Japan nag-donate ng protective equipment sa PNP

Ni Christopher Lloyd Caliwan

Sina Japanese Ambassador to the Philippines Koji Haneda at 

PNP Chief Director General Oscar Albayalde sa ginanap na 

seremonya sa PNP headquarters sa Camp Crame, Quezon City.

Pormal nang ibinigay ni Japanese Ambassador to the Philippines Koji Haneda ang mga bagong protective equipment na donasyon ng gobyerno ng Japan sa Philippine National Police (PNP).

Tinanggap ni PNP Chief Director General Oscar Albayalde ang mga kagamitan sa isang seremonya na ginanap sa PNP headquarters sa Camp Crame, Quezon City kamakailan.

Kabilang sa donasyon ang anim na bagong units ng bomb suit, anim na units ng ballistic shield at 440 units ng ballistics helmet na nagmula sa Grant Aid for Economic and Social Development Program ng Japan na nagkakahalaga ng ¥500 milyon. Sinusuportahan nito ang counter-terrorism campaign at public safety service ng PNP.

“I hope that the bomb suits, ballistic shields and helmets we will turn over today will further build up the defenses of PNP personnel nationwide in their relentless bid to curb terrorist acts and illegal drug abuse. I salute the PNP’s valiant men and women in uniform who risk their lives to the call of duty,” ani Haneda.

Ayon pa sa Japanese envoy, dapat ipagmalaki ng PNP ang tagumpay nito sa kanilang counter-terrorism at drug enforcement operations at sinabing patuloy na magpapaabot ng tulong ang Japan sa kampanyang ito.

Sinabi naman ni Albayalde na ipapagamit sa Explosive Ordinance Detection Units ang mga bomb suits at ballistic shields para maprotektahan nila ang kanilang mga sarili tuwing may bomb threat response operations at iba pang kaugnay na insidente.

Dagdag pa niya na ang mga ballistics helmets ay ibibigay sa police units na naghahawak sa internal security at anti-terrorism operations upang matiyak ang kanilang personal na kaligtasan.

“All this donated equipment will certainly go a long way in enhancing police capability in addressing security issues and threats to public safety,” saad ni Albayalde.

ANA mamumuhunan ng $95-M sa PAL

Ni Florenda Corpuz

Mula sa kaliwa: Sina Philippine Airlines President/COO Jaime Bautista,
LT Group President/PAL Holdings director Michael Tan, ANA
Holdings President/CEO Shinya Katanozaka, at All Nippon Airways
President/CEO Yuji Hirako sa signing ceremony na ginanap kamakailan
sa ANA Intercontinental Hotel, Tokyo. (Kuha ni Din Eugenio)

TOKYO – Sigurado na ang partnership ng All Nippon Airways (ANA), ang pinakamalaki at 5-star airline ng Japan sa loob ng anim na taon, at ng Philippine Airlines (PAL), ang 4-star flag carrier ng Pilipinas.

Ito ay matapos selyuhan ng dalawang airline companies ang paglalagak ng $95 milyong puhunan ng ANA Holdings Inc. (ANA HD) sa PAL Holdings Inc. at pagkuha ng 9.5 porsyentong outstanding shares ng una sa huli.

Manggagaling ang shares na kukunin ng ANA HD sa Trustmark Holdings Corporation na pag-aari ng pamilya Lucio Tan, ang pinakamalaking shareholder ng PAL Holdings.

“Having been established in 1941, PAL is the oldest airline in Asia and it is the foremost flag carrier of the Philippines. This year marks the 70^th anniversary of its service to Japan, which was launched even before the Japanese carriers started their service on Japan-Philippines route,” panimula ni ANA Holdings, Inc. President and CEO Shinya Katanozaka sa kanyang talumpati sa ginanap na Business and Capital Partnership ceremony sa pagitan ng dalawang kumpanya na ginanap sa ANA Intercontinental Hotel kamakailan.

“Lucio Tan Group, which holds stakes in PAL is the Philippines’ leading conglomerate operating in wide range sectors including food, air travel, hotel, and international services, among others. It is a great pleasure for us to form partnership with such a fine partner with a proud long history,” aniya.

Binanggit din ni Katanozaka na ang ANA HD ay “confident in the high potentials of the Philippines” dahil isa ito sa mga bansa sa Asya na nagtala ng pinakamaraming bilang ng mga turistang bumisita sa Japan sa nakalipas na limang taon.

“We look forward to exchanges with Lucio Tan Group and Philippines Airlines to build durable win-win relationship, and hopefully that would take us into further collaboration in various areas in the future,” dagdag pa niya.

Ibinahagi naman ni Michael G. Tan, pangulo ng LT Group, Inc. at director ng PAL Holdings, ang kanyang pagkagalak.

“It has been a privilege of Philippine Airlines to serve the Philippines-Japan international market for seven full decades,” aniya.

Unang lumipad ang PAL patungong Japan sa pamamagitan ng Manila-Tokyo route noong Enero 26, 1949.

“As partner airlines, ANA and PAL share commitment to excellence and passion that is deep and traditional, but also young and modern, and very much focus on the future of innovation and opportunities,” saad niya.

Dumalo rin sa seremonya sina President and CEO of All Nippon Airways Co., Ltd. Yuji Hirako at President and COO of Philippine Airlines, Inc. Jaime J. Bautista.

“We at ANA look forward to learning more about Filipino hospitality to brush up the Japanese way of hospitality. ANA will work even more closely with PAL, which is the only full service carrier in the Philippines to provide services of the highest quality together by working in unison,” sabi ni Hirako.

Sinabi naman ni Bautista na ang pamumuhunan ng ANA Holdings sa PAL Holdings ay maituturing na “major breakthrough” para sa relasyon ng Japan at Pilipinas.

“We assure you that Philippine Airlines is ready to do our part to build on the solid and worthy foundation that we are celebrating today,” aniya.

Sa kasalukuyan ay may 84 flights bawat linggo sa siyam na ruta patungong Japan ang PAL habang ang ANA naman ay nag-o-operate ng 14 na flights kada linggo sa dalawang ruta sa Pilipinas. May codeshare operations din ang dalawang carriers sa Japan-Philippine routes at domestic routes sa Japan at sa Pilipinas na nag-uugnay sa kabuuang 16 na Japanese at 11 na Philippine destinations.

¥110-M halaga ng disaster reduction equipment ibinigay ng Japan sa DPWH

Sina Department of Public Works and Highways Secretary Mark Villar 

at Japanese Ambassador to the Philippines Koji Haneda sa naganap 

na turnover ceremony kamakailan. (Kuha mula sa DPWH)

Opisyal ng ibinigay ni Japanese Ambassador to the Philippines Koji Haneda kamakailan ang disaster reduction equipment na donasyon ng gobyerno ng Japan sa Pilipinas.

Kabilang sa ¥110-million package ang walong units ng mobile drainage pump at 17 power generation set with tower lights na gagamitin para mapabuti ang flood fighting activities at disaster response ng Department of Public Works and Highways (DPWH).

Ang donation package na nakuha ng Japan International Cooperation System (JICS) ay bahagi ng Non-Project Grant Aid (NPGA) for Provision of Japanese Disaster Reduction Equipment 2014 ng Japan para sa Pilipinas.

Ayon kay DPWH Undersecretary for UPMO Operations and Technical Services Emil Sadain, uumpisahan na ang distribusyon ng mobile drainage pumps sa DPWH Regions 1, 2, 5, 6, 9, 10, 12 at National Capital Region (NCR) para sa emergency responding sa mga flooding situations.

Ang mga floodlights naman ay ipapamigay sa lahat ng DPWH Regional Offices at Bureau of Equipment.

Pinasalamatan ni DPWH Secretary Mark Villar ang gobyerno ng Japan para sa patuloy nitong pagtulong sa Pilipinas at sa mga mamamayan nito.

Magugunitang nakatanggap din ng walong mobile drainage pumps ang DPWH mula sa Japan noong 2014 na ginamit naman sa Regions 3, 4-A, 7, 8, 11, 13 at NCR.

Ambassador Laurel, bumisita sa Hokkaido; nakipagkita sa Filipino community

Si Ambassador Laurel kasama ang miyembro ng Samahang 

Pilipino ng Hokkaido. (Kuha mula sa Philippine Embassy, Tokyo)

Nagtungo kamakailan si Philippine Ambassador to Japan Jose C. Laurel V sa Hokkaido kung saan siya ay nakipagkita sa Filipino community doon at nakipagpulong sa mga government officials ng prepektura.

Sinimulan niya ang kanyang pagbisita sa Hokkaido sa pamamagitan ng pakikipagkita sa mga lider ng Samahang Pilipino ng Hokkaido. Pinakinggan niya ang mga concerns ng mga ito at kung paano sila namumuhay sa lugar.

Hinikayat din niya ang mga ito na bumalik sa Pilipinas para humanap ng mga business opportunities matapos niyang ipaalam sa mga ito ang kasalukuyang social and economic developments sa bansa. Ipinaliwanag din niya ang mga pagbabago sa passport requirements at tumugon sa ilang katanungan tungkol sa documentary requirements at legal issues.

Nag-courtesy call din si Laurel kay Hokkaido Governor Harumi Takahashi para ibigay ang donasyon ng gobyerno ng Pilipinas sa mga biktima ng Iburi East Earthquake na tumama rito noong Setyember 2018. Ipinaabot din niya ang pagbati ni Pangulong Rodrigo Duterte na mainit naman na tinanggap ng gobernador.

Nakipagpulong din si Laurel kay Sapporo Mayor Katsuhiro Akimoto kung saan nila pinag-usapan ang mahabang kasaysayan ng pagtutulungan ng gobyerno ng Pilipinas at Japan pati na rin ang mahabang tradisyon ng people-to-people exchanges.

Ayon kay Laurel, ang pagbubukas ng direct flights ng Philippine Airlines (PAL) sa pagitan ng Maynila at Sapporo ay magsisilbing daan para sa mas malalim na pagkakaibigan ng mga Pilipino at Hapon.

Pinasalamatan din niya ang alkalde sa pagdi-display nito ng bandila ng Pilipinas sa poster ng ginanap na snow festival. Ipinarating din niya ang kanyang kahilingan sa gobyerno ng Sapporo para hikayatin ang mas maraming Hapon na bumisita sa Pilipinas para matuto ng English bilang paghahanda sa Tokyo 2020 Olympic and Paralympic Games.

Nag-obserba rin si Laurel sa mga pasilidad ng Machimura Farms.

Consular Outreach Mission ng Philippine Consulate General matagumpay na naisagawa

Ni Nestor Puno

Ang mga staff ng Philippine Consulate General-Osaka at Aichi International
Plaza, at mga miyembro ng Philippine Society in Japan-Nagoya.

Maayos at matagumpay na naisagawa ang Consular Outreach Mission ng Philippine Consulate General sa pamumuno ni Consul Lenna Eilleen C. De Dios-Sison. sa Nagoya. Ito ay sa pakikipagtulungan ng mga kasapi ng Philippine Society in Japan (PSJ Nagoya), at Filipino Migrants Center (FMC). Ang nasabing outreach ay ginanap nitong nakaraang Pebrero 16 sa Aichi International Plaza at Pebrero 17 sa Nagoya International Center.

Ayon kay Consul De Dios-Sison, mayroong 740 aplikante ang naserbisyuhan sa loob ng dalawang araw na outreach kabilang ang 474 na nakapag-renew ng kanilang passport at 266 sa iba’t ibang consular services.

Sa pangkalahatan, naging mabilis ang proseso ng passport application dahil sa patakarang “pre-processing” bagamat may mga aplikante na naantala dahil sa kakulangan ng kanilang requirements. Tumanggap din ng mga konsultasyon hinggil sa mga usapin sa consular services.

Dumadaan sa pre-processing ang passport renewal sa outreach. Kailangang maipadala ang application at mga requirements sa Konsulado sa itinakdang schedule upang mapabilang dito. Hindi pwede ang walk-in dahil hindi nila masusuri ang status ng aplikante sa araw ng outreach.

Ito rin ay para mapabilis ang proseso at mas marami ang makapag-renew, ang impormasyon ng bawat isa ay ipinapasok na sa computer bago pa ang nakatakdang outreach para pagdating ng araw na ito ay kukunan na lamang ng picture, magbabayad, at hihintayin ang kumpirmasyon ng impormasyon. Kaya marami ang nagugulat dahil madaling natatapos ang proseso.

May itinakdang petsa kung kailan lamang pwedeng ipadala ang passport application, hindi pwedeng mas maaga rito o lagpas sa itinakdang petsa.  May pagkakataon din na isinasara agad ang petsa ng tanggapan kapag napuno na ang slots ng aplikante. Pagkatapos nito, maglalabas ang Konsulado ng listahan kung anong araw at oras dapat dumating sa lugar na pagdadausan ng outreach.

Ang ibang consular services, tulad ng Report of Birth, Report of Marriage, LCCM, authentication of documents, notarization, NBI, at iba pa ay hindi na dumadaan sa pre-processing at hindi na kailangan ng appointment. Maaaring pumunta sa naturang outreach anumang araw at anumang oras, tiyakin lamang na kumpleto ang dokumentong dala para maiwasan ang pagka-antala ng proseso.

Sumangguni sa PCG o kaya sa Facebook account ng Philippine Consulate General Osaka  para sa schedule ng susunod na outreach program at iba pang detalye ng mga kailangang impormasyon.

Paano manatiling positibo sa pagsubok sa trabaho, negosyo?

Ni Lorenz Tecson

Habang may buhay daw ay may pag-asa. Ibig sabihin sa buhay ay may mga pagsubok na haharapin. Magkagayon man ay makararanas ng ginhawa hanggang lumalaban at hanggang nananalig. Paano nga ba mas maging positibo at mas makakahanap ng solusyon sa gitna ng pagsubok?    

Pagmamataas o pag-unlad?

Maraming propesyonal ang puno ng “pride” o may labis na pagpapahalaga sa sarili.  Madalas ay ito rin ang nagiging limitasyon nila upang maging progresibo at positibo sa kanilang karera. Minsan ay umaabot na rin kasi sa punto na mas pinapahalagahan nila ang kanilang imahe o estado kaysa tunay na kasiyahan at katuturan ng kanilang buhay. Hindi nila namamalayan ay naikakahon na pala nila ang kanilang mga solusyon. Kaya hanggang nagiging mapagmataas ay para bang wala na rin pag-asa sa pagbabago.

Tutukan ang iyong kalakasan

Sa anumang hamon ay mas sigurado ang pagtahak sa tagumpay kung alam ng isang tao ang kanyang kahinaan at kalakasan. Sa dalawang bagay na ito ay mainam na pagtuunan kung saan siya malakas.  Bakit? Kung ito ang kanyang gagawin ay maiiwasan niya ang lungkot at pagbaba ng kumpiyansa sa sarili.

Halimbawa sa usaping negosyo, mas gagaan ang operasyon kung may mahuhusay na indibidwal na tumatrabaho sa mahahalagang bahagi nito. Ibang-iba ito sa negosyanteng ginagawa ang lahat ng trabaho o kaya ay kumukuha lang ng kung sinu-sino lamang na empleyado.

Mas tingnan kung ano ang posibleng magandang resulta

Minsan ang lumalabas na pag-asa sa problema ay hindi mukhang pag-asa sa iba.  Nangyayari iyan lalo na kapag ang pinagtutuunan lamang ng pansin ay kung ano ang hindi pwedeng gawin. Ganoon din kung uunahing isipin ay kung ano ang pwedeng masamang mangyari.  Kapag ganoon ay negatibong kaisipan at damdamin agad ang ninanamnam, sa halip na maging bukas sa magagandang posibilidad. Resulta?  Ang tao ay mas natatakot kaysa umaasa.

Irespeto ang halaga ng iyong kasama

Sa isang kumpanya ay may mga indibidwal na may magkakaibang personalidad. Bunsod nito ay may mga pagkakataon na may hindi pagkakaunawaan dahil sa pagkakaiba ng opinyon.  Kaya naman malaking tulong kung matutuhan na magbigay ng respeto at pagkilala sa tungkulin ng iba.  Ito ay maging sila man ay nakakaangat o nakakababa sa iyo.  Tandaan din na kahit ano pa ang posisyon o estado ng isang tao ay kailangan pa rin nito ang tulong ng iba.

Dagdag pa rito ay isang ideya na ang taong hindi marunong kumilala sa mga kasama ay hirap din magtagal sa trabaho. Ang taong hindi rin marunong sumunod sa lider ay mas nagiging bahagi ng problema kaysa bahagi ng solusyon. 

Piliin kung ano ang pinakamabuti

Ayon sa  manunulat, pastor, at leadership expert na si John C. Maxwell ay marapat na maging mahusay sa pagdedesisyon kung ano ang dapat ipagpalit  upang magkaroon  ng maliwanag na kinabukasan. Ilan sa kanyang ibinahagi ay ang pagbibigay ng halaga sa personal na pag-unlad kaysa kagyat na kasiyahan, at sa mabuting buhay (good life) kaysa sa mabilis na kawili-wiling buhay (fast life).  

“It is important to remember that we don’t always get what we want, but we always get what we choose,” saad pa nito sa kanyang artikulong “Make These 5 Trade-Offs for a Brighter Future” na nailathala sa Success Magazine.  

Negosyo 101: Ang mga dapat mong malaman sa ‘content creation’

Ni MJ Gonzales

Malaking bahagi na ng kampanya ng mga kumpanya ngayon ang inuukol sa mga online platforms.   Karamihan ay kumukuha pa ng eksperto para tutukan ang paglalathala ng  kahali-halina at epektibong materyales. Ang pinakalayunin dito ay makahatak ng mas maraming parokyano at maitaas pa ang benta ng kumpanya.

Kung ikaw ay nakakakita ng iba’t ibang digital marketing campaigns at may interes o talento rito ay ano nga ba ang bentahe kung ikaw ay maging epektibong content creator? 

Papuntang online, patungong mobile

Sa 3rd quarter financial reports  na  ipinasa ng  ABS-CBN at GMA Network Inc., dalawang nangungunang TV networks sa Pilipinas, sa Philippine Stock Exchange (PSE) noong 2018  ay  lumabas na parehong bumaba ang kita ng mga ito mula sa mga nagpapatalastas.

Ayon sa  pinansyal na ulat ng Kapuso Network ay mula Php 10.5 bilyon noong 2017 ay naging Php 9.8 bilyon (6.5 porsyentong pagbaba) ito ngayong 2018.  Samantala, ang Kapamilya Network naman ay nag-ulat na dumausdos ang kanilang advertising sales mula Php 15. 3 bilyon sa  Php 14.9 bilyon (2.8 porsyento pagbaba).  Sinasabing isa sa dahilan nito ay dahil ang mga advertisers mismo ay nagsisimula ng magsilipitan o hatiin ang kanilang budget para sa mga online platforms.

Mapapansin din na hindi na nag-aalangan maging anumang media companies na maglathala ng materyales online.  Ito ay sa kabila ng banta ng pamimirata at “fake news.”  Ang isang matinding dahilan dito ay ang pag-igting ng online media, na sinamahan pa ng agresibong paggamit ng smartphones ng mga tao.

Impluwensya ng content creators

Sa mga panahon na ito ay hindi na lang ang mga artista sa TV at pelikula ang sumisikat.  Marami na ngayon ang nagiging “viral,” “sensation,” “trending” o “influencer” na personalidad.  Ito ay kahit sila ay mga ordinaryong mga indibidwal.

Kung babalikan ay maraming international artists na dati ay nagpo-post lang ng video sa iba’t ibang video sharing sites ang sikat na sikat na ngayon. Ilan sa mga ito ay sina Canadian singer-songwriter Shawn Mendez (Vine), American comedian Ryan “NigaHiga” Higa (Youtube), at American singer-songwriter Colbie Caillat (MySpace). Ang tawag sa kanila at maging sa mga gumagawa ng videos, teksto, litrato, infographic, at iba pang klase ng materyal ay “content creators.” 

Sa ibang banda ay hindi lamang para pagpapasikat ang paggawa ng content o produkto online, ito rin ay nagiging paraan upang maibahagi ang adhikain, opinyon, at rekomendasyon. Dito na rin papasok ang mga “social media influencers” na maaari rin matawag na content creators.  Subalit, ang content creator ay magiging social media influencer lamang kung ito ay napakaraming followers o subscribers. Sa mata ng advertisers, ang mga sikat  na social media  influencers ay may lakas na hikayatin ang kanilang followers na bilhin ang kanilang iniendorso. Kaya naman may social media influencers ang nagiging “endorsers” o “brand ambassador” o kaya ay palaging naglalathala ng “sponsored post.” 

Content creation sa iyong negosyo

Una sa lahat ay ang mga video sharing sites at content management system (CMS) gaya ng Wordpress at Blogspot na malaking bagay para sa promosyon ng negosyo.  Dito ay mabilis, mura at madaling makapagbabahagi ng patalastas sa lahat ng naka-online.   Katunayan ay kailangan na lamang ay mabilis na internet connection, simpleng digital camera, at computer ng sinumang nagsisimulang maging content creator.

Kung nais mong maging content creator, bilang karera o mismong negosyo,  ay mainam na layunin ang magkaroon ng maraming followers at subscribers.  Maaari mo itong magawa sa natural na paraan, may bayad, o kumbinasyon. Subalit  ang mas mahalaga pa rin dito ay maging may saysay na content creator o makagawa ng mga epektibong content.

Tandaan na hindi lahat ng mataas na hits, likes, shares at kahit na viral o trending posts ay nangangahulugan ng malaking kita. Ito ay dahil posibleng kakaunti lamang sa mga nakakita o nakapanood ng content ay “buying customers.”  Kaya kung sakaling hindi pa man ganoon kalaki ang hits, views, o likes ng mga posts kung nakikita naman ito ng mga potensyal na kliyente  at mataas ang iyong sale ay epektibong content creator ka na.   

Makarami ng benta? Simulan paramihin ang koneksyon

Isang katotohanan na kapag nagnenegosyo ay kailangan na magkaroon ng benta.  Magiging madali  ito  kung unang-una ay kumportable kang makihalubilo sa iba’t ibang klase ng tao. Kung paano mo sisimulan ang kuwentuhan, gayon din kung paano mo makukuha na maging bukas silang makipagkomunikasyon sa iyo.  

Matutong bumati nang kusa at may giliw. Sa panahon ngayon ay bibihira na ang ngingitian ka o babatiin ka.  May ibang tao ang takot na baka kapag nginitian ka o nginitian mo ay pag-isipan pa nang masama. Subalit sa karaniwan na interakasyon ay kung ano ang iyong aksyon ay iyon lang din ang makukuha mong reaksyon at impresyon sa iba. 

Halimbawa ay ano ang iisipin mo sa  makikita mong  taong tahimik na nasa gilid lamang ng kuwarto, seryoso ang mukha, at nakahalukipkip ang mga braso? Hindi ba’t baka mahiyain, abala, o ayaw niyang makipag-usap?  Iyan ay kahit na baka ang totoo ay naghihintay lamang ito ng may makakausap.  Kaya kung matututuhan na maging palabati, palangiti,  makipagkamay, at pagkakaroon ng magiliw na dating ay dadali para sa iyo na makipagkilala.

Maging maingat at piliin ang paksang pag-uusapan.  Para sa dalawang taong matagal nang magkakilala  ay  mayroong  mga paksang sensitibong pag-usapan at iba naman para sa dalawang taong bago pa lang magkakilala. Kailangan matantiya kung ano ang kanilang parehong interes o paksang ayos na pag-usapan.

Ang isang hakbang para magawa ito ay mangamusta at magtanong ng simple pero interesante.  Ang intensyon ay maintindihan at magkaroon kayo ng interaksyon sa isa’t isa.  Makinig nang maigi at hayaan siyang dahan-dahan na magbukas ng kanyang saloobin. Sa pamamagitan nito  ay malalaman mo kung ano pa ang maaaring itanong, paano makukuha ang kanyang atensyon, at kung sakali ay saan kayo nagkakatugma. 

Balang araw kung gusto mo na itong alukin ng produkto o serbisyo ay malalaman mo na kung ano ang iyong gagawin. Tandaan na sa pagbebenta ngayon, ang pag-aalok ay hindi kung ano ang serbisyo o produkto. Sa halip ay kung ano ang solusyon na maibibigay mo sa isang tao sa pamamagitan ng iyong negosyo.  

Patatagin ang iyong koneksyon, ang iyong merkado. Sa mas malalim na aspeto ng koneksyon, hindi lang dapat titigil sa pagkilatis ng interes. Kung iuugnay na ito sa iyong negosyo ay dapat maipaunawa mo rin sa bagong kakilala  na ikaw ay mapagkakatiwalaan at maibibigay mo ang hinahanap niya.

Kung sakali man na humingi ito ng tulong na walang kinalaman sa iyong negosyo ay huwag kang mag-atubiling tumulong sa abot ng iyong makakaya.   Ang iyong magagawa, malaki man o maliit, ay magiging pundasyon para sa mas malawig ninyong  ugnayan.  Indikasyon din nito na ikaw ay malalapitan at hindi lang basta-bastang kakilala.  Ang balik nito ay maaaring tulong din sa ibang paraan  o sa hindi mo inaasahang pagkakataon. Halimbawa ay pagrerekomenda sa  iyo sa kanilang kakilala.

Tandaan din na ang malawak na koneksyon ay nangangahulugan din ng malawak na personal mong merkado.  Kung hindi mo  man mabentahan ang ilan sa kanila ay sa susunod na mga araw ay magkakaroon sila ng papel sa pag-usad ng iyong negosyo. 

May financial resolution ka na ba ngayong 2019?

Hatid ng Bagong Taon ay bagong pag-asa sa maraming Pilipino. Ito ay panahon na mas ganado silang baguhin ang kanilang buhay at magkaroon ng resolusyon sa kanilang pagkakamali. Mayroon ka na bang New Year’s Resolution 2019? Kung mayroon ay mayroon na ba rito tungkol sa iyong pananalapi?  Narito ang ilang suhestiyon na maidadagdag sa iyong resolusyon:

Magkaroon ng materyal na magpapalawig ng iyong kaalamang pinansyal.  Kailangan mo ito para kahit saan o anumang oras ay may mapag-aaralan ka. Kung hindi ka palabasa ay maaaring mag-download ng video tutorial o audio book. Ang mahalaga sa lahat ng ito ay maging maalam sa paghawak ng pera nang tama. Baka kaya ka kinulang ng pera noong 2018 ay dahil kailangan mo pa ng mas epektibong istratehiya para kumita, makapag-ipon, at makapag-invest.

Bumili ng kailangan sa mga murang pamilihan. Ang laking bagay kung may paraan ka kung paano makakamura sa iyong pinamimili. Isa na rito ay kung may alam kang mga pamilihan na sulit ang presyo at maganda  ang serbisyo. Maari rin tingnan kung paano  ka makakadiskwento sa iyong binibili gaya ng paggamit ng discount coupons at pag-iwas ng pagbili ng mahal na brand. Makatutulong din ang pagtatakda sa tuwing kailan sa isang linggo o buwan ka magandang mamili. Iyong oras na hindi ka gahol sa oras at naihanda mo na ang iyong listahan.

Magkaroon ng daily at weekly budget.  Kung kinakapos ka ng pera sa loob ng isang buwan o sa isang taon ay posibleng dahil maluwag ka sa iyong budget sa isang araw o linggo.  Subukan mo pang idetalye kung ano ang dapat na gastos mo sa bawat araw o bawat linggo, makatutulong iyan para mas mapaalalahanan ka sa paglalaan ng pera.

Pababain ang singil sa iyong utility. Magkaroon ng hakbang para pababain ang singil sa  iyong utility bills gaya sa kuryente, tubig, at koneksyon sa internet o telepono. Ilan na rito ay pagbili ng kasangkapan  na mababa ang konsumo ng  enerhiya, pagtatanggal ng plug sa saksakan kung ‘di na ginagamit, at huwag pagsabay-sabayin ang paggamit na mga appliances.

Bayaran agad ang iyong bills. Kung dati ay ipinagpapaliban mo pa ang pagbabayad ng iyong bills, sa taong ito ay maiging baguhin mo na ito. Kung makakalimutin ka sa due date ay  pwedeng mag-enroll sa automatic payment scheme o kung dumating ang statement of account ay diretso mo na itong bayaran.

Mag-shopping ng maliliit na investments.  Sa halip na mag-shopping sa bagay na ilang buwan lang magagamit ay bakit hindi ka na lang magkaroon ng maliliit na investments. Isang halimbawa nito ay insurance policy na magagamit mo para sa iyong medikal na pangangailangan balang araw.

Iwaksi ang pagiging magastos.   Para makatikim ng maalawal na kinabukasan ay dapat munang magkaroon ng disiplinadong pamumuhay ngayon. Halimbawa ay kung nasanay kang kumakain ng junk food at soft drinks, subukan mong tanggalin ito at gawing pera ang iyong maiipon.

Sumubok ng isang ipon challenge. Kung hindi ka nakapag-ipon noong 2018 dahil nakakatamad, bakit hindi ka mag-“ipon challenge?” Sa ngayon ay marami na ang naglalabasang naiiba at nakatutuwang sundan gaya na lamang ng “invisible 50.” Sa ipon challenge na ito ay ang bawat matatanggap na Php50 pesos / ¥100 ay itatabi at babalikan na lang pagkatapos ng ilang buwan o isang taon. Mayroon din na ‘di nagdadala ng barya at inilalagay sa isang banga at iipunin sa loob ng isang taon.

Tandaan lang na sa pag-iipon ng pera lalo na sa perang papel ay piliin ang lalagyan na ligtas sa peste, hamog o anumang makakasira sa kalidad nito.

  

UC Berkeley nakaimbento ng mas epektibong wireless brain pacemaker para sa neurological patients

“The process of finding the right therapy for a patient is extremely costly and can take years. We want to enable the device to figure out what is the best way to stimulate for a given patient to give the best outcomes. And you can only do that by listening and recording the neural signatures.”

Ito ang tinuran ni assistant professor (of electrical engineering and computer sciences) Rikky Muller ng University of California – Berkeley (UC Berkeley) sa pinakabagong pag-aaral ng mga grupo ng mga siyentipikong kinabibilangan niya para mapag-ibayo pa ang mga klase ng gamutan para sa mga pasyente ng neurological disorders gaya ng Parkinson’s disease at epilepsy.

Inilathala ang resulta ng naturang pag-aaral kamakailan sa Nature Biomedical Engineering.

Inilarawan ang bagong neurostimulator na tinatawag na wireless artifact-free neuromodulation (WAND) na isang close-loop device at gumagana na kagaya ng isang “pacemaker for the brain” na parehong nagmamasid sa electrical activity ng utak habang nagbibigay din ito ng electrical stimulation at nagtatala ng mga datos kapag natukoy nito ang mga senyales ng panginginig (seizure).

Higit na nakatutulong ito para maiwasan ang mga nakapagpapahinang seizures sa mga neurological patients, lalo na’t ang mga senyales o electrical signatures na ito bago mangyari ang isang seizure ay sobrang banayad kaya’t mahirap din tukuyin ang kalakasan at kadalasan na nararapat para mapigilan ang seizure.

“Significant reduction in both cost and duration can potentially lead to greatly improved outcomes and accessibility,” ang dagdag pa ni Muller.

Idinisenyo ng mga siyentipiko ng Cortera Neurotechnologies sa pangunguna ni Muller ang custom integrated circuits ng WAND.

Maliban sa pagiging wireless ng device ay autonomous din ito, at dahil dito ay pinag-aaralan nito ang mga senyales ng seizures at kapag nakilala na nito ang mga senyales ay kusa nitong ina-adjust ang stimulation parameters (real-time) para matagumpay na mapigilan ang seizures.

May kakayahan itong magtala ng electrical activity sa 128 channels (from 128 points in the brain) kaysa sa mga nauna nang mga close-loop devices na nagtatala ng datos ng walong channels lamang.

Ani Muller, ilalagay ang dalawang chips (embedded in a chassis) sa labasan ng ulo kung saan ang bawat chip ay inoobserbahan ang electrical activity ng 64 electrodes na nasa utak kasabay ng electric stimulation nito.

Problema rin ng mga brain stimulators ngayon ay ang kawalang kakayahan nito na makapagbigay ng stimulation na kasabay ng recording.

“Because we can actually stimulate and record in the same brain region, we know exactly what is happening when we are providing a therapy,” ang dagdag pa ni Muller ukol dito.

“While delaying reaction time is something that has been demonstrated before, this is, to our knowledge, the first time that it has been demonstrated in a closed-loop system based on a neurological recording only.”

Sa kolaborasyon ng grupo ni Muller sa laboratory ni professor Jan Rabaey (electrical engineering and computer science), nabuo nila ang platform device na magiging kapaki-pakinabang din sa iba-ibang klase ng research at clinical applications dahil sa wireless at close-loop computational capabilities nito.

“In the future we aim to incorporate learning into our closed-loop platform to build intelligent devices that can figure out how to best treat you, and remove the doctor from having to constantly intervene in this process,” ang tugon pa ni Muller sa mga susunod na hakbang ng kanyang grupo.

Cultural Center of the Philippines handog ang samu’t saring art events sa ika-50 anibersaryo ngayong taon

Marami ang kaabang-abang na mga aktibidad ang dapat antabayanan na idaraos ng Cultural Center of the Philippines (CCP) ngayong taon sa selebrasyon ng organisasyon ng ika-50 anibersaryo simula nang buksan ito noong Setyembre 8, 1969.

Ngayong taon, higit na espesyal ang mga inihanda ng CCP para sa publiko at maging mga turista para lalo pang hikayatin ang publiko sa pagtangkilik ng tunay na maipagmamalaking kultura at sining na gawang Pinoy.

Pagbubukas ng Tanghalang Ignacio Gimenez

Magaganap ang inagurasyon sa darating na Setyembre ng pinakabagong black box theater ng CCP na pinangalanang Tanghalang Ignacio Gimenez, na hango sa pangalan ng negosyante at aktibong tagapagtaguyod ng theater arts na si Ignacio Gimenez, na naging malaking bahagi sa katuparan ng nasabing proyekto.

May kapasidad ito na 300 katao at opisyal na magbubukas sa Oktubre 4.

“Adventurous ideas, adventurous collaboration, and adventurous audiences,” ang magiging overarching theme ng mga experimental theater, contemporary shows, at multimedia explorations na ipapalabas dito.

Dalawang anniversary gala shows din ang idaraos Setyembre ngayong taon bilang opisyal na simula ng selebrasyon.

Pangunguna sa pagdaraos ng AAPPAC

Pangungunahan din ng CCP bilang host ang pagdaraos ng Conference of the Association of Asia Pacific Performing Arts Centres (AAPPAC), na pinakamalaking alyansa ng mga pangunahing performing arts venues sa rehiyon ng Asya kung saan magtitipun-tipon ang iba’t ibang mga propesyonal sa industriya ng performing arts.

Kaugnay nito ang pagpupulong ng mga performing arts organizers sa Federation of Asia Cultural Promoters para talakayin ang mga tour opportunities para sa Asian traditional performance, Western classical at First Philippine Performing Arts Market na isang showcase, network at business matching opportunity para sa mga performing arts groups.

Bahagi rin nito ang unang Asia Grand Prix for Choral Singing na itinuturing na pinakamataas na parangal sa chorale at singing competitions na gaganapin sa Hulyo. Isa itong proyekto ng CCP kasama ang Andrea O. Veneracion (AOV) International Festival, Singapore International Choral Festival, at Bali International Choral Festival.

Pagpapalawig sa sining at kultura

Ngayon taon ay ipinagdiriwang din ng Pasinaya, Virgin Labfest, at Cinemalaya ang anibersaryo na kilala bilang mga signature events ng CCP.

Mula sa dalawang araw ng open house Pasinaya Festival na pinakamalaking multi-arts fest ng bansa ay magiging tatlong araw na ito sa Pebrero kung saan magkakaroon ng workshops, film screenings, artist market, showcase, at exhibitions.

Dadalhin naman sa Cagayan de Oro at Siliman sa susunod na taon ang Virgin Labfest na tampok ang mga “untried, untested, and unstaged” one-act plays mula sa mga baguhan at kilala ng mandudula sa Hulyo.

Inaasahan din ang mas malawak na pagpapalabas ng mga Cinemalaya films sa commercial cinemas at pagbubukas ng bagong film section nito.

Tatakbo naman tuwing Martes – Linggo simula Setyembre na libre sa publiko. Isasagawa sa front ramp kaharap ng CCP fountain ang lights and sound show, live performances at video mapping.

CCP Libre at iba pang pagtatanghal

Nakatakda rin gawin ang “CCP Libre: 50 free shows at the CCP” na hinihikayat ang publiko na makibahagi at manood ng iba’t ibang pagtatanghal na pang-sining, ngunit wala pang inanunsyo na partikular na mga programang ipapalabas.

Magtatanghal naman ang Philippine Philharmonic Orchestra (PPO) kasama ang mga pinagpipitagang international musicians gaya na lang ng pianist na si Hiyas Hila ngayong buwan, na susundan naman nina Hungarian concert pianist and conductor Tamás Vásáry (Pebrero 8), Japanese conductor Yoshikazu Fukumura at Hong Kong cellist na si Ray Wang (Marso 15), at Japanese guitarist Kiyoshi Shomura (Abril 12).

Isasagawa rin ang unang Arts and Social Media Festival sa Oktubre, anniversary publications, architecture at visual arts exhibitions, digital time capsule, Kaisa sa Sining Conference, Imagine Nation: Forum on the Role of Arts Education in National Development, at audience development activity na Siningkwenta.

English version ng ‘The Frolic of the Beasts’ ni Yukio Mishima inilabas muli

Ni Jovelyn Javier

Inilathala kamakailan ng Vintage International ang maikling nobela na pinamagatang “The Frolic of the Beasts” ni Yukio Mishima, isa sa mga tinaguriang ‘greatest avant-garde Japanese writers of the 20th century’ at ito ang kauna-unahang pagkakataon na mababasa ang naturang nobela sa English mula nang orihinal na  inilathala ito noong 1961.

Sa kumbinasyon ng thriller, historical at psychological fiction, umani ng magagandang reviews ang nobela sa nakakabighaning kwento nito ng isang love triangle sa pagitan ng isang literary critic at isang babaero na si Ippei Kusakado, si Kōji na estudyante ni Ippei, at ang misteryosong si Yuko, ang asawa ni Ippei.

Isang istorya ng pag-ibig pagkaraan ng giyera

Isang parody ang nobela ng 14^th century Japanese Noh play na pinamagatang “Motomozuka” na tungkol din sa isang love triangle kung saan dalawang lalaki ang magmamahal sa babaeng si Unai.

Hindi matapos-tapos ang pagtatagisan ng dalawang ginoo para makuha ang kamay ni Unai dahil sa palaging patas ang kinalalabasan. Sa gitna nito ay naiipit si Unai sa isang mahirap na sitwasyon na kalauna’y nagtulak sa kanya para magpatiwakal. At dulot ng matinding kalungkutan sa pagkawala ng babaeng kanilang minamahal, sinundan ng dalawang lalaki ang kapalaran ni Unai.

Ngunit sa kwento ni Mishima, inilarawan itong ‘updated and modernized’ kumpara sa naging source material nito, subalit nananatili pa rin itong konektado sa orihinal na kwento ayon sa tema. Samantala, ang pagkakasalaysay naman nito ay pabaliktad.

Nakikitaan ang kwento nito ng mga paksa ukol sa kapalaran, malayang kalooban, at materyalidad habang nagpapakita rin ito ng magagandang eksena sa kung paanong ang mga maliliit na bagay ay nakakaapekto sa buhay ng mga tao.

Isang batikang manunulat

Lumaki sa isang samurai family si Mishima, na ang tunay na pangalan ay Kimitake Hiraoka, kaya’t maaga siyang namulat sa mahahalagang alituntunin gaya ng katapatan sa Emperador. Nagtapos sa School of Jurisprudence ng Tokyo Imperial University (University of Tokyo) noong 1947, inilathala niya ang kanyang unang akda na “The Forest in Full Bloom” (1944) ngunit nakilala siya dahil sa “Confessions of a Mask” (1949).

Maliban sa 33 plays na isinulat niya, nagawa niya ang short story collections na “Death in Midsummer” (1953) at “Acts of Worship” (1965); mga nobelang “Thirst for Love” (1950), “The Temple of the Golden Pavilion” (1956), “Forbidden Colors” (1951), “After the Banquet” (1960), “The Sound of Waves” (1954), at “The Sailor Who Fell From Grace with the Sea” (1963).

Kinikilala si Mishima sa kanyang obra maestro na “Sea of Fertility” tetralogy na binubuo ng mga nobelang “Spring Snow” (1969), “Runaway Horses” (1969), “The Temple of Dawn” (1970), at “The Decay of the Angel” (1971).

Kilala rin si Mishima bilang actor, model at director at marami na sa kanyang mga obra ang isinalin sa pelikula.

At bilang makabayan, itinatag niya ang “Tatenokai” at sinubukang magsagawa ng kudeta na tinatawag na “Mishima Incident” para ibalik ang kapangyarihan ng Emperador ngunit nabigo siya.

Pumanaw si Mishima sa pamamagitan ng “seppuku” (ceremonial suicide)  noong 1970 sa edad na 45-taong-gulang.