empress Michiko sa Imperial Hotel. Pagkatapos nito ay nagtungo siya sa Japan National Press Club kung saan sinagot niya ang mga katanungan ng mga mamamahayag. Nilagdaan din niya rito ang guestbook kung saan niya nakita ang mensahe na nilagdaan ng kanyang ina na si dating pangulo Corazon Aquino noong November 13, 1986.