Japanese firm panalo sa bidding ng E-Trike project sa Pilipinas

Ni Florenda Corpuz

Kuha mula sa Bemac Electric Transportation Philippines, Inc.

Kinumpirma ng Uzushio Electric na sila ang nanalo sa bidding ng 3,000 units ng E-Trike sa Pilipinas para palitan ang tradisyonal na tricycle at madagdagan ang kita ng mga drayber at mabawasan ang polusyon sa bansa.

Ayon sa pahayag ng Uzushio Electric na naka-base sa Imabari City, Ehime Prefecture, natanggap nila ang abiso na nagsasabi na sila ang nanalong bidder para sa E-Trike Project ng Department of Energy (DOE) at Asian Development Bank (ADB) sa contract price na $30,747,000.

“Bidding guidelines for the 3,000 E-Trike Plan were announced in February, 2015 and we participated in the bid that was carried out in May. Four other companies also participated in the bid, which was followed by a technical review and we were the only company that reached the opening of the bidding price which was conducted in August. As a result, we obtained negotiating rights and further negotiated price with the DOE and the ADB and then received official notification of our successful bid,” saad ng Japanese firm.

Inaasahang matatapos ang 1,200 units sa susunod na tatlong buwan habang ang natitirang 1,800 units ay maaaring matapos hanggang Agosto. Nakatakdang i-deliver ang mga ito ng Bemac Electric Transportation Philippines, Inc., ang subsidiary ng Uzushio na may operasyon sa Pilipinas, ngayong taon.

Dadalhin ang mga E-Trikes sa mga local government units (LGUs) at gagamitin ng mga drayber sa pamamagitan ng lease to own arrangements kung saan araw-araw silang magbabayad ng boundary sa mga LGUs.

Plano rin ng DOE na palitan ang 17,000 tricycles ng E-Trikes sa mga susunod na taon.

Ang Uzushio Electric ang nangungunang large ship outfitter sa Japan na gumagawa ng electric at communications equipment.

Sa kasalukuyan ay may mahigit sa 3.5 milyong tricycle ang pumapasada sa Pilipinas na isa sa pangunahing dahilan ng polusyon sa bansa. Dahil dito, inanunsyo ng pamahalaan ang isang proyekto kung saan papalitan ng 100,000 E-Trikes ang mga tradisyonal na tricycle sa bansa para mapabuti ang kapaligiran. 

Bagong teleserye nina Elmo at Janella kinunan sa Japan

Janella Salvador and Elmo Magalona

Lumipad kamakailan sa Japan ang bagong bini-build up na loveteam ng ABS-CBN na sina Janella Salvador at dating Kapuso star na si Elmo Magalona para sa kanilang bagong teleserye na may pamagat na “Born For You.”

Hango ang istorya sa paniniwala ng mga Japanese na mayroong nagkokonekta na invisible red line sa dalawang taong itinadhana para sa isa’t isa. Maraming eksena ang kinunan sa ilang magagandng lugar sa Tokyo kasama ang ilang co-stars na kinabibilangan nina Vina Morales, Ayen Munji-Laurel, Ogie Diaz at Joj Agpangan.

Kahit na bago pa lamang ang tambalan nina Elmo at Janella o “ElNella” sa kanilang mga fans ay makikitaan na ng chemistry ang dalawa at tila nagkakalapit na rin ang kanilang loob. Parehong anak ng singers ang dalawa kaya’t nagkakasundo ang dalawa.

Si Elmo ay anak ng yumaong rapper na si Francis Magalona habang si Janella naman ay anak nina “Miss Saigon” star na si Jenine Desiderio at singer Juan Miguel Salvador. Aminado si Elmo na excited siya na makatrabaho ang dalaga.

“It’s cool that we come from a family of musicians. Janella is bubbly, very easy to work with, and very energetic that’s why I am really excited to work with her,” saad ng batang Magalona.

“When I saw Elmo, I felt good because I will get to work with someone fresh since we haven’t worked before. I’m excited with the music angle in our teleserye because both our parents are musical people,” dagdag naman ni Janella.

Produced ng Dreamscape Productions ang Born For You na nasa likod din ng ilang popular na teleserye ng ABS-CBN gaya ng “On the Wings of Love,” “FPJ’s Ang Probinsiyano,” “Doble Kara” at “And I Love You So.”

Rachelle Ann Go, bumida sa unang pagtatanghal ng ‘Les Miserables’ sa Pilipinas

 

Rachelle Ann Go bilang Fantine

Ikinatuwa ng maraming mga Pinoy nang mabalita ang opisyal na pagkakapili kay Rachelle Ann Go bilang bagong bida sa pinakabagong West End production ng “Les Misérables” mula kay Cameron Mackintosh at Boublil & Schönberg at base sa French historical novel ni Victor Hugo na itinuturing na isa sa greatest novels ng 19^th century.

Nangyari ito pagkatapos ng matagumpay na pagganap at pagkilala kay Rachelle Ann bilang ang bar dancer na si Gigi Van Tranh sa ika-25 anibersaryong edisyon ng “Miss Saigon” sa West End stage sa London noong 2014 hanggang 2015. 

At ngayon, kagaya nina Lea Salonga, Joanna Ampil, Jon Jon Briones at Jose Llana, kabilang na  si Rachelle Ann sa mga bagong hinahangaan ngayon sa ibang bansa pagdating sa likas na galing sa pagkanta, pag-arte at pagsayaw sa mundo ng international musical theatre. Nag-debut si Rachelle Ann bilang Fantine sa West End stage nitong Hunyo 2015.

Ang Les Misérables in Manila ang kauna-unahang pagkakataon na itatanghal ito sa bansa bilang bahagi ng Asia tour ng produksyon. Kaya’t higit na espesyal ang pagkakataong ito dahil mapapanood din sa unang pagkakataon ng mga Pinoy si Rachelle sa pagganap niya sa iconic role na si Fantine.

Hindi naman maitago ni Rachelle Ann ang galak na makapagtanghal para sa mga kababayan. Aniya, magandang pagkakataon ito para maipakita ni Rachelle Ann kung ako ang mga pinagkakaabalahan niya nitong nagdaang mga buwan.

Maging ang mga cast members na sina Simon Gleeson (Jean Valjean), Earl Carpenter (Inspector Javert), Kerrie Anne Greeland (Eponine) at Chris Durling (Enjolras) ay excited na magtanghal sa isang bansa na may kultura ng matinding pagmamahal sa pagkanta.

Ikinatuwa rin ni Cameron Mackintosh ang ideya ng pagdadala sa Les Mis sa Maynila. Aniya, pagkatapos ng magandang takbo ng musical sa Melbourne, Perth at Sydney ay napapanahon ang pagkakataong mapanood ang musical sa Maynila bilang pagbibigay-pugay din sa magandang samahan ni Mackintosh sa mga magagaling na Filipino theatre talents.

Tampok sa Les Mis ang kwento ni Jean Valjean, isang ex-convict noong 19th century France na nakulong ng 19 na taon dahil sa pagnanakaw ng tinapay at ilang beses na nagtangkang tumakas. Dahil sa tulong ng isang obispo, nagdesisyon siya na magbagong-buhay hanggang sa naging alkade ng isang bayan sa France at may-ari ng isang pabrika. At isa sa mga trabahador niya ang single mother na si Fantine na napilitang pasukin ang prostitusyon para sa anak na si Cosette.

Ilan lamang ang mga makasaysayang kanta na “I Dreamed a Dream,” “On My Own,” “Bring Him Home,” “One Day More,” “A Heart Full of Love” at “Do You Hear the People Sing?” ang kabilang sa repertoire ng produksyon na naging tatak na ng Les Mis.

Binuksan ang performances mula Marso 11 at naganap naman ang gala night noong Marso 16. May pagkakataon pa ang mga Pinoy na mapanood ang tinaguriang ‘one of the greatest musicals of all time’ sa The Theatre sa Solaire Resort, Parañaque City hanggang Abril 3.

‘Richard Marx Live in Manila’ delights fans with favorite 80s and 90s hits

Ni Jovelyn Javier

Muling nagtanghal ang isa sa pinaka-successful, most enduring musician at Grammy-winning American singer-songwriter-producer na si Richard Marx sa mga masugid na Pinoy fans para sa second leg ng “Richard Marx: The Solo Tour Live in Manila” na ginanap kamakailan sa Kia Theatre sa Cubao, Quezon City.

Bago dumating sa bansa, hinarana muna ni Marx ang mga Malaysians sa kanyang well-received show sa Kuala Lumpur. Huling nagtanghal si Marx sa bansa noong 2011 sa Araneta Coliseum. Nagpa-unlak din ang singer-songwriter ng isang guest appearance sa “Tonight with Boy Abunda” sa ABS-CBN isang araw bago ang concert.

Timeless hits

Kapag nabanggit ang pangalang Richard Marx, kahit sino ay maiisip agad ang kanyang mga timeless hits mula sa kanyang halos tatlong dekadang karera sa musika gaya ng “Now and Forever,” “Right Here Waiting,” “Hold On to the Night,” “Should Have Known Better,” “Don’t Mean Nothing” at marami pang iba. Ito iyong mga klase ng mga kantang hinding-hindi malilimutan kahit gaano pa magbago ang panahon. Walang araw na dadaan na hindi natin mapapakinggan ang isa sa mga ito sa radyo na mga paborito rin ng mga disc jockeys na patugtugin.

Nostalgic and relaxed

Sobrang nostalgic at relaxed ang pakiramdam kapag pinapanood at pinapakinggan si Marx kumanta, na wari ay dinadala ka niya sa mga panahon nang unang lumabas ang mga kanta niya at nabihag ka sa puro magagandang musika lamang o ika nga ay “the good old days.” 

Binati ni Marx ang mga excited na tagahanga sa mga kantang “Endless Summer Night” (1988) na  summer love song at inspired ng kanyang Hawaii trip sa dating asawang si Cynthia Rodes, “Take This Heart” (1992), “Satisfied” (1989 – 2nd of three consecutive #1 on Billboard 100), “Keep Coming Back” (1991) at “Hazard” (1992 – 3rd #1 on Billboard Adult Contemporary chart).  Sinundan ito ng “Chains Around My Heart” (1991) at “Until I Find You Again” (1997).

Si Marx din ang nagsulat at nag-produce ng iba pang iconic hits na “This I Promise You” (‘N Sync), “Dance With My Father” (co-written with Luther Vandross) at “To Where You Are” (Josh Groban).

Espesyal na bahagi rin ng show nang samahan siya ng kanyang tatlong anak na sina Brandon (guitar), Lucas (piano) at Jesse (drums) sa big screen kung saan tumugtog sila kasabay ng pag-awit ng kanilang ama sa kantang “Save Me.”

Sinabayan naman ng harmonized clap  ng fans ang tono ng “Angelia” nang hindi sinasadyang matanggal ang microphone at guitar amplifier habang kumakanta siya na ikinatuwa ng singer nang magsalita siya pagkatapos ng kanta.

Siyempre, ‘di nakumpleto ang gabi na hindi naririnig ang Should Have Known Better, Hold On to the Night, Now and Forever, Right Here Waiting at Don’t Mean Nothing na kanyang debut single.

Early beginnings

Maagang namulat sa musika si Marx sa murang edad pa lang dahil na rin sa impluwensiya ng amang si Dick Marx na isang jazz musician at jingle company founder. Nang siya ay teenager, nakilala niya si Lionel Richie at hinikayat siyang pumunta sa Los Angeles at nagsimulang maging backup vocals at songwriter para sa kanya hanggang kina Madonna, Whitney Houston at Barbra Streisand.

Nakatrabaho rin niya sina Kenny Rogers, Eagles, Chicago at David Foster. Hanggang sa nadiskubre siya ni Bruce Lundvall ng EMI/Manhattan Records at inilabas ang kanyang self-titled debut album. Ngayon, nag-iisa pa rin si Marx sa music history kung saan nasa top 5 ng Billboard charts ang kanyang unang pitong singles.

Naglabas din si Marx ng bagong all-original 11-track album, ang “Beautiful Goodbye” (2014) tampok ang “Whatever We Started,” “Suddenly,” “Inside,” “Beautiful Goodbye,” “Forgot to Remember,” “Turn Off the Night,” “Have A Little Faith,” “Like the World is Ending,” “To My Senses,” “Getaway” at “Eyes on Me” at bonus tracks na “Just Go” at “Moscow Calling.”

Jericho Rosales, dumalo sa Osaka Asian Film Festival

Ni Florenda Corpuz

 Antoinette Jadaone, Dan Villegas at Jericho Rosales
kasama si Hiroyuki Yamamoto (moderator) sa symposium
na ginanap sa National Museum of Art, Osaka kamakailan.
(Kuha ni Din Eugenio)

Pinasaya ng aktor na si Jericho Rosales ang kanyang mga tagahanga sa Osaka nang siya ay bumisita sa lungsod para daluhan ang 11^th Osaka Asian Film Festival (OAFF) kung saan ipinalabas ang kanyang pinakabagong pelikula na “Walang Forever.”

Pinangunahan ni Echo ang pagdalo sa festival kasama ang direktor na si Dan Villegas at screenwriter na si Antoinette Jadaone. Katambal niya rito ang aktres na si Jennylyn Mercado.

“To be here at OAFF means a lot to us because this is a proof that our film is special,” saad ng magaling na aktor na hindi ininda ang karamdaman para lamang makadalo.

Dumalo rin ang tatlo sa isang symposium na ginanap sa National Museum of Art, Osaka kung saan mas naipaliwanag nila ang tema ng kanilang pelikula at naibahagi ang kultura at kalagayan ng industriya sa Pilipinas.

“It’s my first time to attend a festival as a director so I’m really happy to be invited here by OAFF,” ani Villegas na dumalo rin noong nakaraang taon bilang producer naman ng pelikulang “That Thing Called Tadhana.”

Bigo man ang “Walang Forever” pati na rin ang “Sleepless” ng first time director na si Prime Cruz na maiuwi ang Grand Prix (Best Picture Award) na nasungkit ng Korean movie na “My Sister, The Pig Lady,” ay nakuha naman ng mga ito ang paghanga at respeto ng mga hurado at manonood mula Japan at iba pang bansa sa Asya.

Mainit din na tinanggap ang “Honoy Thy Father” na pinagbibidahan ni John Lloyd Cruz sa direksiyon ni Erik Matti na ipinalabas sa Special Programs (New Action! Southeast Asia) section ng OAFF.

Samantala, namasyal din si Echo sa mga popular na tourist spots sa Osaka tulad ng Umeda Sky Building at Dotonbori kung saan siya nakasalubong ng mga tagahangang OFWs. Tuwang-tuwa ang mga ito na makita ang idolong aktor na masaya namang nagpaunlak ng litrato.

“Thank you for the support. I know how hardworking OFWs are. Mahal ko kayo,” sabi ni Echo sa mga ito.

Ang Osaka Asian Film Festival ay taunang film festival na may temang “From Osaka to All of Asia!” Layon nitong pasiglahin ang ekonomiya ng lungsod at palakasin ang turismo nito sa pamamagitan ng pagbibigay ng pagkakataon sa mga manonood na makapanood ng mahuhusay na pelikulang Asyano at suportahan ang mga Asian filmmakers at filmmaking sa lungsod.

Aquino: Last 100 days in office

President Aquino (Malacanang Photo Bureau)

Parang kailan lamang ay nakita natin ang panunumpa ni Pangulong Benigno Aquino III bilang ika-15 pangulo ng bansa na humalili kay Gloria Macapagal-Arroyo. Taong 2010 nang humarap si Aquino sa mga taumbayan, na kanyang tinawag na kanyang boss, para magbigay ng talumpati at nangakong pangungunahan ang bansa sa “Daang Matuwid” na naging slogan ng kanyang administrasyon.

“Isandaang araw po ang nakalipas, nagpanata ako sa taumbayan: Hindi ko tatalikuran ang tiwalang kaloob ninyo sa akin. Ang nakalipas na isandaang araw ang magsisilbing tanda ng ating pong paninindigan,” pahayag ni Aquino ng una niyang makamit ang unang 100 araw ng pagsisilbi sa bansa noong Oktubre 7, 2010.

Sa pagpasok ng Marso 21, 2016 ay nagsimula naman ang huling 100 araw ni Aquino bilang lider ng bansa. Malalaman kung sino ang hahali kay Aquino pagkaraan ng halalan sa Mayo 9 habang opisyal na magtatapos ang kanyang panunungkulan sa Hunyo 30, 2016.

Sa isang press conference na ginanap kamakailan, sinabi ni Aquino na bagaman tatlong buwan na lamang ang natitira sa kanyang panunungkulan ay responsibilidad pa rin niya ang lahat ng mga magaganap sa mga panahong ito. Hanggang sa kahuli-hulihang segundo ay sisiguraduhin niya na ginampanan niya ang kanyang tungkulin ng 100 porsyento.

“I wish I had the luxury to be able to say that ‘this is the only thing I’d do’ or ‘majority of the time we will spend here.’  But the job of the President is to be responsible for everything all the time—before it happens, while it’s happening, and after it happened,” ani Aquino sa ulat na inilabas ng pahayagang Philippine Daily Inquirer.

Iginiit nito na hangga’t hindi pa natatapos ang kanyang termino ay tuluy-tuloy pa rin ang pagsasagawa ng mga proyekto sa ilalim ng kanyang administrasyon kabilang na ang pagkukumpleto sa rehabilitation at reconstruction project para sa mga naging biktima ng bagyong Yolanda.

Kasalukuyang hinaharap din ng administrasyong Aquino ang napipintong epekto ng El Niño phenomenon na sinasabing higit na mararamdaman ngayong panahon ng tag-init pati na rin ang pagkalat ng Zika virus.

Mga tagumpay at mga kontrobersiya

Aminado si Aquino na hindi siya naging perpektong pangulo ngunit aniya ay nagawa naman niya na mapabuti ang bansa sa pamamagitan ng pagpapataas sa ekonomiya ng bansa na noong 2015 ay umabot sa 6.8 porsyento ang economic growth habang umabos sa humigit-kumulang sa Php1.5 bilyon ang nalikom na buwis.

“Nevertheless, I can look anyone in the eye and say: I made the best decisions based on the information and the capacities we possessed at the time. My one and only interest is the well-being of my Bosses. I did all I could to forge a nation that is more just and more progressive—one that enjoys the fruits of meaningful change,” pahayag ni Aquino sa kanyang huling talumpati sa State of the Nation Address noong nakaraang taon.

Matatandaan na ipinagmalaki ni Aquino na sa ilalim ng kanyang administrasyon ay bumangon ang Pilipinas mula sa pagiging “sick man of Asia” ay naging “Asia’s Rising Tiger.” Ipinagmalaki rin ni Aquino ang “Daang Matuwid” na plataporma ng kanyang administrasyon na dahilan kung bakit nanumbalik ang tiwala ng taumbayan at ng mga banyaga dahilan para lumobo sa $6.2 bilyon ang direct foreign investments sa bansa.

Bukod dito, umabot din sa 4.4 milyong Pilipino ang naging household beneficiaries ng Pantawid Pamilya Pilipino Program, the conditional cash transfer program na ipinatupad ng administrasyon.

Niyanig din ng ilang isyu at kontrobersiya ang administrasyongAquino katulad ng kasong plunder ni ginang Arroyo, ang Priority Development Assistance Fund (PDAF) o “pork barrel” na kinasangkutan ng ilang malalapit kay Aquino gaya ni Secretary butch Abad, paghawak sa rescue at rehabilitation program para sa mga biktima ng bagyong Yolanda, at ang insidente sa Mamasapano, Maguindanao kung saan 44 sundalo ang napatay.

Pag-endorso ng kandidato

Pinangalanan ni Aquino si Department of Interior and Local Government (DILG) Secretary Mar Roxas bilang presidential standard bearer ng kanyang partido, Liberal Party (LP), para sa darating na halalan.

Matatandaan na si Roxas ang standard bearer ng LP noong 2010 elections ngunit nagparaya ito matapos lumakas ang sigaw ng publiko sa pagtakbo ni Aquino.

Sa ilang pagtitipon at kaganapan ay iniendorso ni Aquino ang kandidatura ni Roxas na aniya ay magpapatuloy ng Daang Matuwid na kanyang nasimulan.

“Dapat masiguro ko sa inyo, bago ako umalis, nasa mas maayos na kalagayan kayo na aking mga boss. Mahalaga pong masiguro na ang mga susunod na pinuno ay itutuloy ang Daang Matuwid.

“Hindi na ako magpapaligoy-ligoy pa, ang kailangan ay ang kapareho ng ating pananaw, ang nagmamahal sa Pilipino at tiyak na uunahin ang bayan bago ang sarili. Walang iba po kundi ang tambalang Mar (Manuel) Roxas at Leni Robredo,” ani Aquino ng sumama ito sa pangangampanya.

Gaya ng kanyang tinuran sa SONA 2015, hahayaan niya ang kasaysayan na maghusga sa kanyang mga nagawa bilang pangulo ng bansa.

“I will let history decide. As I did during my mother’s wake, I will once again speak the words from 2 Timothy, Chapter 4, Verse 7. And I quote, ‘I have fought the good fight, I have finished the race, I have kept the faith’”.

Christian Bautista sings his way to the UK charts

Ni Len Armea

Christian Bautista naglabas ng bagong single na
pinamagatang Who Is She To Me? 

Naglabas ng bagong single ang singer na si Christian Bautista na pinamagatang “Who Is She To Me?” na isang love song at isa siya sa mga co-producer. Espesyal ang kantang ito para kay Christian dahil ito ang kauna-unahan niyang awitin na inilabas sa United Kingdom (UK) at simula ng napakinggan ito sa iTunes nitong Disyembre ay nasa #44 ito sa UK Vocal charts at #17 sa Top US New Releases.

Malaking bagay ito para kay Christian lalo na’t hindi madali na makapasok sa international scene lalo na sa United Kingdom at Estados Unidos.

“It’s big for me. If you would look at the numbers, you’d say ‘parang ang layo naman’ pero for me okay na iyon. Hopefully, tumaas pa,” pahayag ni Christian sa Pinoy Gazette.

Tiwala ang sikat na balladeer na tatangkilikin ang bago niyang single dahil maganda ang pagkakagawa sa kanta at sinsero ang lyrics nito na tungkol sa pagmamahal ng tunay na isang babae.

“I’d say it’s a love song from a different perspective. It’s a love song that talks about the beginnings of love. Who Is To Me, it is at that point when one person is starting to feel this feeling. What is this feeling? Who is she to me? Why am I feeling this way? Do I love her already?” Paglalarawan ni Christian sa kanyang bagong single.

“Iba ang melody lines ng kantang ito, alam mo na foreigner ang gumawa and it travelled from different countries – I recorded it in Los Angeles, produced in Italy, and recorded the music video in London,” dagdag pa ni Christian sa kanyang kanta na Who Is She To Me na isinulat ni Michael Shepstone.

Hindi naman bago sa international scene si Christian, na tinaguriang “Asian Pop Superstar,” na ang mga kanta ay popular din sa Indonesia, Singapore, Malaysia at Thailand. Kaya isang malaking hamon para sa binatang tubong Cavite na mapasok ang UK market.

“People say it’s close to impossible, people say it’s hard. A lot of artists have done it already – whether America or UK – sometimes they make it, sometimes they don’t but I am one who just wants to try. I still want to experience it, go with it, or try it at least,” giit ni Christian na nagpasikat sa mga kantang “The Way You Look At Me,” “Colour Everywhere,” “Hands to Heaven,” “Up Where We Belong” at marami pang iba.

Bukod sa pagkanta, naging abala rin si Christian sa pag-arte sa telebisyon at naging host din siya ng katatapos lamang na talent competition sa GMA 7 na “To the Top.” Kahit na ang musika ang kanyang pangunahing pinagkakaabalahan, masaya si Christian na sa mahigit sa 10 dekada sa showbiz ay masasabi niyang marami siyang nasubukang mga bagay at natutuhan.

“There’s really no real formula on how to stay this far in the industry. May be faith, perseverance, hard work, the support of fans and the management, you’re ability to keep on creating – a mix of all that. You just have to continue what you are doing. Just don’t stop.”

Sa taong 2016, nasa plano na ni Christian ang magtanghal sa ibang bansa, maglabas ng bagong OPM album at gumawa ng musical.

“At this point, it’s all about creating creative noise. It’s about conquering different lands and ventures -- finding out what the next step is.”

“Through experience, you learn, you grow up, you mature. You learn from success, you learn from mistakes and hopefully you don’t fall the same way you fell before,” aniya.

Travel 2016: Festivals, events, holidays

Taun-taon inaabangan ng lahat ng Pinoy ang ina-anunsyong eksaktong petsa ng mga regular at special holidays mula sa gobyerno sa ikalawang bahagi ng taon. At ngayon na inilabas na ang mga opisyal na petsa para sa taong 2016, hudyat na ito para sa nakararaming Pinoy travel buffs na planuhin at itakda ang mga petsa ng kanilang mga inaasam-asam na bakasyon ngayong taon.

Ayon sa Proclamation No. 1105, limang long weekend ang nakatakda na sa taong ito: Pebrero 6-8 bunsod ng selebrasyon ng Chinese New Year ng Pebrero 8, Marso 24-27 dahil sa Holy Week, Agosto 27-29 dahil sa National Heroes Day, Oktubre 29 – Nobyembre 1 para sa All Saints Day, at Disyembre 30 – Enero 2 ng sunod na taon para sa Pasko at Bagong Taon.

Nariyan din ang EDSA People Power Revolution (Pebrero 25), Araw ng Kagitingan (Abril 9), Labor Day (Mayo 1), Independence Day (Hunyo 12), Ninoy Aquino Day (Agosto 21), Bonifacio Day (Nobyembre 30), at national holidays para sa Eid’l Fitr at Eidul Adha ng ating mga kababayang Muslim na iaanunsyo pa lamang sa mga susunod na buwan.

Ngunit anu-ano nga ba ang mga masasayang piyesta at mga kaganapan sa iba’t ibang panig ng ating bansa? Sa tulong ng Awesome Planet, narito ang ilan sa mga kaabang-abang na pista at iba pang mahahalagang pangyayari ngayong taon.

Sa buwan ng Pebrero, nariyan ang Tinagba Festival na isinasagawa tuwing Pebrero 11. Ipinagdiriwang ng pista ang mga biyaya ng masaganang ani at inaalay ang mga kilalang produkto ng Iriga sa pamamagitan ng isang tradisyonal na ritwal, at binubuo ng mga makukulay na bullcarts at kasuotan ng mga taga-Iriga sa kanilang espesyal na pagtatanghal.

Gaganapin naman sa Zamboanga sa Pebrero 26 ang Dia de Zamboanga kung saan nagtatagpo rito ang dalawa sa pinakamalaking relihiyon sa bansa, ang Katolisismo at Islam. Bagaman magkaibang-magkaiba, dito makikita ang respeto at pagkakaisa ng bawat isa. 

Para sa lahat din ang Philippine International Hot Air Balloon Fiesta na nasa ika-20 taon na sa Clark Field, Pampanga sa Pebrero 11-14. Maliban sa naglalakihan at makukulay na hot air balloons, mayroon din iba pang aktibidades gaya ng aerobatics, skydiving, paragliding, remote control aircraft, aviation discipline exhibition, at kite flying.

Pagdating ng Marso, maghanda na sa Strawberry Festival sa Marso 2 sa La Trinidad, Benguet. Bilang pangunahing contributor ng strawberry sa bansa, rito nagtitipon-tipon ang mga negosyante sa agro-sector at mga turista. Huwag kaligtaan ang Strawberry lane sa Municipal Park at tangkilikin ang mga produkto ng ating mga kababayan sa Benguet. Nariyan din ang strawberry competition, pastries section at siyempre ang masiglang mga sayawan at parada.

Tuwing Marso 13 naman ginagawa ang Pintados Festival sa Passi City, Iloilo na tampok ang mga artistikong pagtatanghal ng mga mananayaw na nakasuot ng tradisyonal na regalia, at kapansin-pansin din ang kanilang mga simetrikong disenyo ng kanilang mga tattoo sa katawan. Huwag din palampasing makita ang Karosa Parada, carabao painting contest, food festival, The Garden Show, at grand coronation night ng Search for Pintados.

Kung papunta naman ng Oriental Mindoro, isama sa bibisitahin ang Banana Festival sa Marso 18 – 19 sa Baco. At dahil ang ‘Pinas ay kilala bilang top importer ng iba’t ibang klase ng saging sa ibang bansa, nararapat lang na ipagbunyi ang isa sa ipinagmamalaki nating industriya ng sagingan. Kaabang-abang ang banana cookfest kung saan maglalaban-laban ang mga bisita sa pinakamasarap na banana meal plans.

At kung mahilig naman sa sasakyan, nariyan ang Manila International Auto Show sa Abril 1 sa Maynila; Magayon Festival sa Abril 10 sa Legazpi, Albay; Mango Festival sa Abril 19 sa Zambales; Aliwan Fiesta sa Abril 23 sa Pasay City; at Binirayan Festival sa Abril 27 sa Antique, Visayas.

Maliban naman sa paboritong Pahiyas Festival sa Lucban tuwing Mayo 15, gaganapin din sa Mayo ang SuMaKaH Festival sa Antipolo at Babanti Festival sa Isabela (Mayo 1), Carabao Festival sa Pulilan, Bulacan (Mayo 14), Sarangani Bay Festival (Mayo 15), at Obando Festival (Mayo 17).

Pagpatak ng Hunyo ay gagawin ang Lechon Festival sa Balayan, Batangas (Hunyo 24) at Kasadyaan Festival sa Tacloban City (Hunyo 29).

Adachi Museum of Art nanguna sa pinakamagandang Japanese garden

Ni Florenda Corpuz

Kuha mula sa Adachi Museum of Art

Itinanghal ng isang U.S. magazine bilang pinakamagandang Japanese garden sa buong Japan ang Adachi Museum of Art na matatagpuan sa Yasugi City, Shimane Prefecture.

Batay sa Sukiya Living (The Journal of Japanese Gardening), isinagawa ang ranking bilang bahagi ng Shiosai Project na binuo upang piliin ang pinakamagagandang Japanese gardens sa pamamagitan ng pagtuon sa kalidad ng mismong hardin.

Bukod dito ay napili rin ng CNN ang Adachi Museum of Art bilang isa sa 31 pinakamagandang lugar sa Japan. Nakakuha rin ang museo ng tatlong stars, ang pinakamataas na antas na nangangahulugang “worth a trip,” mula sa prestihiyosong Michelin Green Guide Japan at Guide Bleu Japon.

Kabilang sa Top 5 ang Katsura Rikyu (Kyoto) na nasa ikalawang pwesto, Yamamoto-tei (Tokyo) sa ikatlo, Yokokan (Fukui) sa ika-apat at Heian Hotel (Kyoto) sa ikalimang pwesto.

Pasok din sa Top 50 ang lima pang gardens na matatagpuan sa Shimane Prefecture: ang Kasui-en Minami sa ika-pitong pwesto, Minami-kan sa ika-12, Choraku-en sa ika-19 at Yuushien Garden sa ika-32 pwesto.

Ito na ang ika-13 taon na nanguna ang Adachi Museum of Art sa Japanese Garden Ranking. Kabilang din dito ang mahigit sa 1,000 lugar sa buong bansa, kasama ang mga inns, restaurants at historical sites na binigyan ng ranking ng mahigit sa 30 eksperto mula sa iba’t ibang bansa.

Anti-terrorism unit inilunsad ng Japan

Ni Florenda Corpuz

Si Prime Minister Shinzo Abe sa ginanap na 23rd Ministerial Meeting 

Concerning Measures Against Crime sa Prime Minister's Office 

kamakailan. (Kuha mula sa Official Website of the Prime 

Minister of Japan and His Cabinet)

Naglunsad ang pamahalaang Hapon ng anti-terrorism intelligence unit kamakailan bunsod ng sunud-sunod na terrorist attacks sa Paris, France.

Ang bagong specialized unit na tinawag na Counterterrorism Unit-Japan o CTU-J ay binuo upang mangolekta at pag-aralan ang mga impormasyon sa mga terrorist attacks sa iba’t ibang bansa sa mundo.

“The CTU-J will collect and collate data on international terrorism. The Prime Minister’s Office will act as the control tower to strongly advance various proactive measures for the prevention of terrorism, and I would like you all to stand in solidarity to fulfill your responsibilities,” pahayag ni Prime Minister Shinzo Abe sa ginanap na 23rd Ministerial Meeting Concerning Measures Against Crime.

Una nang plinano ang paglulunsad nito sa Abril ngunit ito’y inagahan para mas paigtingin ang seguridad ng bansa bilang paghahanda sa nalalapit na G7 Summit na gaganapin sa Mayo sa Mie Prefecture at Tokyo Olympic Games sa taong 2020.

“As Japan prepares for the coming G7 Summit and Olympic and Paralympic Games, we must cooperate with the international community and, with a sense of crisis, exert every effort to implement countermeasures,” ani Abe.

Nangako rin ang lider na gagawin ng kanyang administrasyon na pinakaligtas na bansa sa buong mundo ang Japan.

“Ensuring safety and security is the foundation of all our activities. There are still many issues to be addressed in order to ensure good public order, such as the prevention of crimes aimed at children, women, and the elderly; and measures to counter cyber-attacks. I would like each Minister to demonstrate strong leadership and focus all your efforts towards making Japan the safest country in the world.”

Binubuo ang unit ng 20 eksperto na nakabase sa opisina sa Tokyo na tututok sa Southeast Asia, South Asia, Middle East at north at western Africa habang 20 iba pa ang itatalaga sa mga Embahada ng Japan sa ibang bansa bilang mga intelligence officers. Sila ay mula sa Foreign Ministry, Defense Ministry, National Police Agency at Cabinet Intelligence and Research Office ng Japan.

“This is a brand new initiative that has only just begun. I think this is a challenge we must consider while keeping a close watch on the outcomes of the initiatives,” sagot naman ni Foreign Minister Fumio Kishida sa tanong ng isang mamamahayag kung sapat ba ang bilang ng mga miyembro ng CTU-J.

Maglalaan ang pamahalaan ng ¥126 milyon mula sa reserve fund nito sa fiscal 2015 budget para pondohan ang operasyon ng grupo.

Bumuo rin ng dalawa pang ahensya para ibahagi at pag-aralan ang mga impormasyon na makakalap ng CTU-J sa iba pang ahensya ng pamahalaan.

           

Matatandaang dalawang Hapon ang dinukot at pinatay ng Islamic State group sa Syria habang tatlo naman ang nasawi sa terrorist attack sa isang museo sa Tunisia noong nakaraang taon.